લિઙ્ગપુરાણ · અધ્યાય 1.85

સર્વવ્રતેષુ સમ્પૂજ્ય દેવદેવમુમાપતિમ્
જપેત્પઞ્ચાક્ષરીં વિદ્યાં વિધિનૈવ દ્વિજોત્તમાઃ ॥

જપાદેવ ન સંદેહો વ્રતાનાં વૈ વિશેષતઃ
સમાપ્તિર્નાન્યથા તસ્માજ્ જપેત્પઞ્ચાક્ષરીં શુભામ્ ॥

કથં પઞ્ચાક્ષરી વિદ્યા પ્રભાવો વા કથં વદ
ક્રમોપાયં મહાભાગ શ્રોતું કૌતૂહલં હિ નઃ ॥

પુરા દેવેન રુદ્રેણ દેવદેવેન શંભુના
પાર્વત્યાઃ કથિતં પુણ્યં પ્રવદામિ સમાસતઃ ॥

ભગવન્દેવદેવેશ સર્વલોકમહેશ્વર
પઞ્ચાક્ષરસ્ય માહાત્મ્યં શ્રોતુમિચ્છામિ તત્ત્વતઃ ॥

પઞ્ચાક્ષરસ્ય માહાત્મ્યં વર્ષકોટિશતૈરપિ
ન શક્યં કથિતું દેવિ તસ્માત્ સંક્ષેપતઃ શૃણુ ॥

પ્રલયે સમનુપ્રાપ્તે નષ્ટે સ્થાવરજઙ્ગમે
નષ્ટે દેવાસુરે ચૈવ નષ્ટે ચોરગરાક્ષસે ॥

સર્વં પ્રકૃતિમાપન્નં ત્વયા પ્રલયમેષ્યતિ
એકો ઽહં સંસ્થિતો દેવિ ન દ્વિતીયો ઽસ્તિ કુત્રચિત્ ॥

તસ્મિન્વેદાશ્ ચ શાસ્ત્રાણિ મન્ત્રે પઞ્ચાક્ષરે સ્થિતાઃ
તે નાશં નૈવ સમ્પ્રાપ્તા મચ્છક્ત્યા હ્યનુપાલિતાઃ ॥

અહમેકો દ્વિધાપ્યાસં પ્રકૃત્યાત્મપ્રભેદતઃ
સ તુ નારાયણઃ શેતે દેવો માયામયીં તનુમ્ ॥

આસ્થાય યોગપર્યઙ્ક શયને તોયમધ્યગઃ
તન્નાભિપઙ્કજાજ્જાતઃ પઞ્ચવક્ત્રઃ પિતામહઃ ॥

સિસૃક્ષમાણો લોકાન્વૈ ત્રીનશક્તો ઽસહાયવાન્
દશ બ્રહ્મા સસર્જાદૌ માનસાનમિતૌજસઃ ॥

તેષાં સૃષ્ટિપ્રસિદ્ધ્યર્થં માં પ્રોવાચ પિતામહઃ
મત્પુત્રાણાં મહાદેવ શક્તિં દેહિ મહેશ્વર ॥

ઇતિ તેન સમાદિષ્ટઃ પઞ્ચવક્ત્રધરો હ્યહમ્
પઞ્ચાક્ષરાન્પઞ્ચમુખૈઃ પ્રોક્તવાન્ પદ્મયોનયે ॥

તાન્પઞ્ચવદનૈર્ગૃહ્ણન્ બ્રહ્મા લોકપિતામહઃ
વાચ્યવાચકભાવેન જ્ઞાતવાન્પરમેશ્વરમ્ ॥

વાચ્યઃ પઞ્ચાક્ષરૈર્દેવિ શિવસ્ત્રૈલોક્યપૂજિતઃ
વાચકઃ પરમો મન્ત્રસ્ તસ્ય પઞ્ચાક્ષરઃ સ્થિતઃ ॥

જ્ઞાત્વા પ્રયોગં વિધિના ચ સિદ્ધિં લબ્ધ્વા તથા પઞ્ચમુખો મહાત્મા
પ્રોવાચ પુત્રેષુ જગદ્ધિતાય મન્ત્રં મહાર્થં કિલ પઞ્ચવર્ણમ્ ॥

તે લબ્ધ્વા મન્ત્રરત્નં તુ સાક્ષાલ્લોકપિતામહાત્
તમારાધયિતું દેવં પરાત્પરતરં શિવમ્ ॥

તતસ્તુતોષ ભગવાન્ ત્રિમૂર્તીનાં પરઃ શિવઃ
દત્તવાનખિલં જ્ઞાનમ્ અણિમાદિગુણાષ્ટકમ્ ॥

તે ઽપિ લબ્ધ્વા વરાન્વિપ્રાસ્ તદારાધનકાઙ્ક્ષિણઃ
મેરોસ્તુ શિખરે રમ્યે મુઞ્જવાન્નામ પર્વતઃ ॥

મત્પ્રિયઃ સતતં શ્રીમાન્ મદ્ભૂતૈઃ પરિરક્ષિતઃ
તસ્યાભ્યાશે તપસ્તીવ્રં લોકસૃષ્ટિસમુત્સુકાઃ ॥

દિવ્યવર્ષસહસ્રં તુ વાયુભક્ષાઃ સમાચરન્
તિષ્ઠન્તો ઽનુગ્રહાર્થાય દેવિ તે ઋષયઃ પુરા ॥

તેષાં ભક્તિમહં દૃષ્ટ્વા સદ્યઃ પ્રત્યક્ષતામિયામ્
પઞ્ચાક્ષરમ્ ઋષિચ્છન્દો દૈવતં શક્તિબીજવત્ ॥

ન્યાસં ષડઙ્ગં દિગ્બન્ધં વિનિયોગમશેષતઃ
પ્રોક્તવાનહમાર્યાણાં લોકાનાં હિતકામ્યયા ॥

તચ્છ્રુત્વા મન્ત્રમાહાત્મ્યમ્ ઋષયસ્તે તપોધનાઃ
મન્ત્રસ્ય વિનિયોગં ચ કૃત્વા સર્વમનુષ્ઠિતાઃ ॥

તન્માહાત્મ્યાત્ તદા લોકાન્ સદેવાસુરમાનુષાન્
વર્ણાન્વર્ણવિભાગાંશ્ ચ સર્વધર્માંશ્ ચ શોભનાન્ ॥

પૂર્વકલ્પસમુદ્ભૂતાઞ્ છ્રુતવન્તો યથા પુરા
પઞ્ચાક્ષરપ્રભાવાચ્ચ લોકા વેદા મહર્ષયઃ ॥

તિષ્ઠન્તિ શાશ્વતા ધર્મા દેવાઃ સર્વમિદં જગત્
તદ્ ઇદાનીં પ્રવક્ષ્યામિ શૃણુ ચાવહિતાખિલમ્ ॥

