Liṅgapurāṇa, 1-108 · Chapter 1.85

sarvavrateṣu sampūjya devadevamumāpatim
japetpañcākṣarīṃ vidyāṃ vidhinaiva dvijottamāḥ //

japādeva na saṃdeho vratānāṃ vai viśeṣataḥ
samāptirnānyathā tasmāj japetpañcākṣarīṃ śubhām //

kathaṃ pañcākṣarī vidyā prabhāvo vā kathaṃ vada
kramopāyaṃ mahābhāga śrotuṃ kautūhalaṃ hi naḥ //

purā devena rudreṇa devadevena śaṃbhunā
pārvatyāḥ kathitaṃ puṇyaṃ pravadāmi samāsataḥ //

bhagavandevadeveśa sarvalokamaheśvara
pañcākṣarasya māhātmyaṃ śrotumicchāmi tattvataḥ //

pañcākṣarasya māhātmyaṃ varṣakoṭiśatairapi
na śakyaṃ kathituṃ devi tasmāt saṃkṣepataḥ śṛṇu //

pralaye samanuprāpte naṣṭe sthāvarajaṅgame
naṣṭe devāsure caiva naṣṭe coragarākṣase //

sarvaṃ prakṛtimāpannaṃ tvayā pralayameṣyati
eko 'haṃ saṃsthito devi na dvitīyo 'sti kutracit //

tasminvedāś ca śāstrāṇi mantre pañcākṣare sthitāḥ
te nāśaṃ naiva samprāptā macchaktyā hyanupālitāḥ //

ahameko dvidhāpyāsaṃ prakṛtyātmaprabhedataḥ
sa tu nārāyaṇaḥ śete devo māyāmayīṃ tanum //

āsthāya yogaparyaṅka śayane toyamadhyagaḥ
tannābhipaṅkajājjātaḥ pañcavaktraḥ pitāmahaḥ //

sisṛkṣamāṇo lokānvai trīnaśakto 'sahāyavān
daśa brahmā sasarjādau mānasānamitaujasaḥ //

teṣāṃ sṛṣṭiprasiddhyarthaṃ māṃ provāca pitāmahaḥ
matputrāṇāṃ mahādeva śaktiṃ dehi maheśvara //

iti tena samādiṣṭaḥ pañcavaktradharo hyaham
pañcākṣarānpañcamukhaiḥ proktavān padmayonaye //

tānpañcavadanairgṛhṇan brahmā lokapitāmahaḥ
vācyavācakabhāvena jñātavānparameśvaram //

vācyaḥ pañcākṣarairdevi śivastrailokyapūjitaḥ
vācakaḥ paramo mantras tasya pañcākṣaraḥ sthitaḥ //

jñātvā prayogaṃ vidhinā ca siddhiṃ labdhvā tathā pañcamukho mahātmā
provāca putreṣu jagaddhitāya mantraṃ mahārthaṃ kila pañcavarṇam //

te labdhvā mantraratnaṃ tu sākṣāllokapitāmahāt
tamārādhayituṃ devaṃ parātparataraṃ śivam //

tatastutoṣa bhagavān trimūrtīnāṃ paraḥ śivaḥ
dattavānakhilaṃ jñānam aṇimādiguṇāṣṭakam //

te 'pi labdhvā varānviprās tadārādhanakāṅkṣiṇaḥ
merostu śikhare ramye muñjavānnāma parvataḥ //

matpriyaḥ satataṃ śrīmān madbhūtaiḥ parirakṣitaḥ
tasyābhyāśe tapastīvraṃ lokasṛṣṭisamutsukāḥ //

divyavarṣasahasraṃ tu vāyubhakṣāḥ samācaran
tiṣṭhanto 'nugrahārthāya devi te ṛṣayaḥ purā //

teṣāṃ bhaktimahaṃ dṛṣṭvā sadyaḥ pratyakṣatāmiyām
pañcākṣaram ṛṣicchando daivataṃ śaktibījavat //

nyāsaṃ ṣaḍaṅgaṃ digbandhaṃ viniyogamaśeṣataḥ
proktavānahamāryāṇāṃ lokānāṃ hitakāmyayā //

tacchrutvā mantramāhātmyam ṛṣayaste tapodhanāḥ
mantrasya viniyogaṃ ca kṛtvā sarvamanuṣṭhitāḥ //

tanmāhātmyāt tadā lokān sadevāsuramānuṣān
varṇānvarṇavibhāgāṃś ca sarvadharmāṃś ca śobhanān //

pūrvakalpasamudbhūtāñ chrutavanto yathā purā
pañcākṣaraprabhāvācca lokā vedā maharṣayaḥ //

tiṣṭhanti śāśvatā dharmā devāḥ sarvamidaṃ jagat
tad idānīṃ pravakṣyāmi śṛṇu cāvahitākhilam //

alpākṣaraṃ mahārthaṃ ca vedasāraṃ vimuktidam
ājñāsiddhamasaṃdigdhaṃ vākyametacchivātmakam //

