મહાભારત · અધ્યાય 7.123

તતો દુઃશાસનો રાજઞ્શૈનેયં સમુપાદ્રવત્ ।
કિરઞ્શરસહસ્રાણિ પર્જન્ય ઇવ વૃષ્ટિમાન્ ॥

સ વિદ્વ્વા સાત્યકિં ષષ્ટ્યા તથા ષોડશભિઃ શરૈઃ ।
નાકમ્પયત્સ્થિતં યુદ્ધે મૈનાકમિવ પર્વતમ્ ॥

તં તુ દુઃશાસનઃ શૂરઃ સાયકૈરાવૃણોદ્ભૃશમ્ ।
રથવ્રાતેન મહતા નાનાદેશોદ્ભવેન ચ ॥

સર્વતો ભરતશ્રેષ્ઠ વિસૃજન્સાયકાન્બહૂન્ ।
પર્જન્ય ઇવ ઘોષેણ નાદયન્વૈ દિશો દશ ॥

તમાપતન્તમાલોક્ય સાત્યકિઃ કૌરવં રણે ।
અભિદ્રુત્ય મહાબાહુશ્છાદયામાસ સાયકૈઃ ॥

તે છાદ્યમાના બાણૌઘૈર્દુઃશાસનપુરોગમાઃ ।
પ્રાદ્રવન્સમરે ભીતાસ્તવ સૈન્યસ્ય પશ્યતઃ ॥

તેષુ દ્રવત્સુ રાજેન્દ્ર પુત્રો દુઃશાનસ્તવ ।
તસ્થૌ વ્યપેતભી રાજન્સાત્યકિં ચાર્દયચ્છરૈઃ ॥

ચતુર્ભિર્વાજિનસ્તસ્ય સારથિં ચ ત્રિભિઃ શરૈઃ ।
સાત્યકિં ચ શતેનાજૌ વિદ્ધ્વા નાદં મુમોચ સઃ ॥

તતઃ ક્રુદ્ધો મહારાજ માધવસ્તસ્ય સંયુગે ।
રથં સૂતં ધ્વજં તં ચ ચક્રેઽદૃશ્યમજિહ્મગૈઃ ॥

સ તુ દુઃશાસનં શૂરં સાયકૈરાવૃણોદ્ભૃશમ્ ।
મશકં સમનુપ્રાપ્તમૂર્ણનાભિરિવોર્ણયા ॥

ત્વરન્સમાવૃણોદ્બાણૈર્દુઃશાસનમમિત્રજિત્ ॥ દૃષ્ટ્વા દુઃશાસનં રાજા તથા શરશતાચિતમ્ ।

ત્રિગર્તાંશ્ચોદયામાસ યુયુધાનરથં પ્રતિ ॥

તેઽગચ્છન્યુયુધાનસ્ય સમીપં ક્રુરકર્મણઃ ।
ત્રિગર્તાનાં ત્રિસાહસ્રા રથા યુદ્ધવિશારદાઃ ॥

તે તુ તં રથવંશેન મહતા પર્યવારયન્ ।
સ્થિરાં કૃત્વા મતિં યુદ્ધે ભૂત્વા સંશપ્તકા મિથઃ ॥

તેષાં પ્રયતમાનાનાં શરવર્ષાણિ મુઞ્ચતામ્ ।
યોધાન્પઞ્ચશતાન્મુખ્યાનગ્ર્યાનીકે વ્યપોથયત્ ॥

તેઽપતન્નિહતાસ્તૂર્ણં શિનિપ્રવરસાયકૈઃ ।
મહામારુતવેગેન ભગ્ના ઇવ નગાદ્દ્રુમાઃ ॥

નાગૈશ્ચ બહુધા ચ્છિન્નૈર્ધ્વજૈશ્ચૈવ વિશામ્પતે ।
હયૈશ્ચ કનકાપીડૈઃ પતિતૈસ્તત્ર મેદિની ॥

શૈનેયશરસઙ્કૃત્તૈઃ શોણિતૌઘપરિપ્લુતૈઃ ।
અશોભત મહારાજ કિંશુકૈરિવ પુષ્પિતૈઃ ॥

તે વધ્યમાનાઃ સમરે યુયુધાનેન તાવકાઃ ।
ત્રાતારં નાધ્યગચ્છન્ત પઙ્કમગ્ના ઇવ દ્વિપાઃ ॥

