કુટ્ટનીમત · શ્લોક 761-780

અથ વૈતાલિક ઉચ્ચૈરુપસંહૃતલોકકલકલે ધીરઃ ।
અભિતુષ્ટાવ તમિત્થં પ્રસન્નગમ્બીરયા વાચા

જય દેવ પરબલાન્તક ગુરુચરણારાધનૈકકૃતચિત્ત ।
પરવનિતાજઘનાસન દારિદ્ર્યતમઃપ્રચણ્ડકરજાલ

રણધીરવંશભૂષણ ગુરુવસુધાદેવપૂજનપ્રહ્વ ।
શરણાગતાભયપ્રદ હિતબાન્ધવબન્ધુજીવમધ્યાહ્ન

ઈદૃક્ પ્રતાપદહનો ભાવત્કો વ્યાપ્તગગનદિક્ચક્રઃ ।
દૃષ્ટો જલાયમાનો રિપુવનિતાતિલકશોભાસુ

એષ વિશેષઃ સ્પષ્ટો વહ્નેશ્ચ ત્વત્પ્રતાપવહ્નેશ્ચ ।
અઙ્કુરતિ તેન દગ્ધં દગ્ધસ્યાનેન નોદ્ભવો ભૂયઃ

શ્રીફલભુક્પત્રવૃતો વિગ્રહરસિકો વિમુક્તસત્ત્રરતિઃ ।
રાજ્યસ્થિતિં ન મુઞ્ચતિ હૃતલક્ષ્મીકો ઽપિ તવ વિપક્ષગણઃ

દદતો વાઞ્છિતમર્થં સદાનુરક્તસ્ય તવ ગૃહં ત્યક્ત્વા ।
સ્ત્રીચાપલેન કીર્તિર્નગ્નાસક્તા ગતા કકુભઃ

ભવતઃ ભવતો ધૈર્યં તેન હિ ભિન્નો ઽન્ધકઃ પ્રણતઃ ।
મુક્તાસ્ત્વયા તુ બહવો રિપવો ઽપિ પ્રેક્ષકાઃ સમરે

અટતા જગતીમખિલામિદમાશ્ચર્યં મયા દૃષ્ટમ્ ।
ધનદો ઽપિ નયનનન્દન પરિહરસિ યદુગ્રસમ્પર્કમ્

ઇદમપરમદ્ભુતતમં યુવતિસહસ્રૈર્વિલુપ્યમાનસ્ય ।
વૃદ્ધિર્ભવતિ ન હાનિર્યત્તવ સૌભાગ્યકોશસ્ય

અપરં વિસ્મયજનનં ધવલત્વં નાપયાતિ યદ્ભવતઃ ।
લલનાલોચનકુવલયદલત્વિષા શબલિતસ્યાપિ

હૃદયેષુ કામિનીનામેકો ઽનેકેષુ વસસિ યેન ત્વમ્ ।
જનક કુસુમાસ્ત્રપાણેઃ પુરુષોત્તમ તેન વિશ્વરૂપો ઽસિ

કિં વહસિ વૃથા ગર્વં પ્રિયો ઽહમિતિ યોષિતાં નરાધીશ ।
કાઙ્ક્ષન્તિ સ્મ મુરારિં ષોડશગોપીસહસ્રાણિ

બ્રાહ્મણ્યેન યયાચે મખસમયે યઃ બલિં હૃષીકેશઃ ।
ન સ ભવતિ સમો ભવતા દાનૈકનિષણ્ણહૃદયેન

ભૂમિભૃતામુપરિસ્થિત ઉન્નત્યા સકલજીવલોકસ્ય ।
તૃષ્ણાસંતાપહરો મેઘ ઇવ કદા ન દક્ષસ્ત્વમ્

બહુમાર્ગો ભઙ્ગયુતઃ કુસૃતિપરો ગોત્રભેદકરણપટુઃ ।
ગઙ્ગાજલપ્રવાહઃ પુણ્યદિશા કેવલં તવ સમાનઃ

દુર્વ્યવહારોત્પત્તિર્મૌર્ખ્યપ્રસવો ઽવિવેકિતાવસતિઃ ।
એકસ્ત્વં દોષજ્ઞઃ કૃતીકૃતો યેન કલિકાલઃ

સુગતો ઽપિ નાજિવિમુખો વૃષધ્વજો ઽપિ ન વિષાદિતાયુક્તઃ ।
ઉદ્યતશસ્ત્રો ઽપિ રિપૌ કથમસિ સન્નાસિકો જાતઃ

સન્મણિરનેકભોગો ગુરુભારસહઃ સ્થિરાત્મતાસ્થાનમ્ ।
નરદેવ ચિત્રમેતદ્યદશેષગુણૈસ્ત્વમાશ્લિષ્ટઃ

પ્રકૃતિલઘોર્યેન કૃતા જઘન્યવર્ણસ્ય ગૌરવાપત્તિઃ ।
જઘનચપલા તથાર્યા સ પિઙ્ગલસ્તે કથં તુલ્યઃ