Kubjikamatatantra · અધ્યાય 8

શ્રુતં દેવ મયાખ્યાતમ્ અશેષાર્થસુવિસ્તરમ્
કથં દેવ્યાઃ શિખાસંસ્થા સ્વચ્છન્દઃ કતિરૂપધૃક્ ॥

પ્રયોગવિપુલં દેવ સર્વોપાયવિવર્જિતમ્
અધુનાશ્રોતુમ્ ઇચ્છામિ સારાત્ સારતરં વિભો ॥

આપ્યાયનં શરીરસ્ય આકાશાદિપ્રસાધનમ્
અર્ચનં ચૈવ સઙ્ક્ષેપાદ્ ગ્રહમર્દકરં યથા ॥

રિપુમર્દકરં ચૈવ બિલયન્ત્રપ્રસાધનમ્
જ્વરદુષ્ટવિષાદીનાં સર્વદુઃખવિમર્દનમ્ ॥

યથા સ્મરણમાત્રેણ વ્યાધિતો મુચ્યતે ક્ષણાત્
ધર્મકામાર્થસંસિદ્ધમ્ અર્થમોક્ષપ્રસાધનમ્ ॥

વશીકરણકર્માણિ આકર્ષણવિધિક્રિયા
દિવ્યાદિવ્યેષુ કાર્યેષુ નાગકાર્યેષુ ભૈરવ ॥

શરીરસ્થં યથા બ્રૂહિ નાડિસ્થં મુદ્રયા સહ
સઙ્ક્ષેપાર્ચનકર્મ ચ સંસિદ્ધં ભોગસાધનમ્ ॥

વ્રતયાગવિહીનં ચ વિત્તોપાયવિવર્જિતમ્
સ્મરણાત્ કેવલો મન્ત્રઃ સુખમ્ ઉત્પાદયેદ્ યથા ॥

સાધુ કુબ્જિનિ ભદ્રે ત્વં કથયતઃ શૃણુષ્વ મે
શિખા ગુણકલા યસ્ય સ્વચ્છન્દસ્યામિતદ્યુતેઃ ॥

કુબ્જિકાયાઃ શિખા રૌદ્રા રૌદ્રસિદ્ધિપ્રદાયિકા
સારાત્ સારતરં દેવિ સત્યં સત્યં ન ચાન્યથા ॥

અઘોરાન્ ન પરો મન્ત્રઃ કસ્માચ્ ચૂલીગતસ્ તુ સઃ
શમનં સર્વદુઃખાનાં વ્યાધીનાં ચ નિકૃન્તનમ્ ॥

સર્વાનુગ્રહકં દેવિ ભુક્તિમુક્તિપ્રદાયકમ્
કાલનિર્ણાશનં દેવિ જરાસિંહમ્ ઉદાહૃતમ્ ॥

દારિદ્રશમનં ચેદમ્ અચિરેણ ગણામ્બિકે
આશાઃ સંશોધયિત્વા તુ દેવ્યા ન્યાસં હિ પૂર્વવત્ ॥

હૃદયાદિપ્રભેદેન અસ્ત્રાન્તં યાવદાવધિમ્
સ્વસ્થાનન્યાસવિન્યાસં પૂર્વવચ્ ચ યથાસ્થિતમ્ ॥

શિખાસ્વચ્છન્દદેવેશં મન્ત્રેદં પારમેશ્વરમ્
ષડઙ્ગયજનાદ્ વાથ નિરાચારેણ સિધ્યતિ ॥

તતો મુદ્રાં પરાં બદ્ધ્વા ચિન્તયેદ્ યોનિમધ્યગામ્
મહામુદ્રેતિ વિખ્યાતા નાખ્યાતા કસ્યચિન્ મયા ॥

ધ્યાત્વા પ્રેતં પુરા દેવિ સર્વકારણકારણમ્
મહાયોગી મહાસિદ્ધઃ સર્વલોકધરઃ પ્રભુઃ ॥

સર્વજ્ઞગુણસંયુક્તં પદ્મં તસ્યોપરિ સ્થિતમ્
કર્ણિકોપરિ દીપ્યન્તં પ્રજ્વલન્તં મહૌજસમ્ ॥

