લિઙ્ગપુરાણ · અધ્યાય 1.96

કથં દેવો મહાદેવો વિશ્વસંહારકારકઃ
શરભાખ્યં મહાઘોરં વિકૃતં રૂપમાસ્થિતઃ ॥

કિં કિં ધૈર્યં કૃતં તેન બ્રૂહિ સર્વમ્ અશેષતઃ
એવમભ્યર્થિતો દેવૈર્ મતિં ચક્રે કૃપાલયઃ ॥

યત્તેજસ્તુ નૃસિંહાખ્યં સંહર્તું પરમેશ્વરઃ
તદર્થં સ્મૃતવાન્ રુદ્રો વીરભદ્રં મહાબલમ્ ॥

આત્મનો ભૈરવં રૂપં મહાપ્રલયકારકમ્
આજગામ પુરા સદ્યો ગણાનામગ્રતો હસન્ ॥

સાટ્ટહાસૈર્ ગણવરૈર્ ઉત્પતદ્ભિર્ ઇતસ્તતઃ
નૃસિંહરૂપૈરત્યુગ્રૈઃ કોટિભિઃ પરિવારિતઃ ॥

તાવદ્ભિર્ અભિતો વીરૈર્ નૃત્યદ્ભિશ્ ચ મુદાન્વિતૈઃ
ક્રીડદ્ભિશ્ ચ મહાધીરૈર્ બ્રહ્માદ્યૈઃ કન્દુકૈરિવ ॥

અદૃષ્ટપૂર્વૈરન્યૈશ્ ચ વેષ્ટિતો વીરવન્દિતઃ
કલ્પાન્તજ્વલનજ્વાલો વિલસલ્લોચનત્રયઃ ॥

આત્તશસ્ત્રો જટાજૂટે જ્વલદ્બાલેન્દુમણ્ડિતઃ
બાલેન્દુદ્વિતયાકાર તીક્ષ્ણદંષ્ટ્રાઙ્કુરદ્વયઃ ॥

આખણ્ડલધનુઃખણ્ડ સંનિભભ્રૂલતાયુતઃ
મહાપ્રચણ્ડહુઙ્કાર બધિરીકૃતદિઙ્મુખઃ ॥

નીલમેઘાઞ્જનાકાર ભીષણશ્મશ્રુરદ્ભુતઃ
વાદખણ્ડમ્ અખણ્ડાભ્યાં ભ્રામયંસ્ત્રિશિખં મુહુઃ ॥

વીરભદ્રો ઽપિ ભગવાન્ વીરશક્તિવિજૃમ્ભિતઃ
સ્વયં વિજ્ઞાપયામાસ કિમત્ર સ્મૃતિકારણમ્ ॥

આજ્ઞાપય જગત્સ્વામિન્ પ્રસાદઃ ક્રિયતાં મયિ
અકાલે ભયમુત્પન્નં દેવાનામપિ ભૈરવ ॥

જ્વલિતઃ સ નૃસિંહાગ્નિઃ શમયૈનં દુરાસદમ્
સાન્ત્વયન્ બોધયાદૌ તં તેન કિં નોપશામ્યતિ ॥

તતો મત્પરમં ભાવં ભૈરવં સંપ્રદર્શય
સૂક્ષ્મં સૂક્ષ્મેણ સંહૃત્ય સ્થૂલં સ્થૂલેન તેજસા ॥

વક્ત્રમાનય કૃત્તિં ચ વીરભદ્ર મમાજ્ઞયા
ઇત્યાદિષ્ટો ગણાધ્યક્ષઃ પ્રશાન્તવપુરાસ્થિતઃ ॥

જગામ રંહસા તત્ર યત્રાસ્તે નરકેસરી
તતસ્તં બોધયામાસ વીરભદ્રો હરો હરિમ્ ॥

ઉવાચ વાક્યમીશાનઃ પિતા પુત્રમિવૌરસમ્
જગત્સુખાય ભગવન્ન્ અવતીર્ણો ઽસિ માધવ ॥

સ્થિત્યર્થેન ચ યુક્તો ઽસિ પરેણ પરમેષ્ઠિના
જન્તુચક્રં ભગવતા રક્ષિતં મત્સ્યરૂપિણા ॥