nānāsiddhiyutaṃ divyaṃ lokacittānurañjakam
suniścitārthaṃ gaṃbhīraṃ vākyaṃ me pārameśvaram //

mantraṃ mukhasukhoccāryam aśeṣārthaprasādhakam
tadbījaṃ sarvavidyānāṃ mantramādyaṃ suśobhanam //

atisūkṣmaṃ mahārthaṃ ca jñeyaṃ tadvaṭabījavat
vedaḥ sa triguṇātītaḥ sarvajñaḥ sarvakṛtprabhuḥ //

omityekākṣaraṃ mantraṃ sthitaḥ sarvagataḥ śivaḥ
mantre ṣaḍakṣare sūkṣme pañcākṣaratanuḥ śivaḥ //

vācyavācakabhāvena sthitaḥ sākṣātsvabhāvataḥ
vācyaḥ śivaḥ prameyatvān mantrastadvācakaḥ smṛtaḥ //

vācyavācakabhāvo 'yam anādiḥ saṃsthitastayoḥ
vede śivāgame vāpi yatra yatra ṣaḍakṣaraḥ //

mantraḥ sthitaḥ sadā mukhyo loke pañcākṣaro mataḥ
kiṃ tasya bahubhir mantraiḥ śāstrairvā bahuvistṛtaiḥ //

yasyaivaṃ hṛdi saṃstho 'yaṃ mantraḥ syātpārameśvaraḥ
tenādhītaṃ śrutaṃ tena tena sarvamanuṣṭhitam //

yo vidvānvai japetsamyag adhītyaiva vidhānataḥ
etāvaddhi śivajñānam etāvatparamaṃ padam //

etāvad brahmavidyā ca tasmānnityaṃ japedbudhaḥ
pañcākṣaraiḥ sapraṇavo mantro 'yaṃ hṛdayaṃ mama //

guhyādguhyataraṃ sākṣān mokṣajñānam anuttamam
asya mantrasya vakṣyāmi ṛṣicchando 'dhidaivatam //

bījaṃ śaktiṃ svaraṃ varṇaṃ sthānaṃ caivākṣaraṃ prati
vāmadevo nāma ṛṣiḥ paṅktiśchanda udāhṛtaḥ //

devatā śiva evāhaṃ mantrasyāsya varānane
nakārādīni bījāni pañcabhūtātmakāni ca //

ātmānaṃ praṇavaṃ viddhi sarvavyāpinamavyayam
śaktistvameva deveśi sarvadevanamaskṛte //

tvadīyaṃ praṇavaṃ kiṃcin madīyaṃ praṇavaṃ tathā
tvadīyaṃ devi mantrāṇāṃ śaktibhūtaṃ na saṃśayaḥ //

akārokāramakārā madīye praṇave sthitāḥ
ukāraṃ ca makāraṃ ca akāraṃ ca krameṇa vai //

tvadīyaṃ praṇavaṃ viddhi trimātraṃ plutamuttamam
oṅkārasya svarodātta ṛṣirbrahma sitaṃ vapuḥ //

chando devī ca gāyatrī paramātmādhidevatā
udāttaḥ prathamastadvac caturthaś ca dvitīyakaḥ //

pañcamaḥ svaritaścaiva madhyamo niṣadhaḥ smṛtāḥ
nakāraḥ pītavarṇaś ca sthānaṃ pūrvamukhaṃ smṛtam //

indro 'dhidaivataṃ chando gāyatrī gautama ṛṣiḥ
makāraḥ kṛṣṇavarṇo 'sya sthānaṃ vai dakṣiṇāmukham //

chando 'nuṣṭup ṛṣiścātrī rudro daivatamucyate
śikāro dhūmravarṇo 'sya sthānaṃ vai paścimaṃ mukham //

viśvāmitra ṛṣistriṣṭup chando viṣṇustu daivatam
vākāro hemavarṇo 'sya sthānaṃ caivottaraṃ mukham //

brahmādhidaivataṃ chando bṛhatī cāṅgirā ṛṣiḥ
yakāro raktavarṇaś ca sthānam ūrdhvaṃ mukhaṃ virāṭ //

chanda ṛṣirbharadvājaḥ skando daivatamucyate
nyāsamasya pravakṣyāmi sarvasiddhikaraṃ śubham //

sarvapāpaharaṃ caiva trividho nyāsa ucyate
utpattisthitisaṃhāra bhedatastrividhaḥ smṛtaḥ //

brahmacārigṛhasthānāṃ yatīnāṃ kramaśo bhavet
utpattirbrahmacāriṇāṃ gṛhasthānāṃ sthitiḥ sadā //

yatīnāṃ saṃhṛtir nyāsaḥ siddhir bhavati nānyathā
aṅganyāsaḥ karanyāso dehanyāsa iti tridhā //

