મહાભારત · અધ્યાય 1.89

ભગવન્વિસ્તરેણેહ ભરતસ્ય મહાત્મનઃ ।
જન્મ કર્મ ચ સુશ્રૂષોસ્તન્મે શંસિતુમર્હસિ ॥
વૈશમ્પાયન ઉવાચ ।

પૌરવાણાં વંશકરો દુષ્યન્તો નામ વીર્યવાન્ ।
પૃથિવ્યાશ્ચતુરન્તાયા ગોપ્તા ભરતસત્તમ ॥

ચતુર્ભાગં ભુવઃ કૃત્સ્નં યો ભુઙ્ક્તે મનુજેશ્વરઃ ।
સમુદ્રાવરણાંશ્ચાપિ દેશાન્સ સમિતિઞ્જયઃ ॥

આમ્લેચ્છાવધિકાન્સર્વાન્સ ભુઙ્ક્તે રિપુમર્દનઃ ।
રત્નાકરસમુદ્રાન્તાંશ્ચાતુર્વર્ણ્યજનાવૃતાન્ ॥

ન વર્ણસઙ્કરકરો ન કૃષ્યાકરકૃજ્જનઃ ।
ન પાપકૃત્કશ્ચિદાસીત્તસ્મિન્રાજનિ શાસતિ ॥

ધર્મે રતિં સેવમાના ધર્માર્થાવભિપેદિરે ।
તદા નરા નરવ્યાઘ્ર તસ્મિઞ્જનપદેશ્વરે ॥

નાસીચ્ચોરભયં તાત ન ક્ષુધાભયમણ્વપિ ।
નાસીદ્વ્યાધિભયં ચાપિ તસ્મિઞ્જનપદેશ્વરે ॥

સ્વધર્મૈ રેમિરે વર્ણા દૈવે કર્મણિ નિઃસ્પૃહાઃ ।
તમાશ્રિત્ય મહીપાલમાસંશ્ચૈવાકુતોભયાઃ ॥

કાલવર્ષી ચ પર્જન્યઃ સસ્યાનિ રસવન્તિ ચ ।
સર્વરત્નસમૃદ્ધા ચ મહી પશુમતી તથા ॥

સ્વકર્મનિરતા વિપ્રા નાનૃતં તેષુ વિદ્યતે ।
સ ચાદ્ભુતમહાવીર્યો વજ્રસંહનનો યુવા ॥

ઉદ્યમ્ય મન્દરં દોર્ભ્યાં વહેત્સવનકાનનમ્ ।
ચતુષ્પથગદાયુદ્ધે સર્વપ્રહરણેષુ ચ ॥

નાગપૃષ્ઠેઽશ્વપૃષ્ઠે ચ બભૂવ પરિનિષ્ઠતઃ ।
બલે વિષ્ણુસમશ્ચાસીત્તેજસા ભાસ્કરોપમઃ ॥

અક્ષોભ્યત્વેઽર્ણવસમઃ સહિષ્ણુત્વે ધરાસમઃ ।
સમ્મતઃ સ મહીપાલઃ પ્રસન્નપુરરાષ્ટ્રવાન્ ॥

ભૂયો ધર્મપરૈર્ભાવૈર્મુદિતં જનમાદિશત્ ॥