પુચ્છેનૈવ સમાબધ્ય ભ્રમન્નેકાર્ણવે પુરા
બિભર્ષિ કૂર્મરૂપેણ વારાહેણોદ્ધૃતા મહી ॥

અનેન હરિરૂપેણ હિરણ્યકશિપુર્હતઃ
વામનેન બલિર્બદ્ધસ્ ત્વયા વિક્રમતા પુનઃ ॥

ત્વમ્ એવ સર્વભૂતાનાં પ્રભાવઃ પ્રભુર્ અવ્યયઃ
યદા યદા હિ લોકસ્ય દુઃખં કિંચિત્ પ્રજાયતે ॥

તદા તદાવતીર્ણસ્ત્વં કરિષ્યસિ નિરામયમ્
નાધિકસ્ત્વત્સમો ઽપ્યસ્તિ હરે શિવપરાયણ ॥

ત્વયા ધર્માશ્ ચ વેદાશ્ ચ શુભે માર્ગે પ્રતિષ્ઠિતાઃ
યદર્થમ્ અવતારો ઽયં નિહતઃ સો ઽપિ કેશવ ॥

અત્યન્તઘોરં ભગવન્ નરસિંહ વપુસ્તવ
ઉપસંહર વિશ્વાત્મંસ્ ત્વમેવ મમ સંનિધૌ ॥

ઇત્યુક્તો વીરભદ્રેણ નૃસિંહઃ શાન્તયા ગિરા
તતો ઽધિકં મહાઘોરં કોપં પ્રજ્વાલયદ્ધરિઃ ॥

આગતો ઽસિ યતસ્તત્ર ગચ્છ ત્વં મા હિતં વદ
ઇદાનીં સંહરિષ્યામિ જગદેતચ્ચરાચરમ્ ॥

સંહર્તુર્ ન હિ સંહારઃ સ્વતો વા પરતો ઽપિ વા
શાસિતં મમ સર્વત્ર શાસ્તા કો ઽપિ ન વિદ્યતે ॥

મત્પ્રસાદેન સકલં સમર્યાદં પ્રવર્તતે
અહં હિ સર્વશક્તીનાં પ્રવર્તકનિવર્તકઃ ॥

યદ્ યદ્ વિભૂતિમત્ સત્ત્વં શ્રીમદૂર્જિતમેવ વા
તત્તદ્વિદ્ધિ ગણાધ્યક્ષ મમ તેજોવિજૃમ્ભિતમ્ ॥

દેવતાપરમાર્થજ્ઞા મમૈવ પરમં વિદુઃ
મદંશાઃ શક્તિસમ્પન્ના બ્રહ્મશક્રાદયઃ સુરાઃ ॥

મન્નાભિપઙ્કજાજ્જાતઃ પુરા બ્રહ્મા ચતુર્મુખઃ
તલ્લલાટસમુત્પન્નો ભગવાન્વૃષભધ્વજઃ ॥

રજસાધિષ્ઠિતઃ સ્રષ્ટા રુદ્રસ્તામસ ઉચ્યતે
અહં નિયન્તા સર્વસ્ય મત્પરં નાસ્તિ દૈવતમ્ ॥

વિશ્વાધિકઃ સ્વતન્ત્રશ્ ચ કર્તા હર્તાખિલેશ્વરઃ
ઇદં તુ મત્પરં તેજઃ કઃ પુનઃ શ્રોતુમિચ્છતિ ॥

અતો માં શરણં પ્રાપ્ય ગચ્છ ત્વં વિગતજ્વરઃ
અવેહિ પરમં ભાવમ્ ઇદં ભૂતમહેશ્વરઃ ॥

કાલો ઽસ્મ્યહં કાલવિનાશહેતુર્ લોકાન્ સમાહર્તુમ્ અહં પ્રવૃત્તઃ
મૃત્યોર્મૃત્યું વિદ્ધિ માં વીરભદ્ર જીવન્ત્યેતે મત્પ્રસાદેન દેવાઃ ॥