અનન્તં તદ્ વિજાનીયાત્ તસ્યોર્ધ્વે તચ્છિખાશિવમ્
અષ્ટપત્ત્રાસનાસીનં દ્વાત્રિંશાર્ચિભિર્ આવૃતમ્ ॥

નાનાલઙ્કારસમ્પન્નં નાનાવર્ણં વિચિન્તયેત્
દશબાહું મહાઘોરં ચતુર્વક્ત્રં સુલાલસમ્ ॥

સર્વવર્ણધરં દેવમ્ અથ શ્યામં વિન્ચિન્તયેત્
કપાલં ચૈવ ખટ્વાઙ્ગમ્ અન્યત્ પરશુશૂલધૃક્ ॥

ડમરું ચાક્ષમાલાં ચ ફલં હસ્તે નિવેશયેત્
ગજચર્મધરૌ ચોભૌ હસ્તૌ તુ પરિકીર્તિતૌ ॥

ગર્જન્તં ભીષણં નાદં સર્વકારણકારણમ્
ભક્ષન્તં ચિન્તયેદ્ વ્યાધિં વિશ્વેશ્વરકુજેશ્વરમ્ ॥

ખાદ્યમાનાં રટન્તીં તાં તાડ્યમાનાં વિભેદિતામ્
ભેદયન્તીં ત્રિશૂલેન છેદયન્તીં મહાસિના ॥

ક્રુદ્ધભાવાદ્ ધુનન્તીં તાં પૂર્વવ્યાધિં વિચિન્તયેત્
તસ્યોપરિ તમ્ ઐકારમ્ ઈશતત્ત્વાવધિસ્થિતમ્ ॥

શિખાસ્વચ્છન્દદેવેશં તત્ સ્થાપ્યોપરિ પૂજયેત્
સ્વકીયાઙ્ગસમુદ્ભૂતમ્ એકવીરાઙ્ગપઞ્ચકમ્ ॥

આગ્નેય્યાં હૃદયં ન્યસ્ય શિરસ્ ત્વ્ ઈશાનગોચરે
શિખાં શિખાત્મકાં રક્ષે તનુત્રાણં તુ વાયવે ॥

અસ્ત્રં દિશાસુ વિન્યસ્ય ભૂયો મધ્યે પ્રપૂજયેત્
જુષ્ટચણ્ડેશ્વરં ક્ષેત્રે પૂજાદૌ વિઘ્નરાટ્ કુલે ॥

ચલાદીનામ્ અધિષ્ઠાનં જાનીયાદ્ ગુરુપઙ્ક્તિવત્
ધૂપચન્દનનૈવેદ્યં ત્રયાણાં પ્રથમં દદેત્ ॥

સિદ્ધિસાધનયુક્તસ્ય માર્ગો ઽયં હ્ય્ અવિચારકઃ
નિરાચારપદસ્થાનાં ક્ષેત્રચણ્ડીશવિઘ્નરાટ્ ॥

બલિપૂજાસુ નૈવેદ્યં ત્રયાણાં પ્રથમં દદેત્
પશ્ચાત્ ક્રમસ્ય કુબ્જીશે અતઃ શાઠ્યં ન કારયેત્ ॥

પારમ્પર્યક્રમં પૂજ્ય પશ્ચાન્ મણ્ડલકોપરિ
શિખાસ્વચ્છન્દદેવેશં યામલં તુ ચતુષ્કલમ્ ॥

હૃત્તનુત્રાણપર્યન્તં યજેદ્ દેવં ચતુષ્કલમ્
યોગમાર્ગાવલમ્બાનાં શ્રીસિદ્ધાખ્યં ચતુષ્કલમ્ ॥

પૂજ્ય સ્વચ્છન્દદેવેશં ક્રમાગ્રે મણ્ડલોપરિ
તતો જપેચ્ છિખાનાથમ્ અઘોરં પરમેશ્વરમ્ ॥

પ્રણવાદ્યં નમસ્કારમ્ અસિદ્ધાનાં નિયુઞ્જયેત્
સિદ્ધાર્થયોગયુક્તાનામ્ ઐંપાદાદ્યન્તયોજિતમ્ ॥