અલ્પાક્ષરં મહાર્થં ચ વેદસારં વિમુક્તિદમ્
આજ્ઞાસિદ્ધમસંદિગ્ધં વાક્યમેતચ્છિવાત્મકમ્ ॥

નાનાસિદ્ધિયુતં દિવ્યં લોકચિત્તાનુરઞ્જકમ્
સુનિશ્ચિતાર્થં ગંભીરં વાક્યં મે પારમેશ્વરમ્ ॥

મન્ત્રં મુખસુખોચ્ચાર્યમ્ અશેષાર્થપ્રસાધકમ્
તદ્બીજં સર્વવિદ્યાનાં મન્ત્રમાદ્યં સુશોભનમ્ ॥

અતિસૂક્ષ્મં મહાર્થં ચ જ્ઞેયં તદ્વટબીજવત્
વેદઃ સ ત્રિગુણાતીતઃ સર્વજ્ઞઃ સર્વકૃત્પ્રભુઃ ॥

ઓમિત્યેકાક્ષરં મન્ત્રં સ્થિતઃ સર્વગતઃ શિવઃ
મન્ત્રે ષડક્ષરે સૂક્ષ્મે પઞ્ચાક્ષરતનુઃ શિવઃ ॥

વાચ્યવાચકભાવેન સ્થિતઃ સાક્ષાત્સ્વભાવતઃ
વાચ્યઃ શિવઃ પ્રમેયત્વાન્ મન્ત્રસ્તદ્વાચકઃ સ્મૃતઃ ॥

વાચ્યવાચકભાવો ઽયમ્ અનાદિઃ સંસ્થિતસ્તયોઃ
વેદે શિવાગમે વાપિ યત્ર યત્ર ષડક્ષરઃ ॥

મન્ત્રઃ સ્થિતઃ સદા મુખ્યો લોકે પઞ્ચાક્ષરો મતઃ
કિં તસ્ય બહુભિર્ મન્ત્રૈઃ શાસ્ત્રૈર્વા બહુવિસ્તૃતૈઃ ॥

યસ્યૈવં હૃદિ સંસ્થો ઽયં મન્ત્રઃ સ્યાત્પારમેશ્વરઃ
તેનાધીતં શ્રુતં તેન તેન સર્વમનુષ્ઠિતમ્ ॥

યો વિદ્વાન્વૈ જપેત્સમ્યગ્ અધીત્યૈવ વિધાનતઃ
એતાવદ્ધિ શિવજ્ઞાનમ્ એતાવત્પરમં પદમ્ ॥

એતાવદ્ બ્રહ્મવિદ્યા ચ તસ્માન્નિત્યં જપેદ્બુધઃ
પઞ્ચાક્ષરૈઃ સપ્રણવો મન્ત્રો ઽયં હૃદયં મમ ॥

ગુહ્યાદ્ગુહ્યતરં સાક્ષાન્ મોક્ષજ્ઞાનમ્ અનુત્તમમ્
અસ્ય મન્ત્રસ્ય વક્ષ્યામિ ઋષિચ્છન્દો ઽધિદૈવતમ્ ॥

બીજં શક્તિં સ્વરં વર્ણં સ્થાનં ચૈવાક્ષરં પ્રતિ
વામદેવો નામ ઋષિઃ પઙ્ક્તિશ્છન્દ ઉદાહૃતઃ ॥

દેવતા શિવ એવાહં મન્ત્રસ્યાસ્ય વરાનને
નકારાદીનિ બીજાનિ પઞ્ચભૂતાત્મકાનિ ચ ॥

આત્માનં પ્રણવં વિદ્ધિ સર્વવ્યાપિનમવ્યયમ્
શક્તિસ્ત્વમેવ દેવેશિ સર્વદેવનમસ્કૃતે ॥

ત્વદીયં પ્રણવં કિંચિન્ મદીયં પ્રણવં તથા
ત્વદીયં દેવિ મન્ત્રાણાં શક્તિભૂતં ન સંશયઃ ॥

અકારોકારમકારા મદીયે પ્રણવે સ્થિતાઃ
ઉકારં ચ મકારં ચ અકારં ચ ક્રમેણ વૈ ॥

ત્વદીયં પ્રણવં વિદ્ધિ ત્રિમાત્રં પ્લુતમુત્તમમ્
ઓઙ્કારસ્ય સ્વરોદાત્ત ઋષિર્બ્રહ્મ સિતં વપુઃ ॥

છન્દો દેવી ચ ગાયત્રી પરમાત્માધિદેવતા
ઉદાત્તઃ પ્રથમસ્તદ્વચ્ ચતુર્થશ્ ચ દ્વિતીયકઃ ॥

પઞ્ચમઃ સ્વરિતશ્ચૈવ મધ્યમો નિષધઃ સ્મૃતાઃ
નકારઃ પીતવર્ણશ્ ચ સ્થાનં પૂર્વમુખં સ્મૃતમ્ ॥

ઇન્દ્રો ઽધિદૈવતં છન્દો ગાયત્રી ગૌતમ ઋષિઃ
મકારઃ કૃષ્ણવર્ણો ઽસ્ય સ્થાનં વૈ દક્ષિણામુખમ્ ॥

છન્દો ઽનુષ્ટુપ્ ઋષિશ્ચાત્રી રુદ્રો દૈવતમુચ્યતે
શિકારો ધૂમ્રવર્ણો ઽસ્ય સ્થાનં વૈ પશ્ચિમં મુખમ્ ॥

વિશ્વામિત્ર ઋષિસ્ત્રિષ્ટુપ્ છન્દો વિષ્ણુસ્તુ દૈવતમ્
વાકારો હેમવર્ણો ઽસ્ય સ્થાનં ચૈવોત્તરં મુખમ્ ॥

બ્રહ્માધિદૈવતં છન્દો બૃહતી ચાઙ્ગિરા ઋષિઃ
યકારો રક્તવર્ણશ્ ચ સ્થાનમ્ ઊર્ધ્વં મુખં વિરાટ્ ॥

છન્દ ઋષિર્ભરદ્વાજઃ સ્કન્દો દૈવતમુચ્યતે
ન્યાસમસ્ય પ્રવક્ષ્યામિ સર્વસિદ્ધિકરં શુભમ્ ॥

સર્વપાપહરં ચૈવ ત્રિવિધો ન્યાસ ઉચ્યતે
ઉત્પત્તિસ્થિતિસંહાર ભેદતસ્ત્રિવિધઃ સ્મૃતઃ ॥

બ્રહ્મચારિગૃહસ્થાનાં યતીનાં ક્રમશો ભવેત્
ઉત્પત્તિર્બ્રહ્મચારિણાં ગૃહસ્થાનાં સ્થિતિઃ સદા ॥

યતીનાં સંહૃતિર્ ન્યાસઃ સિદ્ધિર્ ભવતિ નાન્યથા
અઙ્ગન્યાસઃ કરન્યાસો દેહન્યાસ ઇતિ ત્રિધા ॥

