Mahāsubhāṣitasaṃgraha 1-9979 · Verses 0681-0700

atyādaro bhaved yatra kāryakāraṇavarjitaḥ /
tatra śaṅkā prakartavyā pariṇāme'sukhāvahā //

atyāyatairniyamakāribhiruddhatānāṃ divyaiḥ prabhābhiranapāyamayairupāyaiḥ /
śaurirbhujairiva caturbhiradaḥ sadā yo lakṣmīvilāsabhavanairbhuvanaṃ babhāra //

atyāyāsena nātmānaṃ kuryādatisamucchrayam /
pāto yathā hi duḥkhāya nocchrāyaḥ sukhakṛt tathā //

atyāryamatidātāram atiśūramativratam /
prajñābhimāninaṃ caiva śrīrbhayānnopasarpati //

na cātiguṇavatsveṣā nātyantaṃ nirguṇeṣu ca /
naiṣā guṇānkāmayate nairguṇyāṃ nānurajyate /
unmattā gaurivāndhā śrīḥ kvacidevāvatiṣṭhate //

atyāśīviṣaśastraṃ hi vijitapralayānalam /
tejo laṅghayituṃ śaktaḥ ko nu nāma dvijanmanām //

atyāsannā vināśāya dūrasthā na phalapradā /
tasmādāhṛtya dātavyā bhūmiḥ pārthivasattama //

atyāsannā vināśāya dūrasthā na phalapradāḥ /
sevyā madhyamabhāvena rājāvahnirguruḥ striyaḥ //

atyuktau yadi na prakupyasi mṛṣāvādaṃ na cenmanyase tadbrūmo'dbhutakīrtanāya rasanā keṣāṃ na kaṇḍūyate /
deva tvattaruṇapratāpadahanajvālāvalīśoṣitāḥ sarve vāridhayastato ripuvadhūnetrāmbubhiḥ pūritāḥ //

atyuccastanaśailadurgamamuro nābhirgabhīrāntarā bhīmaṃ dehavanaṃ sphuradbhujalataṃ romālijālākulam /
vyādhaḥ pañcaśaraḥ kiratyatitarāṃ tīkṣṇān kaṭākṣāśugāṃs- tanme brūhi manaḥkuraṅga śaraṇaṃ kiṃ sāṃprataṃ yāsyasi //

atyuccāḥ paritaḥsphuranti girayaḥ sphārāstathāmbhodhayas tānetānapi bibhratī kimapi na klāntāsi tubhyaṃ namaḥ /
āścaryeṇa muhurmuhuḥ stutimimāṃ prastaumi yāvadbhuvas tāvadbibhrādimāṃ smṛtastava bhujo vācastato mudritāḥ //

atyuccairatinīcair aślīlamayuktamanupayuktaṃ ca /
na vadati nṛpatisabhāyā- mādaramīpsurmahāmanasām //

atyucchrite mantriṇi pārthive ca viṣṭabhya pādāvupatiṣṭhate śrīḥ /
sā strīsvabhāvādasahā bharasya tayordvayorekataraṃ jahāti //

atyucchritonnatasitadhvajapaṅkticitrair nāgāśvapattirathasaṃkṣubhitairbalaughaiḥ /
uddhūtacāmaravirājitagātraśobhāḥ puṇyena bhūmipatayo bhuvi saṃcaranti //

atyujjvalairavayavairmṛdutāṃ dadhānā muktā balaṃ vitarati smaradānadakṣā /
snigdhāśāyā guruguṇagrathitā manojñā phīṇī navīnalalaneva mudaṃ dadāti //

atyutsārya bahirviṭaṅkavaḍabhīgaṇḍasthalaśyāmikāṃ bhinnābhinnagavākṣajālaviralacchidraiḥ pradīpāṃśavaḥ /
ārūḍhasya bhareṇa yauvanamiva dhvāntasya naktaṃ mukhe niryātāḥ kapilāḥ karālaviralaśmaśrūprarohā iva //

atyutsekena mahasā sāhasādhyavasāyinām /
śrīrārohati saṃdehaṃ mahatāmapi bhūbhṛtām //

atyudāttagaṇeṣveṣā kṛtapuṇyaiḥ praropitā /
śataśākhī bhavatyeva yāvanmātrāpi satkriyā //

atyudgāḍharayasthirākṛtighanadhvānabhramanmandara- kṣubdhakṣīradhivīcisaṃcayagataprāleyapādopamaḥ /
śrīmatpotalake gabhīravivṛtidhvānapratidhvānite sāndrasvāṃśucayaśriyā valayito lokeśvaraḥ pātu vaḥ //

atyuddhṛtā vasumatī dalito'rivargaḥ kroḍīkṛtā balavatā balirājalakṣmīḥ /
ekatra janmani kṛtaṃ yadanena yūnā janmatraye tadakarot puruṣaḥ purāṇaḥ //