Liṅgapurāṇa, 1-108 · Chapter 1.96

kathaṃ devo mahādevo viśvasaṃhārakārakaḥ
śarabhākhyaṃ mahāghoraṃ vikṛtaṃ rūpamāsthitaḥ //

kiṃ kiṃ dhairyaṃ kṛtaṃ tena brūhi sarvam aśeṣataḥ
evamabhyarthito devair matiṃ cakre kṛpālayaḥ //

yattejastu nṛsiṃhākhyaṃ saṃhartuṃ parameśvaraḥ
tadarthaṃ smṛtavān rudro vīrabhadraṃ mahābalam //

ātmano bhairavaṃ rūpaṃ mahāpralayakārakam
ājagāma purā sadyo gaṇānāmagrato hasan //

sāṭṭahāsair gaṇavarair utpatadbhir itastataḥ
nṛsiṃharūpairatyugraiḥ koṭibhiḥ parivāritaḥ //

tāvadbhir abhito vīrair nṛtyadbhiś ca mudānvitaiḥ
krīḍadbhiś ca mahādhīrair brahmādyaiḥ kandukairiva //

adṛṣṭapūrvairanyaiś ca veṣṭito vīravanditaḥ
kalpāntajvalanajvālo vilasallocanatrayaḥ //

āttaśastro jaṭājūṭe jvaladbālendumaṇḍitaḥ
bālendudvitayākāra tīkṣṇadaṃṣṭrāṅkuradvayaḥ //

ākhaṇḍaladhanuḥkhaṇḍa saṃnibhabhrūlatāyutaḥ
mahāpracaṇḍahuṅkāra badhirīkṛtadiṅmukhaḥ //

nīlameghāñjanākāra bhīṣaṇaśmaśruradbhutaḥ
vādakhaṇḍam akhaṇḍābhyāṃ bhrāmayaṃstriśikhaṃ muhuḥ //

vīrabhadro 'pi bhagavān vīraśaktivijṛmbhitaḥ
svayaṃ vijñāpayāmāsa kimatra smṛtikāraṇam //

ājñāpaya jagatsvāmin prasādaḥ kriyatāṃ mayi
akāle bhayamutpannaṃ devānāmapi bhairava //

jvalitaḥ sa nṛsiṃhāgniḥ śamayainaṃ durāsadam
sāntvayan bodhayādau taṃ tena kiṃ nopaśāmyati //

tato matparamaṃ bhāvaṃ bhairavaṃ saṃpradarśaya
sūkṣmaṃ sūkṣmeṇa saṃhṛtya sthūlaṃ sthūlena tejasā //

vaktramānaya kṛttiṃ ca vīrabhadra mamājñayā
ityādiṣṭo gaṇādhyakṣaḥ praśāntavapurāsthitaḥ //

jagāma raṃhasā tatra yatrāste narakesarī
tatastaṃ bodhayāmāsa vīrabhadro haro harim //

uvāca vākyamīśānaḥ pitā putramivaurasam
jagatsukhāya bhagavann avatīrṇo 'si mādhava //

sthityarthena ca yukto 'si pareṇa parameṣṭhinā
jantucakraṃ bhagavatā rakṣitaṃ matsyarūpiṇā //

pucchenaiva samābadhya bhramannekārṇave purā
bibharṣi kūrmarūpeṇa vārāheṇoddhṛtā mahī //

anena harirūpeṇa hiraṇyakaśipurhataḥ
vāmanena balirbaddhas tvayā vikramatā punaḥ //

tvam eva sarvabhūtānāṃ prabhāvaḥ prabhur avyayaḥ
yadā yadā hi lokasya duḥkhaṃ kiṃcit prajāyate //

tadā tadāvatīrṇastvaṃ kariṣyasi nirāmayam
nādhikastvatsamo 'pyasti hare śivaparāyaṇa //

tvayā dharmāś ca vedāś ca śubhe mārge pratiṣṭhitāḥ
yadartham avatāro 'yaṃ nihataḥ so 'pi keśava //

atyantaghoraṃ bhagavan narasiṃha vapustava
upasaṃhara viśvātmaṃs tvameva mama saṃnidhau //

ityukto vīrabhadreṇa nṛsiṃhaḥ śāntayā girā
tato 'dhikaṃ mahāghoraṃ kopaṃ prajvālayaddhariḥ //