ઉત્પત્ત્યાદિત્રિભેદેન વક્ષ્યતે તે વરાનને
ન્યસેત્પૂર્વં કરન્યાસં દેહન્યાસમ્ અનન્તરમ્ ॥

અઙ્ગન્યાસં તતઃ પશ્ચાદ્ અક્ષરાણાં વિધિક્રમાત્
મૂર્ધાદિપાદપર્યન્તમ્ ઉત્પત્તિન્યાસ ઉચ્યતે ॥

પાદાદિમૂર્ધપર્યન્તં સંહારો ભવતિ પ્રિયે
હૃદયાસ્યગલન્યાસઃ સ્થિતિન્યાસ ઉદાહૃતઃ ॥

બ્રહ્મચારિગૃહસ્થાનાં યતીનાં ચૈવ શોભને
સશિરસ્કં તતો દેહં સર્વમન્ત્રેણ સંસ્પૃશેત્ ॥

સ દેહન્યાસ ઇત્યુક્તઃ સર્વેષાં સમ એવ સ
દક્ષિણાઙ્ગુષ્ઠમારભ્ય વામાઙ્ગુષ્ઠાન્ત એવ હિ ॥

ન્યસ્યતે યત્તદુત્પત્તિર્ વિપરીતં તુ સંહૃતિઃ
અઙ્ગુષ્ઠાદિકનિષ્ઠાન્તં ન્યસ્યતે હસ્તયોર્ દ્વયોઃ ॥

અતીવ ભોગદો દેવિ સ્થિતિન્યાસઃ કુટુંબિનામ્
કરન્યાસં પુરા કૃત્વા દેહન્યાસમ્ અનન્તરમ્ ॥

અઙ્ગન્યાસં ન્યસેત્પશ્ચાદ્ એષ સાધારણો વિધિઃ
ઓઙ્કારં સંપુટીકૃત્ય સર્વાઙ્ગેષુ ચ વિન્યસેત્ ॥

કરયોરુભયોશ્ચૈવ દશાગ્રાંગુલિષુ ક્રમાત્
પ્રક્ષાલ્ય પાદાવાચમ્ય શુચિર્ભૂત્વા સમાહિતઃ ॥

પ્રાઙ્મુખોદઙ્મુખો વાપિ ન્યાસકર્મ સમાચરેત્
સ્મરેત્ પૂર્વમ્ ઋષિં છન્દો દૈવતં બીજમેવ ચ ॥

શક્તિં ચ પરમાત્માનં ગુરું ચૈવ વરાનને
મન્ત્રેણ પાણી સંમૃજ્ય તલયોઃ પ્રણવં ન્યસેત્ ॥

અઙ્ગુલીનાં ચ સર્વેષાં તથા ચાદ્યન્તપર્વસુ
સબિન્દુકાનિ બીજાનિ પઞ્ચ મધ્યમપર્વસુ ॥

ઉત્પત્ત્યાદિત્રિભેદેન ન્યસેદાશ્રમતઃ ક્રમાત્
ઉભાભ્યામેવ પાણિભ્યામ્ આપાદતલમસ્તકમ્ ॥

મન્ત્રેણ સંસ્પૃશેદ્દેહં પ્રણવેનૈવ સંપુટમ્
મૂર્ધ્નિ વક્ત્રે ચ કણ્ઠે ચ હૃદયે ગુહ્યકે તથા ॥

પાદયોર્ ઉભયોશ્ચૈવ ગુહ્યે ચ હૃદયે તથા
કણ્ઠે ચ મુખમધ્યે ચ મૂર્ધ્નિ ચ પ્રણવાદિકમ્ ॥

હૃદયે ગુહ્યકે ચૈવ પાદયોર્મૂર્ધ્નિ વાચિ વા
કણ્ઠે ચૈવ ન્યસેદેવ પ્રણવાદિત્રિભેદતઃ ॥

કૃત્વાઙ્ગન્યાસમેવં હિ મુખાનિ પરિકલ્પયેત્
પૂર્વાદિ ચોર્ધ્વપર્યન્તં નકારાદિ યથાક્રમમ્ ॥

ષડઙ્ગાનિ ન્યસેત્પશ્ચાદ્ યથાસ્થાનં ચ શોભનમ્
નમઃ સ્વાહા વષડ્ઢું ચ વૌષટ્ફટ્કારકૈઃ સહ ॥

પ્રણવં હૃદયં વિદ્યાન્ નકારઃ શિર ઉચ્યતે
શિખા મકાર આખ્યાતઃ શિકારઃ કવચં તથા ॥

આકારો નેત્રમસ્ત્રં તુ યકારઃ પરિકીર્તિતઃ
ઇત્થમઙ્ગાનિ વિન્યસ્ય તતો વૈ બન્ધયેદ્દિશઃ ॥

વિઘ્નેશો માતરો દુર્ગા ક્ષેત્રજ્ઞો દેવતા દિશઃ
આગ્નેયાદિષુ કોણેષુ ચતુર્ષ્વપિ યથાક્રમમ્ ॥

અઙ્ગુષ્ઠતર્જન્યગ્રાભ્યાં સંસ્થાપ્ય સુમુખં શુભમ્
રક્ષધ્વમિતિ ચોક્ત્વા તુ નમસ્કુર્યાત્પૃથક્પૃથક્ ॥

ગલે મધ્યે તથાઙ્ગુષ્ઠે તર્જન્યાદ્યાઙ્ગુલીષુ ચ
અઙ્ગુષ્ઠેન કરન્યાસં કુર્યાદેવ વિચક્ષણઃ ॥

એવં ન્યાસમિમં પ્રોક્તં સર્વપાપહરં શુભમ્
સર્વસિદ્ધિકરં પુણ્યં સર્વરક્ષાકરં શિવમ્ ॥

ન્યસ્તે મન્ત્રે ઽથ સુભગે શઙ્કરપ્રતિમો ભવેત્
જન્માન્તરકૃતં પાપમ્ અપિ નશ્યતિ તત્ક્ષણાત્ ॥

એવં વિન્યસ્ય મેધાવી શુદ્ધકાયો દૃઢવ્રતઃ
જપેત્પઞ્ચાક્ષરં મન્ત્રં લબ્ધ્વાચાર્યપ્રસાદતઃ ॥

અતઃ પરં પ્રવક્ષ્યામિ મન્ત્રસંગ્રહણં શુભે
યં વિના નિષ્ફલં નિત્યં યેન વા સફલં ભવેત્ ॥

આજ્ઞાહીનં ક્રિયાહીનં શ્રદ્ધાહીનમ્ અમાનસમ્
આજ્ઞપ્તં દક્ષિણાહીનં સદા જપ્તં ચ નિષ્ફલમ્ ॥

આજ્ઞાસિદ્ધં ક્રિયાસિદ્ધં શ્રદ્ધાસિદ્ધં સુમાનસમ્
એવં ચ દક્ષિણાસિદ્ધં મન્ત્રં સિદ્ધં યતસ્તતઃ ॥

