Liṅgapurāṇa, 1-108 · Chapter 1.93

andhako nāma daityendro mandare cārukandare
damitastu kathaṃ lebhe gāṇapatyaṃ maheśvarāt //

vaktumarhasi cāsmākaṃ yathāvṛttaṃ yathāśrutam
andhakānugrahaṃ caiva mandare śoṣaṇaṃ tathā //

varalābhamaśeṣaṃ ca pravadāmi samāsataḥ
hiraṇyākṣasya tanayo hiraṇyanayanopamaḥ //

purāndhaka iti khyātas tapasā labdhavikramaḥ
prasādādbrahmaṇaḥ sākṣād avadhyatvamavāpya ca //

trailokyamakhilaṃ bhuktvā jitvā cendrapuraṃ purā
līlayā cāprayatnena trāsayāmāsa vāsavam //

bādhitāstāḍitā baddhāḥ pātitāstena te surāḥ
viviśurmandaraṃ bhītā nārāyaṇapurogamāḥ //

evaṃ saṃpīḍya vai devān andhako 'pi mahāsuraḥ
yadṛcchayā giriṃ prāpto mandaraṃ cārukandaram //

tataste samastāḥ surendrāḥ sasādhyāḥ sureśaṃ maheśaṃ puretyāhurevam
drutaṃ cālpavīryaprabhinnāṅgabhinnā vayaṃ daityarājasya śastrairnikṛttāḥ //

itīdamakhilaṃ śrutvā daityāgamam anaupamam
gaṇeśvaraiś ca bhagavān andhakābhimukhaṃ yayau //

jayeti vācā bhagavantam ūcuḥ kirīṭabaddhāñjalayaḥ samantāt //

athāśeṣāsurāṃstasya koṭikoṭiśatais tataḥ
bhasmīkṛtya mahādevo nirbibhedāndhakaṃ tadā //

śūlena śūlinā protaṃ dagdhakalmaṣakañcukam
dṛṣṭvāndhakaṃ nanādeśaṃ praṇamya sa pitāmahaḥ //

tannādaśravaṇānnedur devā devaṃ praṇamya tam
nanṛturmunayaḥ sarve mumudurgaṇapuṅgavāḥ //

sasṛjuḥ puṣpavarṣāṇi devāḥ śaṃbhostadopari
trailokyamakhilaṃ harṣān nananda ca nanāda ca //

dagdho 'gninā ca śūlena protaḥ preta ivāndhakaḥ
sāttvikaṃ bhāvamāsthāya cintayāmāsa cetasā //

janmāntare 'pi devena dagdho yasmācchivena vai
ārādhito mayā śaṃbhuḥ purā sākṣānmaheśvaraḥ //

tasmādetanmayā labdham anyathā nopapadyate
yaḥ smarenmanasā rudraṃ prāṇānte sakṛdeva vā //

sa yāti śivasāyujyaṃ kiṃ punarbahuśaḥ smaran
brahmā ca bhagavānviṣṇuḥ sarve devāḥ savāsavāḥ //

śaraṇaṃ prāpya tiṣṭhanti tameva śaraṇaṃ vrajet
evaṃ saṃcintya tuṣṭātmā so 'ndhakaś cāndhakārdanam //

sagaṇaṃ śivamīśānam astuvatpuṇyagauravāt
prārthitastena bhagavān paramārtiharo haraḥ //

hiraṇyanetratanayaṃ śūlāgrasthaṃ sureśvaraḥ
provāca dānavaṃ prekṣya ghṛṇayā nīlalohitaḥ //

tuṣṭo 'smi vatsa bhadraṃ te kāmaṃ kiṃ karavāṇi te
varānvaraya daityendra varado 'haṃ tavāndhaka //

śrutvā vākyaṃ tadā śaṃbhor hiraṇyanayanātmajaḥ
harṣagadgadayā vācā provācedaṃ maheśvaram //

bhagavandevadeveśa bhaktārtihara śaṅkara
tvayi bhaktiḥ prasīdeśa yadi deyo varaś ca me //

śrutvā bhavo 'pi vacanam andhakasya mahātmanaḥ
pradadau durlabhāṃ śraddhāṃ daityendrāya mahādyutiḥ //

gāṇapatyaṃ ca daityāya pradadau cāvaropya tam
praṇemustaṃ surendrādyā gāṇapatye pratiṣṭhitam //