લિઙ્ગપુરાણ · અધ્યાય 1.30

એવમુક્તાસ્તદા તેન બ્રહ્મણા બ્રાહ્મણર્ષભાઃ
શ્વેતસ્ય ચ કથાં પુણ્યામ્ અપૃચ્છન્ પરમર્ષયઃ ॥

શ્વેતો નામ મુનિઃ શ્રીમાન્ ગતાયુર્ગિરિગહ્વરે
સક્તો હ્યભ્યર્ચ્ય યદ્ભક્ત્યા તુષ્ટાવ ચ મહેશ્વરમ્ ॥

રુદ્રાધ્યાયેન પુણ્યેન નમસ્તેત્યાદિના દ્વિજાઃ
તતઃ કાલો મહાતેજાઃ કાલપ્રાપ્તં દ્વિજોત્તમમ્ ॥

નેતું સંચિન્ત્ય વિપ્રેન્દ્રાઃ સાન્નિધ્યમકરોન્મુનેઃ
શ્વેતો ઽપિ દૃષ્ટ્વા તં કાલં કાલપ્રાપ્તો ઽપિ શઙ્કરમ્ ॥

પૂજયામાસ પુણ્યાત્મા ત્રિયંબકમનુસ્મરન્
ત્રિયંબકં યજેદેવં સુગન્ધિં પુષ્ટિવર્ધનમ્ ॥

કિં કરિષ્યતિ મે મૃત્યુર્ મૃત્યોર્મૃત્યુરહં યતઃ
તં દૃષ્ટ્વા સસ્મિતં પ્રાહ શ્વેતં લોકભયંકરઃ ॥

એહ્યેહિ શ્વેત ચાનેન વિધિના કિં ફલં તવ
રુદ્રો વા ભગવાન્ વિષ્ણુર્ બ્રહ્મા વા જગદીશ્વરઃ ॥

કઃ સમર્થઃ પરિત્રાતું મયા ગ્રસ્તં દ્વિજોત્તમ
અનેન મમ કિં વિપ્ર રૌદ્રેણ વિધિના પ્રભોઃ ॥

નેતું યસ્યોત્થિતશ્ચાહં યમલોકં ક્ષણેન વૈ
યસ્માદ્ગતાયુસ્ત્વં તસ્માન્ મુને નેતુમિહોદ્યતઃ ॥

તસ્ય તદ્વચનં શ્રુત્વા ભૈરવં ધર્મમિશ્રિતમ્
હા રુદ્ર રુદ્ર રુદ્રેતિ લલાપ મુનિપુઙ્ગવઃ ॥

તં પ્રાહ ચ મહાદેવં કાલં સમ્પ્રેક્ષ્ય વૈ દૃશા
નેત્રેણ બાષ્પમિશ્રેણ સંભ્રાન્તેન સમાકુલઃ ॥

ત્વયા કિં કાલ નો નાથશ્ ચાસ્તિ ચેદ્ધિ વૃષધ્વજઃ
લિઙ્ગે ઽસ્મિન્ શઙ્કરો રુદ્રઃ સર્વદેવભવોદ્ભવઃ ॥

અતીવ ભવભક્તાનાં મદ્વિધાનાં મહાત્મનામ્
વિધિના કિં મહાબાહો ગચ્છ ગચ્છ યથાગતમ્ ॥

તતો નિશમ્ય કુપિતસ્ તીક્ષ્ણદંષ્ટ્રો ભયઙ્કરઃ
શ્રુત્વા શ્વેતસ્ય તદ્વાક્યં પાશહસ્તો ભયાવહઃ ॥

સિંહનાદં મહત્કૃત્વા ચાસ્ફાટ્ય ચ મુહુર્મુહુઃ
બબન્ધ ચ મુનિં કાલઃ કાલપ્રાપ્તં તમાહ ચ ॥

મયા બદ્ધો ઽસિ વિપ્રર્ષે શ્વેતં નેતું યમાલયમ્
અદ્ય વૈ દેવદેવેન તવ રુદ્રેણ કિં કૃતમ્ ॥

ક્વ શર્વસ્તવ ભક્તિશ્ ચ ક્વ પૂજા પૂજયા ફલમ્
ક્વ ચાહં ક્વ ચ મે ભીતિઃ શ્વેત બદ્ધો ઽસિ વૈ મયા ॥

લિઙ્ગે ઽસ્મિન્ સંસ્થિતઃ શ્વેત તવ રુદ્રો મહેશ્વરઃ
નિશ્ચેષ્ટો ઽસૌ મહાદેવઃ કથં પૂજ્યો મહેશ્વરઃ ॥