utpattyāditribhedena vakṣyate te varānane
nyasetpūrvaṃ karanyāsaṃ dehanyāsam anantaram //

aṅganyāsaṃ tataḥ paścād akṣarāṇāṃ vidhikramāt
mūrdhādipādaparyantam utpattinyāsa ucyate //

pādādimūrdhaparyantaṃ saṃhāro bhavati priye
hṛdayāsyagalanyāsaḥ sthitinyāsa udāhṛtaḥ //

brahmacārigṛhasthānāṃ yatīnāṃ caiva śobhane
saśiraskaṃ tato dehaṃ sarvamantreṇa saṃspṛśet //

sa dehanyāsa ityuktaḥ sarveṣāṃ sama eva sa
dakṣiṇāṅguṣṭhamārabhya vāmāṅguṣṭhānta eva hi //

nyasyate yattadutpattir viparītaṃ tu saṃhṛtiḥ
aṅguṣṭhādikaniṣṭhāntaṃ nyasyate hastayor dvayoḥ //

atīva bhogado devi sthitinyāsaḥ kuṭuṃbinām
karanyāsaṃ purā kṛtvā dehanyāsam anantaram //

aṅganyāsaṃ nyasetpaścād eṣa sādhāraṇo vidhiḥ
oṅkāraṃ saṃpuṭīkṛtya sarvāṅgeṣu ca vinyaset //

karayorubhayoścaiva daśāgrāṃguliṣu kramāt
prakṣālya pādāvācamya śucirbhūtvā samāhitaḥ //

prāṅmukhodaṅmukho vāpi nyāsakarma samācaret
smaret pūrvam ṛṣiṃ chando daivataṃ bījameva ca //

śaktiṃ ca paramātmānaṃ guruṃ caiva varānane
mantreṇa pāṇī saṃmṛjya talayoḥ praṇavaṃ nyaset //

aṅgulīnāṃ ca sarveṣāṃ tathā cādyantaparvasu
sabindukāni bījāni pañca madhyamaparvasu //

utpattyāditribhedena nyasedāśramataḥ kramāt
ubhābhyāmeva pāṇibhyām āpādatalamastakam //

mantreṇa saṃspṛśeddehaṃ praṇavenaiva saṃpuṭam
mūrdhni vaktre ca kaṇṭhe ca hṛdaye guhyake tathā //

pādayor ubhayoścaiva guhye ca hṛdaye tathā
kaṇṭhe ca mukhamadhye ca mūrdhni ca praṇavādikam //

hṛdaye guhyake caiva pādayormūrdhni vāci vā
kaṇṭhe caiva nyasedeva praṇavāditribhedataḥ //

kṛtvāṅganyāsamevaṃ hi mukhāni parikalpayet
pūrvādi cordhvaparyantaṃ nakārādi yathākramam //

ṣaḍaṅgāni nyasetpaścād yathāsthānaṃ ca śobhanam
namaḥ svāhā vaṣaḍḍhuṃ ca vauṣaṭphaṭkārakaiḥ saha //

praṇavaṃ hṛdayaṃ vidyān nakāraḥ śira ucyate
śikhā makāra ākhyātaḥ śikāraḥ kavacaṃ tathā //

ākāro netramastraṃ tu yakāraḥ parikīrtitaḥ
itthamaṅgāni vinyasya tato vai bandhayeddiśaḥ //

vighneśo mātaro durgā kṣetrajño devatā diśaḥ
āgneyādiṣu koṇeṣu caturṣvapi yathākramam //

aṅguṣṭhatarjanyagrābhyāṃ saṃsthāpya sumukhaṃ śubham
rakṣadhvamiti coktvā tu namaskuryātpṛthakpṛthak //

gale madhye tathāṅguṣṭhe tarjanyādyāṅgulīṣu ca
aṅguṣṭhena karanyāsaṃ kuryādeva vicakṣaṇaḥ //

evaṃ nyāsamimaṃ proktaṃ sarvapāpaharaṃ śubham
sarvasiddhikaraṃ puṇyaṃ sarvarakṣākaraṃ śivam //

nyaste mantre 'tha subhage śaṅkarapratimo bhavet
janmāntarakṛtaṃ pāpam api naśyati tatkṣaṇāt //

evaṃ vinyasya medhāvī śuddhakāyo dṛḍhavrataḥ
japetpañcākṣaraṃ mantraṃ labdhvācāryaprasādataḥ //

ataḥ paraṃ pravakṣyāmi mantrasaṃgrahaṇaṃ śubhe
yaṃ vinā niṣphalaṃ nityaṃ yena vā saphalaṃ bhavet //

ājñāhīnaṃ kriyāhīnaṃ śraddhāhīnam amānasam
ājñaptaṃ dakṣiṇāhīnaṃ sadā japtaṃ ca niṣphalam //

