મહાભારત · અધ્યાય 12.369

અથ કાલે બહુતિથે પૂર્ણે પ્રાપ્તો ભુજઙ્ગમઃ ।
દત્તાભ્યનુજ્ઞઃ સ્વં વેશ્મ કૃતકર્મા વિવસ્વતા ॥

તં ભાર્યાઽપ્યુપચક્રામ પાદશૌચાદિભિર્ગુણૈઃ ।
ઉપપન્નાં ચ તાં સાધ્વીં પન્નગઃ પર્યપૃચ્છત ॥

અથ ત્વમસિ કલ્યાણિ દેવતાતિથિપૂજને ।
પૂર્વમુક્તેન વિધિના યુક્તા કર્મસુ વર્તસે ॥

ન ખલ્વસ્યકૃતાર્થેન સ્ત્રીબુદ્ધ્યા માર્દવીકૃતા ।
મદ્વિયોગેન સુશ્રોણિ વિમુક્તા ધર્મસેતુના ॥
નાગભાર્યોવાચ ।

શિષ્યાણાં ગુરુશુશ્રૂષા વિપ્રાણાં વેદધારણમ્ ।
ભૃત્યાનાં સ્વામિવચનં રાજ્ઞો લોકાનુપાલનમ્ ॥

સર્વભૂતપરિત્રાણં ક્ષત્રધર્મ ઇહોચ્યતે ।
વૈશ્યાનાં યજ્ઞસંવૃત્તિરાતિથેયસમન્વિતા ॥

વિપ્રક્ષત્રિયવૈશ્યાનાં શુશ્રૂષા શૂદ્રકર્મ તત્ ।
ગૃહસ્થધર્મો નાગેન્દ્ર સર્વભૂતહિતૈષિતા ॥

નિયતાહારતા નિત્યં વ્રતચર્યા યથાક્રમમ્ ।
ધર્મો હિ ધર્મસમ્બન્ધાદિન્દ્રિયાણાં વિશેષતઃ ॥

અહં કસ્ય કુતો વાઽપિ કઃ કો મે હ ભવેદિતિ ।
પ્રયોજનમતિર્નિત્યમેવં મોક્ષાશ્રમે વસેત્ ॥

પતિવ્રતાત્વં ભાર્યાયાઃ પરમો ધર્મ ઉચ્યતે ।
તવોપદેશાન્નાગેન્દ્ર તચ્ચ તત્ત્વેન વેદ્મિ વૈ ॥

સાઽહં ધર્મં વિજાનન્તી ધર્નનિત્યે ત્વયિ સ્થિતે ।
સત્પથં કથમૃત્સૃજ્ય યાસ્યામિ વિપથં પથઃ ॥

દેવતાનાં મહાભાગ ધર્મચર્યા ન હીયતે ।
અતિથીનાં ચ સત્કારે નિત્યયુક્તાઽસ્મ્યતન્દ્રિતા ॥

સપ્તાષ્ટદિવસાસ્ત્વદ્ય વિપ્રસ્યેહાગતસ્ય વૈ ।
તચ્ચ કાર્યં ન મે ખ્યાતિ દર્શનં તવ કાઙ્ક્ષતિ ॥

ગોમત્યાસ્ત્વેષ પુલિને ત્વદ્દર્શનસમુત્સુકઃ ।
આસીનો વર્તયન્બ્રહ્મ બ્રાહ્મણઃ સંશિતવ્રતઃ ॥

અહં ત્વનેન નાગેન્દ્ર સત્યપૂર્વં સમાહિતા ।
પ્રસ્થાપ્યો મત્સકાશં સ સમ્પ્રાપ્તો ભુજગોત્તમઃ ॥

એતચ્છ્રુત્વા મહાપ્રાજ્ઞ તત્ર ગન્તું ત્વમર્હસિ ।
દાતુમર્હસિ વા તસ્ય દર્શનં દર્શનશ્રવઃ ॥