āgato 'si yatastatra gaccha tvaṃ mā hitaṃ vada
idānīṃ saṃhariṣyāmi jagadetaccarācaram //

saṃhartur na hi saṃhāraḥ svato vā parato 'pi vā
śāsitaṃ mama sarvatra śāstā ko 'pi na vidyate //

matprasādena sakalaṃ samaryādaṃ pravartate
ahaṃ hi sarvaśaktīnāṃ pravartakanivartakaḥ //

yad yad vibhūtimat sattvaṃ śrīmadūrjitameva vā
tattadviddhi gaṇādhyakṣa mama tejovijṛmbhitam //

devatāparamārthajñā mamaiva paramaṃ viduḥ
madaṃśāḥ śaktisampannā brahmaśakrādayaḥ surāḥ //

mannābhipaṅkajājjātaḥ purā brahmā caturmukhaḥ
tallalāṭasamutpanno bhagavānvṛṣabhadhvajaḥ //

rajasādhiṣṭhitaḥ sraṣṭā rudrastāmasa ucyate
ahaṃ niyantā sarvasya matparaṃ nāsti daivatam //

viśvādhikaḥ svatantraś ca kartā hartākhileśvaraḥ
idaṃ tu matparaṃ tejaḥ kaḥ punaḥ śrotumicchati //

ato māṃ śaraṇaṃ prāpya gaccha tvaṃ vigatajvaraḥ
avehi paramaṃ bhāvam idaṃ bhūtamaheśvaraḥ //

kālo 'smyahaṃ kālavināśahetur lokān samāhartum ahaṃ pravṛttaḥ
mṛtyormṛtyuṃ viddhi māṃ vīrabhadra jīvantyete matprasādena devāḥ //

sāhaṅkāramidaṃ śrutvā harer amitavikramaḥ
vihasyovāca sāvajñaṃ tato visphuritādharaḥ //

kiṃ na jānāsi viśveśaṃ saṃhartāraṃ pinākinam
asadvādo vivādaś ca vināśastvayi kevalaḥ //

tavānyonyāvatārāṇi kāni śeṣāṇi sāṃpratam
kṛtāni yena kenāpi kathāśeṣo bhaviṣyati //

doṣaṃ tvaṃ paśya etattvam avasthāmīdṛśīṃ gataḥ
tena saṃhāradakṣeṇa kṣaṇātsaṃkṣayameṣyasi //

prakṛtistvaṃ pumān rudras tvayi vīryaṃ samāhitam
tvannābhipaṅkajājjātaḥ pañcavaktraḥ pitāmahaḥ //

sṛṣṭyarthena jagatpūrvaṃ śaṅkaraṃ nīlalohitam
lalāṭe cintayāmāsa tapasyugre vyavasthitaḥ //

tallalāṭādabhūcchaṃbhoḥ sṛṣṭyarthaṃ tanna dūṣaṇam
aṃśo 'haṃ devadevasya mahābhairavarūpiṇaḥ //

tvatsaṃhāre niyukto 'smi vinayena balena ca
evaṃ rakṣo vidāryaiva tvaṃ śaktikalayā yutaḥ //

ahaṅkārāvalepena garjasi tvamatandritaḥ
upakāro hyasādhūnām apakārāya kevalam //

yadi siṃha maheśānaṃ svapunarbhūta manyase
na tvaṃ sraṣṭā na saṃhartā na svatantro hi kutracit //

kulālacakravacchaktyā prerito 'si pinākinā
adyāpi tava nikṣiptaṃ kapālaṃ kūrmarūpiṇaḥ //

harahāralatāmadhye mugdha kasmānna budhyase
vismṛtaṃ kiṃ tadaṃśena daṃṣṭrotpātanapīḍitaḥ //

vārāhavigrahaste 'dya sākrośaṃ tārakāriṇā
dagdho 'si yasya śūlāgre viṣvaksenacchalādbhavān //

dakṣayajñe śiraśchinnaṃ mayā te yajñarūpiṇaḥ
adyāpi tava putrasya brahmaṇaḥ pañcamaṃ śiraḥ //