ājñāsiddhaṃ kriyāsiddhaṃ śraddhāsiddhaṃ sumānasam
evaṃ ca dakṣiṇāsiddhaṃ mantraṃ siddhaṃ yatastataḥ //

upāgamya guruṃ vipraṃ mantratattvārthavedinam
jñāninaṃ sadguṇopetaṃ dhyānayogaparāyaṇam //

toṣayettaṃ prayatnena bhāvaśuddhisamanvitaḥ
vācā ca manasā caiva kāyena draviṇena ca //

ācāryaṃ pūjayecchiṣyaḥ sarvadātiprayatnataḥ
hastyaśvaratharatnāni kṣetrāṇi ca gṛhāṇi ca //

bhūṣaṇāni ca vāsāṃsi dhānyāni vividhāni ca
etāni gurave dadyād bhaktyā ca vibhave sati //

vittaśāṭhyaṃ na kurvīta yadīcchetsiddhimātmanaḥ
paścānnivedayeddevi ātmānaṃ saparicchadam //

evaṃ sampūjya vidhivad yathāśakti tvavañcayan
ādadīta gurormantraṃ jñānaṃ caiva krameṇa tu //

evaṃ tuṣṭo guruḥ śiṣyaṃ pūjitaṃ vatsaroṣitam
śuśrūṣum anahaṅkāram upavāsakṛśaṃ śucim //

snāpayitvā tu śiṣyāya brāhmaṇānapi pūjya ca
samudratīre nadyāṃ ca goṣṭhe devālaye 'pi vā //

śucau deśe gṛhe vāpi kāle siddhikare tithau
nakṣatre śubhayoge ca sarvadā doṣavarjite //

anugṛhya tato dadyāc chivajñānam anuttamam
svareṇoccārayet samyag ekānte 'pi prasannadhīḥ //

uccāryoccārayitvā tu ācāryaḥ siddhidaḥ svayam
śivaṃ cāstu śubhaṃ cāstu śobhano 'stu priyo 'stviti //

evaṃ labdhvā paraṃ mantraṃ jñānaṃ caiva gurostataḥ
japennityaṃ sasaṃkalpaṃ puraścaraṇameva ca //

yāvajjīvaṃ japennityam aṣṭottarasahasrakam
anaśnaṃstatparo bhūtvā sa yāti paramāṃ gatim //

japedakṣaralakṣaṃ vai caturguṇitamādarāt
naktāśī saṃyamī yaś ca pauraścaraṇikaḥ smṛtaḥ //

puraścaraṇajāpī vā api vā nityajāpakaḥ
acirātsiddhikāṅkṣī tu tayoranyataro bhavet //

yaḥ puraścaraṇaṃ kṛtvā nityajāpī bhavennaraḥ
tasya nāsti samo loke sa siddhaḥ siddhido vaśī //

āsanaṃ ruciraṃ baddhvā maunī caikāgramānasaḥ
prāṅmukhodaṅmukho vāpi japenmantramanuttamam //

ādyāntayor japasyāpi kuryādvai prāṇasaṃyamān
tathā cānte japedbījaṃ śatamaṣṭottaraṃ śubham //

catvāriṃśatsamāvṛtti prāṇānāyamya saṃsmaret
pañcākṣarasya mantrasya prāṇāyāma udāhṛtaḥ //

prāṇāyāmādbhavetkṣipraṃ sarvapāpaparikṣayaḥ
indriyāṇāṃ vaśitvaṃ ca tasmātprāṇāṃś ca saṃyamet //

gṛhe japaḥ samaṃ vidyād goṣṭhe śataguṇaṃ bhavet
nadyāṃ śatasahasraṃ tu anantaḥ śivasannidhau //

samudratīre devahrade girau devālayeṣu ca
puṇyāśrameṣu sarveṣu japaḥ koṭiguṇo bhavet //

śivasya saṃnidhāne ca sūryasyāgre gurorapi
dīpasya gorjalasyāpi japakarma praśasyate //

aṅgulījapasaṃkhyānam ekamekaṃ śubhānane
rekhairaṣṭaguṇaṃ proktaṃ putrajīvaphalair daśa //

śataṃ vai śaṅkhamaṇibhiḥ pravālaiś ca sahasrakam
sphāṭikair daśasāhasraṃ mauktikairlakṣamucyate //

padmākṣairdaśalakṣaṃ tu sauvarṇaiḥ koṭirucyate
kuśagranthyā ca rudrākṣair anantaguṇamucyate //

pañcaviṃśati mokṣārthaṃ saptaviṃśati pauṣṭikam
triṃśacca dhanasaṃpattyai pañcāśaccābhicārikam //

tatpūrvābhimukhaṃ vaśyaṃ dakṣiṇaṃ cābhicārikam
paścimaṃ dhanadaṃ vidyād uttaraṃ śāntikaṃ bhavet //

aṅguṣṭhaṃ mokṣadaṃ vidyāt tarjanī śatrunāśanī
madhyamā dhanadā śāntiṃ karotyeṣā hy anāmikā //

