મહાસુભાષિતસંગ્રહ · શ્લોક 3423-3442

અવૈમિ ચૈનામનઘેતિ કિં તુ લોકાપવાદો બલવાન્ મતો મે ।
છાયા હિ ભૂમેઃ શશિનો મલત્વે- નારોપિતા શુદ્ધિમતઃ પ્રજાભિઃ ॥

અવૈમિ તે સારમતઃ ખલુ ત્વાં કાર્યે ગુરુણ્યાત્મસમં નિયોક્ષ્યે ।
વ્યાદિશ્યતે ભૂધરતામવેક્ષ્ય કૃષ્ણેન દેહોદ્વહનાય શેષઃ ॥

અવૈમિ પૂતમાત્માનં દ્વયેનૈવ દ્વિજોત્તમાઃ ।
મૂર્ધ્નિ ગઙ્ગાપ્રપાતેન ધૌતપાદામ્ભસા ચ વઃ ॥

અવૈમિ સૌભાગ્યમદેન વઞ્ચિતં તવ પ્રિયં યશ્ચતુરાવલોકિનઃ ।
કરોતિ લક્ષ્યં ચિરમસ્ય ચક્ષુષો ન વક્ત્રમાત્મીયમરાલપક્ષ્મણઃ ॥

અવૈમિ હંસાવલયો વલક્ષાસ્ ત્વત્કાન્તિકીર્તેશ્ચપલાઃ પુલાકાઃ ।
ઉડ્ડીય યુક્તં પતિતાઃ સ્રવન્તી- વેશન્તપૂરં પરિતઃ પ્લવન્તે ॥

અવૈષ્ણવો હતો વિપ્રો હતં શ્રાદ્ધમદક્ષિણમ્ ।
અબ્રહ્મણ્યં હતં ક્ષેત્રમ્ અનાચારં કુલં હતમ્ ॥

અવ્યક્તમક્ષરમુપાસ્ય બભૂવ કશ્ચિત્ સ્વં લબ્ધવર્ણમવગત્ય કૃતાર્થમાની ।
સદ્યસ્ત્રિભઙ્ગલલિતસ્ફુરણાદમન્દ- નન્દોત્થયા જડતયૈવ વયં કૃતાર્થાઃ ॥

અવ્યક્તાદીનિ ભૂતાનિ વ્યક્તમધ્યાનિ ભારત ।
અવ્યક્તનિધનાન્યેવ તત્ર કા પરિદેવના ॥

અવ્યયવતોઽપિ ધનિનઃ સ્વજનસહસ્રં ભવેત્ પદસ્થસ્ય ।
ભ્રષ્ટધનસ્ય હિ સતતં બન્ધુરપિ મુખં ન દર્શયતિ ॥

અવ્યયે વ્યયમાયાતિ વ્યયે યાતિ સુવિસ્તરમ્ ।
અપુર્વઃ કોઽપિ ભાણ્ડારસ્ તવ ભારતિ દૃશ્યતે ॥

અવ્યવસાયિનમલસં દૈવપરં સહસાચ્ચ પરિહીણમ્ ।
પ્રમદેવ હિ વૃદ્ધપતિં નેચ્છત્યવગૂહિતું લક્ષ્મીઃ ॥

અવ્યવસ્થિતચિત્તસ્ય પ્રસાદોઽપિ ભયંકરઃ ।
વ્યવસ્થિતપ્રસન્નાત્મા કુપિતોઽપ્યભયંકરઃ ॥

અવ્યવસ્થિતવૃત્તાનામ્ અભિન્નશ્રુતિચક્ષુષામ્ ।
અધર્માર્જિતભોગાનામ્ આશીરપ્યહિતોચિતા ॥

... ... ... ... ... ... ।
અવ્યવસ્થૌ હિ દૃશ્યેતે યુદ્ધે જયપરાજયૌ ॥

અવ્યાકરણમધીતં ભિન્નદ્રોણ્યા તરઙ્ગિણીતરણમ્ ।
ભેષજમપથ્યસહિતં ત્રયમિદમકૃતં વરં ન કૃતમ્ ॥

... ... ... ... ... ... ।
અન્યાક્ષેપો ભવિષ્યન્ત્યાઃ કાર્યસિદ્ધેર્હિ લક્ષણમ્ ॥

અવ્યાખ્યેયાં વિતરતિ પરાં પ્રીતિમન્તર્નિમગ્ના કણ્ઠે લગ્ના હરતિ નિતરાં યાન્તરધ્વાન્તજાલમ્ ।
તાં દ્રાક્ષાદ્યૈરપિ બહુમતાં માધુરીમુદ્ગિરન્તીં કૃષ્ણેત્યાખ્યાં કથય રસને યદ્યસિ ત્વં રસજ્ઞા ॥

અવ્યાજસુન્દરમનુત્તરમપ્રમેયમ્ અપ્રાકૃતં પરમમઙ્ગલમઙ્ઘ્રિપદ્મમ્ ।
સંદર્શયેદપિ સકૃદ્ભવતી દયાર્દ્રા દ્રષ્ટાસ્મિ કેન તદહં તુ વિલોચનેન ॥

અવ્યાજસુન્દરીં તાં વિજ્ઞાનેન લલિતેન યોજયતા ।
પરિકલ્પિતો વિધાત્રા બાણઃ કામસ્ય વિષદિગ્ધઃ ॥

અવ્યાત્ સ વો યસ્ય નિસર્ગવક્રઃ સ્પૃશત્યધિજ્યસ્મરચાપલીલામ્ ।
જટાપિનદ્ધોરગરાજરત્ન- મરીચિલીઢોભયકોટિરિન્દુઃ ॥