મહાભારત · અધ્યાય 12.162

આનૃશંસ્યં વિજાનામિ દર્શનેન સતાં સદા ।
નૃશંસાન્ન વિજાનામિ તેષાં કર્મ ચ ભારત ॥

કણ્ટકાન્કૂપમગ્નિં ચ વર્જયન્તિ યથા નરાઃ ।
તથા નૃશંસકર્માણં વર્જયન્તિ નરા નરમ્ ॥

નૃશંસો દહ્યતે વ્યક્તં પ્રેત્ય ચેહ ચ ભારત ।
તસ્માત્ત્વં બ્રૂહિ કૌરવ્ય તસ્ય ધર્મવિનિશ્ચયમ્ ॥
ભીષ્મ ઉવાચ ।

સ્પૃહાઽસ્યાન્તર્ગતા ચૈવ વિદિતાર્થા ચ કર્મણામ્ આક્રોષ્ટા ક્રુશ્યતે ચૈવ બન્ધિતા બધ્યતે સ ચ ॥

દત્તાનુકીર્તિર્વિષમઃ ક્ષુદ્રો નૈકૃતિકઃ શઠઃ ।
અસમ્ભોગી ચ માની ચ તથા સઙ્ગી વિકત્થનઃ ॥

સર્વાતિશઙ્કી પુરુષો બલીશઃ કૃપણોઽથવા ।
વર્ગપ્રશંસીં સતતમાશ્રમદ્વેપસન્કરી ॥

હિંસાવિકારી સતતમવિશેષગુણાગુણઃ ।
બહ્વલીકો મનસ્વી ચ લુબ્ધોઽત્યર્થં નૃશંસકૃત્ ॥

ધર્મશીલં ગુણોપેતં પાપ ઇત્યવગચ્છતિ ।
આત્મશીલોપમાનેન ન વિશ્વસિતિ કસ્યચિત્ ॥

પરેષાં યત્ર દોપઃ સ્યાત્તદ્ગુહ્યં સમ્પ્રકાશયેત્ ।
સમાનેષ્વેવ દોપેષુ વૃત્ત્યર્થમુપઘાતયેત્ ॥

તથોપકારિણં ચૈવ મન્યતે વઞ્ચિતં પરમ્ ।
દત્ત્વાઽપિ ચ ધનં કાલે સન્તપત્યુપકારિણે ॥

ભક્ષ્યં પેયમથાલેહ્યં યચ્ચાન્યત્સાધુ ભોજનમ્ ।
પ્રેક્ષમાણેષુ યોઽશ્નીયાન્નૃશંસમિતિ તં વદેત્ ॥

બ્રાહ્મણેભ્યઃ પ્રદાયાગ્રં યઃ સુહૃદ્ભિઃ સહાશ્નુતે ।
સ પ્રેત્ય લભતે સ્વર્ગમિહ ચાનન્ત્યમશ્નુતે ॥

એષ તે ભરતશ્રેષ્ઠ નૃશંસઃ પરિકીર્તિતઃ ।
સદા વિવર્જનીયો હિ પુરુષેણ બુભૂષતા ॥