મહાભારત · અધ્યાય 13.21

વિનતા પુત્રશોકાર્તા શાપાદ્ભીતા ચ ભારત ।
પ્રતીક્ષતે સ્મ તં કાલં યઃ પુત્રોક્તસ્તદાઽભવત્ ॥

તતોઽપ્યતીતે પઞ્ચશતે વર્ષાણાં કાલસંયુગે ।
ગરુડોઽથ મહાવીર્યો જજ્ઞે ભુજગભુગ્બલી ॥

બન્ધુરાસ્યઃ શિખી પત્રકોશઃ કૂર્મનખો મહાન્ ।
રક્તાક્ષઃ સંહતગ્રીવો હ્રસ્વપાદો મહાશિરાઃ ॥

યસ્ત્વણ્ડાત્સ વિનિર્ભિન્નો નિષ્ક્રાન્તો ભરતર્ષભ ।
વિનતાપૂર્વજઃ પુત્રઃ સોઽરુણો દૃશ્યતે દિવિ ॥

પૂર્વાં દિશામભિપ્રેત્ય સૂર્યસ્યોદયનં પ્રતિ ।
અરુણોઽરુણસન્કાશો નામ્ના ચૈવારુણઃ સ્મૃતઃ ॥

જાતમાત્રસ્તુ વિહગો ગરુડઃ પન્નગાશનઃ ।
વિહાય માતરં ક્ષિપ્રમગમત્સર્વતો દિશઃ ॥

સ તદા વવૃધેઽતીવ સર્વકામૈઃ કદાઽર્ચિતઃ ।
પિતામહવિસૃષ્ટેન ભોજનેન વિશામ્પતે ॥

તસ્મિંશ્ચ વિહગે તત્ર યથાકામં વિવર્ધતિ ।
કદ્રૂશ્ચ વિનતા ચૈવાગચ્છતાં સાગરં પ્રતિ ॥

દદૃશાતે તુ તે યાન્તમુચ્ચૈશ્શ્રવસમન્તિકાત્ ।
સ્નાત્વોપવૃત્તં ત્વરિતં પીતવન્તં ચ વાજિનમ્ ॥

તતઃ કદ્રૂર્હસન્ત્યેવ વિનતામિદમબ્રવીત્ ।
હયસ્ય વર્ણઃ કો ન્વત્ર બ્રૂહિ યસ્તે મતઃ શુભે ॥
વિનતોવાચ ।

એકવર્ણો હયો રાજ્ઞિ સર્વશ્વેતો મતો મમ ।
વર્ણં વા કીદૃશં તસ્ય મન્યતે ત્વં મનસ્વિનિ ॥
કદ્રૂરુવાચ ।

સર્વશ્વેતો મતસ્તુભ્યં ય એષ હયસત્તમઃ ।
બ્રૂહિ કલ્યાણિ દીવ્યાવો વર્ણાન્યત્વેન ભામિનિ ॥
વિનતોવાચ ।

યદ્યાર્યે દીવ્યસિ ત્વં મે કઃ પણો નો ભવિષ્યતિ ।
સા તજ્જ્ઞાત્વા પણેયં વૈ જ્ઞાત્વા તુ વિપણે ત્વયા ॥
કદ્રૂરુવાચ ।

જિતા દાસી ભવેર્મે ત્વમહં ચાપ્યસિતેક્ષણે ।
નૈકવર્ણૈકવર્ણત્વે વિનતે રોચતે ચ તે ॥

રોચતે મે પણે રાજ્ઞિ દાસીત્વેન ન સંશયઃ ।
સત્યમાતિષ્ઠ ભદ્રં તે સત્યે સ્થાસ્યામિ ચાપ્યહમ્ ॥