તતો ઽ ગ્નિપૂજનં કૃત્વા યથા પૂજા તથાહુતિમ્
સહસ્રં વા શતં વાથ પઞ્ચાશત્ પઞ્ચવિંશ વા ॥

તિલૈર્ હોમં પ્રકુર્વીત દધિમધ્વાજ્યસંયુતૈઃ
ઘૃતસક્ત્વા ચ મધુના સર્વદુઃખપ્રમર્દકમ્ ॥

વ્યાધિનિર્ણાશનં કુબ્જિ શેષહોમં તુ ભૂતિદમ્
સહસ્રેણ મહાભૂતિઃ શતેન વ્યાધિનાશનમ્ ॥

શતમ્ અષ્ટશતં કુબ્જિ દેવતુલ્યો ભવિષ્યતિ
સર્વદુઃખવિનિર્મુક્તં જપપૂજાસમન્વિતમ્ ॥

શતતો ઽ ષ્ટસહસ્રેણ ત્રિષ્કાલેન તુ સુન્દરિ
ષણ્માસાજ્ જાયતે સિદ્ધિઃ સાક્ષાત્ પશ્યતિ ભૈરવીમ્ ॥

યથેષ્ટં જાયતે સિદ્ધિર્ નાસ્ત્ય્ અત્ર-મ્-અનૃતં વચઃ
સહસ્રેણ જ્વરં યાતિ છાગસ્ય પિશિતૈર્ હુતૈઃ ॥

ત્રિષ્કાલં માસમ્ એકં તુ સહસ્રં હુનતે તુ સઃ
સિધ્યતે માંસહોમેન ક્ષૌદ્રાજ્યદધિસંયુતમ્ ॥

યવક્ષીરાન્નહોમેન શાલિતણ્ડુલસાધિતમ્
પ્રીયતે તુ શિખાદેવઃ સ્વચ્છન્દો ઘોરરૂપધૃક્ ॥

દધિહોમાત્ પરા પુષ્ટિઃ ક્ષીરહોમેન શાન્તિકમ્
ષણ્માસાત્ તુ ઘૃતં હુત્વા સર્વવ્યાધિવિનાશનમ્ ॥

રાજયક્ટ્મં તિલૈર્ હોમાદ્ આયુવૃદ્ધિર્ યવૈર્ હુતૈઃ
કુષ્ઠસ્યૈવ સદા હોમાત્ ત્રિયુક્તૈસ્ તણ્ડુલૈઃ પ્રિયે ॥

સમસક્તુઘૃતેનાશુ નાશયેત ભગન્દરમ્
તિલૈર્ હોમં પ્રકુર્વીત દધિમધ્વાજ્યસંયુતમ્ ॥

વ્યાધિનિર્ણાશનં કુબ્જિ શેષહોમસ્ તુ ભૂતિદઃ
ઘૃતકેવલહોમેન સર્વવ્યાધિનિકૃન્તનમ્ ॥

પ્રયોગં સમ્પ્રવક્ષ્યામિ યદ્ ઉક્તં તે પુરા મયા
ધર્મકામાર્થમોક્ષાણાં ચતુર્વર્ગફલોદયમ્ ॥

તવ કુબ્જિ પ્રવક્ષ્યામિ શૃણુષ્વેકમનાધુના
સર્વવ્યાધિહરં ધ્યાનં પરં પુષ્ટિવિવર્ધનમ્ ॥

આશાં સંશોધયેત્ પૂર્વં ન્યાસં કૃત્વા તુ પૂર્વકમ્
પૂર્વં ન્યસ્ય ચ મન્ત્રેશં નાડીવર્ણૈસ્ તથાક્ષરૈઃ ॥

અધઃસ્રોતં તુ વામેન દક્ષિણોર્ધ્વગતં પ્રિયે
ન્યાસં કૃત્વા શરીરે તુ મન્ત્રરાજમ્ અનુસ્મરેત્ ॥