તતસ્તે પર્યવર્તન્ત સર્વે દ્રોણરથં પ્રતિ ।
ભયાત્પતગરાજસ્ય ગર્તાનીવ મહોરગાઃ ॥

હત્વા પઞ્ચશતાન્યોધાઞ્છરૈરાશીવિષોપમૈઃ ।
પ્રાયાત્સ શનકૈર્વીરો ધનઞ્જયરથં પ્રતિ ॥

તં પ્રયાન્તં નરશ્રેષ્ઠં પુત્રો દુઃશાસનસ્તવ ।
વિવ્યાધ નવભિસ્તૂર્ણં શરૈઃ સન્નતપર્વભિઃ ॥

સ તુ તં પ્રતિવિવ્યાધ પઞ્ચભિર્નિશિતૈઃ શરૈઃ ।
રુક્મપુઙ્ખૈર્મહેષ્વાસો ગાર્ધ્રપત્રૈરજિહ્મગૈઃ ॥

સાત્યકિં તુ મહારાજ પ્રહસન્નિવ ભારત ।
દુઃશાસનસ્ત્રિભિર્વિદ્ધ્વા પુનર્વિવ્યાધ પઞ્ચભિઃ ॥

શૈનેયસ્તવ પુત્રં તુ હત્વા પઞ્ચભિરાશુગૈઃ ।
ધનુશ્ચાસ્ય રણે છિત્ત્વા વિસ્મયન્નર્જુનં યયૌ ॥

તતો દુઃશાસનઃ ક્રુદ્ધો વૃષ્ણિવીરાય ગચ્છતે ।
સર્વપારશવીં શક્તિં વિસસર્જ જિઘાંસયા ॥

તાં તુ શક્તિં તદા ઘોરાં તવ પુત્રસ્ય સાત્યકિઃ ।
ચિચ્છેદ શતધા રાજન્નિશિતૈઃ કઙ્કપત્રિભિઃ ॥

અથાન્યદ્ધનુરાદાય પુત્રસ્તવ જનેશ્વર ।
સાત્યકિં ચ શરૈર્વિદ્ધ્વા સિંહનાદં નનાદ ચ ॥

સાત્યકિસ્તુ રણે ક્રુદ્ધો મોહયિત્વા સુતં તવ ।
શરૈરગ્નિશિખાકારૈરાજઘાન સ્તનાન્તરે ॥

ત્રિભિરેવ મહાભાગઃ શરૈઃ સન્નતપર્વભિઃ ।
સર્વાયસૈસ્તીક્ષ્ણવક્ત્રૈઃ પુનર્વિવ્યાધ ચાષ્ટભિઃ ॥

દુઃશાસનસ્તુ વિંશત્યા સાત્યકિં પ્રત્યવિધ્યત ।
સાત્વતોઽપિ મહારાજ તં વિવ્યાધ સ્તનાન્તરે ॥

ત્રિભિરેવ મહાભાગઃ શરૈઃ સન્નતપર્વભિઃ ।
તતોઽસ્ય વાહાન્નિશિતૈઃ શરૈર્જઘ્ને મહારથઃ ॥

સારથિં ચ સુરાઙ્ક્રુદ્ધઃ શરૈઃ સન્નતપર્વભિઃ ।
ધનુરેકેન ભલ્લેન હસ્તાવાપં ચ પઞ્ચભિઃ ॥

ધ્વજં ચ રથશક્તિં ચ ભલ્લાભ્યાં પરમસ્ત્રિવિત્ ।
ચિચ્છેદ વિશિખૈસ્તીક્ષ્ણૈસ્તથોભૌ પાર્ષ્ણિસારથી ॥

સ ચ્છિન્નધન્વા વિરથો હતાશ્વો હતસારથિઃ ।
ત્રિગર્તસેનાપતિના સ્વરથેનાપવાહિતઃ ॥

તમભિદ્રુત્ય શૈનેયો મુહૂર્તમિવ ભારત ।
ન જઘાન મહાબાહુર્ભીમસેનવચઃ સ્મરન્ ॥

ભીમસેનેન તુ વધઃ સુતાનાં તવ ભારત ।
પ્રતિજ્ઞાતઃ સભામધ્યે સર્વેષામેવ સંયુગે ॥

તતો દુઃશાસનં જિત્વા સાત્યકિઃ સંયુગે પ્રભો ।
જગામ ત્વરિતો રાજન્યેન યાતો ધનઞ્જયઃ ॥