kaniṣṭhā rakṣaṇīyā sā japakarmaṇi śobhane
aṅguṣṭhena japejjapyam anyairaṅgulibhiḥ saha //

aṅguṣṭhena vinā karma kṛtaṃ tadaphalaṃ yataḥ
śṛṇuṣva sarvayajñebhyo japayajño viśiṣyate //

hiṃsayā te pravartante japayajño na hiṃsayā
yāvantaḥ karmayajñāḥ syuḥ pradānāni tapāṃsi ca //

sarve te japayajñasya kalāṃ nārhanti ṣoḍaśīm
māhātmyaṃ vācikasyaiva japayajñasya kīrtitam //

tasmācchataguṇopāṃśuḥ sahasro mānasaḥ smṛtaḥ
yad uccanīcasvaritaiḥ śabdaiḥ spaṣṭapadākṣaraiḥ //

mantramuccārayedvācā japayajñaḥ sa vācikaḥ
śanairuccārayenmantram īṣad oṣṭhau tu cālayet //

kiṃcit karṇāntaraṃ vidyād upāṃśuḥ sa japaḥ smṛtaḥ
dhiyā yadakṣaraśreṇyā varṇādvarṇaṃ padātpadam //

śabdārthaṃ cintayedbhūyaḥ sa tūkto mānaso japaḥ
trayāṇāṃ japayajñānāṃ śreyān syāduttarottaraḥ //

bhavedyajñaviśeṣeṇa vaiśiṣṭyaṃ tatphalasya ca
japena devatā nityaṃ stūyamānā prasīdati //

prasannā vipulān bhogān dadyānmuktiṃ ca śāśvatīm
yakṣarakṣaḥpiśācāś ca grahāḥ sarve ca bhīṣaṇāḥ
jāpinaṃ nopasarpanti bhayabhītāḥ samantataḥ //

japena bhogān jayate ca mṛtyuṃ japena siddhiṃ labhate ca muktim //

evaṃ labdhvā śivaṃ jñānaṃ jñātvā japavidhikramam //

sadācārī japannityaṃ dhyāyan bhadraṃ samaśnute
sadācāraṃ pravakṣyāmi samyagdharmasya sādhanam //

yasmādācārahīnasya sādhanaṃ niṣphalaṃ bhavet
ācāraḥ paramo dharma ācāraḥ paramaṃ tapaḥ //

ācāraḥ paramā vidyā ācāraḥ paramā gatiḥ
sadācāravatāṃ puṃsāṃ sarvatrāpyabhayaṃ bhavet //

tadvadācārahīnānāṃ sarvatraiva bhayaṃ bhavet
sadācāreṇa devatvam ṛṣitvaṃ ca varānane //

upayānti kuyonitvaṃ tadvad ācāralaṅghanāt
ācārahīnaḥ puruṣo loke bhavati ninditaḥ //

tasmātsaṃsiddhimanvicchan samyagācāravān bhavet
durvṛttaḥ śuddhibhūyiṣṭhaḥ pāpīyān jñānadūṣakaḥ //

varṇāśramavidhānoktaṃ dharmaṃ kurvīta yatnataḥ //

yasya yadvihitaṃ karma tatkurvanmatpriyaḥ sadā
saṃdhyopāsanaśīlaḥ syāt sāyaṃ prātaḥ prasannadhīḥ //

udayāstamayātpūrvam āramya vidhinā śuciḥ
kāmānmohādbhayāllobhāt saṃdhyāṃ nātikrameddvijaḥ //

saṃdhyātikramaṇādvipro brāhmaṇyātpatate yataḥ
asatyaṃ na vadet kiṃcin na satyaṃ ca parityajet //

yatsatyaṃ brahma ityāhur asatyaṃ brahmadūṣaṇam
anṛtaṃ paruṣaṃ śāṭhyaṃ paiśunyaṃ pāpahetukam //

paradārānparadravyaṃ parahiṃsāṃ ca sarvadā
kvaciccāpi na kurvīta vācā ca manasā tathā //

śūdrānnaṃ yātayāmānnaṃ naivedyaṃ śrāddhameva ca
gaṇānnaṃ samudāyānnaṃ rājānnaṃ ca vivarjayet //

annaśuddhau sattvaśuddhir na mṛdā na jalena vai
sattvaśuddhau bhavetsiddhis tato 'nnaṃ pariśodhayet //

rājapratigrahair dagdhān brāhmaṇān brahmavādinaḥ
svinnānāmapi bījānāṃ punarjanma na vidyate //

rājapratigraho ghoro buddhvā cādau viṣopamaḥ
budhena parihartavyaḥ śvamāṃsaṃ cāpi varjayet //

asnātvā na ca bhuñjīyād ajapo 'gnimapūjya ca
parṇapṛṣṭhe na bhuñjīyād rātrau dīpaṃ vinā tathā //

bhinnabhāṇḍe ca rathyāyāṃ patitānāṃ ca saṃnidhau
śūdraśeṣaṃ na bhuñjīyāt sahānnaṃ śiśukairapi //