પઞ્ચપ્રણવ-મ્-આદ્યેન અઘોરેણ સુરાધિપે
અધ્યુષ્ટમાત્રાદ્ ઉત્તીર્ણં જ્ઞાત્વા મન્ત્રમ્ અનુસ્મરેત્ ॥

અકુલાદિત્રિમધ્યસ્થં કુલા[ચ્] ચાદેસ્ ત્રિમધ્યગમ્
મધ્યમાદિત્રિમધ્યસ્થં પિણ્ડાદેસ્ તુ ત્રિમધ્યગમ્ ॥

ત્રયાર્ધમાત્રસંયુક્તં પ્રણવેદં શિખાશિવમ્
ત્રિનાડીપિણ્ડસમ્ભૂતં મુદ્રયા ચોર્ધ્વદીપિતમ્ ॥

ત્રિપક્ષક્ષયકર્તારં ત્રિધાબદ્ધં ત્રિશૂલિનમ્
ત્રિમૂર્તિગુણસમ્ભૂતં તેનાસૌ ત્રિદશેશ્વરઃ ॥

ત્રિમાર્ગવિહિતં શાન્તં ત્રિપથાન્તસમુદ્ભવમ્
ત્રિપથેન વિના ભદ્રે ભ્રાજતે યોનિમણ્ડલમ્ ॥

યોનિં વિના ન નિષ્પત્તિર્ દિવ્યાદિવ્યેષુ વસ્તુષુ
ઉત્તમોત્તમમધ્યસ્થા કન્યસાન્તવ્યવસ્થિતા ॥

બિન્દુ શક્તિસ્ તથા નાદં માત્રાત્રયમ્ ઉદાહૃતમ્
ત્રયાણામ્ અપિ સંયોગાન્ નિષ્પદ્યેત ભગાલયમ્ ॥

પરાર્ધમાત્રસમ્ભિન્નં પ્રણવો ઽયં કુલાગમે
અ-ઉ-મ-કારસંયુક્તં પ્રણવેદં ક્રિયાત્મકમ્ ॥

સાદાખ્યેશ્વરરુદ્રાણાં બ્રહ્મવિષ્ણુ-ર્-અનુક્રમાત્
એતે તે પ્રણવાઃ પઞ્ચ ક્રિયાકારણગોચરે ॥

પ્રણવાદિસમુદ્ભૂતાઃ પઞ્ચૈતે ગુણવત્તરાઃ
પઞ્ચપ્રણવ-મ્-આદ્યન્તં તતોર્ધ્વે તુ શિખાશિવમ્ ॥

એવં તુ પ્રણવં દિવ્યં સુગોપ્યં પ્રકટીકૃતમ્
અત્ર દેવિ સ્ફુટં તુભ્યં ભ્રાન્તં ચાત્ર જગત્ત્રયમ્ ॥

જ્ઞાત્વેવં સંસ્મરેદ્ યસ્ તુ સન્નિધાનો ઽસ્તિ તસ્ય વૈ
સુદુર્લભઃ પ્રયોગો ઽયં ગુરુવક્ત્રાત્ તુ લભ્યતે ॥

યત્રોત્પન્નં તતો યાતિ લયં કૃત્વા સુરાધિપે
ઉત્પત્તિપ્રલયં જ્ઞાત્વા તતો મન્ત્રમ્ અનુસ્મરેત્ ॥

યત્ કિઞ્ચિત્ કુરુતે કાર્યં સાધકઃ સાધનાત્મકઃ
ઉચ્ચરેત્ તુ લયાન્તસ્થં તર્જન્યાગ્રે વ્યવસ્થિતમ્ ॥

નાડીસૂત્રેણ વિન્યસ્તં બહિર્ અન્તે ચ માતરઃ
યા નાડી સા ભવેદ્ વર્ણસ્ તયા નાડ્યા તુ વેષ્ટયેત્ ॥

યદિ ચન્દ્રં વહેચ્ ચક્રં સૂર્યં વા ચક્રમ્ ઉત્તમમ્
તસ્ય મધ્યે સ્વયં સ્થિત્વા વિશ્વો ઽહમ્ ઇતિ ચિન્તયેત્ ॥

