મહાભારત · અધ્યાય 3.249

અજાનતસ્તે રાધેય નાભ્યસૂયામ્યહં વચઃ ।
જાનાસિ ત્વં જિતાઞ્શત્રૂન્ગન્ધર્વાં સ્તેજસા મયા ॥

આયોધિતાસ્તુ ગન્ધર્વાઃ સુચિરં સોદરૈર્મમ ।
મયા સહ મહાબાહો કૃતશ્ચોભયતઃ ક્ષયઃ ॥

માયાધિકાસ્ત્વયુધ્યન્ત યદા શૂરા વિયદ્ગતાઃ ।
તદા નો ન સમં યુદ્ધમભવત્ખેચરૈઃ સહ ॥

પરાજયં ચ પ્રાપ્તાઃ સ્મો રણે બન્ધનમેવ ચ । સભૃત્યામાત્યપુત્રાશ્ચ સદારબલવાહનાઃ ।
ઉચ્ચૈરાકાશમાર્ગેણ હ્રિયમાણાઃ સુદુઃખિતાઃ ॥

અથ નઃ સૈનિકાઃ કેચિદમાત્યાશ્ચ મહારથાઃ ।
ઉપગમ્યાબ્રુવન્દીનાઃ પાણ્ડવાઞ્શરણપ્રદાન્ ॥

એષ દુર્યોધનો રાજા ધાર્તરાષ્ટ્રઃ સહાનુજઃ ।
સામાત્યદારો હ્રિયતે ગન્ધર્વૈર્દિવમાશ્રિતૈઃ ॥

તં મોક્ષયત ભદ્રં વઃ સહદારં નરાધિપમ્ । પરામર્શો મા ભવિષ્યત્કુરુદારેષુ સર્વશઃ ।
ઇત્યબ્રુવન્રણઆન્મુક્તા ધર્મરાજમુપાગતાઃ ॥

એવમુક્તે તુ ધર્માત્મા જ્યેષ્ઠઃ પાણ્ડુસુતસ્તદા ।
પ્રસાદ્ય સોદરાન્સર્વાનાજ્ઞાપયત મોક્ષણે ॥

અથાગમ્ય તમુદ્દેશં પાણ્ડવાઃ પુરુષર્ષભાઃ ।
સાન્ત્વપૂર્વમયાચન્ત શક્તાઃ સન્તો મહારથાઃ ॥

યદા ચાસ્માન્ન મુમુચુર્ગન્ધર્વાઃ સાન્ત્વિતા અપિ ।
આકાશચારિણો વીરા નદન્તો જલદા ઇવ ॥

તતોઽર્જુનશ્ચ ભીમશ્ચ યમજૌ ચ બલોત્કટૌ ।
મુમુચુઃ શરવર્ષાણિ ગન્ધર્વાન્પ્રત્યનેકશઃ ॥

અથ સર્વે રણં મુક્ત્વા પ્રયાતાઃ ખેચરા દિવમ્ ।
અસ્માનેવાભિકર્ષન્તો દીનાન્મુદિતમાનસાઃ ॥

તતઃ સમન્તાત્પશ્યામઃ શરજાલેન વેષ્ટિતમ્ ।
અમાનુષાણિ ચાસ્ત્રાણિ પ્રયુઞ્જાનં ઘનઞ્જયમ્ ॥

સમાવૃતા દિશો દૃષ્ટ્વા પાણ્ડવેન શિતૈઃ શરૈઃ ।
ધનઞ્જયસખાઽત્માનં દર્શયામાસ વૈ તદા ॥

ચિત્રસેનઃ પાણ્ડવેન સમાશ્લિષ્ય પરસ્પરમ્ ।
કુશલં પરિપપ્રચ્છ તૈઃ પૃષ્ટશ્ચાપ્યનામયમ્ ॥

તે સમેત્ય તથાઽન્યોન્યં સન્નાહાન્વિપ્રમુચ્ય ચ ।
એકીભૂતાસ્તતો વીરા ગન્ધર્વાઃ સહ પાણ્ડવૈઃ ॥

પરસ્પરં સમાગમ્ય પ્રીત્યા પરમયા યુતૌ । અપૂજયેતામન્યોન્યં ચિત્રસેનધનઞ્જયૌ ॥