સાહઙ્કારમિદં શ્રુત્વા હરેર્ અમિતવિક્રમઃ
વિહસ્યોવાચ સાવજ્ઞં તતો વિસ્ફુરિતાધરઃ ॥

કિં ન જાનાસિ વિશ્વેશં સંહર્તારં પિનાકિનમ્
અસદ્વાદો વિવાદશ્ ચ વિનાશસ્ત્વયિ કેવલઃ ॥

તવાન્યોન્યાવતારાણિ કાનિ શેષાણિ સાંપ્રતમ્
કૃતાનિ યેન કેનાપિ કથાશેષો ભવિષ્યતિ ॥

દોષં ત્વં પશ્ય એતત્ત્વમ્ અવસ્થામીદૃશીં ગતઃ
તેન સંહારદક્ષેણ ક્ષણાત્સંક્ષયમેષ્યસિ ॥

પ્રકૃતિસ્ત્વં પુમાન્ રુદ્રસ્ ત્વયિ વીર્યં સમાહિતમ્
ત્વન્નાભિપઙ્કજાજ્જાતઃ પઞ્ચવક્ત્રઃ પિતામહઃ ॥

સૃષ્ટ્યર્થેન જગત્પૂર્વં શઙ્કરં નીલલોહિતમ્
લલાટે ચિન્તયામાસ તપસ્યુગ્રે વ્યવસ્થિતઃ ॥

તલ્લલાટાદભૂચ્છંભોઃ સૃષ્ટ્યર્થં તન્ન દૂષણમ્
અંશો ઽહં દેવદેવસ્ય મહાભૈરવરૂપિણઃ ॥

ત્વત્સંહારે નિયુક્તો ઽસ્મિ વિનયેન બલેન ચ
એવં રક્ષો વિદાર્યૈવ ત્વં શક્તિકલયા યુતઃ ॥

અહઙ્કારાવલેપેન ગર્જસિ ત્વમતન્દ્રિતઃ
ઉપકારો હ્યસાધૂનામ્ અપકારાય કેવલમ્ ॥

યદિ સિંહ મહેશાનં સ્વપુનર્ભૂત મન્યસે
ન ત્વં સ્રષ્ટા ન સંહર્તા ન સ્વતન્ત્રો હિ કુત્રચિત્ ॥

કુલાલચક્રવચ્છક્ત્યા પ્રેરિતો ઽસિ પિનાકિના
અદ્યાપિ તવ નિક્ષિપ્તં કપાલં કૂર્મરૂપિણઃ ॥

હરહારલતામધ્યે મુગ્ધ કસ્માન્ન બુધ્યસે
વિસ્મૃતં કિં તદંશેન દંષ્ટ્રોત્પાતનપીડિતઃ ॥

વારાહવિગ્રહસ્તે ઽદ્ય સાક્રોશં તારકારિણા
દગ્ધો ઽસિ યસ્ય શૂલાગ્રે વિષ્વક્સેનચ્છલાદ્ભવાન્ ॥

દક્ષયજ્ઞે શિરશ્છિન્નં મયા તે યજ્ઞરૂપિણઃ
અદ્યાપિ તવ પુત્રસ્ય બ્રહ્મણઃ પઞ્ચમં શિરઃ ॥

છિન્નં તમેનાભિસંધં તદંશં તસ્ય તદ્બલમ્
નિર્જિતસ્ત્વં દધીચેન સંગ્રામે સમરુદ્ગણઃ ॥

કણ્ડૂયમાને શિરસિ કથં તદ્વિસ્મૃતં ત્વયા
ચક્રં વિક્રમતો યસ્ય ચક્રપાણે તવ પ્રિયમ્ ॥

કુતઃ પ્રાપ્તં કૃતં કેન ત્વયા તદપિ વિસ્મૃતમ્
તે મયા સકલા લોકા ગૃહીતાસ્ત્વં પયોનિધૌ ॥

નિદ્રાપરવશઃ શેષે સ કથં સાત્ત્વિકો ભવાન્
ત્વદાદિસ્તમ્બપર્યન્તં રુદ્રશક્તિવિજૃમ્ભિતમ્ ॥

