કુટ્ટનીમત · શ્લોક 781-800

યસ્ય ન જાતિર્નાત્મા નાર્થજ્ઞાનં ન માનસે પ્રશમઃ ।
ભવસિ ભવસાર ન ત્વં તેનાદ્વયવાદિનાસદૃશઃ

તત્રાપિ વૃદ્ધિયોગસ્તસ્મિન્નપિ પુરુષગુણગણખ્યાતિઃ ।
પરિભાષા તત્રાપિ વ્યાકરણાન્નાતિરિચ્યસે તેન

નિર્વ્યાજસ્તવનો ઽપિ ત્યક્તાક્ષેપો ઽપિ નિરુપમાનો ઽપિ ।
સદ્રૂપકજાતિગુણૈર્નાથ ત્વં ગામલઙ્કુરુષે

અન્યૈવ વર્ણનૈષા ભવત્સુ લોકોત્તરા સ્થિતા કાપિ ।
વામો યથૈવ શત્રુષુ મિત્રેષુ તથૈવ વામો ઽસિ

પૂજયસિ યેન ગુરુજનમભિનન્દસિ યેન સાધુચરિતાનિ ।
પ્રીણયસિ યેન વિપ્રાન્નૃપનન્દન તેન વૃષલસ્ત્વમ્

દૈન્યમિદં યચ્છ્લાઘા ક્રિયતે તવ રક્ષસાપિ ન સમસ્ય ।
ન સ હઠમકરોદ્યોષિતિ ભવાંસ્તુ ભુઙ્ક્તે પ્રસહ્ય રિપુલક્ષ્મીમ્

રામણિકાચાટુપદસ્તવનં યલ્લાભહેતુરસ્માકમ્ ।
તત્પતતિ તે સ્વરૂપે યામિ નમઃ સન્તુ સૌખ્યાનિ

શ્રુત્વાનન્તરમવદદ્બન્દિનમભિનન્દ્ય સાધુવાદેન ।
આસ્સ્વ કિમાકુલતા તે યાસ્યસિ તુષ્ટો મયા પ્રહિતઃ

પુનરપિ પઠ તદ્યુગલં ગીતિકયોર્યત્ત્વયા પુરા પઠિતમ્ ।
કક્ષાન્તરિતેન મમ સ્થિતસ્ય કુલપુત્રિકાવાસે

ત્વયિ વદતિ સાધુવાદં વાગિયમુન્મુદ્રિતા બુધસમાજે ।
અભિધાયેતિ પપાઠ ત્રિસ્થાનવિશુદ્ધનાદેન

એકા ખણ્ડનકુપિતા વિરસાન્યા પ્રણયભઙ્ગવૈલક્ષ્યાત્ ।
કા ચિન્નિકટતરાસનમપ્રાપ્ય બિભર્તિ હૃદયનિર્વેદમ્

અન્યા કલહાન્તરિતા નવપરિણયલજ્જયાપરા વિહતા ।
રમણીગણમધ્યગતઃ સ્મરાતુરઃ કિં કરોતુ બહુજાનિઃ

અભ્યુપગમાવબોધકમસ્તકચલનં વિધાય વિકૃતભ્રૂઃ ।
નૃત્તાચાર્યમવાદીદેતસ્મિન્ કિં સુસંગીતમ્

સ ઉવાચ તતો વણિજો નેતારો યત્ર યત્ર પાત્રાણિ ।
શાઠ્યાયતનં દાસ્યસ્તત્ર કુતઃ સૌષ્ઠવં નાટ્યે

કા ચિદ્બલિનાક્રાન્તા કા ચિન્ન જહાતિ કામિનં રુચિરમ્ ।
અન્યા પાનકગોષ્ઠ્યાં નયતિ દિનં પ્રીતકૈઃ સાર્ધમ્

નોત્સૃજતિ સતતમેકા પુરુષાગમનાશયા ગૃહદ્વારમ્ ।
શૂલાપાલઃ કથયતિ લબ્ધોત્કોચો રજસ્વલામપરામ્

રઙ્ગગતાપિ ક્ષુદ્રા શૃણોતિ યદિ પરિચિતં ગૃહાયાતમ્ ।
ઉદ્દિશ્ય વારિકાર્યં વ્રજતિ તતઃ પ્રકૃતમુત્સૃજ્ય

આ તારુણ્યોદ્ભેદાત્કાન્તે દૃષ્ટિર્યયાભ્યસ્તા ।
સામાજિકમધ્યસ્થા સા કથમન્યાસુ યાતિ પરભાગમ્

ચેતોવશિતા સત્ત્વં સત્ત્વે સતિ ચારુતા પ્રયોગસ્ય ।
ન ભવતિ સા વેશ્યાનાં મદ્યામિષપુરુષનિહિતહૃદયાનામ્

વયમપિ દેવનિકેતનમનઙ્ગહર્ષે ગતે ત્રિદશલોકમ્ ।
આશ્રિતવન્તો ઽગત્યા તીર્થસ્થાનોપરોધેન