મહાસુભાષિતસંગ્રહ · શ્લોક 0980-0999

અદ્યાપિ સા મમ મનસ્તટિની સદાસ્તે રોમાઞ્ચવીચિવિલસદ્વિપુલસ્વભાવા ।
કાદમ્બકેશરરુચિઃ ક્ષતવીક્ષણં માં ગાત્રક્લમં કથયતી પ્રિયરાજહંસી ॥

અદ્યાપિ સુન્દરિ તવાનનચન્દ્રબિમ્બં બન્દીકૃતામ્બુજયુગં પરિચુમ્બ્ય ચેતઃ ।
ત્વત્સંગમોદ્ભવસુખં તનુતે તથાપિ વૈરં કરોતિ કરુણાવિકલો વિવેકઃ ॥

અદ્યાપિ સ્તનશૈલદુર્ગવિષમે સીમન્તિનીનાં હૃદિ સ્થાતું વાઞ્છતિ માન એષ ધિગિતિ ક્રોધાદિવાલોહિતઃ ।
ઉદ્યદ્દૂરતરપ્રસારિતકરઃ કર્ષત્યસૌ તત્ક્ષણાત્ ફુલ્લત્કૈરવકોશનિઃસરદલિશ્રેણીકૃપાણં શશી ॥

અદ્યાપિ હરિહરાદિભિર્ અમરૈરપિ તત્ત્વતો ન વિજ્ઞાતાઃ ।
ભ્રમવિભ્રમબહુમોહા વેશ્યાઃ સંસારમાયાશ્ચ ॥

અદ્યાપિ હિ નૃશંસસ્ય પિતુસ્તે દિવસો ગતઃ ।
તમસા પિહિતઃ પન્થા એહિ પુત્રક શેવહે ॥

અદ્યાપ્યશોકનવપલ્લવરક્તહસ્તાં મુક્તાફલપ્રચયચુમ્બિતચૂચુકાગ્રામ્ ।
અન્તઃસ્મિતોચ્છ્વસિતપાણ્ડુરગણ્ડભિત્તિં તાં વલ્લભામલસહંસગતિં સ્મરામિ ॥

અદ્યાપ્યહં ચલિતચારુનિમીલિતાક્ષમ્ આસ્યં સ્મરામિ સતતં સુરતાવસાને ।
તત્કાલનિશ્વસિતનિઃસૃતકાન્તિકાન્તં સ્વેદોદબિન્દુપરિદન્તુરિતં પ્રિયાયાઃ ॥

અદ્યાપ્યહં વરવધૂસુરતોપભોગં જીવામિ નાન્યવિધિના ક્ષણમન્તરેણ ।
તદ્ભ્રાતરો મરણમેવ હિ દુઃખશાન્ત્યૈ વિજ્ઞાપયામિ ભવતસ્ત્વરિતં લુનીધ્વમ્ ॥

અદ્યાપ્યહં વિકચકુન્દસમાનદન્તં તિર્યગ્વિવર્તિતવિશાલવિલોચનાન્તમ્ ।
તસ્યા મુખં સુવિજિતેન્દુ ન વિસ્મરામિ ચોદ્યં કૃતજ્ઞ ઇવ સાધુકૃતોપકારમ્ ॥

અદ્યાપ્યહં સરસમઞ્જુલભૃઙ્ગનાદમ્ ઈષત્સ્મરોલ્લસિતરાગસુપાણ્ડુગણ્ડમ્ ।
પશ્યામિ પૂર્ણશરદિન્દુસમાનકાન્તિ તસ્યા મુખં વિકચપઙ્કજપાત્રનેત્રમ્ ॥

અદ્યાપ્યહો જગતિ સુન્દરલક્ષપૂર્ણે અન્યાન્યમુત્તમગુણાધિકસંપ્રપન્ને ।
અન્યાભિરપ્યુપમિતું ન મયા ચ શક્યં રૂપં તદીયમિતિ મે હૃદયે વિતર્કઃ ॥