શક્તિમાનભિતસ્ત્વં ચ હ્ય્ અનલસ્ત્વં ચ મોહિતઃ
તત્તેજસો ઽપિ માહાત્મ્યં યુવાં દ્રષ્ટું ન હિ ક્ષમૌ ॥

સ્થૂલા યે હિ પ્રપશ્યન્તિ તદ્વિષ્ણોઃ પરમં પદમ્
દ્યાવાપૃથિવ્યા ઇન્દ્રાગ્નિ યમસ્ય વરુણસ્ય ચ ॥

ધ્વાન્તોદરે શશાઙ્કસ્ય જનિત્વા પરમેશ્વરઃ
કાલો ઽસિ ત્વં મહાકાલઃ કાલકાલો મહેશ્વરઃ ॥

અતસ્ત્વમુગ્રકલયા મૃત્યોર્મૃત્યુર્ભવિષ્યસિ
સ્થિરધન્વા ક્ષયો વીરો વીરો વિશ્વાધિકઃ પ્રભુઃ ॥

ઉપહસ્તા જ્વરં ભીમો મૃગપક્ષિહિરણ્મયઃ
શાસ્તાશેષસ્ય જગતો ન ત્વં નૈવચતુર્મુખઃ ॥

ઇત્થં સર્વં સમાલોક્ય સંહરાત્માનમ્ આત્મના
નો ચેદિદાનીં ક્રોધસ્ય મહાભૈરવરૂપિણઃ ॥

વજ્રાશનિરિવ સ્થાણોસ્ ત્વ્ એવં મૃત્યુઃ પતિષ્યતિ
ઇત્યુક્તો વીરભદ્રેણ નૃસિંહઃ ક્રોધવિહ્વલઃ ॥

નનાદ તનુવેગેન તં ગૃહીતું પ્રચક્રમે
અત્રાન્તરે મહાઘોરં વિપક્ષભયકારણમ્ ॥

ગગનવ્યાપિ દુર્ધર્ષ શૈવતેજઃસમુદ્ભવમ્
વીરભદ્રસ્ય તદ્રૂપં તત્ક્ષણાદેવ દૃશ્યતે ॥

ન તદ્ધિરણ્મયં સૌમ્યં ન સૌરં નાગ્નિસંભવમ્
ન તડિચ્ચન્દ્રસદૃશમ્ અનૌપમ્યં મહેશ્વરમ્ ॥

તદા તેજાંસિ સર્વાણિ તસ્મિન્ લીનાનિ શાઙ્કરે
તતો વ્યક્તો મહાતેજા વ્યક્તે સંભવતસ્તતઃ ॥

રુદ્રસાધારણં ચૈવ ચિહ્નિતં વિકૃતાકૃતિ
તતઃ સંહારરૂપેણ સુવ્યક્તઃ પરમેશ્વરઃ ॥

પશ્યતાં સર્વદેવાનાં જયશબ્દાદિમઙ્ગલૈઃ
સહસ્રબાહુર્ જટિલશ્ ચન્દ્રાર્ધકૃતશેખરઃ ॥

સ મૃગાર્ધશરીરેણ પક્ષાભ્યાં ચઞ્ચુના દ્વિજાઃ
અતિતીક્ષ્ણમહાદંષ્ટ્રો વજ્રતુલ્યનખાયુધઃ ॥

કણ્ઠે કાલો મહાબાહુશ્ ચતુષ્પાદ્ વહ્નિસંભવઃ
યુગાન્તોદ્યતજીમૂત ભીમગંભીરનિઃસ્વનઃ ॥

સમં કુપિતવૃત્તાગ્નિ વ્યાવૃત્તનયનત્રયઃ
સ્પષ્ટદંષ્ટ્રો ઽધરોષ્ઠશ્ ચ હુઙ્કારેણ યુતો હરઃ ॥

હરિસ્તદ્દર્શનાદેવ વિનષ્ટબલવિક્રમઃ
બિભ્રદ્ ઔર્મ્યં સહસ્રાંશોર્ અધઃ ખદ્યોતવિભ્રમમ્ ॥

અથ વિભ્રમ્ય પક્ષાભ્યાં નાભિપાદે ઽભ્યુદારયન્
પાદાવાબધ્ય પુચ્છેન બાહુભ્યાં બાહુમણ્ડલમ્ ॥