ઉપાગમ્ય ગુરું વિપ્રં મન્ત્રતત્ત્વાર્થવેદિનમ્
જ્ઞાનિનં સદ્ગુણોપેતં ધ્યાનયોગપરાયણમ્ ॥

તોષયેત્તં પ્રયત્નેન ભાવશુદ્ધિસમન્વિતઃ
વાચા ચ મનસા ચૈવ કાયેન દ્રવિણેન ચ ॥

આચાર્યં પૂજયેચ્છિષ્યઃ સર્વદાતિપ્રયત્નતઃ
હસ્ત્યશ્વરથરત્નાનિ ક્ષેત્રાણિ ચ ગૃહાણિ ચ ॥

ભૂષણાનિ ચ વાસાંસિ ધાન્યાનિ વિવિધાનિ ચ
એતાનિ ગુરવે દદ્યાદ્ ભક્ત્યા ચ વિભવે સતિ ॥

વિત્તશાઠ્યં ન કુર્વીત યદીચ્છેત્સિદ્ધિમાત્મનઃ
પશ્ચાન્નિવેદયેદ્દેવિ આત્માનં સપરિચ્છદમ્ ॥

એવં સમ્પૂજ્ય વિધિવદ્ યથાશક્તિ ત્વવઞ્ચયન્
આદદીત ગુરોર્મન્ત્રં જ્ઞાનં ચૈવ ક્રમેણ તુ ॥

એવં તુષ્ટો ગુરુઃ શિષ્યં પૂજિતં વત્સરોષિતમ્
શુશ્રૂષુમ્ અનહઙ્કારમ્ ઉપવાસકૃશં શુચિમ્ ॥

સ્નાપયિત્વા તુ શિષ્યાય બ્રાહ્મણાનપિ પૂજ્ય ચ
સમુદ્રતીરે નદ્યાં ચ ગોષ્ઠે દેવાલયે ઽપિ વા ॥

શુચૌ દેશે ગૃહે વાપિ કાલે સિદ્ધિકરે તિથૌ
નક્ષત્રે શુભયોગે ચ સર્વદા દોષવર્જિતે ॥

અનુગૃહ્ય તતો દદ્યાચ્ છિવજ્ઞાનમ્ અનુત્તમમ્
સ્વરેણોચ્ચારયેત્ સમ્યગ્ એકાન્તે ઽપિ પ્રસન્નધીઃ ॥

ઉચ્ચાર્યોચ્ચારયિત્વા તુ આચાર્યઃ સિદ્ધિદઃ સ્વયમ્
શિવં ચાસ્તુ શુભં ચાસ્તુ શોભનો ઽસ્તુ પ્રિયો ઽસ્ત્વિતિ ॥

એવં લબ્ધ્વા પરં મન્ત્રં જ્ઞાનં ચૈવ ગુરોસ્તતઃ
જપેન્નિત્યં સસંકલ્પં પુરશ્ચરણમેવ ચ ॥

યાવજ્જીવં જપેન્નિત્યમ્ અષ્ટોત્તરસહસ્રકમ્
અનશ્નંસ્તત્પરો ભૂત્વા સ યાતિ પરમાં ગતિમ્ ॥

જપેદક્ષરલક્ષં વૈ ચતુર્ગુણિતમાદરાત્
નક્તાશી સંયમી યશ્ ચ પૌરશ્ચરણિકઃ સ્મૃતઃ ॥

પુરશ્ચરણજાપી વા અપિ વા નિત્યજાપકઃ
અચિરાત્સિદ્ધિકાઙ્ક્ષી તુ તયોરન્યતરો ભવેત્ ॥

યઃ પુરશ્ચરણં કૃત્વા નિત્યજાપી ભવેન્નરઃ
તસ્ય નાસ્તિ સમો લોકે સ સિદ્ધઃ સિદ્ધિદો વશી ॥

આસનં રુચિરં બદ્ધ્વા મૌની ચૈકાગ્રમાનસઃ
પ્રાઙ્મુખોદઙ્મુખો વાપિ જપેન્મન્ત્રમનુત્તમમ્ ॥

આદ્યાન્તયોર્ જપસ્યાપિ કુર્યાદ્વૈ પ્રાણસંયમાન્
તથા ચાન્તે જપેદ્બીજં શતમષ્ટોત્તરં શુભમ્ ॥

ચત્વારિંશત્સમાવૃત્તિ પ્રાણાનાયમ્ય સંસ્મરેત્
પઞ્ચાક્ષરસ્ય મન્ત્રસ્ય પ્રાણાયામ ઉદાહૃતઃ ॥

પ્રાણાયામાદ્ભવેત્ક્ષિપ્રં સર્વપાપપરિક્ષયઃ
ઇન્દ્રિયાણાં વશિત્વં ચ તસ્માત્પ્રાણાંશ્ ચ સંયમેત્ ॥

ગૃહે જપઃ સમં વિદ્યાદ્ ગોષ્ઠે શતગુણં ભવેત્
નદ્યાં શતસહસ્રં તુ અનન્તઃ શિવસન્નિધૌ ॥

સમુદ્રતીરે દેવહ્રદે ગિરૌ દેવાલયેષુ ચ
પુણ્યાશ્રમેષુ સર્વેષુ જપઃ કોટિગુણો ભવેત્ ॥

શિવસ્ય સંનિધાને ચ સૂર્યસ્યાગ્રે ગુરોરપિ
દીપસ્ય ગોર્જલસ્યાપિ જપકર્મ પ્રશસ્યતે ॥

અઙ્ગુલીજપસંખ્યાનમ્ એકમેકં શુભાનને
રેખૈરષ્ટગુણં પ્રોક્તં પુત્રજીવફલૈર્ દશ ॥

શતં વૈ શઙ્ખમણિભિઃ પ્રવાલૈશ્ ચ સહસ્રકમ્
સ્ફાટિકૈર્ દશસાહસ્રં મૌક્તિકૈર્લક્ષમુચ્યતે ॥

પદ્માક્ષૈર્દશલક્ષં તુ સૌવર્ણૈઃ કોટિરુચ્યતે
કુશગ્રન્થ્યા ચ રુદ્રાક્ષૈર્ અનન્તગુણમુચ્યતે ॥

પઞ્ચવિંશતિ મોક્ષાર્થં સપ્તવિંશતિ પૌષ્ટિકમ્
ત્રિંશચ્ચ ધનસંપત્ત્યૈ પઞ્ચાશચ્ચાભિચારિકમ્ ॥

તત્પૂર્વાભિમુખં વશ્યં દક્ષિણં ચાભિચારિકમ્
પશ્ચિમં ધનદં વિદ્યાદ્ ઉત્તરં શાન્તિકં ભવેત્ ॥

અઙ્ગુષ્ઠં મોક્ષદં વિદ્યાત્ તર્જની શત્રુનાશની
મધ્યમા ધનદા શાન્તિં કરોત્યેષા હ્ય્ અનામિકા ॥