śuddhānnaṃ snigdham aśnīyāt saṃskṛtaṃ cābhimantritam
bhoktā śiva iti smṛtvā maunī caikāgramānasaḥ //

āsyena na pibettoyaṃ tiṣṭhannañjalināpi vā
vāmahastena śayyāyāṃ tathaivānyaṃkareṇa vā //

vibhītakārkakārañja snuhicchāyāṃ na cāśrayet
staṃbhadīpamanuṣyāṇām anyeṣāṃ prāṇināṃ tathā //

eko na gacchedadhvānaṃ bāhubhyāṃ nottarennadīm
nāvaroheta kūpādiṃ nāroheduccapādapān //

sūryāgnijaladevānāṃ gurūṇāṃ vimukhaḥ śubhe
na kuryādiha kāryāṇi japakarma śubhāni vā //

agnau na tāpayetpādau hastaṃ padbhyāṃ na saṃspṛśet
agnernocchrayam āsīta nāgnau kiṃcin malaṃ tyajet //

na jalaṃ tāḍayetpadbhyāṃ nāṃbhasyaṅgamalaṃ tyajet
malaṃ prakṣālayet tīre prakṣālya snānamācaret //

nakhāgrakeśanirdhūta snānavastraghaṭodakam
aśrīkaraṃ manuṣyāṇām aśuddhaṃ saṃspṛśedyadi //

ajāśvānakhuroṣṭrāṇāṃ mārjanāt tuṣareṇukān
saṃspṛśed yadi mūḍhātmā śriyaṃ hanti harerapi //

mārjāraś ca gṛhe yasya so 'pyantyajasamo naraḥ
bhojayedyastu viprendrān mārjārasaṃnidhau yadi //

taccāṇḍālasamaṃ jñeyaṃ nātra kāryā vicāraṇā
sphigvātaṃ śūrpavātaṃ ca vātaṃ prāṇamukhānilam //

sukṛtāni harantyete saṃspṛṣṭāḥ puruṣasya tu
uṣṇīṣī kañcukī nagno muktakeśo malāvṛtaḥ //

apavitrakaro 'śuddhaḥ pralapanna japet kvacit
krodho madaḥ kṣudhā tandrā niṣṭhīvanavijṛmbhaṇe //

śvanīcadarśanaṃ nidrā pralāpāste japadviṣaḥ
eteṣāṃ saṃbhave vāpi kuryātsūryādidarśanam //

ācamya vā japeccheṣaṃ kṛtvā vā prāṇasaṃyamam
sūryo 'gniścandramāścaiva grahanakṣatratārakāḥ //

ete jyotīṃṣi proktāni vidvadbhir brāhmaṇais tathā
prasārya pādau na japet kukkuṭāsana eva ca //

anāsanaḥ śayāno vā rathyāyāṃ śūdrasannidhau
raktabhūmyāṃ ca khaṭvāyāṃ na japejjāpakas tathā //

āsanastho japetsamyak mantrārthagatamānasaḥ
kauśeyaṃ vyāghracarmaṃ vā cailaṃ taulamathāpi vā //

dāravaṃ tālaparṇaṃ vā āsanaṃ parikalpayet
trisaṃdhyaṃ tu guroḥ pūjā kartavyā hitamicchatā //

yo guruḥ sa śivaḥ prokto yaḥ śivaḥ sa guruḥ smṛtaḥ
yathā śivas tathā vidyā yathā vidyā tathā guruḥ //

śivavidyāgurostasmād bhaktyā ca sadṛśaṃ phalam
sarvadevamayo devi sarvaśaktimayo hi saḥ //

saguṇo nirguṇo vāpi tasyājñāṃ śirasā vahet
śreyo 'rthī yastu gurvājñāṃ manasāpi na laṅghayet //

gurvājñāpālakaḥ samyak jñānasaṃpattimaśnute
gacchaṃstiṣṭhansvapan bhuñjan yadyatkarma samācaret //

samakṣaṃ yadi tatsarvaṃ kartavyaṃ gurvanujñayā
gurordevasamakṣaṃ vā na yatheṣṭāsano bhavet //

gururdevo yataḥ sākṣāt tadgṛhaṃ devamandiram
pāpinā ca yathāsaṃgāt tatpāpaiḥ patanaṃ bhavet //

tadvadācāryasaṃgena taddharmaphalabhāgbhavet
yathaiva vahnisaṃparkān malaṃ tyajati kāñcanam //

tathaiva gurusaṃparkāt pāpaṃ tyajati mānavaḥ
yathā vahnisamīpastho ghṛtakuṃbho vilīyate //

tathā pāpaṃ vilīyeta ācāryasya samīpataḥ
yathā prajvalito vahnir viṣṭhāṃ kāṣṭhaṃ ca nirdahet //

