Mahāsubhāṣitasaṃgraha 1-9979 · Verses 3423-3442

avaimi caināmanagheti kiṃ tu lokāpavādo balavān mato me /
chāyā hi bhūmeḥ śaśino malatve- nāropitā śuddhimataḥ prajābhiḥ //

avaimi te sāramataḥ khalu tvāṃ kārye guruṇyātmasamaṃ niyokṣye /
vyādiśyate bhūdharatāmavekṣya kṛṣṇena dehodvahanāya śeṣaḥ //

avaimi pūtamātmānaṃ dvayenaiva dvijottamāḥ /
mūrdhni gaṅgāprapātena dhautapādāmbhasā ca vaḥ //

avaimi saubhāgyamadena vañcitaṃ tava priyaṃ yaścaturāvalokinaḥ /
karoti lakṣyaṃ ciramasya cakṣuṣo na vaktramātmīyamarālapakṣmaṇaḥ //

avaimi haṃsāvalayo valakṣās tvatkāntikīrteścapalāḥ pulākāḥ /
uḍḍīya yuktaṃ patitāḥ sravantī- veśantapūraṃ paritaḥ plavante //

avaiṣṇavo hato vipro hataṃ śrāddhamadakṣiṇam /
abrahmaṇyaṃ hataṃ kṣetram anācāraṃ kulaṃ hatam //

avyaktamakṣaramupāsya babhūva kaścit svaṃ labdhavarṇamavagatya kṛtārthamānī /
sadyastribhaṅgalalitasphuraṇādamanda- nandotthayā jaḍatayaiva vayaṃ kṛtārthāḥ //

avyaktādīni bhūtāni vyaktamadhyāni bhārata /
avyaktanidhanānyeva tatra kā paridevanā //

avyayavato'pi dhaninaḥ svajanasahasraṃ bhavet padasthasya /
bhraṣṭadhanasya hi satataṃ bandhurapi mukhaṃ na darśayati //

avyaye vyayamāyāti vyaye yāti suvistaram /
apurvaḥ ko'pi bhāṇḍāras tava bhārati dṛśyate //

avyavasāyinamalasaṃ daivaparaṃ sahasācca parihīṇam /
pramadeva hi vṛddhapatiṃ necchatyavagūhituṃ lakṣmīḥ //

avyavasthitacittasya prasādo'pi bhayaṃkaraḥ /
vyavasthitaprasannātmā kupito'pyabhayaṃkaraḥ //

avyavasthitavṛttānām abhinnaśruticakṣuṣām /
adharmārjitabhogānām āśīrapyahitocitā //

... ... ... ... ... ... /
avyavasthau hi dṛśyete yuddhe jayaparājayau //

avyākaraṇamadhītaṃ bhinnadroṇyā taraṅgiṇītaraṇam /
bheṣajamapathyasahitaṃ trayamidamakṛtaṃ varaṃ na kṛtam //

... ... ... ... ... ... /
anyākṣepo bhaviṣyantyāḥ kāryasiddherhi lakṣaṇam //

avyākhyeyāṃ vitarati parāṃ prītimantarnimagnā kaṇṭhe lagnā harati nitarāṃ yāntaradhvāntajālam /
tāṃ drākṣādyairapi bahumatāṃ mādhurīmudgirantīṃ kṛṣṇetyākhyāṃ kathaya rasane yadyasi tvaṃ rasajñā //

avyājasundaramanuttaramaprameyam aprākṛtaṃ paramamaṅgalamaṅghripadmam /
saṃdarśayedapi sakṛdbhavatī dayārdrā draṣṭāsmi kena tadahaṃ tu vilocanena //

avyājasundarīṃ tāṃ vijñānena lalitena yojayatā /
parikalpito vidhātrā bāṇaḥ kāmasya viṣadigdhaḥ //

avyāt sa vo yasya nisargavakraḥ spṛśatyadhijyasmaracāpalīlām /
jaṭāpinaddhoragarājaratna- marīcilīḍhobhayakoṭirinduḥ //