chinnaṃ tamenābhisaṃdhaṃ tadaṃśaṃ tasya tadbalam
nirjitastvaṃ dadhīcena saṃgrāme samarudgaṇaḥ //

kaṇḍūyamāne śirasi kathaṃ tadvismṛtaṃ tvayā
cakraṃ vikramato yasya cakrapāṇe tava priyam //

kutaḥ prāptaṃ kṛtaṃ kena tvayā tadapi vismṛtam
te mayā sakalā lokā gṛhītāstvaṃ payonidhau //

nidrāparavaśaḥ śeṣe sa kathaṃ sāttviko bhavān
tvadādistambaparyantaṃ rudraśaktivijṛmbhitam //

śaktimānabhitastvaṃ ca hy analastvaṃ ca mohitaḥ
tattejaso 'pi māhātmyaṃ yuvāṃ draṣṭuṃ na hi kṣamau //

sthūlā ye hi prapaśyanti tadviṣṇoḥ paramaṃ padam
dyāvāpṛthivyā indrāgni yamasya varuṇasya ca //

dhvāntodare śaśāṅkasya janitvā parameśvaraḥ
kālo 'si tvaṃ mahākālaḥ kālakālo maheśvaraḥ //

atastvamugrakalayā mṛtyormṛtyurbhaviṣyasi
sthiradhanvā kṣayo vīro vīro viśvādhikaḥ prabhuḥ //

upahastā jvaraṃ bhīmo mṛgapakṣihiraṇmayaḥ
śāstāśeṣasya jagato na tvaṃ naivacaturmukhaḥ //

itthaṃ sarvaṃ samālokya saṃharātmānam ātmanā
no cedidānīṃ krodhasya mahābhairavarūpiṇaḥ //

vajrāśaniriva sthāṇos tv evaṃ mṛtyuḥ patiṣyati
ityukto vīrabhadreṇa nṛsiṃhaḥ krodhavihvalaḥ //

nanāda tanuvegena taṃ gṛhītuṃ pracakrame
atrāntare mahāghoraṃ vipakṣabhayakāraṇam //

gaganavyāpi durdharṣa śaivatejaḥsamudbhavam
vīrabhadrasya tadrūpaṃ tatkṣaṇādeva dṛśyate //

na taddhiraṇmayaṃ saumyaṃ na sauraṃ nāgnisaṃbhavam
na taḍiccandrasadṛśam anaupamyaṃ maheśvaram //

tadā tejāṃsi sarvāṇi tasmin līnāni śāṅkare
tato vyakto mahātejā vyakte saṃbhavatastataḥ //

rudrasādhāraṇaṃ caiva cihnitaṃ vikṛtākṛti
tataḥ saṃhārarūpeṇa suvyaktaḥ parameśvaraḥ //

paśyatāṃ sarvadevānāṃ jayaśabdādimaṅgalaiḥ
sahasrabāhur jaṭilaś candrārdhakṛtaśekharaḥ //

sa mṛgārdhaśarīreṇa pakṣābhyāṃ cañcunā dvijāḥ
atitīkṣṇamahādaṃṣṭro vajratulyanakhāyudhaḥ //

kaṇṭhe kālo mahābāhuś catuṣpād vahnisaṃbhavaḥ
yugāntodyatajīmūta bhīmagaṃbhīraniḥsvanaḥ //

samaṃ kupitavṛttāgni vyāvṛttanayanatrayaḥ
spaṣṭadaṃṣṭro 'dharoṣṭhaś ca huṅkāreṇa yuto haraḥ //

haristaddarśanādeva vinaṣṭabalavikramaḥ
bibhrad aurmyaṃ sahasrāṃśor adhaḥ khadyotavibhramam //

atha vibhramya pakṣābhyāṃ nābhipāde 'bhyudārayan
pādāvābadhya pucchena bāhubhyāṃ bāhumaṇḍalam //

bhindannurasi bāhubhyāṃ nijagrāha haro harim
tato jagāma gaganaṃ devaiḥ saha maharṣibhiḥ //

sahasaiva bhayādviṣṇuṃ vihagaś ca yathoragam
utkṣipyotkṣipya saṃgṛhya nipātya ca nipātya ca //

uḍḍīyoḍḍīya bhagavān pakṣāghātavimohitam
hariṃ harantaṃ vṛṣabhaṃ viśveśānaṃ tamīśvaram //