ભિન્દન્નુરસિ બાહુભ્યાં નિજગ્રાહ હરો હરિમ્
તતો જગામ ગગનં દેવૈઃ સહ મહર્ષિભિઃ ॥

સહસૈવ ભયાદ્વિષ્ણું વિહગશ્ ચ યથોરગમ્
ઉત્ક્ષિપ્યોત્ક્ષિપ્ય સંગૃહ્ય નિપાત્ય ચ નિપાત્ય ચ ॥

ઉડ્ડીયોડ્ડીય ભગવાન્ પક્ષાઘાતવિમોહિતમ્
હરિં હરન્તં વૃષભં વિશ્વેશાનં તમીશ્વરમ્ ॥

અનુયાન્તિ સુરાઃ સર્વે નમોવાક્યેન તુષ્ટુવુઃ
નીયમાનઃ પરવશો દીનવક્ત્રઃ કૃતાઞ્જલિઃ ॥

તુષ્ટાવ પરમેશાનં હરિસ્તં લલિતાક્ષરૈઃ
નમો રુદ્રાય શર્વાય મહાગ્રાસાય વિષ્ણવે ॥

નમ ઉગ્રાય ભીમાય નમઃ ક્રોધાય મન્યવે
નમો ભવાય શર્વાય શઙ્કરાય શિવાય તે ॥

કાલકાલાય કાલાય મહાકાલાય મૃત્યવે
વીરાય વીરભદ્રાય ક્ષયદ્વીરાય શૂલિને ॥

મહાદેવાય મહતે પશૂનાં પતયે નમઃ
એકાય નીલકણ્ઠાય શ્રીકણ્ઠાય પિનાકિને ॥

નમો ઽનન્તાય સૂક્ષ્માય નમસ્તે મૃત્યુમન્યવે
પરાય પરમેશાય પરાત્પરતરાય તે ॥

પરાત્પરાય વિશ્વાય નમસ્તે વિશ્વમૂર્ત્તયે
નમો વિષ્ણુકલત્રાય વિષ્ણુક્ષેત્રાય ભાનવે ॥

કૈવર્તાય કિરાતાય મહાવ્યાધાય શાશ્વતે
ભૈરવાય શરણ્યાય મહાભૈરવરૂપિણે ॥

નમો નૃસિંહસંહર્ત્રે કામકાલપુરારયે
મહાપાશૌઘસંહર્ત્રે વિષ્ણુમાયાન્તકારિણે ॥

ત્ર્યંબકાય ત્ર્યક્ષરાય શિપિવિષ્ટાય મીઢુષે
મૃત્યુઞ્જયાય શર્વાય સર્વજ્ઞાય મખારયે ॥

મખેશાય વરેણ્યાય નમસ્તે વહ્નિરૂપિણે
મહાઘ્રાણાય જિહ્વાય પ્રાણાપાનપ્રવર્તિને ॥

ત્રિગુણાય ત્રિશૂલાય ગુણાતીતાય યોગિને
સંસારાય પ્રવાહાય મહાયન્ત્રપ્રવર્તિને ॥

નમશ્ચન્દ્રાગ્નિસૂર્યાય મુક્તિવૈચિત્ર્યહેતવે
વરદાયાવતારાય સર્વકારણહેતવે ॥

કપાલિને કરાલાય પતયે પુણ્યકીર્ત્તયે
અમોઘાયાગ્નિનેત્રાય લકુલીશાય શંભવે ॥

ભિષક્તમાય મુણ્ડાય દણ્ડિને યોગરૂપિણે
મેઘવાહાય દેવાય પાર્વતીપતયે નમઃ ॥

અવ્યક્તાય વિશોકાય સ્થિરાય સ્થિરધન્વિને
સ્થાણવે કૃત્તિવાસાય નમઃ પઞ્ચાર્થહેતવે ॥

વરદાયૈકપાદાય નમશ્ચન્દ્રાર્ધમૌલિને
નમસ્તે ઽધ્વરરાજાય વયસાં પતયે નમઃ ॥

યોગીશ્વરાય નિત્યાય સત્યાય પરમેષ્ઠિને
સર્વાત્મને નમસ્તુભ્યં નમઃ સર્વેશ્વરાય તે ॥

એકદ્વિત્રિચતુઃપઞ્ચ કૃત્વસ્ તે ઽસ્તુ નમોનમઃ
દશકૃત્વસ્તુ સાહસ્ર કૃત્વસ્તે ચ નમોનમઃ ॥