gurustuṣṭo dahatyevaṃ pāpaṃ tanmantratejasā
brahmā haris tathā rudro devāś ca munayas tathā //

kurvantyanugrahaṃ tuṣṭā gurau tuṣṭe na saṃśayaḥ
karmaṇā manasā vācā guroḥ krodhaṃ na kārayet //

tasya krodhena dahyante āyuḥśrījñānasatkriyāḥ
tatkrodhaṃ ye kariṣyanti teṣāṃ yajñāś ca niṣphalāḥ //

japānyaniyamāścaiva nātra kāryā vicāraṇā
gurorviruddhaṃ yadvākyaṃ na vadetsarvayatnataḥ //

vaded yadi mahāmohād rauravaṃ narakaṃ vrajet
cittenaiva ca vittena tathā vācā ca suvratāḥ //

mithyā na kārayeddevi kriyayā ca guroḥ sadā
durguṇe khyāpite tasya nairguṇyaśatabhāgbhavet //

guṇe tu khyāpite tasya sārvaguṇyaphalaṃ bhavet
gurorhitaṃ priyaṃ kuryād ādiṣṭo vā na vā sadā //

asamakṣaṃ samakṣaṃ vā guroḥ kāryaṃ samācaret
gurorhitaṃ priyaṃ kuryān manovākkāyakarmabhiḥ //

kurvanpatatyadho gatvā tatraiva parivartate
tasmātsa sarvadopāsyo vandanīyaś ca sarvadā //

samīpastho 'pyanujñāpya vadettadvimukho gurum
evamācāravān bhakto nityaṃ japaparāyaṇaḥ //

gurupriyakaro mantraṃ viniyoktuṃ tato 'rhati
viniyogaṃ pravakṣyāmi siddhamantraprayojanam //

daurbalyaṃ yāti tanmantraṃ viniyogamajānataḥ
yasya yena viyuñjīta kāryeṇa tu viśeṣataḥ //

viniyogaḥ sa vijñeya aihikāmuṣmikaṃ phalam
viniyogajamāyuṣyam ārogyaṃ tanunityatā //

rājyaiśvaryaṃ ca vijñānaṃ svargo nirvāṇa eva ca
prokṣaṇaṃ cābhiṣekaṃ ca aghamarṣaṇameva ca //

snāne ca saṃdhyayoścaiva kuryādekādaśena vai
śuciḥ parvatamāruhya japellakṣamatandritaḥ //

mahānadyāṃ dvilakṣaṃ tu dīrghamāyuravāpnuyāt
dūrvāṅkurāstilā vāṇī guḍūcī ghuṭikā tathā //

teṣāṃ tu daśasāhasraṃ homamāyuṣyavardhanam
aśvatthavṛkṣamāśritya japellakṣadvayaṃ sudhīḥ //

śanaiścaradine spṛṣṭvā dīrghāyuṣyaṃ labhennaraḥ
śanaiścaradine 'śvatthaṃ pāṇibhyāṃ saṃspṛśetsudhīḥ //

japedaṣṭottaraśataṃ somamṛtyuharo bhavet
ādityābhimukho bhūtvā japellakṣamananyadhīḥ //

arkairaṣṭaśataṃ japtvā juhvanvyādhervimucyate
samastavyādhiśāntyarthaṃ palāśasamidhair naraḥ //

hutvā daśasahasraṃ tu nirogī manujo bhavet
nityamaṣṭaśataṃ japtvā pibed ambho 'rkasannidhau //

audaryairvyādhibhiḥ sarvair māsenaikena mucyate
ekādaśena bhuñjīyād annaṃ caivābhimantritam //

bhakṣyaṃ cānyattathā peyaṃ viṣamapyamṛtaṃ bhavet
japel lakṣaṃ tu pūrvāhṇe hutvā cāṣṭaśatena vai //

sūryaṃ nityamupasthāya samyagārogyamāpnuyāt
nadītoyena sampūrṇaṃ ghaṭaṃ saṃspṛśya śobhanam //

japtvāyutaṃ ca tatsnānād rogāṇāṃ bheṣajaṃ bhavet
aṣṭāviṃśajjapitvānnam aśnīyād anvahaṃ śuciḥ //

hutvā ca tāvatpālāśair evaṃ vārogyam aśnute
candrasūryagrahe pūrvam upoṣya vidhinā śuciḥ //

yāvadgrahaṇamokṣaṃ tu tāvannadyāṃ samāhitaḥ
japetsamudragāminyāṃ vimokṣe grahaṇasya tu //

aṣṭottarasahasreṇa pibedbrāhmīrasaṃ dvijāḥ
aihikāṃ labhate medhāṃ sarvaśāstradharāṃ śubhām //

sārasvatī bhaveddevī tasya vāgatimānuṣī
grahanakṣatrapīḍāsu japedbhaktyāyutaṃ naraḥ //

