મહાભારત · અધ્યાય 3.277

તતો બ્રહ્મર્ષયઃ સર્વે સિદ્ધા દેવર્ષયસ્તથા ।
હવ્યવાહં પુરસ્કૃત્ય બ્રહ્માણં શરણં ગતાઃ ॥
અગ્નિરુવાચ ।

યોસૌ વિશ્રવસઃ પુત્રો દશગ્રીવો મહાબલઃ ।
અવધ્યો વરદાનેન કૃતો ભગવતા પુરા ॥

સ બાધતે પ્રજાઃ સર્વા વિપ્રકારૈર્મહાબલઃ ।
તતો નસ્ત્રાતુ ભગવાન્નાન્યસ્ત્રાતા હિ વિદ્યતે ॥
બ્રહ્મોવાચ ।

ન સ દેવાસુરૈઃ શક્યો યુદ્ધે જેતું વિભાવસો ।
વિહિતં તત્રયત્કાર્યમભિતસ્તસ્ય નિગ્રહઃ ॥

તદર્થમવતીર્ણોઽસૌ મન્નિયોગાચ્ચતુર્ભુજઃ ।
વિષ્ણુઃ પ્રહરતાં શ્રેષ્ઠઃ સ તત્કર્મ કરિષ્યતિ ॥
માર્કણ્ડેય ઉવાચ ।

પિતામહસ્તતસ્તેષાં સન્નિધૌ શક્રમબ્રવીત્ ।
સર્વૈર્દેવગણૈઃ સાર્ધં સમ્ભવ ત્વં મહીતલે ॥

વિષ્ણોઃ સહાયાનૃક્ષીષુ વાનરીષુ ચ સર્વશઃ ।
જનયધ્વં સુતાન્વીરાન્કામરૂપબલાન્વિતાન્ ॥

તે યથોક્તા ભગવતા તત્પ્રતિશ્રુત્ય શાસનમ્ ।
સસૃજુર્દેવગન્ધર્વાઃ પુત્રાન્વાનરરૂપિણઃ ॥

તતો ભાગાનુભાગેન દેવગન્ધર્વદાનવાઃ ।
અવતર્તું મહીં સર્વે મન્ત્રયામાસુરઞ્જસા ॥

અવતેરુર્મહીં સ્વર્ગાદંશૈશ્ચ સહિતાઃ સુરાઃ । ઋષયશ્ચ મહાત્માનઃ સિદ્ધાશ્ચ સહ કિન્નરૈઃ ।
ચારણાશ્ચાસૃજન્ઘોરાન્વાનરાન્વનચારિણઃ ॥

યસ્ય દેવસ્ય યદ્રૂપં વેષસ્તેજશ્ચ યદ્વિધમ્ ।
અજાયન્ત સમાસ્તેન તસ્ય તસ્ય સુતાસ્તદા ॥

તેષાં સમક્ષં ગન્ધર્વી દુન્દુભીં નામ નામતઃ ।
શશાસ વરદો દેવો ગચ્છ કાર્યાર્થસિદ્ધયે ॥

પિતામહવચઃ શ્રુત્વા ગન્ધર્વી દુન્દુભી તતઃ ।
મન્થરા માનુષે લોકે કુબ્જા સમભવત્તદા ॥

શક્રપ્રભૃતયશ્ચૈવ સર્વે તે સુરસત્તમાઃ ।
વાનરર્ક્ષવરસ્ત્રીષુ જનયામાસુરાત્મજાન્ ॥

તેઽન્વવર્તન્પિતૄન્સર્વે યશસા ચ બલેન ચ ।
ભેત્તારો ગિરિશૃઙ્ગાણાં સાલતાલશિલાયુધાઃ ॥

વજ્ચસંહનનાઃ સર્વેસર્વેઽમોઘવલાસ્તથા ।
કામવીર્યબલાશ્ચૈવસર્વે બુદ્ધિવિશારદાઃ ॥

નાગાયુતસમપ્રાણા વાયુવેગસમા જવે ।
યથેચ્છવિનિપાતાશ્ચ કેચિદત્ર વનૌકસઃ ॥

એવં વિધાય તત્સર્વં ભગવાઁલ્લોકભાવનઃ ।
મન્થરાં બોધયામાસ યદ્યત્કાર્યં ત્વયા તથા ॥

સા તદ્વચ સમાજ્ઞાય તથા ચક્રે મનોજવા । ઇતશ્ચેતશ્ચ ગચ્છન્તી વૈરસન્ધુક્ષણે રતા ॥