મહાસુભાષિતસંગ્રહ · શ્લોક 0681-0700

અત્યાદરો ભવેદ્ યત્ર કાર્યકારણવર્જિતઃ ।
તત્ર શઙ્કા પ્રકર્તવ્યા પરિણામેઽસુખાવહા ॥

અત્યાયતૈર્નિયમકારિભિરુદ્ધતાનાં દિવ્યૈઃ પ્રભાભિરનપાયમયૈરુપાયૈઃ ।
શૌરિર્ભુજૈરિવ ચતુર્ભિરદઃ સદા યો લક્ષ્મીવિલાસભવનૈર્ભુવનં બભાર ॥

અત્યાયાસેન નાત્માનં કુર્યાદતિસમુચ્છ્રયમ્ ।
પાતો યથા હિ દુઃખાય નોચ્છ્રાયઃ સુખકૃત્ તથા ॥

અત્યાર્યમતિદાતારમ્ અતિશૂરમતિવ્રતમ્ ।
પ્રજ્ઞાભિમાનિનં ચૈવ શ્રીર્ભયાન્નોપસર્પતિ ॥

ન ચાતિગુણવત્સ્વેષા નાત્યન્તં નિર્ગુણેષુ ચ ।
નૈષા ગુણાન્કામયતે નૈર્ગુણ્યાં નાનુરજ્યતે ।
ઉન્મત્તા ગૌરિવાન્ધા શ્રીઃ ક્વચિદેવાવતિષ્ઠતે ॥

અત્યાશીવિષશસ્ત્રં હિ વિજિતપ્રલયાનલમ્ ।
તેજો લઙ્ઘયિતું શક્તઃ કો નુ નામ દ્વિજન્મનામ્ ॥

અત્યાસન્ના વિનાશાય દૂરસ્થા ન ફલપ્રદા ।
તસ્માદાહૃત્ય દાતવ્યા ભૂમિઃ પાર્થિવસત્તમ ॥

અત્યાસન્ના વિનાશાય દૂરસ્થા ન ફલપ્રદાઃ ।
સેવ્યા મધ્યમભાવેન રાજાવહ્નિર્ગુરુઃ સ્ત્રિયઃ ॥

અત્યુક્તૌ યદિ ન પ્રકુપ્યસિ મૃષાવાદં ન ચેન્મન્યસે તદ્બ્રૂમોઽદ્ભુતકીર્તનાય રસના કેષાં ન કણ્ડૂયતે ।
દેવ ત્વત્તરુણપ્રતાપદહનજ્વાલાવલીશોષિતાઃ સર્વે વારિધયસ્તતો રિપુવધૂનેત્રામ્બુભિઃ પૂરિતાઃ ॥

અત્યુચ્ચસ્તનશૈલદુર્ગમમુરો નાભિર્ગભીરાન્તરા ભીમં દેહવનં સ્ફુરદ્ભુજલતં રોમાલિજાલાકુલમ્ ।
વ્યાધઃ પઞ્ચશરઃ કિરત્યતિતરાં તીક્ષ્ણાન્ કટાક્ષાશુગાંસ્- તન્મે બ્રૂહિ મનઃકુરઙ્ગ શરણં કિં સાંપ્રતં યાસ્યસિ ॥

અત્યુચ્ચાઃ પરિતઃસ્ફુરન્તિ ગિરયઃ સ્ફારાસ્તથામ્ભોધયસ્ તાનેતાનપિ બિભ્રતી કિમપિ ન ક્લાન્તાસિ તુભ્યં નમઃ ।
આશ્ચર્યેણ મુહુર્મુહુઃ સ્તુતિમિમાં પ્રસ્તૌમિ યાવદ્ભુવસ્ તાવદ્બિભ્રાદિમાં સ્મૃતસ્તવ ભુજો વાચસ્તતો મુદ્રિતાઃ ॥

અત્યુચ્ચૈરતિનીચૈર્ અશ્લીલમયુક્તમનુપયુક્તં ચ ।
ન વદતિ નૃપતિસભાયા- માદરમીપ્સુર્મહામનસામ્ ॥

અત્યુચ્છ્રિતે મન્ત્રિણિ પાર્થિવે ચ વિષ્ટભ્ય પાદાવુપતિષ્ઠતે શ્રીઃ ।
સા સ્ત્રીસ્વભાવાદસહા ભરસ્ય તયોર્દ્વયોરેકતરં જહાતિ ॥

અત્યુચ્છ્રિતોન્નતસિતધ્વજપઙ્ક્તિચિત્રૈર્ નાગાશ્વપત્તિરથસંક્ષુભિતૈર્બલૌઘૈઃ ।
ઉદ્ધૂતચામરવિરાજિતગાત્રશોભાઃ પુણ્યેન ભૂમિપતયો ભુવિ સંચરન્તિ ॥

અત્યુજ્જ્વલૈરવયવૈર્મૃદુતાં દધાના મુક્તા બલં વિતરતિ સ્મરદાનદક્ષા ।
સ્નિગ્ધાશાયા ગુરુગુણગ્રથિતા મનોજ્ઞા ફીણી નવીનલલનેવ મુદં દદાતિ ॥

અત્યુત્સાર્ય બહિર્વિટઙ્કવડભીગણ્ડસ્થલશ્યામિકાં ભિન્નાભિન્નગવાક્ષજાલવિરલચ્છિદ્રૈઃ પ્રદીપાંશવઃ ।
આરૂઢસ્ય ભરેણ યૌવનમિવ ધ્વાન્તસ્ય નક્તં મુખે નિર્યાતાઃ કપિલાઃ કરાલવિરલશ્મશ્રૂપ્રરોહા ઇવ ॥

અત્યુત્સેકેન મહસા સાહસાધ્યવસાયિનામ્ ।
શ્રીરારોહતિ સંદેહં મહતામપિ ભૂભૃતામ્ ॥

અત્યુદાત્તગણેષ્વેષા કૃતપુણ્યૈઃ પ્રરોપિતા ।
શતશાખી ભવત્યેવ યાવન્માત્રાપિ સત્ક્રિયા ॥

અત્યુદ્ગાઢરયસ્થિરાકૃતિઘનધ્વાનભ્રમન્મન્દર- ક્ષુબ્ધક્ષીરધિવીચિસંચયગતપ્રાલેયપાદોપમઃ ।
શ્રીમત્પોતલકે ગભીરવિવૃતિધ્વાનપ્રતિધ્વાનિતે સાન્દ્રસ્વાંશુચયશ્રિયા વલયિતો લોકેશ્વરઃ પાતુ વઃ ॥

અત્યુદ્ધૃતા વસુમતી દલિતોઽરિવર્ગઃ ક્રોડીકૃતા બલવતા બલિરાજલક્ષ્મીઃ ।
એકત્ર જન્મનિ કૃતં યદનેન યૂના જન્મત્રયે તદકરોત્ પુરુષઃ પુરાણઃ ॥