કનિષ્ઠા રક્ષણીયા સા જપકર્મણિ શોભને
અઙ્ગુષ્ઠેન જપેજ્જપ્યમ્ અન્યૈરઙ્ગુલિભિઃ સહ ॥

અઙ્ગુષ્ઠેન વિના કર્મ કૃતં તદફલં યતઃ
શૃણુષ્વ સર્વયજ્ઞેભ્યો જપયજ્ઞો વિશિષ્યતે ॥

હિંસયા તે પ્રવર્તન્તે જપયજ્ઞો ન હિંસયા
યાવન્તઃ કર્મયજ્ઞાઃ સ્યુઃ પ્રદાનાનિ તપાંસિ ચ ॥

સર્વે તે જપયજ્ઞસ્ય કલાં નાર્હન્તિ ષોડશીમ્
માહાત્મ્યં વાચિકસ્યૈવ જપયજ્ઞસ્ય કીર્તિતમ્ ॥

તસ્માચ્છતગુણોપાંશુઃ સહસ્રો માનસઃ સ્મૃતઃ
યદ્ ઉચ્ચનીચસ્વરિતૈઃ શબ્દૈઃ સ્પષ્ટપદાક્ષરૈઃ ॥

મન્ત્રમુચ્ચારયેદ્વાચા જપયજ્ઞઃ સ વાચિકઃ
શનૈરુચ્ચારયેન્મન્ત્રમ્ ઈષદ્ ઓષ્ઠૌ તુ ચાલયેત્ ॥

કિંચિત્ કર્ણાન્તરં વિદ્યાદ્ ઉપાંશુઃ સ જપઃ સ્મૃતઃ
ધિયા યદક્ષરશ્રેણ્યા વર્ણાદ્વર્ણં પદાત્પદમ્ ॥

શબ્દાર્થં ચિન્તયેદ્ભૂયઃ સ તૂક્તો માનસો જપઃ
ત્રયાણાં જપયજ્ઞાનાં શ્રેયાન્ સ્યાદુત્તરોત્તરઃ ॥

ભવેદ્યજ્ઞવિશેષેણ વૈશિષ્ટ્યં તત્ફલસ્ય ચ
જપેન દેવતા નિત્યં સ્તૂયમાના પ્રસીદતિ ॥

પ્રસન્ના વિપુલાન્ ભોગાન્ દદ્યાન્મુક્તિં ચ શાશ્વતીમ્
યક્ષરક્ષઃપિશાચાશ્ ચ ગ્રહાઃ સર્વે ચ ભીષણાઃ
જાપિનં નોપસર્પન્તિ ભયભીતાઃ સમન્તતઃ ॥

જપેન ભોગાન્ જયતે ચ મૃત્યું જપેન સિદ્ધિં લભતે ચ મુક્તિમ્ ॥

એવં લબ્ધ્વા શિવં જ્ઞાનં જ્ઞાત્વા જપવિધિક્રમમ્ ॥

સદાચારી જપન્નિત્યં ધ્યાયન્ ભદ્રં સમશ્નુતે
સદાચારં પ્રવક્ષ્યામિ સમ્યગ્ધર્મસ્ય સાધનમ્ ॥

યસ્માદાચારહીનસ્ય સાધનં નિષ્ફલં ભવેત્
આચારઃ પરમો ધર્મ આચારઃ પરમં તપઃ ॥

આચારઃ પરમા વિદ્યા આચારઃ પરમા ગતિઃ
સદાચારવતાં પુંસાં સર્વત્રાપ્યભયં ભવેત્ ॥

તદ્વદાચારહીનાનાં સર્વત્રૈવ ભયં ભવેત્
સદાચારેણ દેવત્વમ્ ઋષિત્વં ચ વરાનને ॥

ઉપયાન્તિ કુયોનિત્વં તદ્વદ્ આચારલઙ્ઘનાત્
આચારહીનઃ પુરુષો લોકે ભવતિ નિન્દિતઃ ॥

તસ્માત્સંસિદ્ધિમન્વિચ્છન્ સમ્યગાચારવાન્ ભવેત્
દુર્વૃત્તઃ શુદ્ધિભૂયિષ્ઠઃ પાપીયાન્ જ્ઞાનદૂષકઃ ॥

વર્ણાશ્રમવિધાનોક્તં ધર્મં કુર્વીત યત્નતઃ ॥

યસ્ય યદ્વિહિતં કર્મ તત્કુર્વન્મત્પ્રિયઃ સદા
સંધ્યોપાસનશીલઃ સ્યાત્ સાયં પ્રાતઃ પ્રસન્નધીઃ ॥

ઉદયાસ્તમયાત્પૂર્વમ્ આરમ્ય વિધિના શુચિઃ
કામાન્મોહાદ્ભયાલ્લોભાત્ સંધ્યાં નાતિક્રમેદ્દ્વિજઃ ॥

સંધ્યાતિક્રમણાદ્વિપ્રો બ્રાહ્મણ્યાત્પતતે યતઃ
અસત્યં ન વદેત્ કિંચિન્ ન સત્યં ચ પરિત્યજેત્ ॥

યત્સત્યં બ્રહ્મ ઇત્યાહુર્ અસત્યં બ્રહ્મદૂષણમ્
અનૃતં પરુષં શાઠ્યં પૈશુન્યં પાપહેતુકમ્ ॥

પરદારાન્પરદ્રવ્યં પરહિંસાં ચ સર્વદા
ક્વચિચ્ચાપિ ન કુર્વીત વાચા ચ મનસા તથા ॥

શૂદ્રાન્નં યાતયામાન્નં નૈવેદ્યં શ્રાદ્ધમેવ ચ
ગણાન્નં સમુદાયાન્નં રાજાન્નં ચ વિવર્જયેત્ ॥

અન્નશુદ્ધૌ સત્ત્વશુદ્ધિર્ ન મૃદા ન જલેન વૈ
સત્ત્વશુદ્ધૌ ભવેત્સિદ્ધિસ્ તતો ઽન્નં પરિશોધયેત્ ॥

રાજપ્રતિગ્રહૈર્ દગ્ધાન્ બ્રાહ્મણાન્ બ્રહ્મવાદિનઃ
સ્વિન્નાનામપિ બીજાનાં પુનર્જન્મ ન વિદ્યતે ॥

રાજપ્રતિગ્રહો ઘોરો બુદ્ધ્વા ચાદૌ વિષોપમઃ
બુધેન પરિહર્તવ્યઃ શ્વમાંસં ચાપિ વર્જયેત્ ॥

અસ્નાત્વા ન ચ ભુઞ્જીયાદ્ અજપો ઽગ્નિમપૂજ્ય ચ
પર્ણપૃષ્ઠે ન ભુઞ્જીયાદ્ રાત્રૌ દીપં વિના તથા ॥

