લિઙ્ગપુરાણ · અધ્યાય 1.31

કથં ભવપ્રસાદેન દેવદારુવનૌકસઃ
પ્રપન્નાઃ શરણં દેવં વક્તુમર્હસિ મે પ્રભો ॥

તાનુવાચ મહાભાગાન્ ભગવાન્ આત્મભૂઃ સ્વયમ્
દેવદારુવનસ્થાંસ્તુ તપસા પાવકપ્રભાન્ ॥

એષ દેવો મહાદેવો વિજ્ઞેયસ્તુ મહેશ્વરઃ
ન તસ્માત્પરમં કિંચિત્ પદં સમધિગમ્યતે ॥

દેવાનાં ચ ઋષીનાં ચ પિતૄણાં ચૈવ સ પ્રભુઃ
સહસ્રયુગપર્યન્તે પ્રલયે સર્વદેહિનઃ ॥

સંહરત્યેષ ભગવાન્ કાલો ભૂત્વા મહેશ્વરઃ
એષ ચૈવ પ્રજાઃ સર્વાઃ સૃજત્યેકઃ સ્વતેજસા ॥

એષ ચક્રી ચ વજ્રી ચ શ્રીવત્સકૃતલક્ષણઃ
યોગી કૃતયુગે ચૈવ ત્રેતાયાં ક્રતુર્ ઉચ્યતે ॥

દ્વાપરે ચૈવ કાલાગ્નિર્ ધર્મકેતુઃ કલૌ સ્મૃતઃ
રુદ્રસ્ય મૂર્તયસ્ત્વેતા યે ઽભિધ્યાયન્તિ પણ્ડિતાઃ ॥

ચતુરસ્રં બહિશ્ચાન્તર્ અષ્ટાસ્રં પિણ્ડિકાશ્રયે
વૃત્તં સુદર્શનં યોગ્યમ્ એવં લિઙ્ગં પ્રપૂજયેત્ ॥

તમો હ્યગ્ની રજો બ્રહ્મા સત્ત્વં વિષ્ણુઃ પ્રકાશકમ્
મૂર્તિરેકા સ્થિતા ચાસ્ય મૂર્તયઃ પરિકીર્તિતાઃ ॥

યત્ર તિષ્ઠતિ તદ્બ્રહ્મ યોગેન તુ સમન્વિતમ્
તસ્માદ્ધિ દેવદેવેશમ્ ઈશાનં પ્રભુમવ્યયમ્ ॥

આરાધયન્તિ વિપ્રેન્દ્રા જિતક્રોધા જિતેન્દ્રિયાઃ
લિઙ્ગં કૃત્વા યથાન્યાયં સર્વલક્ષણસંયુતમ્ ॥

અઙ્ગુષ્ઠમાત્રં સુશુભં સુવૃત્તં સર્વસંમતમ્
સમનાભં તથાષ્ટાસ્રં ષોડશાસ્રમ્ અથાપિ વા ॥

સુવૃત્તં મણ્ડલં દિવ્યં સર્વકામફલપ્રદમ્
વેદિકા દ્વિગુણા તસ્ય સમા વા સર્વસંમતા ॥

ગોમુખી ચ ત્રિભાગૈકા વેદ્યા લક્ષણસંયુતા
પટ્ટિકા ચ સમન્તાદ્વૈ યવમાત્રા દ્વિજોત્તમાઃ ॥

સૌવર્ણં રાજતં શૈલં કૃત્વા તામ્રમયં તથા
વેદિકાયાશ્ ચ વિસ્તારં ત્રિગુણં વૈ સમન્તતઃ ॥

વર્તુલં ચતુરસ્રં વા ષડસ્રં વા ત્રિરસ્રકમ્
સમન્તાન્નિર્વ્રણં શુભ્રં લક્ષણૈસ્તત્ સુલક્ષિતમ્ ॥

પ્રતિષ્ઠાપ્ય યથાન્યાયં પૂજાલક્ષણસંયુતમ્
કલશં સ્થાપયેત્તસ્ય વેદિમધ્યે તથા દ્વિજાઃ ॥

સહિરણ્યં સબીજં ચ બ્રહ્મભિશ્ ચાભિમન્ત્રિતમ્
સેચયેચ્ચ તતો લિઙ્ગં પવિત્રૈઃ પઞ્ચભિઃ શુભૈઃ ॥

પૂજયેચ્ચ યથાલાભં તતઃ સિદ્ધિમવાપ્સ્યથ
સમાહિતાઃ પૂજયધ્વં સપુત્રાઃ સહ બન્ધુભિઃ ॥

સર્વે પ્રાઞ્જલયો ભૂત્વા શૂલપાણિં પ્રપદ્યત
તતો દ્રક્ષ્યથ દેવેશં દુર્દર્શમકૃતાત્મભિઃ ॥

યં દૃષ્ટ્વા સર્વમજ્ઞાનમ્ અધર્મશ્ ચ પ્રણશ્યતિ
તતઃ પ્રદક્ષિણં કૃત્વા બ્રહ્માણમમિતૌજસમ્ ॥

સમ્પ્રસ્થિતા વનૌકાસ્તે દેવદારુવનં તતઃ
આરાધયિતુમારબ્ધા બ્રહ્મણા કથિતં યથા ॥

સ્થણ્ડિલેષુ વિચિત્રેષુ પર્વતાનાં ગુહાસુ ચ
નદીનાં ચ વિવિક્તેષુ પુલિનેષુ શુભેષુ ચ ॥