અહં બ્રહ્મા તથા વિષ્ણુર્ અહં દેવો મહેશ્વરઃ
ભૈરવો ઽહમ્ ઇતિ દેવિ ચિન્તયિત્વા તુ સાધકઃ ॥

હૃન્મધ્યે ચિન્તયેચ્ ચક્રં નાડીવર્ણૈસ્ તથાક્ષરૈઃ
આદ્યક્ષરં જપેન્ મન્ત્રં પુનર્ આદ્યં નિયોજયેત્ ॥

એવં સંસ્મૃત્ય વિધિવત્ સર્વકર્માણિ સાધયેત્
અર્ચનં હવનં ધ્યાનં જપમ્ એકાન્તરૂપિણમ્ ॥

કર્મ કૃત્વા કુજેશાનિ કુજેશાય નિવેદયેત્
તતો ધ્યાનં પ્રકુર્વીત વિશુદ્ધેનાન્તરાત્મના ॥

સ એવ મન્ત્રમ્ ઉચ્ચાર્ય આદ્યાદૌ યાવદ્ અન્તિમમ્
નાદેન તુ ગતિં કુર્યાત્ સ્વચ્છન્દગતિભાવિતઃ ॥

બ્રહ્મં ભિત્ત્વા તતો વિષ્ણું રુદ્રમ્ ઈશ્વરમ્ એવ ચ
સેતુમધ્યેન ગમનં કુઞ્ચિકોદ્ઘાટયેદ્ બિલમ્ ॥

ઉદ્ઘાટ્ય પરમં સ્થાનમ્ અઘોરં યત્ર સંસ્થિતમ્
અષ્ટાકપાલ ઘોરીશં ત્ર્યક્ષરં સમનુસ્મરેત્ ॥

સર્વમન્ત્રેષુ હૃદયં યત્ કુબ્જીશશિખાત્મકમ્
મનસા સ્મૃતમાત્રેણ ખેચરત્વં પ્રજાયતે ॥

સર્વવિઘ્નોપશમનં મન્ત્રં ત્ર્યક્ષરમ્ ઉત્તમમ્
શેષષટ્કં તુ યદ્ દેવિ તદઙ્ગાન્ય્ અસ્ય કલ્પયેત્ ॥

જપ્તવ્યં તુ શિખાસૂત્રં સકૃત્ સિદ્ધિઃ પ્રજાયતે
આકાશાદિપ્રસિદ્ધ્યર્થં સિદ્ધિર્ અન્યાસુ કા કથા ॥

મન્ત્રસન્નદ્ધદેહસ્ તુ સર્વાવસ્થો ઽપિ સાધકઃ
તિષ્ઠન્ જાગ્રન્ સ્વપન્ ગચ્છન્ ભુઞ્જાનો મૈથુને રતઃ ॥

ચર્યાધારી નિરાચારો મન્ત્રસંસ્મરણાચ્ છુચિઃ
સામાન્યસ્મરણાદ્ એવ વ્યાધિભિર્ નાભિભૂયતે ॥

પ્રજ્વલન્ દૃશ્યતે ભૂતૈર્ યસ્યેદં તુ શરીરગમ્
અતઃ કિં બહુનોક્તેન સિંહસ્યૈવ યથા મૃગાઃ ॥

ગન્ધેન પ્રલયં યાન્તિ સત્યં સત્યં મહાતપે
જપેન સાધયેત્ સર્વં વ્રતસ્થો યસ્ તુ સાધકઃ ॥

પૂર્વમ્ એવ જપેલ્ લક્ષં સિધ્યતે ઘોરમૂર્ધજમ્
અવિદિત્વા વિધાનેન કિઞ્ચિત્ કાર્યં ન સાધયેત્ ॥

યઃ કુર્યાદ્ વિધિહીનં તુ સ વિઘ્નૈશ્ ચાભિભૂયતે
તસ્માત્ પદાર્થનવકં જ્ઞાતવ્યં તુ કુજેશ્વરિ ॥

