કુટ્ટનીમત · શ્લોક 661-680

એવમભિધીયમાનો નો બુધ્યતિ યદિ પશુર્નરાકારઃ ।
તદિદં સુન્દરિ વાચ્યઃ પ્રશ્રિતવચસા ત્વયા કામી

પ્રીયત એવ તવોપરિ હૃદયં મે કિં તુ ગુરુજનાધીના ।
માતૃવચોતિક્રમણં ન સમર્થા સંવિધાતુમહમ્

અર્હસિ તાવદતસ્ત્વં ગન્તુમિતઃ કતિપયાન્યપિ દિનાનિ ।
પુનરપિ ભવતૈવ સમં ભોક્તવ્યં જીવલોકસુખમ્

નિર્વાસિતે તુ તસ્મિન્ યઃ કામી પૂર્વમુજ્ઝિતો ભુક્ત્વા ।
તસ્ય પ્રાપ્તવિભૂતેર્યુક્તિરિયં ભિન્નસંધાને

ઉપવનલીલાવિહરણહાવોજ્જ્વલમઞ્જુલસ્ય સહ તેન ।
વર્ણનમિતિવૃત્તસ્ય સ્મરજવિકારાશ્ચ વીક્ષિતે તસ્મિન્

ઇદમુપવનમતિધન્યં નિર્ભરમાલિઙ્ગિતં સુરભિલક્ષ્મ્યા ।
મત્સ્કન્ધાર્પિતપાણિર્બભ્રામ સ યત્ર જીવિતાધીશઃ

સખ્ય ઇતો ભ્રમરકુલત્રાસિતયા પ્રિયતમો મયા સહસા ।
વક્રીભવત્પયોધરમુપગૂઢો ધીરસીત્કારમ્

રણદિન્દિન્દિરવૃન્દે કૂજત્કલકણ્ઠરાવરમણીયે ।
અત્રાતિમુક્તકગૃહે મરુદીરણવિધુતકુસુમસંછન્ને

મયિ જાતાધિકરાગો બલવતિ મદને સહાયસામગ્ર્યા ।
કાન્તઃ પલ્લવશયને નો તૃપ્તિમગાદ્વિવિક્તકાર્યેષુ

પ્રેઙ્ખોલનવિતરણયુક્ત્યા વિધ્યન્ પાર્શ્વયોર્નખૈર્ધૂર્તઃ ।
ચક્રે માં મદનમયીં વ્રતતિપ્રેઙ્ખામિમાં સમારૂઢામ્

સ્પૃહણીયો ઽયમશોકઃ સ્પૃષ્ટો યદ્વલ્લભેન હસ્તેન ।
અસ્મદવતંસકાર્થં નૂતનદલપલ્લવાન્ વિચારયતા

અસ્મિન્સહકારતલે તસ્યોત્સઙ્ગે સલીલમાસીના ।
અશૃણવમહમિતિ વાચઃ પશ્યન્તી વિલસિતાનિ તરુણાનામ્

ઉત્થાપય માનરસે દયિતં ચરણાગ્રનિપતિતં તૂર્ણમ્ ।
અત્યાકૃષ્ટં ત્રુટ્યતિ સુદૃઢમપિ પ્રેમબન્ધનં મૂઢે

તિષ્ઠન્નપિ યાતસમઃ કિં તેન નિવારિતેન સખિ પશુના ।
યામીતિ નિષ્પ્રકમ્પં વિનિઃસૃતા યસ્ય માધવે વાણી

આયુઃસારં યૌવનમૃતુસારઃ કુસુમસાયકવયસ્યઃ ।
સુન્દરિ જીવિતસારો રતિભોગસુખામૃતાસ્વાદઃ

રમ્યં કુસુમસ્તબકં કુરુ મે પ્રિય કૈઙ્કિરાતમવતંસમ્ ।
તિષ્ઠતુ વા કિમનેન પ્રત્યગ્રમશોકકિસલયં ચારુ

આસ્તામાસ્તામેતત્પ્રાપય માં સિન્દુવારમભિરામમ્ ।
નહિ નહિ રાજતિ સુતરાં ચૂતદ્રુમમઞ્જરી કર્ણે

ધિક્તારુણ્યમકાન્તં ધિક્કાન્તં યૌવનેન રહિતં ચ ।
ધિક્તદ્દ્વયમપિ મન્મથસામર્થ્યવિકાસિતં વિના સુરતમ્

જનિતો ઽપ્યપરાધશતૈર્વામે તસ્મિંશ્ચિરપ્રરૂઢો ઽપિ ।
અવગતમધુના સખ્યો ન વસન્તમતીત્ય વર્તતે માનઃ

વર્ષશતસ્ય સ સારઃ કાલલવઃ પ્રથમમેલકસ્થાનમ્ ।
સચકિતમાગચ્છન્તી સોત્કલિકા યત્ર દૃશ્યતે રમણી