મહાભારત · અધ્યાય 3.125

તતઃ શ્રુત્વા તુ શર્યાતિર્વયસ્થં ચ્યવનં કૃતમ્ ।
સુહૃષ્ટઃ સેનયા સાર્ધમુપાયાદ્ભાર્ગવાશ્રમમ્ ॥

ચ્યવનં ચ સુકન્યાં ચ દૃષ્ટ્વા દેવસુતાવિવ ।
રેમે સભાર્યઃ શર્યાતિઃ કૃત્સ્નાં પ્રાપ્ય મહીમિવ ॥

ઋષિણા સત્કૃતસ્તેન સભાર્યઃ પૃથિવીપતિઃ ।
ઉપોપવિષ્ટઃ કલ્યાણીઃ કથાશ્ચક્રે મનોરમાઃ ॥

અથૈનં ભાર્ગવો રાજન્નુવાચ પરિસાન્ત્વયન્ ।
યાજયિષ્યામિ રાજંસ્ત્વાં સમ્ભારાનુપકલ્પય ॥

તતઃ પરમસંહૃષ્ટઃ શર્યાતિરવનીપતિઃ ।
ચ્યવનસ્ય મહારાજ તદ્વાક્યં પ્રત્યપૂજયત્ ॥

પ્રશસ્તેઽહનિ યજ્ઞીયે સર્વકામસમૃદ્ધિમત્ ।
કારયામાસ શર્યાતિર્યજ્ઞાયતનમુત્તમમ્ ॥

તત્રૈનં ચ્યવનો રાજન્યાજયામાસ ભાર્ગવઃ ।
અદ્ભુતાનિ ચ તત્રાસન્યાનિ તાનિ નિબોધ મે ॥

અગૃહ્ણાચ્ચ્યવનઃ સોમમશ્વિનોર્દેવયોસ્તદા ।
તમિન્દ્રો વારયામાસ ગૃહ્ણાનં સ તયોર્ગ્રહમ્ ॥
ઇન્દ્ર ઉવાચ ।

ઉભાવેતૌ ન સોમાર્હૌ નાસત્યાવિતિ મે મતિઃ ।
ભિષજૌ દિવિ દેવાનાં કર્મણા તેન નાર્હતઃ ॥
ચ્યવન ઉવાચ ।

માવમંસ્થા મહાત્માનૌ રૂપદ્રવિણવત્તરૌ ।
યૌ ચક્રતુર્માં મધવન્વૃન્દારકમિવાજરમ્ ॥

ઋતે ત્વાં વિબુધાંશ્ચાન્યાન્કથં વૈ નાર્હતઃ સવમ્ ।
અશ્વિનાવપિ દેવેન્દ્ર દેવૌ વિદ્ધિ પુરન્દર ॥
ઇન્દ્ર ઉવાચ ।

ચિકિત્સકૌ કર્મકરૌ કામરૂપસમન્વિતૌ ।
લોકે ચરન્તૌ મર્ત્યાનાં કથં સોમમિહાર્હતઃ ॥
લોમશ ઉવાચ ।

એતદેવ તદા વાક્યમામ્રેડયતિ વાસવે ।
અનાદૃત્યતતઃ શક્રં ગ્રહં જગ્રાહ ભાર્ગવઃ ॥

ગ્રહીષ્યન્તં તુ તં સોમમશ્વિનોરુત્તમં તદા ।
સમીક્ષ્ય બલભિદ્દેવ ઇદં વચનમબ્રવીત્ ॥

આભ્યામર્તાય સોમં ત્વં ગ્રહીષ્યસિ યદિ સ્વયમ્ ।
વજ્રં તે પ્રહરિષ્યામિ ઘોરરૂપમનુત્તમમ્ ॥

એવમુક્તઃ સ્મયન્નિન્દ્રમભિવીક્ષ્યસ ભાર્ગવઃ ।
જગ્રાહ વિધિવત્સોમમશ્વિભ્યામુત્તમં ગ્રહમ્ ॥

તતોઽસ્મૈ પ્રાહરદ્વજ્રં ઘોરરૂપં શચીપતિઃ ।
તસ્ય પ્રહરતો બાહું સ્તમ્ભયામાસ ભાર્ગવઃ ॥

તં સ્તમ્ભયિત્વા ચ્યવનો જુહુવે મન્ત્રતોઽનલમ્ ।
કૃત્યાર્થી સુમહાતેજા દેવં હિંસિતુમુદ્યતઃ ॥

તતઃ કૃત્યાઽથ સઞ્જજ્ઞે મુનેસ્તસ્ય તપોબલાત્ ।
મદો નામ મહાવીર્યો બૃહત્કાયો મહાસુરઃ ॥

શરીરં યસ્ નિર્દેષ્ટુમશક્યં તુ સુરાસુરૈઃ ।
તસ્યાસ્યમભવદ્ધોરં તીક્ષ્ણાગ્રદશનં મહત્ ॥

હનુરેકા સ્થિતા ત્વસ્ય ભૂમાવેકા દિવં ગતા ।
ચતસ્રશ્ચાયતા દંષ્ટ્રા યોજનાનાં શતંશતમ્ ॥

ઇતરે તસ્ય દશના બભૂવુર્દશયોજનાઃ ।
પ્રાસાદશિખરાકારાઃ શૂલાગ્રસમદર્શનાઃ ॥

બાહૂ પરિઘસન્કાશાવાયતાવયુતં સમૌ ।
નેત્રે રવિશશિપ્રખ્યે વક્રં કાલાગ્નિસન્નિભમ્ ॥

લેલિહઞ્જિહ્વયા વક્રં વિદ્યુચ્ચપલલોલયા ।
વ્યાત્તાનનો ઘોરદૃષ્ટિર્ગ્રસન્નિવ જગદ્બલાત્ ॥

સ ભક્ષયિષ્યન્સન્ક્રુદ્ધઃ શતક્રતુમુપાદ્રવત્ । મહતા ઘોરરૂપેણ લોકાઞ્શબ્દેન નાદયત્ ॥