મહાસુભાષિતસંગ્રહ · શ્લોક 1000-1019

અદ્યૈવ કુરુ યચ્છ્રેયો મા ત્વા કાલોઽત્યગાદયમ્ ।
અકૃતેષ્વેવ કાર્યેષુ મૃત્યુર્વૈ સંપ્રકર્ષતિ ॥

અદ્યૈવ કુરુ યચ્છ્રેયો વૃદ્ધઃસન્ કિં કરિષ્યસિ ।
સ્વગાત્રાણ્યપિ ભારાય ભવન્તિ હિ વિપર્યયે ॥

અદ્યૈવ યત્ પ્રતિપદુદ્ગતચન્દ્રલેખા- સખ્યં ત્વયા તનુરિયં ગમિતા વરાક્યાઃ ।
કાન્તે ગતે કુસુમસાયક તત્ પ્રભાતે બાણાવલીં કથય કુત્ર વિમોક્ષ્યસિ ત્વમ્ ॥

અદ્યૈવ શ્વઃ પરશ્વસ્ત્રિચતુરદિવસાનન્તરં સાયમહ્નિ પ્રાતઃ પ્રાહ્ણે પરાહ્ણે ક્ષણમિહ નિવસ પ્રસ્થિતોઽભ્યેહિ ભૂયઃ ।
ઇત્થં રેકાતિરેકાનવિદિતકપટપ્રક્રિયાનર્થિસાર્થાન્ અત્યર્થં વ્યર્થયન્તિ પ્રતિદિવસમહો રાજધાન્યાં વદાન્યાઃ ॥

અદ્યૈવ હસિતં ગીતં ક્રીડિતં યૈઃ શરીરિભિઃ ।
અદ્યૈવ તે ન દૃશ્યન્તે પશ્ય કાલસ્ય ચેષ્ટિતમ્ ॥

અદ્યોત્સઙ્ગવસદ્ભુજંગકવલક્લેશાદિવેશાચલ- પ્રાલેયપ્લવનેચ્છયાનુસરતિ શ્રીખણ્ડશૈલાનિલઃ ।
કિં ચ સ્નિગ્ધરસાલમૌલિમુકુલાન્યાલોક્ય હર્ષોદયાદ્ ઉન્મીલન્તિ કુહૂઃકુહૂરિતિ કલોત્તાલાઃ પિકાનાં ગિરઃ ॥

અદ્યોદ્યાનગૃહાઙ્ગણે સખિ મયા સ્વપ્નેન લાક્ષારુણઃ પ્રોત્ક્ષિપ્તોઽયમશોકદોહદવિધૌ પાદઃ ક્વણન્નૂપુરઃ ।
તાવત્ કિં કથયામિ કેલિપટુના નિર્ગત્ય કુઞ્જોદરાદ્ અજ્ઞાતોપનતેન તેન સહસા મૂર્ધ્નૈવ સંભાવિતઃ ॥

અદ્યોન્મીલન્મલયપવનોદ્ધૂતચૂતાંકુરાગ્ર- ગ્રાસાસ્વાદાદધિકમધુરૈરુચ્ચરદ્ભિર્નિનાદૈઃ ।
ક્વાપિ ક્વાપિ સ્મરહુતવહોદ્દીપનાયાધ્વગાનાં હોતું પ્રાણાનૃચમિવ પિકઃ સામિધેનીમધીતે ॥

અદ્રાક્ષીદપનિદ્રકોરકભરવ્યાનમ્રવલ્લીસ્ખલદ્- ધૂલીદુર્દિનસૂદિતામ્બરમસાવુદ્યાનમુર્વીપતિઃ ।
આસ્થાનીભવનં વસન્તનૃપતેર્દેવસ્ય ચેતોભુવઃ સત્રાગારમનુત્તરં મધુલિહામેકં પ્રપામણ્ડપમ્ ॥

અદ્રાક્ષુર્યે નરેન્દ્રા દ્રુપદતનુભુવઃ કેશપાશાવકૃષ્ટિં ચક્રુર્વાકારયન્ વા મનસિ કિમપરં યેઽન્વમન્યન્ત મોહાત્ ।
સર્વેષામેવ તેષાં સમરમખભુવિ ક્રોધવહ્ણૌ જુહોતિ દ્વિત્રૈર્હુંકારમ્ન્ત્રૈરભિજનસમિધો મધ્યમઃ પાણ્ડવેયઃ ॥

અદ્રિષ્વઞ્જનપુઞ્જકાન્તિ જલદ્રપ્રાયં ચ મૂલે દિશામ્ ઊર્ધ્વં નીલવિતાનકલ્પભવનૌ જમ્બાલલેપોપમમ્ ।
તીરે નીરનિધેસ્તમાલવિટપિચ્છાયાં ચ સાયં શનૈર્ ઉદ્ગચ્છત્યભિસારિકાપ્રિયતમપ્રેમાનુકૂલં તમઃ ॥

અદ્રેઃ કિં સ્વિદ્વહતિ પવનઃ શૃઙ્ગમિત્યુન્મુખીભિર્ દૃષ્ટોત્સાહશ્ચકિતચકિતં મુગ્ધસિદ્ધાઙ્ગનાભિઃ ।
સ્થાનાદસ્માત્ સરસનિચુલાદુત્પતોદઙ્મુખઃ ખં દિઙ્નાગાનાં પથિ પરિહરન્ સ્થૂલહસ્તાવલેપાન્ ॥

અદ્રોહઃ શૌચાનામ્ અચાપલં વ્રતવિશેષનિયમાનામ્ ।
પૈશુન્યમપ્રિયાણાં વૃત્તિચ્છેદો નૃશંસચરિતાનામ્ ॥

અદ્રોહઃ સર્વભૂતેષુ કર્મણા મનસા ગિરા ।
અનુગ્રહશ્ચ દાનં ચ સતાં ધર્મઃ સનાતનઃ ॥

અદ્રોહસમયં કૃત્વા મુનીનામગ્રતો હરિઃ ।
જઘાન નમુચિં પશ્ચાદ્ અપાં ફેનેન પાર્થિવ ॥

અદ્રોહે સમયં કૃત્વા ચિચ્છેદ નમુચેઃ શિરઃ ।
શક્રઃ સા હિ મતા તસ્ય રિપૌ વૃત્તિઃ સનાતની ॥

અદ્રૌ જીર્ણદરીષુ સંકટસરિત્તીરેષુ નિમ્નોન્નતે ઊઢા યેન વૃષેણ ધૂર્બલવતા યૂના દ્વિતીયેન યા ।
તાં વૃદ્ધોઽપિ કૃશોઽપિ દુર્વહ ધુરં વોઢું સ એવ ક્ષમો રથ્યાભડ્ડલકૈઃ સમેત્ય બહુભિર્નાકૃષ્યતેઽન્યૈર્વૃષૈઃ ॥

અદ્વિતીયં નિજં લોકે વિલોક્ય વહતો મુદમ્ ।
પ્રમદાવદનસ્યાયં દર્પોદ્રેકો ન તુ સ્મિતમ્ ॥

અદ્વિસંવીક્ષણં ચક્ષુર્ અદ્વિસંમીલનં મનઃ ।
અદ્વિસંસ્પર્શનઃ પાણિર્ અદ્ય મે કિં કરિષ્યતિ ॥

અદ્વેષપેશલં કુર્યાન્ મનઃ કુસુમકોમલમ્ ।
બભૂવ દ્વેષદોષેણ દેવદાનવસંક્ષયઃ ॥