અદ્યાપ્યુન્મદયાતુધાનતરુણીચઞ્ ચત્કરાસ્ફાલન- વ્યાવલ્ગન્નૃકપાલતાલરણિતૈર્નૃત્યત્પિશાચાઙ્ગનાઃ ।
ઉદ્ગાયન્તિ યશાંસિ યસ્ય વિતતૈર્નાદૈઃ પ્રચણ્ડાનિલ- પ્રક્ષુભ્યત્કરિકુમ્ભકૂટકુહરવ્યક્તૈ રણક્ષોણયઃ ॥

અદ્યાભોગિનિ ગાઢમર્મનિવહે હર્મ્યાગ્રવેદીજુષાં સદ્યશ્ચન્દનશોષિણિ સ્તનતટે સઙ્ગે કુરઙ્ગીદૃશામ્ ।
પ્રાયઃ પ્રશ્લથયન્તિ પુષ્પધનુષઃ પુષ્પાકરે નિષ્ઠિતે નિર્વેદં નવમલ્લિકાસુરભયઃ સાયંતના વાયવઃ ॥

અદ્યામ્ભઃ પરિતઃ પતિષ્યતિ ભુવસ્તાપોઽદ્ય નિર્વાસ્યતિ ક્ષેત્રેષ્વદ્ય યતિષ્યતે જનપદઃ સસ્યેષુ પર્યુત્સુકઃ ।
નર્તિષ્યન્તિ તવોદયેઽદ્ય જલદ વ્યાલોલપુચ્છચ્છદ- ચ્છત્રચ્છાદિતમૌલયો દિશિ દિશિ ક્રીડાલસાઃ કેકિનઃ ॥

અદ્યારભ્ય કઠોરકાર્મુકલતાવિન્યસ્તહસ્તામ્બુજસ્ તાવન્ન પ્રકટીકરોમિ નયને શોણે નિમેષોદયાન્ ।
યાવત્ સાયકકોતિપાટિતરિપુક્ષ્માપાલમૌલિસ્ખલન્ મલ્લીમાલ્યપતત્પરાગપટલૈરામોદિની મેદિની ॥

અદ્યારભ્ય ન હિ પ્રિયે પુનરહં માનસ્ય વા ભાજનં ગૃહ્ણીયાં વિષરૂપિણઃ શઠમતેર્નામાપિ સંક્ષેપતઃ ।
કિં તેનૈવ વિના શશાઙ્કકિરણસ્પષ્ટાટ્ટહાસા નિશા નૈકો વા દિવસઃ પયોદમલિનો યાયાન્ મમ પ્રાવૃષિ ॥

અદ્યાશનં શિશુજનસ્ય બલેન જાતં શ્વો વા કથં નુ ભવિતેતિ વિચિન્તયન્તી ।
ઇત્યશ્રુપાતમલિનીકૃતગણ્ડદેશા નેચ્છેદ્દરિદ્રગૃહિણી રજનીવિરામમ્ ॥

અદ્યેદં શ્વ ઇદં તથા પરુદિદં કૃત્યં પરારિ ત્વદશ્ ચેતશ્ચિન્તયસીત્થમેવ સતતં નિર્વ્યાકુલં રે કુતઃ ।
તત્કાલં વિલસન્મનોરથલતાકાન્તારદાવાનલો યસ્મિન્ દણ્ડધરં સ્મરિષ્યસિ સખે સોઽપ્યસ્તિ કશ્ચિત્ ક્ષણઃ ॥

અદ્યેશ્વરાશ્ચારણગાયનાનાં સદૈવ કલ્પદ્રુમવત્ ફલન્તિ ।
સદ્ભ્યસ્તુ કિંચિદ્ વચસૈવ સાયં દીપાય કર્પૂરમિવાર્પયન્તિ ॥

અદ્યૈકે પ્રાતરપરે વિતતેઽહ્નિ તથા પરે ।
યાન્તિ નિઃસીમ્નિ સંસારે કઃ સ્થાતા નનુ શોચતિ ॥