Liṅgapurāṇa, 1-108 · Chapter 1.30

evamuktāstadā tena brahmaṇā brāhmaṇarṣabhāḥ
śvetasya ca kathāṃ puṇyām apṛcchan paramarṣayaḥ //

śveto nāma muniḥ śrīmān gatāyurgirigahvare
sakto hyabhyarcya yadbhaktyā tuṣṭāva ca maheśvaram //

rudrādhyāyena puṇyena namastetyādinā dvijāḥ
tataḥ kālo mahātejāḥ kālaprāptaṃ dvijottamam //

netuṃ saṃcintya viprendrāḥ sānnidhyamakaronmuneḥ
śveto 'pi dṛṣṭvā taṃ kālaṃ kālaprāpto 'pi śaṅkaram //

pūjayāmāsa puṇyātmā triyaṃbakamanusmaran
triyaṃbakaṃ yajedevaṃ sugandhiṃ puṣṭivardhanam //

kiṃ kariṣyati me mṛtyur mṛtyormṛtyurahaṃ yataḥ
taṃ dṛṣṭvā sasmitaṃ prāha śvetaṃ lokabhayaṃkaraḥ //

ehyehi śveta cānena vidhinā kiṃ phalaṃ tava
rudro vā bhagavān viṣṇur brahmā vā jagadīśvaraḥ //

kaḥ samarthaḥ paritrātuṃ mayā grastaṃ dvijottama
anena mama kiṃ vipra raudreṇa vidhinā prabhoḥ //

netuṃ yasyotthitaścāhaṃ yamalokaṃ kṣaṇena vai
yasmādgatāyustvaṃ tasmān mune netumihodyataḥ //

tasya tadvacanaṃ śrutvā bhairavaṃ dharmamiśritam
hā rudra rudra rudreti lalāpa munipuṅgavaḥ //

taṃ prāha ca mahādevaṃ kālaṃ samprekṣya vai dṛśā
netreṇa bāṣpamiśreṇa saṃbhrāntena samākulaḥ //

tvayā kiṃ kāla no nāthaś cāsti ceddhi vṛṣadhvajaḥ
liṅge 'smin śaṅkaro rudraḥ sarvadevabhavodbhavaḥ //

atīva bhavabhaktānāṃ madvidhānāṃ mahātmanām
vidhinā kiṃ mahābāho gaccha gaccha yathāgatam //

tato niśamya kupitas tīkṣṇadaṃṣṭro bhayaṅkaraḥ
śrutvā śvetasya tadvākyaṃ pāśahasto bhayāvahaḥ //

siṃhanādaṃ mahatkṛtvā cāsphāṭya ca muhurmuhuḥ
babandha ca muniṃ kālaḥ kālaprāptaṃ tamāha ca //

mayā baddho 'si viprarṣe śvetaṃ netuṃ yamālayam
adya vai devadevena tava rudreṇa kiṃ kṛtam //

kva śarvastava bhaktiś ca kva pūjā pūjayā phalam
kva cāhaṃ kva ca me bhītiḥ śveta baddho 'si vai mayā //

liṅge 'smin saṃsthitaḥ śveta tava rudro maheśvaraḥ
niśceṣṭo 'sau mahādevaḥ kathaṃ pūjyo maheśvaraḥ //

tataḥ sadāśivaḥ svayaṃ dvijaṃ nihantumāgatam
nihantumantakaṃ smayan smarāriyajñahā haraḥ //

tvaran vinirgataḥ paraḥ śivaḥ svayaṃ trilocanaḥ
triyaṃbako 'mbayā samaṃ sanandinā gaṇeśvaraiḥ //

sasarja jīvitaṃ kṣaṇād bhavaṃ nirīkṣya vai bhayāt
papāta cāśu vai balī munestu saṃnidhau dvijāḥ //

nanāda cordhvamuccadhīr nirīkṣya cāntakāntakam
nirīkṣaṇena vai mṛtaṃ bhavasya viprapuṅgavāḥ //

vineduruccamīśvarāḥ sureśvarā maheśvaram
praṇemuraṃbikāmumāṃ munīśvarāstu harṣitāḥ //

sasarjur asya mūrdhni vai munerbhavasya khecarāḥ
suśobhanaṃ suśītalaṃ supuṣpavarṣamaṃbarāt //

aho nirīkṣya cāntakaṃ mṛtaṃ tadā suvismitaḥ
śilāśanātmajo 'vyayaṃ śivaṃ praṇamya śaṅkaram //

uvāca bāladhīrmṛtaḥ prasīda ceti vai muneḥ
maheśvaraṃ maheśvara -sya cānugo gaṇeśvaraḥ //

tato viveśa bhagavān anugṛhya dvijottamam
kṣaṇādgūḍhaśarīraṃ hi dhvastaṃ dṛṣṭvāntakaṃ kṣaṇāt //

tasmānmṛtyuñjayaṃ caiva bhaktyā sampūjaye dvijāḥ
muktidaṃ bhuktidaṃ caiva sarveṣāmapi śaṅkaram //

bahunā kiṃ pralāpena saṃnyasyābhyarcya vai bhavam
bhaktyā cāparayā tasmin viśokā vai bhaviṣyatha //

evamuktāstadā tena brahmaṇā brahmavādinaḥ
prasīda bhaktirdeveśe bhavedrudre pinākini //

kena vā tapasā deva yajñenāpyatha kena vā
vratairvā bhagavadbhaktā bhaviṣyanti dvijātayaḥ //

na dānena muniśreṣṭhās tapasā ca na vidyayā
yajñair homair vratair vedair yogaśāstrair nirodhanaiḥ //

prasāde naiva sā bhaktiḥ śive paramakāraṇe
atha tasya vacaḥ śrutvā sarve te paramarṣayaḥ //

sadāratanayāḥ śrāntāḥ praṇemuś ca pitāmaham
tasmātpāśupatī bhaktir dharmakāmārthasiddhidā //

muner vijayadā caiva sarvamṛtyujayapradā
dadhīcastu purā bhaktyā hariṃ jitvāmarairvibhum //

kṣayaṃ jaghāna pādena vajrāsthitvaṃ ca labdhavān
mayāpi nirjito mṛtyur mahādevasya kīrtanāt //

śvetenāpi gatenāsyaṃ mṛtyormunivareṇa tu
mahādevaprasādena jito mṛtyuryathā mayā //