લિઙ્ગપુરાણ · અધ્યાય 1.93

અન્ધકો નામ દૈત્યેન્દ્રો મન્દરે ચારુકન્દરે
દમિતસ્તુ કથં લેભે ગાણપત્યં મહેશ્વરાત્ ॥

વક્તુમર્હસિ ચાસ્માકં યથાવૃત્તં યથાશ્રુતમ્
અન્ધકાનુગ્રહં ચૈવ મન્દરે શોષણં તથા ॥

વરલાભમશેષં ચ પ્રવદામિ સમાસતઃ
હિરણ્યાક્ષસ્ય તનયો હિરણ્યનયનોપમઃ ॥

પુરાન્ધક ઇતિ ખ્યાતસ્ તપસા લબ્ધવિક્રમઃ
પ્રસાદાદ્બ્રહ્મણઃ સાક્ષાદ્ અવધ્યત્વમવાપ્ય ચ ॥

ત્રૈલોક્યમખિલં ભુક્ત્વા જિત્વા ચેન્દ્રપુરં પુરા
લીલયા ચાપ્રયત્નેન ત્રાસયામાસ વાસવમ્ ॥

બાધિતાસ્તાડિતા બદ્ધાઃ પાતિતાસ્તેન તે સુરાઃ
વિવિશુર્મન્દરં ભીતા નારાયણપુરોગમાઃ ॥

એવં સંપીડ્ય વૈ દેવાન્ અન્ધકો ઽપિ મહાસુરઃ
યદૃચ્છયા ગિરિં પ્રાપ્તો મન્દરં ચારુકન્દરમ્ ॥

તતસ્તે સમસ્તાઃ સુરેન્દ્રાઃ સસાધ્યાઃ સુરેશં મહેશં પુરેત્યાહુરેવમ્
દ્રુતં ચાલ્પવીર્યપ્રભિન્નાઙ્ગભિન્ના વયં દૈત્યરાજસ્ય શસ્ત્રૈર્નિકૃત્તાઃ ॥

ઇતીદમખિલં શ્રુત્વા દૈત્યાગમમ્ અનૌપમમ્
ગણેશ્વરૈશ્ ચ ભગવાન્ અન્ધકાભિમુખં યયૌ ॥

જયેતિ વાચા ભગવન્તમ્ ઊચુઃ કિરીટબદ્ધાઞ્જલયઃ સમન્તાત્ ॥

અથાશેષાસુરાંસ્તસ્ય કોટિકોટિશતૈસ્ તતઃ
ભસ્મીકૃત્ય મહાદેવો નિર્બિભેદાન્ધકં તદા ॥

શૂલેન શૂલિના પ્રોતં દગ્ધકલ્મષકઞ્ચુકમ્
દૃષ્ટ્વાન્ધકં નનાદેશં પ્રણમ્ય સ પિતામહઃ ॥

તન્નાદશ્રવણાન્નેદુર્ દેવા દેવં પ્રણમ્ય તમ્
નનૃતુર્મુનયઃ સર્વે મુમુદુર્ગણપુઙ્ગવાઃ ॥

સસૃજુઃ પુષ્પવર્ષાણિ દેવાઃ શંભોસ્તદોપરિ
ત્રૈલોક્યમખિલં હર્ષાન્ નનન્દ ચ નનાદ ચ ॥

દગ્ધો ઽગ્નિના ચ શૂલેન પ્રોતઃ પ્રેત ઇવાન્ધકઃ
સાત્ત્વિકં ભાવમાસ્થાય ચિન્તયામાસ ચેતસા ॥

જન્માન્તરે ઽપિ દેવેન દગ્ધો યસ્માચ્છિવેન વૈ
આરાધિતો મયા શંભુઃ પુરા સાક્ષાન્મહેશ્વરઃ ॥

તસ્માદેતન્મયા લબ્ધમ્ અન્યથા નોપપદ્યતે
યઃ સ્મરેન્મનસા રુદ્રં પ્રાણાન્તે સકૃદેવ વા ॥

સ યાતિ શિવસાયુજ્યં કિં પુનર્બહુશઃ સ્મરન્
બ્રહ્મા ચ ભગવાન્વિષ્ણુઃ સર્વે દેવાઃ સવાસવાઃ ॥

શરણં પ્રાપ્ય તિષ્ઠન્તિ તમેવ શરણં વ્રજેત્
એવં સંચિન્ત્ય તુષ્ટાત્મા સો ઽન્ધકશ્ ચાન્ધકાર્દનમ્ ॥

સગણં શિવમીશાનમ્ અસ્તુવત્પુણ્યગૌરવાત્
પ્રાર્થિતસ્તેન ભગવાન્ પરમાર્તિહરો હરઃ ॥

હિરણ્યનેત્રતનયં શૂલાગ્રસ્થં સુરેશ્વરઃ
પ્રોવાચ દાનવં પ્રેક્ષ્ય ઘૃણયા નીલલોહિતઃ ॥

તુષ્ટો ઽસ્મિ વત્સ ભદ્રં તે કામં કિં કરવાણિ તે
વરાન્વરય દૈત્યેન્દ્ર વરદો ઽહં તવાન્ધક ॥

શ્રુત્વા વાક્યં તદા શંભોર્ હિરણ્યનયનાત્મજઃ
હર્ષગદ્ગદયા વાચા પ્રોવાચેદં મહેશ્વરમ્ ॥

ભગવન્દેવદેવેશ ભક્તાર્તિહર શઙ્કર
ત્વયિ ભક્તિઃ પ્રસીદેશ યદિ દેયો વરશ્ ચ મે ॥

શ્રુત્વા ભવો ઽપિ વચનમ્ અન્ધકસ્ય મહાત્મનઃ
પ્રદદૌ દુર્લભાં શ્રદ્ધાં દૈત્યેન્દ્રાય મહાદ્યુતિઃ ॥

ગાણપત્યં ચ દૈત્યાય પ્રદદૌ ચાવરોપ્ય તમ્
પ્રણેમુસ્તં સુરેન્દ્રાદ્યા ગાણપત્યે પ્રતિષ્ઠિતમ્ ॥