anuyānti surāḥ sarve namovākyena tuṣṭuvuḥ
nīyamānaḥ paravaśo dīnavaktraḥ kṛtāñjaliḥ //

tuṣṭāva parameśānaṃ haristaṃ lalitākṣaraiḥ
namo rudrāya śarvāya mahāgrāsāya viṣṇave //

nama ugrāya bhīmāya namaḥ krodhāya manyave
namo bhavāya śarvāya śaṅkarāya śivāya te //

kālakālāya kālāya mahākālāya mṛtyave
vīrāya vīrabhadrāya kṣayadvīrāya śūline //

mahādevāya mahate paśūnāṃ pataye namaḥ
ekāya nīlakaṇṭhāya śrīkaṇṭhāya pinākine //

namo 'nantāya sūkṣmāya namaste mṛtyumanyave
parāya parameśāya parātparatarāya te //

parātparāya viśvāya namaste viśvamūrttaye
namo viṣṇukalatrāya viṣṇukṣetrāya bhānave //

kaivartāya kirātāya mahāvyādhāya śāśvate
bhairavāya śaraṇyāya mahābhairavarūpiṇe //

namo nṛsiṃhasaṃhartre kāmakālapurāraye
mahāpāśaughasaṃhartre viṣṇumāyāntakāriṇe //

tryaṃbakāya tryakṣarāya śipiviṣṭāya mīḍhuṣe
mṛtyuñjayāya śarvāya sarvajñāya makhāraye //

makheśāya vareṇyāya namaste vahnirūpiṇe
mahāghrāṇāya jihvāya prāṇāpānapravartine //

triguṇāya triśūlāya guṇātītāya yogine
saṃsārāya pravāhāya mahāyantrapravartine //

namaścandrāgnisūryāya muktivaicitryahetave
varadāyāvatārāya sarvakāraṇahetave //

kapāline karālāya pataye puṇyakīrttaye
amoghāyāgninetrāya lakulīśāya śaṃbhave //

bhiṣaktamāya muṇḍāya daṇḍine yogarūpiṇe
meghavāhāya devāya pārvatīpataye namaḥ //

avyaktāya viśokāya sthirāya sthiradhanvine
sthāṇave kṛttivāsāya namaḥ pañcārthahetave //

varadāyaikapādāya namaścandrārdhamauline
namaste 'dhvararājāya vayasāṃ pataye namaḥ //

yogīśvarāya nityāya satyāya parameṣṭhine
sarvātmane namastubhyaṃ namaḥ sarveśvarāya te //

ekadvitricatuḥpañca kṛtvas te 'stu namonamaḥ
daśakṛtvastu sāhasra kṛtvaste ca namonamaḥ //

namo 'parimitaṃ kṛtvā -nantakṛtvo namonamaḥ
namonamo namo bhūyaḥ punarbhūyo namonamaḥ //

nāmnāmaṣṭaśatenaivaṃ stutvāmṛtamayena tu
punastu prārthayāmāsa nṛsiṃhaḥ śarabheśvaram //

yadā yadā mamājñānam atyahaṅkāradūṣitam
tadā tadāpanetavyaṃ tvayaiva parameśvara //

evaṃ vijñāpayanprītaḥ śaṅkaraṃ narakesarī
nanvaśakto bhavān viṣṇo jīvitāntaṃ parājitaḥ //

tadvaktraśeṣamātrāntaṃ kṛtvā sarvasya vigraham
śuktiśityaṃ tadā maṅgaṃ vīrabhadraḥ kṣaṇāttataḥ //

atha brahmādayaḥ sarve vīrabhadra tvayā dṛśā
jīvitāḥ smo vayaṃ devāḥ parjanyeneva pādapāḥ //

yasya bhīṣā dahatyagnir udeti ca raviḥ svayam
vāto vāti ca so 'si tvaṃ mṛtyurdhāvati pañcamaḥ //

yadavyaktaṃ paraṃ vyoma kalātītaṃ sadāśivam
bhagavaṃstvāmeva bhavaṃ vadanti brahmavādinaḥ //

ke vayameva dhātukye vedane parameśvaraḥ
na viddhi paramaṃ dhāma rūpalāvaṇyavarṇane //

upasargeṣu sarveṣu trāyasvāsmān gaṇādhipa
ekādaśātman bhagavān vartate rūpavān haraḥ //