ભિન્નભાણ્ડે ચ રથ્યાયાં પતિતાનાં ચ સંનિધૌ
શૂદ્રશેષં ન ભુઞ્જીયાત્ સહાન્નં શિશુકૈરપિ ॥

શુદ્ધાન્નં સ્નિગ્ધમ્ અશ્નીયાત્ સંસ્કૃતં ચાભિમન્ત્રિતમ્
ભોક્તા શિવ ઇતિ સ્મૃત્વા મૌની ચૈકાગ્રમાનસઃ ॥

આસ્યેન ન પિબેત્તોયં તિષ્ઠન્નઞ્જલિનાપિ વા
વામહસ્તેન શય્યાયાં તથૈવાન્યંકરેણ વા ॥

વિભીતકાર્કકારઞ્જ સ્નુહિચ્છાયાં ન ચાશ્રયેત્
સ્તંભદીપમનુષ્યાણામ્ અન્યેષાં પ્રાણિનાં તથા ॥

એકો ન ગચ્છેદધ્વાનં બાહુભ્યાં નોત્તરેન્નદીમ્
નાવરોહેત કૂપાદિં નારોહેદુચ્ચપાદપાન્ ॥

સૂર્યાગ્નિજલદેવાનાં ગુરૂણાં વિમુખઃ શુભે
ન કુર્યાદિહ કાર્યાણિ જપકર્મ શુભાનિ વા ॥

અગ્નૌ ન તાપયેત્પાદૌ હસ્તં પદ્ભ્યાં ન સંસ્પૃશેત્
અગ્નેર્નોચ્છ્રયમ્ આસીત નાગ્નૌ કિંચિન્ મલં ત્યજેત્ ॥

ન જલં તાડયેત્પદ્ભ્યાં નાંભસ્યઙ્ગમલં ત્યજેત્
મલં પ્રક્ષાલયેત્ તીરે પ્રક્ષાલ્ય સ્નાનમાચરેત્ ॥

નખાગ્રકેશનિર્ધૂત સ્નાનવસ્ત્રઘટોદકમ્
અશ્રીકરં મનુષ્યાણામ્ અશુદ્ધં સંસ્પૃશેદ્યદિ ॥

અજાશ્વાનખુરોષ્ટ્રાણાં માર્જનાત્ તુષરેણુકાન્
સંસ્પૃશેદ્ યદિ મૂઢાત્મા શ્રિયં હન્તિ હરેરપિ ॥

માર્જારશ્ ચ ગૃહે યસ્ય સો ઽપ્યન્ત્યજસમો નરઃ
ભોજયેદ્યસ્તુ વિપ્રેન્દ્રાન્ માર્જારસંનિધૌ યદિ ॥

તચ્ચાણ્ડાલસમં જ્ઞેયં નાત્ર કાર્યા વિચારણા
સ્ફિગ્વાતં શૂર્પવાતં ચ વાતં પ્રાણમુખાનિલમ્ ॥

સુકૃતાનિ હરન્ત્યેતે સંસ્પૃષ્ટાઃ પુરુષસ્ય તુ
ઉષ્ણીષી કઞ્ચુકી નગ્નો મુક્તકેશો મલાવૃતઃ ॥

અપવિત્રકરો ઽશુદ્ધઃ પ્રલપન્ન જપેત્ ક્વચિત્
ક્રોધો મદઃ ક્ષુધા તન્દ્રા નિષ્ઠીવનવિજૃમ્ભણે ॥

શ્વનીચદર્શનં નિદ્રા પ્રલાપાસ્તે જપદ્વિષઃ
એતેષાં સંભવે વાપિ કુર્યાત્સૂર્યાદિદર્શનમ્ ॥

આચમ્ય વા જપેચ્છેષં કૃત્વા વા પ્રાણસંયમમ્
સૂર્યો ઽગ્નિશ્ચન્દ્રમાશ્ચૈવ ગ્રહનક્ષત્રતારકાઃ ॥

એતે જ્યોતીંષિ પ્રોક્તાનિ વિદ્વદ્ભિર્ બ્રાહ્મણૈસ્ તથા
પ્રસાર્ય પાદૌ ન જપેત્ કુક્કુટાસન એવ ચ ॥

અનાસનઃ શયાનો વા રથ્યાયાં શૂદ્રસન્નિધૌ
રક્તભૂમ્યાં ચ ખટ્વાયાં ન જપેજ્જાપકસ્ તથા ॥

આસનસ્થો જપેત્સમ્યક્ મન્ત્રાર્થગતમાનસઃ
કૌશેયં વ્યાઘ્રચર્મં વા ચૈલં તૌલમથાપિ વા ॥

દારવં તાલપર્ણં વા આસનં પરિકલ્પયેત્
ત્રિસંધ્યં તુ ગુરોઃ પૂજા કર્તવ્યા હિતમિચ્છતા ॥

યો ગુરુઃ સ શિવઃ પ્રોક્તો યઃ શિવઃ સ ગુરુઃ સ્મૃતઃ
યથા શિવસ્ તથા વિદ્યા યથા વિદ્યા તથા ગુરુઃ ॥

શિવવિદ્યાગુરોસ્તસ્માદ્ ભક્ત્યા ચ સદૃશં ફલમ્
સર્વદેવમયો દેવિ સર્વશક્તિમયો હિ સઃ ॥

સગુણો નિર્ગુણો વાપિ તસ્યાજ્ઞાં શિરસા વહેત્
શ્રેયો ઽર્થી યસ્તુ ગુર્વાજ્ઞાં મનસાપિ ન લઙ્ઘયેત્ ॥

ગુર્વાજ્ઞાપાલકઃ સમ્યક્ જ્ઞાનસંપત્તિમશ્નુતે
ગચ્છંસ્તિષ્ઠન્સ્વપન્ ભુઞ્જન્ યદ્યત્કર્મ સમાચરેત્ ॥

સમક્ષં યદિ તત્સર્વં કર્તવ્યં ગુર્વનુજ્ઞયા
ગુરોર્દેવસમક્ષં વા ન યથેષ્ટાસનો ભવેત્ ॥

ગુરુર્દેવો યતઃ સાક્ષાત્ તદ્ગૃહં દેવમન્દિરમ્
પાપિના ચ યથાસંગાત્ તત્પાપૈઃ પતનં ભવેત્ ॥

તદ્વદાચાર્યસંગેન તદ્ધર્મફલભાગ્ભવેત્
યથૈવ વહ્નિસંપર્કાન્ મલં ત્યજતિ કાઞ્ચનમ્ ॥

તથૈવ ગુરુસંપર્કાત્ પાપં ત્યજતિ માનવઃ
યથા વહ્નિસમીપસ્થો ઘૃતકુંભો વિલીયતે ॥

તથા પાપં વિલીયેત આચાર્યસ્ય સમીપતઃ
યથા પ્રજ્વલિતો વહ્નિર્ વિષ્ઠાં કાષ્ઠં ચ નિર્દહેત્ ॥

