Mahāsubhāṣitasaṃgraha 1-9979 · Verses 1000-1019

adyaiva kuru yacchreyo mā tvā kālo'tyagādayam /
akṛteṣveva kāryeṣu mṛtyurvai saṃprakarṣati //

adyaiva kuru yacchreyo vṛddhaḥsan kiṃ kariṣyasi /
svagātrāṇyapi bhārāya bhavanti hi viparyaye //

adyaiva yat pratipadudgatacandralekhā- sakhyaṃ tvayā tanuriyaṃ gamitā varākyāḥ /
kānte gate kusumasāyaka tat prabhāte bāṇāvalīṃ kathaya kutra vimokṣyasi tvam //

adyaiva śvaḥ paraśvastricaturadivasānantaraṃ sāyamahni prātaḥ prāhṇe parāhṇe kṣaṇamiha nivasa prasthito'bhyehi bhūyaḥ /
itthaṃ rekātirekānaviditakapaṭaprakriyānarthisārthān atyarthaṃ vyarthayanti pratidivasamaho rājadhānyāṃ vadānyāḥ //

adyaiva hasitaṃ gītaṃ krīḍitaṃ yaiḥ śarīribhiḥ /
adyaiva te na dṛśyante paśya kālasya ceṣṭitam //

adyotsaṅgavasadbhujaṃgakavalakleśādiveśācala- prāleyaplavanecchayānusarati śrīkhaṇḍaśailānilaḥ /
kiṃ ca snigdharasālamaulimukulānyālokya harṣodayād unmīlanti kuhūḥkuhūriti kalottālāḥ pikānāṃ giraḥ //

adyodyānagṛhāṅgaṇe sakhi mayā svapnena lākṣāruṇaḥ protkṣipto'yamaśokadohadavidhau pādaḥ kvaṇannūpuraḥ /
tāvat kiṃ kathayāmi kelipaṭunā nirgatya kuñjodarād ajñātopanatena tena sahasā mūrdhnaiva saṃbhāvitaḥ //

adyonmīlanmalayapavanoddhūtacūtāṃkurāgra- grāsāsvādādadhikamadhurairuccaradbhirninādaiḥ /
kvāpi kvāpi smarahutavahoddīpanāyādhvagānāṃ hotuṃ prāṇānṛcamiva pikaḥ sāmidhenīmadhīte //

adrākṣīdapanidrakorakabharavyānamravallīskhalad- dhūlīdurdinasūditāmbaramasāvudyānamurvīpatiḥ /
āsthānībhavanaṃ vasantanṛpaterdevasya cetobhuvaḥ satrāgāramanuttaraṃ madhulihāmekaṃ prapāmaṇḍapam //

adrākṣurye narendrā drupadatanubhuvaḥ keśapāśāvakṛṣṭiṃ cakrurvākārayan vā manasi kimaparaṃ ye'nvamanyanta mohāt /
sarveṣāmeva teṣāṃ samaramakhabhuvi krodhavahṇau juhoti dvitrairhuṃkāramntrairabhijanasamidho madhyamaḥ pāṇḍaveyaḥ //

adriṣvañjanapuñjakānti jaladraprāyaṃ ca mūle diśām ūrdhvaṃ nīlavitānakalpabhavanau jambālalepopamam /
tīre nīranidhestamālaviṭapicchāyāṃ ca sāyaṃ śanair udgacchatyabhisārikāpriyatamapremānukūlaṃ tamaḥ //

adreḥ kiṃ svidvahati pavanaḥ śṛṅgamityunmukhībhir dṛṣṭotsāhaścakitacakitaṃ mugdhasiddhāṅganābhiḥ /
sthānādasmāt sarasaniculādutpatodaṅmukhaḥ khaṃ diṅnāgānāṃ pathi pariharan sthūlahastāvalepān //

adrohaḥ śaucānām acāpalaṃ vrataviśeṣaniyamānām /
paiśunyamapriyāṇāṃ vṛtticchedo nṛśaṃsacaritānām //

adrohaḥ sarvabhūteṣu karmaṇā manasā girā /
anugrahaśca dānaṃ ca satāṃ dharmaḥ sanātanaḥ //

adrohasamayaṃ kṛtvā munīnāmagrato hariḥ /
jaghāna namuciṃ paścād apāṃ phenena pārthiva //

adrohe samayaṃ kṛtvā ciccheda namuceḥ śiraḥ /
śakraḥ sā hi matā tasya ripau vṛttiḥ sanātanī //

adrau jīrṇadarīṣu saṃkaṭasarittīreṣu nimnonnate ūḍhā yena vṛṣeṇa dhūrbalavatā yūnā dvitīyena yā /
tāṃ vṛddho'pi kṛśo'pi durvaha dhuraṃ voḍhuṃ sa eva kṣamo rathyābhaḍḍalakaiḥ sametya bahubhirnākṛṣyate'nyairvṛṣaiḥ //

advitīyaṃ nijaṃ loke vilokya vahato mudam /
pramadāvadanasyāyaṃ darpodreko na tu smitam //

advisaṃvīkṣaṇaṃ cakṣur advisaṃmīlanaṃ manaḥ /
advisaṃsparśanaḥ pāṇir adya me kiṃ kariṣyati //

adveṣapeśalaṃ kuryān manaḥ kusumakomalam /
babhūva dveṣadoṣeṇa devadānavasaṃkṣayaḥ //