શૈવાલશોભનાઃ કેચિત્ કેચિદન્તર્જલેશયાઃ
કેચિદ્દર્ભાવકાશાસ્તુ પાદાઙ્ગુષ્ઠાગ્રધિષ્ઠિતાઃ ॥

દન્તોલૂખલિનસ્ત્વન્યે અશ્મકુટ્ટાસ્ તથા પરે
સ્થાનવીરાસનાસ્ત્વન્યે મૃગચર્યારતાઃ પરે ॥

કાલં નયન્તિ તપસા પૂજયા ચ મહાધિયઃ
એવં સંવત્સરે પૂર્ણે વસન્તે સમુપસ્થિતે ॥

તતસ્તેષાં પ્રસાદાર્થં ભક્તાનામ્ અનુકમ્પયા
દેવઃ કૃતયુગે તસ્મિન્ ગિરૌ હિમવતઃ શુભે ॥

દેવદારુવનં પ્રાપ્તઃ પ્રસન્નઃ પરમેશ્વરઃ
ભસ્મપાંસૂપદિગ્ધાઙ્ગો નગ્નો વિકૃતલક્ષણઃ ॥

ઉલ્મુકવ્યગ્રહસ્તશ્ ચ રક્તપિઙ્ગલલોચનઃ
ક્વચિચ્ચ હસતે રૌદ્રં ક્વચિદ્ગાયતિ વિસ્મિતઃ ॥

ક્વચિન્નૃત્યતિ શૃઙ્ગારં ક્વચિદ્રૌતિ મુહુર્મુહુઃ
આશ્રમે હ્યટતે ભૈક્ષ્યં યાચતે ચ પુનઃ પુનઃ ॥

માયાં કૃત્વા તથારૂપાં દેવસ્તદ્વનમ્ આગતઃ
તતસ્તે મુનયઃ સર્વે તુષ્ટુવુશ્ ચ સમાહિતાઃ ॥

અદ્ભિર્ વિવિધમાલ્યૈશ્ ચ ધૂપૈર્ગન્ધૈસ્તથૈવ ચ
સપત્નીકા મહાભાગાઃ સપુત્રાઃ સપરિચ્છદાઃ ॥

મુનયસ્તે તથા વાગ્ભિર્ ઈશ્વરં ચેદમ્ અબ્રુવન્
અજ્ઞાનાદ્દેવદેવેશ યદસ્માભિર્ અનુષ્ઠિતમ્ ॥

કર્મણા મનસા વાચા તત્સર્વં ક્ષન્તુમર્હસિ
ચરિતાનિ વિચિત્રાણિ ગુહ્યાનિ ગહનાનિ ચ ॥

બ્રહ્માદીનાં ચ દેવાનાં દુર્વિજ્ઞેયાનિ તે હર
અગતિં તે ન જાનીમો ગતિં નૈવ ચ નૈવ ચ ॥

વિશ્વેશ્વર મહાદેવ યો ઽસિ સો ઽસિ નમો ઽસ્તુ તે
સ્તુવન્તિ ત્વાં મહાત્માનો દેવદેવં મહેશ્વરમ્ ॥

નમો ભવાય ભવ્યાય ભાવનાયોદ્ભવાય ચ
અનન્તબલવીર્યાય ભૂતાનાં પતયે નમઃ ॥

સંહર્ત્રે ચ પિશઙ્ગાય અવ્યયાય વ્યયાય ચ
ગઙ્ગાસલિલધારાય આધારાય ગુણાત્મને ॥

ત્ર્યંબકાય ત્રિનેત્રાય ત્રિશૂલવરધારિણે
કન્દર્પાય હુતાશાય નમો ઽસ્તુ પરમાત્મને ॥

શઙ્કરાય વૃષાઙ્કાય ગણાનાં પતયે નમઃ
દણ્ડહસ્તાય કાલાય પાશહસ્તાય વૈ નમઃ ॥

વેદમન્ત્રપ્રધાનાય શતજિહ્વાય વૈ નમઃ
ભૂતં ભવ્યં ભવિષ્યં ચ સ્થાવરં જઙ્ગમં ચ યત્ ॥

તવ દેહાત્સમુત્પન્નં દેવ સર્વમિદં જગત્
પાસિ હંસિ ચ ભદ્રં તે પ્રસીદ ભગવંસ્તતઃ ॥

અજ્ઞાનાદ્યદિ વિજ્ઞાનાદ્ યત્ કિંચિત્ કુરુતે નરઃ
તત્સર્વં ભગવાનેવ કુરુતે યોગમાયયા ॥

એવં સ્તુત્વા તુ મુનયઃ પ્રહૃષ્ટૈરન્તરાત્મભિઃ
યાચન્ત તપસા યુક્તાઃ પશ્યામસ્ત્વાં યથાપુરા ॥

તતો દેવઃ પ્રસન્નાત્મા સ્વમેવાસ્થાય શઙ્કરઃ
રૂપં ત્ર્યક્ષં ચ સંદ્રષ્ટું દિવ્યં ચક્ષુરદાત્પ્રભુઃ ॥

લબ્ધદૃષ્ટ્યા તયા દૃષ્ટ્વા દેવદેવં ત્રિયંબકમ્
પુનસ્તુષ્ટુવુરીશાનં દેવદારુવનૌકસઃ ॥