ગુરુસ્તુષ્ટો દહત્યેવં પાપં તન્મન્ત્રતેજસા
બ્રહ્મા હરિસ્ તથા રુદ્રો દેવાશ્ ચ મુનયસ્ તથા ॥

કુર્વન્ત્યનુગ્રહં તુષ્ટા ગુરૌ તુષ્ટે ન સંશયઃ
કર્મણા મનસા વાચા ગુરોઃ ક્રોધં ન કારયેત્ ॥

તસ્ય ક્રોધેન દહ્યન્તે આયુઃશ્રીજ્ઞાનસત્ક્રિયાઃ
તત્ક્રોધં યે કરિષ્યન્તિ તેષાં યજ્ઞાશ્ ચ નિષ્ફલાઃ ॥

જપાન્યનિયમાશ્ચૈવ નાત્ર કાર્યા વિચારણા
ગુરોર્વિરુદ્ધં યદ્વાક્યં ન વદેત્સર્વયત્નતઃ ॥

વદેદ્ યદિ મહામોહાદ્ રૌરવં નરકં વ્રજેત્
ચિત્તેનૈવ ચ વિત્તેન તથા વાચા ચ સુવ્રતાઃ ॥

મિથ્યા ન કારયેદ્દેવિ ક્રિયયા ચ ગુરોઃ સદા
દુર્ગુણે ખ્યાપિતે તસ્ય નૈર્ગુણ્યશતભાગ્ભવેત્ ॥

ગુણે તુ ખ્યાપિતે તસ્ય સાર્વગુણ્યફલં ભવેત્
ગુરોર્હિતં પ્રિયં કુર્યાદ્ આદિષ્ટો વા ન વા સદા ॥

અસમક્ષં સમક્ષં વા ગુરોઃ કાર્યં સમાચરેત્
ગુરોર્હિતં પ્રિયં કુર્યાન્ મનોવાક્કાયકર્મભિઃ ॥

કુર્વન્પતત્યધો ગત્વા તત્રૈવ પરિવર્તતે
તસ્માત્સ સર્વદોપાસ્યો વન્દનીયશ્ ચ સર્વદા ॥

સમીપસ્થો ઽપ્યનુજ્ઞાપ્ય વદેત્તદ્વિમુખો ગુરુમ્
એવમાચારવાન્ ભક્તો નિત્યં જપપરાયણઃ ॥

ગુરુપ્રિયકરો મન્ત્રં વિનિયોક્તું તતો ઽર્હતિ
વિનિયોગં પ્રવક્ષ્યામિ સિદ્ધમન્ત્રપ્રયોજનમ્ ॥

દૌર્બલ્યં યાતિ તન્મન્ત્રં વિનિયોગમજાનતઃ
યસ્ય યેન વિયુઞ્જીત કાર્યેણ તુ વિશેષતઃ ॥

વિનિયોગઃ સ વિજ્ઞેય ઐહિકામુષ્મિકં ફલમ્
વિનિયોગજમાયુષ્યમ્ આરોગ્યં તનુનિત્યતા ॥

રાજ્યૈશ્વર્યં ચ વિજ્ઞાનં સ્વર્ગો નિર્વાણ એવ ચ
પ્રોક્ષણં ચાભિષેકં ચ અઘમર્ષણમેવ ચ ॥

સ્નાને ચ સંધ્યયોશ્ચૈવ કુર્યાદેકાદશેન વૈ
શુચિઃ પર્વતમારુહ્ય જપેલ્લક્ષમતન્દ્રિતઃ ॥

મહાનદ્યાં દ્વિલક્ષં તુ દીર્ઘમાયુરવાપ્નુયાત્
દૂર્વાઙ્કુરાસ્તિલા વાણી ગુડૂચી ઘુટિકા તથા ॥

તેષાં તુ દશસાહસ્રં હોમમાયુષ્યવર્ધનમ્
અશ્વત્થવૃક્ષમાશ્રિત્ય જપેલ્લક્ષદ્વયં સુધીઃ ॥

શનૈશ્ચરદિને સ્પૃષ્ટ્વા દીર્ઘાયુષ્યં લભેન્નરઃ
શનૈશ્ચરદિને ઽશ્વત્થં પાણિભ્યાં સંસ્પૃશેત્સુધીઃ ॥

જપેદષ્ટોત્તરશતં સોમમૃત્યુહરો ભવેત્
આદિત્યાભિમુખો ભૂત્વા જપેલ્લક્ષમનન્યધીઃ ॥

અર્કૈરષ્ટશતં જપ્ત્વા જુહ્વન્વ્યાધેર્વિમુચ્યતે
સમસ્તવ્યાધિશાન્ત્યર્થં પલાશસમિધૈર્ નરઃ ॥

હુત્વા દશસહસ્રં તુ નિરોગી મનુજો ભવેત્
નિત્યમષ્ટશતં જપ્ત્વા પિબેદ્ અમ્ભો ઽર્કસન્નિધૌ ॥

ઔદર્યૈર્વ્યાધિભિઃ સર્વૈર્ માસેનૈકેન મુચ્યતે
એકાદશેન ભુઞ્જીયાદ્ અન્નં ચૈવાભિમન્ત્રિતમ્ ॥

ભક્ષ્યં ચાન્યત્તથા પેયં વિષમપ્યમૃતં ભવેત્
જપેલ્ લક્ષં તુ પૂર્વાહ્ણે હુત્વા ચાષ્ટશતેન વૈ ॥

સૂર્યં નિત્યમુપસ્થાય સમ્યગારોગ્યમાપ્નુયાત્
નદીતોયેન સમ્પૂર્ણં ઘટં સંસ્પૃશ્ય શોભનમ્ ॥

જપ્ત્વાયુતં ચ તત્સ્નાનાદ્ રોગાણાં ભેષજં ભવેત્
અષ્ટાવિંશજ્જપિત્વાન્નમ્ અશ્નીયાદ્ અન્વહં શુચિઃ ॥

હુત્વા ચ તાવત્પાલાશૈર્ એવં વારોગ્યમ્ અશ્નુતે
ચન્દ્રસૂર્યગ્રહે પૂર્વમ્ ઉપોષ્ય વિધિના શુચિઃ ॥

યાવદ્ગ્રહણમોક્ષં તુ તાવન્નદ્યાં સમાહિતઃ
જપેત્સમુદ્રગામિન્યાં વિમોક્ષે ગ્રહણસ્ય તુ ॥

અષ્ટોત્તરસહસ્રેણ પિબેદ્બ્રાહ્મીરસં દ્વિજાઃ
ઐહિકાં લભતે મેધાં સર્વશાસ્ત્રધરાં શુભામ્ ॥

સારસ્વતી ભવેદ્દેવી તસ્ય વાગતિમાનુષી
ગ્રહનક્ષત્રપીડાસુ જપેદ્ભક્ત્યાયુતં નરઃ ॥

હુત્વા ચાષ્ટસહસ્રં તુ ગ્રહપીડાં વ્યપોહતિ
દુઃસ્વપ્નદર્શને સ્નાત્વા જપેદ્વૈ ચાયુતં નરઃ ॥

