કુટ્ટનીમત · શ્લોક 641-660

ક્ષીણદ્રવ્યે દેહિનિ દારા અપિ નાદરેણ વર્તન્તે ।
કિમુતાદાનૈકરસાઃ શરીરપણવૃત્તયો દાસ્યઃ

અવિદિતહેયાદેયાસ્તિર્યઞ્ચો ઽપિ ત્યજન્તિ પીતરસમ્ ।
કુસુમં કિમુ કાર્યવિદો વેશ્યા નરમાત્તસર્વસ્વમ્

ઉત્પાદયતિ સદાનો રાગં રાગાત્મકો યથાભ્યધિકમ્ ।
નિર્દાનો ઽપિ સદા નો નિઃસંદેહં તથૈવ મનુજન્મા

યદતીતં તદતીતં ભાવિનિ લાભે ઽપિ નાતિબહુમાનઃ ।
તત્કાલહસ્તનિપતિતમનિયતપુંસાં મુદે વિત્તમ્

પીડિતમધુ મધુજાલં તુચ્છીભૂતં ચ મન્મથાગ્રસ્તમ્ ।
મુઞ્ચન્તિ મદનશેષં ક્ષુદ્રાશ્ચ પ્રકટરામાશ્ચ

એકઃ ક્રીણાત્યદ્ય પ્રાતો ભવિતા તથાપરઃ ક્રેતા ।
અન્યવશે ક્ષણમેકં ન વિક્રયઃ શાશ્વતો ઽસ્તિ વેશ્યાનામ્

સંદર્શિતપરમાર્થં ભ્રૂક્ષેપકટાક્ષદૃષ્ટહસિતાદિ ।
શૃણ્વન્તુ યે સકર્ણાસ્તત્કૃતમન્યત્ર સંક્રાન્તમ્

યદિ નામ નિરાકરણે ન સમર્થા છિન્નકાર્યબન્ધે ઽપિ ।
કા ચિન્મહાનુભાવા બોદ્ધવ્યં તદપિ ચેતનાવદ્ભિઃ

તેનાર્થેનોપકૃતં તયાપિ તસ્ય સ્વદેહદાનેન ।
તચ્ચાતીતં સમ્પ્રતિ નિરર્થકઃ શુષ્કશૃઙ્ગારઃ

અવધીરણા રસાયનમપમાનો ભવતિ યસ્ય પરિતુષ્ટ્યૈ ।
યોગ્યો ઽસૌ પુરુષખરઃ ખરતરનિર્ભર્ત્સનોક્તિલકુટાનામ્

દીપજ્વાલાલલને વ્રજતઃ ખલુ નિર્વૃતિં તયોસ્ત્વિયાન્ ભેદઃ ।
પ્રથમા સ્નેહેન વિના તથાપરા સ્નેહયોગેન

ધર્મઃ કામાદભિનવગુણવન્નિઃસ્વસ્ય મદનરોગવતઃ ।
અર્થો ઽર્થવતો ઽભિગમાત્કામઃ સમરતનરોપભોગેન

યસ્તુ ન ધર્મપ્રાપ્ત્યૈ નાર્થાય ન કામસાધનોપાયઃ ।
સ પુમાન્સચ્ચરિતધનૈઃ પર્યનુયુક્તઃ કિમાચષ્ટે

કામોદ્વેગગૃહીતં ધૂર્તૈરુપહસ્યમાનશૃઙ્ગારમ્ ।
દારિદ્ર્યહતં યૌવનમબુધાનાં કેવલં વિપદે

વ્યપગતકોષે રાગિણિ યાતિ લયં પાનમાત્રલાભહૃતા ।
ક્ષુદ્રા મધુકરિકાબ્જે ન તુ ગણિકા ચિન્તિતસ્વાર્થા

યાસાં કાર્યાપેક્ષા સકટાક્ષનિરીક્ષણે ઽપિ વેશ્યાનામ્ ।
દર્શનમાત્રક્ષુભિતૈર્વઞ્ચ્યન્તે તાઃ કથં પુરુષૈઃ

ક્લેશાય દુર્ગતાનાં માનસ્તુતિગાત્રભઙ્ગવિન્યાસમ્ ।
ગણિકાભિનયચતુષ્ટયમાકૃષ્ટ્યૈ સ્વાપતેયપુષ્ટાનામ્

કિં ધક્ષ્યતિ ભૂયો ઽપિ જ્વલનસ્તં તાદૃશં કુલાઙ્ગારમ્ ।
યો દહ્યતે ઽવિરામં વિરક્તદાસીતિરસ્કારૈઃ

ગૃહમેતદીશ્વરાણાં કાન્તારં દુષ્પ્રવેશમન્યેષામ્ ।
પૂત્કૃતમિદમુદ્ભુજયા ન માલતી કામસત્ત્રદાનપરા

ઇતિ ચોદિતગૃહચેટીનિગદિતકટુકાક્ષરાન્યકૃતલક્ષ્યાઃ ।
આકર્ણયતો વાચો દૈવોપહતસ્ય તસ્ય મર્મભિદઃ