hutvā cāṣṭasahasraṃ tu grahapīḍāṃ vyapohati
duḥsvapnadarśane snātvā japedvai cāyutaṃ naraḥ //

ghṛtenāṣṭaśataṃ hutvā sadyaḥ śāntirbhaviṣyati
candrasūryagrahe liṅgaṃ samabhyarcya yathāvidhi //

yat kiṃcit prārthayed devi japedayutamādarāt
saṃnidhāvasya devasya śuciḥ saṃyatamānasaḥ //

sarvānkāmānavāpnoti puruṣo nātra saṃśayaḥ
gajānāṃ turagāṇāṃ tu gojātīnāṃ viśeṣataḥ //

vyādhyāgame śucirbhūtvā juhuyātsamidhāhutim
māsamabhyarcya vidhinā -yutaṃ bhaktisamanvitaḥ //

teṣāmṛddhiś ca śāntiś ca bhaviṣyati na saṃśayaḥ
utpāte śatrubādhāyāṃ juhuyādayutaṃ śuciḥ //

pālāśasamidhair devi tasya śāntirbhaviṣyati
ābhicārikabādhāyām etaddevi samācaret //

pratyag bhavati tacchaktiḥ śatroḥ pīḍā bhaviṣyati
vidveṣaṇārthaṃ juhuyād vaibhītasamidhāṣṭakam //

akṣarapratilomyena ārdreṇa rudhireṇa vā
viṣeṇa rudhirābhyakto vidveṣaṇakaraṃ nṛṇām //

prāyaścittaṃ pravakṣyāmi sarvapāpaviśuddhaye
pāpaśuddhiryathā samyak kartumabhyudyato naraḥ //

pāpaśuddhir yataḥ samyag jñānasaṃpattihaitukī
pāpaśuddhirna cetpuṃsaḥ kriyāḥ sarvāścaniṣphalāḥ //

jñānaṃ ca hīyate tasmāt kartavyaṃ pāpaśodhanam
vidyālakṣmīviśuddhyarthaṃ māṃ dhyātvāñjalinā śubhe //

śivenaikādaśenādbhir abhiṣiñcetsamantataḥ
aṣṭottaraśatenaiva snāyātpāpaviśuddhaye //

sarvatīrthaphalaṃ tacca sarvapāpaharaṃ śubham
saṃdhyopāsanavicchede japedaṣṭaśataṃ naraḥ //

viḍvarāhaiś ca cāṇḍālair durjanaiḥ kukkuṭairapi
spṛṣṭamannaṃ na bhuñjīta bhuktvā cāṣṭaśataṃ japet //

brahmahatyāviśuddhyarthaṃ japellakṣāyutaṃ naraḥ
pātakānāṃ tadardhaṃ syān nātra kāryā vicāraṇā //

upapātakaduṣṭānāṃ tadardhaṃ parikīrtitam
śeṣāṇāmapi pāpānāṃ japetpañcasahasrakam //

ātmabodhaparaṃ guhyaṃ śivabodhaprakāśakam
śivaḥ syātsa japenmantraṃ pañcalakṣam anākulaḥ //

pañcavāyujayaṃ bhadre prāpnoti manujaḥ sukham
japecca pañcalakṣaṃ tu vigṛhītendriyaḥ śuciḥ //

pañcendriyāṇāṃ vijayo bhaviṣyati varānane
dhyānayukto japedyastu pañcalakṣamanākulaḥ //

viṣayāṇāṃ ca pañcānāṃ jayaṃ prāpnoti mānavaḥ
caturthaṃ pañcalakṣaṃ tu yo japedbhaktisaṃyutaḥ //

bhūtānāmiha pañcānāṃ vijayaṃ manujo labhet
caturlakṣaṃ japedyastu manaḥ saṃyamya yatnataḥ //

samyagvijayamāpnoti karaṇānāṃ varānane
pañcaviṃśatilakṣāṇāṃ japena kamalānane //

pañcaviṃśatitattvānāṃ vijayaṃ manujo labhet
madhyarātre 'tinirvāte japedayutamādarāt //

brahmasiddhimavāpnoti vratenānena suṃdari
japellakṣamanālasyo nirvāte dhvanivarjite //

madhyarātre ca śivayoḥ paśyatyeva na saṃśayaḥ
andhakāravināśaś ca dīpasyeva prakāśanam //

hṛdayāntarbahirvāpi bhaviṣyati na saṃśayaḥ
sarvasaṃpatsamṛddhyarthaṃ japedayutamātmavān //

sabījasaṃpuṭaṃ mantraṃ śatalakṣaṃ japecchuciḥ
matsāyujyamavāpnoti bhaktimān kimataḥ param //

iti te sarvamākhyātaṃ pañcākṣaravidhikramam
yaḥ paṭhecchṛṇuyādvāpi sa yāti paramāṃ gatim //

śrāvayecca dvijāñchuddhān pañcākṣaravidhikramam
daive karmaṇi pitrye vā śivaloke mahīyate //