ઘૃતેનાષ્ટશતં હુત્વા સદ્યઃ શાન્તિર્ભવિષ્યતિ
ચન્દ્રસૂર્યગ્રહે લિઙ્ગં સમભ્યર્ચ્ય યથાવિધિ ॥

યત્ કિંચિત્ પ્રાર્થયેદ્ દેવિ જપેદયુતમાદરાત્
સંનિધાવસ્ય દેવસ્ય શુચિઃ સંયતમાનસઃ ॥

સર્વાન્કામાનવાપ્નોતિ પુરુષો નાત્ર સંશયઃ
ગજાનાં તુરગાણાં તુ ગોજાતીનાં વિશેષતઃ ॥

વ્યાધ્યાગમે શુચિર્ભૂત્વા જુહુયાત્સમિધાહુતિમ્
માસમભ્યર્ચ્ય વિધિના -યુતં ભક્તિસમન્વિતઃ ॥

તેષામૃદ્ધિશ્ ચ શાન્તિશ્ ચ ભવિષ્યતિ ન સંશયઃ
ઉત્પાતે શત્રુબાધાયાં જુહુયાદયુતં શુચિઃ ॥

પાલાશસમિધૈર્ દેવિ તસ્ય શાન્તિર્ભવિષ્યતિ
આભિચારિકબાધાયામ્ એતદ્દેવિ સમાચરેત્ ॥

પ્રત્યગ્ ભવતિ તચ્છક્તિઃ શત્રોઃ પીડા ભવિષ્યતિ
વિદ્વેષણાર્થં જુહુયાદ્ વૈભીતસમિધાષ્ટકમ્ ॥

અક્ષરપ્રતિલોમ્યેન આર્દ્રેણ રુધિરેણ વા
વિષેણ રુધિરાભ્યક્તો વિદ્વેષણકરં નૃણામ્ ॥

પ્રાયશ્ચિત્તં પ્રવક્ષ્યામિ સર્વપાપવિશુદ્ધયે
પાપશુદ્ધિર્યથા સમ્યક્ કર્તુમભ્યુદ્યતો નરઃ ॥

પાપશુદ્ધિર્ યતઃ સમ્યગ્ જ્ઞાનસંપત્તિહૈતુકી
પાપશુદ્ધિર્ન ચેત્પુંસઃ ક્રિયાઃ સર્વાશ્ચનિષ્ફલાઃ ॥

જ્ઞાનં ચ હીયતે તસ્માત્ કર્તવ્યં પાપશોધનમ્
વિદ્યાલક્ષ્મીવિશુદ્ધ્યર્થં માં ધ્યાત્વાઞ્જલિના શુભે ॥

શિવેનૈકાદશેનાદ્ભિર્ અભિષિઞ્ચેત્સમન્તતઃ
અષ્ટોત્તરશતેનૈવ સ્નાયાત્પાપવિશુદ્ધયે ॥

સર્વતીર્થફલં તચ્ચ સર્વપાપહરં શુભમ્
સંધ્યોપાસનવિચ્છેદે જપેદષ્ટશતં નરઃ ॥

વિડ્વરાહૈશ્ ચ ચાણ્ડાલૈર્ દુર્જનૈઃ કુક્કુટૈરપિ
સ્પૃષ્ટમન્નં ન ભુઞ્જીત ભુક્ત્વા ચાષ્ટશતં જપેત્ ॥

બ્રહ્મહત્યાવિશુદ્ધ્યર્થં જપેલ્લક્ષાયુતં નરઃ
પાતકાનાં તદર્ધં સ્યાન્ નાત્ર કાર્યા વિચારણા ॥

ઉપપાતકદુષ્ટાનાં તદર્ધં પરિકીર્તિતમ્
શેષાણામપિ પાપાનાં જપેત્પઞ્ચસહસ્રકમ્ ॥

આત્મબોધપરં ગુહ્યં શિવબોધપ્રકાશકમ્
શિવઃ સ્યાત્સ જપેન્મન્ત્રં પઞ્ચલક્ષમ્ અનાકુલઃ ॥

પઞ્ચવાયુજયં ભદ્રે પ્રાપ્નોતિ મનુજઃ સુખમ્
જપેચ્ચ પઞ્ચલક્ષં તુ વિગૃહીતેન્દ્રિયઃ શુચિઃ ॥

પઞ્ચેન્દ્રિયાણાં વિજયો ભવિષ્યતિ વરાનને
ધ્યાનયુક્તો જપેદ્યસ્તુ પઞ્ચલક્ષમનાકુલઃ ॥

વિષયાણાં ચ પઞ્ચાનાં જયં પ્રાપ્નોતિ માનવઃ
ચતુર્થં પઞ્ચલક્ષં તુ યો જપેદ્ભક્તિસંયુતઃ ॥

ભૂતાનામિહ પઞ્ચાનાં વિજયં મનુજો લભેત્
ચતુર્લક્ષં જપેદ્યસ્તુ મનઃ સંયમ્ય યત્નતઃ ॥

સમ્યગ્વિજયમાપ્નોતિ કરણાનાં વરાનને
પઞ્ચવિંશતિલક્ષાણાં જપેન કમલાનને ॥

પઞ્ચવિંશતિતત્ત્વાનાં વિજયં મનુજો લભેત્
મધ્યરાત્રે ઽતિનિર્વાતે જપેદયુતમાદરાત્ ॥

બ્રહ્મસિદ્ધિમવાપ્નોતિ વ્રતેનાનેન સુંદરિ
જપેલ્લક્ષમનાલસ્યો નિર્વાતે ધ્વનિવર્જિતે ॥

મધ્યરાત્રે ચ શિવયોઃ પશ્યત્યેવ ન સંશયઃ
અન્ધકારવિનાશશ્ ચ દીપસ્યેવ પ્રકાશનમ્ ॥

હૃદયાન્તર્બહિર્વાપિ ભવિષ્યતિ ન સંશયઃ
સર્વસંપત્સમૃદ્ધ્યર્થં જપેદયુતમાત્મવાન્ ॥

સબીજસંપુટં મન્ત્રં શતલક્ષં જપેચ્છુચિઃ
મત્સાયુજ્યમવાપ્નોતિ ભક્તિમાન્ કિમતઃ પરમ્ ॥

ઇતિ તે સર્વમાખ્યાતં પઞ્ચાક્ષરવિધિક્રમમ્
યઃ પઠેચ્છૃણુયાદ્વાપિ સ યાતિ પરમાં ગતિમ્ ॥

શ્રાવયેચ્ચ દ્વિજાઞ્છુદ્ધાન્ પઞ્ચાક્ષરવિધિક્રમમ્
દૈવે કર્મણિ પિત્ર્યે વા શિવલોકે મહીયતે ॥