નમો ઽપરિમિતં કૃત્વા -નન્તકૃત્વો નમોનમઃ
નમોનમો નમો ભૂયઃ પુનર્ભૂયો નમોનમઃ ॥

નામ્નામષ્ટશતેનૈવં સ્તુત્વામૃતમયેન તુ
પુનસ્તુ પ્રાર્થયામાસ નૃસિંહઃ શરભેશ્વરમ્ ॥

યદા યદા મમાજ્ઞાનમ્ અત્યહઙ્કારદૂષિતમ્
તદા તદાપનેતવ્યં ત્વયૈવ પરમેશ્વર ॥

એવં વિજ્ઞાપયન્પ્રીતઃ શઙ્કરં નરકેસરી
નન્વશક્તો ભવાન્ વિષ્ણો જીવિતાન્તં પરાજિતઃ ॥

તદ્વક્ત્રશેષમાત્રાન્તં કૃત્વા સર્વસ્ય વિગ્રહમ્
શુક્તિશિત્યં તદા મઙ્ગં વીરભદ્રઃ ક્ષણાત્તતઃ ॥

અથ બ્રહ્માદયઃ સર્વે વીરભદ્ર ત્વયા દૃશા
જીવિતાઃ સ્મો વયં દેવાઃ પર્જન્યેનેવ પાદપાઃ ॥

યસ્ય ભીષા દહત્યગ્નિર્ ઉદેતિ ચ રવિઃ સ્વયમ્
વાતો વાતિ ચ સો ઽસિ ત્વં મૃત્યુર્ધાવતિ પઞ્ચમઃ ॥

યદવ્યક્તં પરં વ્યોમ કલાતીતં સદાશિવમ્
ભગવંસ્ત્વામેવ ભવં વદન્તિ બ્રહ્મવાદિનઃ ॥

કે વયમેવ ધાતુક્યે વેદને પરમેશ્વરઃ
ન વિદ્ધિ પરમં ધામ રૂપલાવણ્યવર્ણને ॥

ઉપસર્ગેષુ સર્વેષુ ત્રાયસ્વાસ્માન્ ગણાધિપ
એકાદશાત્મન્ ભગવાન્ વર્તતે રૂપવાન્ હરઃ ॥

ઈદૃશાન્ તે ઽવતારાણિ દૃષ્ટ્વા શિવ બહૂંસ્તમઃ
કદાચિત્ સંદિહેન્ નાસ્માંસ્ ત્વચ્ચિન્તાસ્તમયા તથા ॥

ગુઞ્જાગિરિવરતટા -મિતરૂપાણિ સર્વશઃ
અભ્યસંહર ગમ્યં તે ન નીતવ્યં પરાપરા ॥

દ્વે તનૂ તવ રુદ્રસ્ય વેદજ્ઞા બ્રાહ્મણા વિદુઃ
ઘોરાપ્યન્યા શિવાપ્યન્યા તે પ્રત્યેકમનેકધા ॥

ઇહાસ્માન્પાહિ ભગવન્ નિત્યાહતમહાબલઃ
ભવતા હિ જગત્સર્વં વ્યાપ્તં સ્વેનૈવ તેજસા ॥

બ્રહ્મવિષ્ણ્વિન્દ્રચન્દ્રાદિ વયં ચ પ્રમુખાઃ સુરાઃ
સુરાસુરાઃ સમ્પ્રસૂતાસ્ ત્વત્તઃ સર્વે મહેશ્વર ॥

બ્રહ્મા ચ ઇન્દ્રો વિષ્ણુશ્ ચ યમાદ્યા ન સુરાસુરાન્
તતો નિગૃહ્ય ચ હરિં સિંહ ઇત્ય્ ઉપચેતસમ્ ॥

