કુટ્ટનીમત · શ્લોક 801-820

ઇહ તુ કદા ચિત્કિં ચિદ્વૃત્તિનિરોધાભિશઙ્કયા નિરુત્સાહાઃ ।
રત્નાવલ્યામેતા વિદધતિ કરપાદવિક્ષેપમ્

વત્સેશભૂમિકાસ્યા ઇયમનુકુરુતે નરેશ્વરવયસ્યમ્ ।
વાસવદત્તાચરિતપ્રયોગમેષા વિડમ્બયતિ

ઉદ્યમસાહિત્યવશાચ્છોભાતિશયેન મદનુબન્ધેન ।
અનયા પ્રસિદ્ધિરાપ્તા સિંહલરાજાત્મજાનુકૃતૌ

વિવિધસ્થાનકરચનાં પરિક્રમં ગાત્રવલનલાલિત્યમ્ ।
કાકુવિભક્તાર્થગિરો રસપુષ્ટિં વાસનાસ્થૈર્યમ્

સાત્ત્વિકભાવોન્મીલનમભિનયમનુરૂપવર્તનાભરણમ્ ।
મિશ્રામિશ્રે વાદ્યે લયાચ્યુતિં વર્ણયન્તિ મઞ્જર્યાઃ

એષાભિધાનકીર્તનનાશિતસશરીરકુસુમશરબોધા ।
સહસોદ્ભિન્નમનોભવભાવદૃશા સિન્દુવારવિવરેણ

પશ્યન્તી વત્સેશ્વરમનુકાર્યાનુકરણભેદપરિમોષમ્ ।
સાધુધ્વનિમુખરાનનસામાજિકજનમનઃસુ વિદધાતિ

વત્સપતિમાલિખન્તી કામાવસ્થાં ક્રમેણ ભજમાના ।
વેપથુપુલકસ્વેદૈરાવહતિ વિસંષ્ઠુલં હસ્તમ્

સદૃશે ઽપ્યનુભાવગણે કરુણરસં વિપ્રલમ્ભતો ભિન્નમ્ ।
દર્શયતિ નિરભિકાઙ્ક્ષિતમુદ્બન્ધનગોચરાપન્ના

તસ્મિન્નિર્દિશતીત્થં મઞ્જરિકાં સાભિલાષમવલોક્ય ।
પસ્પર્શ રાજપુત્રઃ કિમસાવિતિ વેત્રદણ્ડેન

બુદ્ધ્વાથ તસ્ય ભાવં પ્રસારયન્યુવતિસંકથાકેલિમ્ ।
ન્યક્કુર્વન્વારવધૂઃ સચિવઃ પ્રશશંસ બન્ધકીગમનમ્

દારરતિઃ સંતતયે વ્યાધિપ્રશમાય ચેટિકાશ્લેષઃ ।
તત્ખલુ સુરતં સુરતં કૃચ્છ્રપ્રાપ્યં યદન્યનારીષુ

સ્વવ્યાપારૈકમતેઃ પરચિન્તા નાસ્તિ મે કદા ચિદપિ ।
પશ્યન્ત્યાસ્ત્વામીદૃશમદ્ય તુ મે માનસં વ્યથિતમ્

યદિ વેદ્મિ તસ્ય વસતિં સામર્થ્યં યદિ ભવેત્તતો ઽભ્યધિકમ્ ।
તદ્ગત્વા દગ્ધવિધિં લગુડૈઃ સંચૂર્ણયિષ્યામિ

વપુરિદમનુપમમીદૃગ્યદિ વિહિતં તવ કૃશાઙ્ગિ હતધાત્રા ।
અનુરૂપરમણવિરહાત્કિમિતિ કૃતં વન્ધ્યજન્મફલમ્

શૈશવમસ્તુ જરા વા વ્યાધિર્વા ક્ષેત્રિયઃ પ્રણાશો વા ।
સ્વાકારં તારુણ્યં ન તુ કુપતિકદર્થનાગ્રસ્તમ્

કેલિઃ પ્રદહતિ મજ્જાં શૃઙ્ગારો ઽસ્થીનિ ચાટવઃ કટુકાઃ ।
ન કરોતિ મનસ્તુષ્ટિં દાનમભવ્યસ્ય ગૃહભર્તુઃ

કુત આગતાસિ કસ્મિન્વેલામિયતીં સ્થિતા કિમર્થમિતિ ।
પૃચ્છન્નસ્વસ્થમના જનયતિ ગેહી શિરઃશૂલમ્

યદિ ભવતિ દૈવયોગાચ્ચક્ષુર્વિષયે સમુજ્જ્વલસ્તરુણઃ ।
તત્રાત્માનં ક્ષપયતિ જાયાં ચ રટન્ ગૃહસ્વામી

સવિવાદે પરલોકે જનાપવાદે ઽપિ જગતિ બહુચિત્રે ।
દૈવાધીને પ્રલયે ન વિદગ્ધા હારયન્તિ તારુણ્યમ્