īdṛśān te 'vatārāṇi dṛṣṭvā śiva bahūṃstamaḥ
kadācit saṃdihen nāsmāṃs tvaccintāstamayā tathā //

guñjāgirivarataṭā -mitarūpāṇi sarvaśaḥ
abhyasaṃhara gamyaṃ te na nītavyaṃ parāparā //

dve tanū tava rudrasya vedajñā brāhmaṇā viduḥ
ghorāpyanyā śivāpyanyā te pratyekamanekadhā //

ihāsmānpāhi bhagavan nityāhatamahābalaḥ
bhavatā hi jagatsarvaṃ vyāptaṃ svenaiva tejasā //

brahmaviṣṇvindracandrādi vayaṃ ca pramukhāḥ surāḥ
surāsurāḥ samprasūtās tvattaḥ sarve maheśvara //

brahmā ca indro viṣṇuś ca yamādyā na surāsurān
tato nigṛhya ca hariṃ siṃha ity upacetasam //

yato bibharṣi sakalaṃ vibhajya tanumaṣṭadhā
ato 'smān pāhi bhagavan surān dānair abhīpsitaiḥ //

uvāca tān surāndevo maharṣīṃś ca purātanān
yathā jale jalaṃ kṣiptaṃ kṣīraṃ kṣīre ghṛtaṃ ghṛte //

eka eva tadā viṣṇuḥ śivalīno na cānyathā
eṣa eva nṛsiṃhātmā sadarpaś ca mahābalaḥ //

jagatsaṃhārakāreṇa pravṛtto narakesarī
yājanīyo namastasmai madbhaktisiddhikāṅkṣibhiḥ //

etāvaduktvā bhagavān vīrabhadro mahābalaḥ
apaśyan sarvabhūtānāṃ tatraivāntaradhīyata //

nṛsiṃhakṛttivasanas tadāprabhṛti śaṅkaraḥ
vaktraṃ tanmuṇḍamālāyāṃ nāyakatvena kalpitam //

tato devā nirātaṅkāḥ kīrtayantaḥ kathāmimām
vismayotphullanayanā jagmuḥ sarve yathāgatam //

ya idaṃ paramākhyānaṃ puṇyaṃ vedaiḥ samanvitam
paṭhitvā śṛṇute caiva sarvaduḥkhavināśanam //

dhanyaṃ yaśasyam āyuṣyam ārogyaṃ puṣṭivardhanam
sarvavighnapraśamanaṃ sarvavyādhivināśanam //

apamṛtyupraśamanaṃ mahāśāntikaraṃ śubham
aricakrapraśamanaṃ sarvādhipravināśanam //

tato duḥsvapnaśamanaṃ sarvabhūtanivāraṇam
viṣagrahakṣayakaraṃ putrapautrādivardhanam //

yogasiddhipradaṃ samyak śivajñānaprakāśakam
śeṣalokasya sopānaṃ vāñchitārthaikasādhanam //

viṣṇumāyānirasanaṃ devatāparamārthadam
vāñchāsiddhipradaṃ caiva ṛddhiprajñādisādhanam //

idaṃ tu śarabhākāraṃ paraṃ rūpaṃ pinākinaḥ
prakāśitavyaṃ bhakteṣu cireṣūdyamiteṣu ca //

taireva paṭhitavyaṃ ca śrotavyaṃ ca śivātmabhiḥ
śivotsaveṣu sarveṣu caturdaśyaṣṭamīṣu ca //

paṭhetpratiṣṭhākāleṣu śivasannidhikāraṇam
coravyāghrāhisiṃhānta kṛto rājabhayeṣu ca //

atrānyotpātabhūkampa davāgnipāṃsuvṛṣṭiṣu
ulkāpāte mahāvāte vinā vṛṣṭyātivṛṣṭiṣu //

atastatra paṭhedvidvāñ chivabhakto dṛḍhavrataḥ
yaḥ paṭhecchṛṇuyādvāpi stavaṃ sarvamanuttamam //

sa rudratvaṃ samāsādya rudrasyānucaro bhavet //