યતો બિભર્ષિ સકલં વિભજ્ય તનુમષ્ટધા
અતો ઽસ્માન્ પાહિ ભગવન્ સુરાન્ દાનૈર્ અભીપ્સિતૈઃ ॥

ઉવાચ તાન્ સુરાન્દેવો મહર્ષીંશ્ ચ પુરાતનાન્
યથા જલે જલં ક્ષિપ્તં ક્ષીરં ક્ષીરે ઘૃતં ઘૃતે ॥

એક એવ તદા વિષ્ણુઃ શિવલીનો ન ચાન્યથા
એષ એવ નૃસિંહાત્મા સદર્પશ્ ચ મહાબલઃ ॥

જગત્સંહારકારેણ પ્રવૃત્તો નરકેસરી
યાજનીયો નમસ્તસ્મૈ મદ્ભક્તિસિદ્ધિકાઙ્ક્ષિભિઃ ॥

એતાવદુક્ત્વા ભગવાન્ વીરભદ્રો મહાબલઃ
અપશ્યન્ સર્વભૂતાનાં તત્રૈવાન્તરધીયત ॥

નૃસિંહકૃત્તિવસનસ્ તદાપ્રભૃતિ શઙ્કરઃ
વક્ત્રં તન્મુણ્ડમાલાયાં નાયકત્વેન કલ્પિતમ્ ॥

તતો દેવા નિરાતઙ્કાઃ કીર્તયન્તઃ કથામિમામ્
વિસ્મયોત્ફુલ્લનયના જગ્મુઃ સર્વે યથાગતમ્ ॥

ય ઇદં પરમાખ્યાનં પુણ્યં વેદૈઃ સમન્વિતમ્
પઠિત્વા શૃણુતે ચૈવ સર્વદુઃખવિનાશનમ્ ॥

ધન્યં યશસ્યમ્ આયુષ્યમ્ આરોગ્યં પુષ્ટિવર્ધનમ્
સર્વવિઘ્નપ્રશમનં સર્વવ્યાધિવિનાશનમ્ ॥

અપમૃત્યુપ્રશમનં મહાશાન્તિકરં શુભમ્
અરિચક્રપ્રશમનં સર્વાધિપ્રવિનાશનમ્ ॥

તતો દુઃસ્વપ્નશમનં સર્વભૂતનિવારણમ્
વિષગ્રહક્ષયકરં પુત્રપૌત્રાદિવર્ધનમ્ ॥

યોગસિદ્ધિપ્રદં સમ્યક્ શિવજ્ઞાનપ્રકાશકમ્
શેષલોકસ્ય સોપાનં વાઞ્છિતાર્થૈકસાધનમ્ ॥

વિષ્ણુમાયાનિરસનં દેવતાપરમાર્થદમ્
વાઞ્છાસિદ્ધિપ્રદં ચૈવ ઋદ્ધિપ્રજ્ઞાદિસાધનમ્ ॥

ઇદં તુ શરભાકારં પરં રૂપં પિનાકિનઃ
પ્રકાશિતવ્યં ભક્તેષુ ચિરેષૂદ્યમિતેષુ ચ ॥

તૈરેવ પઠિતવ્યં ચ શ્રોતવ્યં ચ શિવાત્મભિઃ
શિવોત્સવેષુ સર્વેષુ ચતુર્દશ્યષ્ટમીષુ ચ ॥

પઠેત્પ્રતિષ્ઠાકાલેષુ શિવસન્નિધિકારણમ્
ચોરવ્યાઘ્રાહિસિંહાન્ત કૃતો રાજભયેષુ ચ ॥

અત્રાન્યોત્પાતભૂકમ્પ દવાગ્નિપાંસુવૃષ્ટિષુ
ઉલ્કાપાતે મહાવાતે વિના વૃષ્ટ્યાતિવૃષ્ટિષુ ॥

અતસ્તત્ર પઠેદ્વિદ્વાઞ્ છિવભક્તો દૃઢવ્રતઃ
યઃ પઠેચ્છૃણુયાદ્વાપિ સ્તવં સર્વમનુત્તમમ્ ॥

સ રુદ્રત્વં સમાસાદ્ય રુદ્રસ્યાનુચરો ભવેત્ ॥