તતઃ સદાશિવઃ સ્વયં દ્વિજં નિહન્તુમાગતમ્
નિહન્તુમન્તકં સ્મયન્ સ્મરારિયજ્ઞહા હરઃ ॥

ત્વરન્ વિનિર્ગતઃ પરઃ શિવઃ સ્વયં ત્રિલોચનઃ
ત્રિયંબકો ઽમ્બયા સમં સનન્દિના ગણેશ્વરૈઃ ॥

સસર્જ જીવિતં ક્ષણાદ્ ભવં નિરીક્ષ્ય વૈ ભયાત્
પપાત ચાશુ વૈ બલી મુનેસ્તુ સંનિધૌ દ્વિજાઃ ॥

નનાદ ચોર્ધ્વમુચ્ચધીર્ નિરીક્ષ્ય ચાન્તકાન્તકમ્
નિરીક્ષણેન વૈ મૃતં ભવસ્ય વિપ્રપુઙ્ગવાઃ ॥

વિનેદુરુચ્ચમીશ્વરાઃ સુરેશ્વરા મહેશ્વરમ્
પ્રણેમુરંબિકામુમાં મુનીશ્વરાસ્તુ હર્ષિતાઃ ॥

સસર્જુર્ અસ્ય મૂર્ધ્નિ વૈ મુનેર્ભવસ્ય ખેચરાઃ
સુશોભનં સુશીતલં સુપુષ્પવર્ષમંબરાત્ ॥

અહો નિરીક્ષ્ય ચાન્તકં મૃતં તદા સુવિસ્મિતઃ
શિલાશનાત્મજો ઽવ્યયં શિવં પ્રણમ્ય શઙ્કરમ્ ॥

ઉવાચ બાલધીર્મૃતઃ પ્રસીદ ચેતિ વૈ મુનેઃ
મહેશ્વરં મહેશ્વર -સ્ય ચાનુગો ગણેશ્વરઃ ॥

તતો વિવેશ ભગવાન્ અનુગૃહ્ય દ્વિજોત્તમમ્
ક્ષણાદ્ગૂઢશરીરં હિ ધ્વસ્તં દૃષ્ટ્વાન્તકં ક્ષણાત્ ॥

તસ્માન્મૃત્યુઞ્જયં ચૈવ ભક્ત્યા સમ્પૂજયે દ્વિજાઃ
મુક્તિદં ભુક્તિદં ચૈવ સર્વેષામપિ શઙ્કરમ્ ॥

બહુના કિં પ્રલાપેન સંન્યસ્યાભ્યર્ચ્ય વૈ ભવમ્
ભક્ત્યા ચાપરયા તસ્મિન્ વિશોકા વૈ ભવિષ્યથ ॥

એવમુક્તાસ્તદા તેન બ્રહ્મણા બ્રહ્મવાદિનઃ
પ્રસીદ ભક્તિર્દેવેશે ભવેદ્રુદ્રે પિનાકિનિ ॥

કેન વા તપસા દેવ યજ્ઞેનાપ્યથ કેન વા
વ્રતૈર્વા ભગવદ્ભક્તા ભવિષ્યન્તિ દ્વિજાતયઃ ॥

ન દાનેન મુનિશ્રેષ્ઠાસ્ તપસા ચ ન વિદ્યયા
યજ્ઞૈર્ હોમૈર્ વ્રતૈર્ વેદૈર્ યોગશાસ્ત્રૈર્ નિરોધનૈઃ ॥

પ્રસાદે નૈવ સા ભક્તિઃ શિવે પરમકારણે
અથ તસ્ય વચઃ શ્રુત્વા સર્વે તે પરમર્ષયઃ ॥

સદારતનયાઃ શ્રાન્તાઃ પ્રણેમુશ્ ચ પિતામહમ્
તસ્માત્પાશુપતી ભક્તિર્ ધર્મકામાર્થસિદ્ધિદા ॥

મુનેર્ વિજયદા ચૈવ સર્વમૃત્યુજયપ્રદા
દધીચસ્તુ પુરા ભક્ત્યા હરિં જિત્વામરૈર્વિભુમ્ ॥

ક્ષયં જઘાન પાદેન વજ્રાસ્થિત્વં ચ લબ્ધવાન્
મયાપિ નિર્જિતો મૃત્યુર્ મહાદેવસ્ય કીર્તનાત્ ॥

શ્વેતેનાપિ ગતેનાસ્યં મૃત્યોર્મુનિવરેણ તુ
મહાદેવપ્રસાદેન જિતો મૃત્યુર્યથા મયા ॥