ક્ષેત્રસ્થાનાનિ સુશ્રોણિ જ્ઞાતવ્યાનિ સુનિશ્ચિતૈઃ
ક્ષેત્રં વ્રતાનિ મન્ત્રાશ્ ચ અક્ષસૂત્રં જપં તથા ॥

ધ્યાનં પૂજા તથા દ્રવ્યં વર્ણં મુખસમન્વિતમ્
મુખહીના ન સિધ્યન્તિ અગ્નિહોત્રવિવર્જિતાઃ ॥

મુખમ્ આહવનીયં સ્યાત્ તસ્મિન્ મન્ત્રાઃ સદા સ્થિતાઃ
અઘોરં કાલમ્ ઇત્ય્ ઉક્તમ્ અઘોરં વિષ્ણુર્ ઉચ્યતે ॥

અઘોરસ્ ત્વં મહેશાનિ અઘોરશ્ ચાહમ્ એવ ચ
બહુરૂપધરો હ્ય્ અગ્નિઃ પ્રચણ્ડઃ કાલ-મ્-અન્તગઃ ॥

સ શિવઃ પરમો બ્રહ્મા નિર્વાણઃ સ સદાશિવઃ
ઈશ્વરઃ સ પરો નિત્યમ્ અસ્માત્ પરતરો ન હિ ॥

અનેન સ્મૃતમાત્રેણ સર્વદુઃખૈઃ પ્રમુચ્યતે
દારિદ્રસિંહો ઽઘોરીશો વ્યાધિસિંહઃ કુલેશ્વરિ ॥

પ્રચણ્ડદુષ્ટસિંહશ્ ચ મહાપાતકનાશનઃ
સર્વતીર્થાભિષેકશ્ ચ સપ્તજપ્તેન જાયતે ॥

શતજપ્તેન દેવેન સર્વયજ્ઞફલં લભેત્
દીક્ષાનિર્વાણકારી સ્યાત્ ત્રિસપ્તપરિવર્તનાત્ ॥

દશાવર્તેન દુરિતં બ્રહ્મહત્યાં વ્યપોહતિ
દશાવર્તાદ્ ગુરોપેક્ષી સ્મરણાદ્ એવ મુચ્યતે ॥

વિધિહીને તથા પાને પઞ્ચભિશ્ ચોપપાતકી
શતેન ચૈવ ત્રિષ્કાલ્યં વર્ષાત્ સિદ્ધિર્ યથેપ્સિતા ॥

બલવતાં રિપૂણાં તુ વ્યસ્તમ્ આવર્તયેત્ પ્રભુઃ
દક્ષિણાસ્યો મહાદેવિ સહસ્રેણ નિપાતયેત્ ॥

સઙ્ગ્રામકાલે સ્મર્તવ્યમ્ અસિપત્ત્રગતં હૃદિ
વેષ્ટન્તં માતૃભિઃ સૈન્યં ભક્ષ ભક્ષેતિ ભાષયેત્ ॥

હતદર્પાઃ પ્રજાયન્તે ન પુનઃ સંહરન્તિ ચ
દુઃસ્વપ્ને દ્વિગુણં જાપ્યં વ્રણે ચૈવ ચતુર્ગુણમ્ ॥

લૂતા દશગુણં ચૈવ વિષે વૈ વિંશતિસ્ તથા
દિને દિને શતં જપ્ત્વા વિભૂતિર્ વર્ધતે ઽ ચિરાત્ ॥

પ્રાઙ્મુખો યસ્ય નામ્ના તુ સાધ્યારૂઢો હૃદિ સ્થિતઃ
વશીભવતિ રાજાનં શતજાપ્યેન ધીમતા ॥

સપ્તાહાત્ સ બલોપેતો વશીભવતિ નાન્યથા
દિને દિને સહસ્રેણ નાસ્તિ તદ્ યન્ ન સાધયેત્ ॥

આદિત્યાભિમુખો ભૂત્વા સહસ્રં પરિવર્તયેત્
યત્ કિઞ્ચિદ્ વિહિતં ચિત્તે સપ્તાહાત્ સાધયિષ્યતિ ॥

ન્યસ્તં સર્વાઙ્ગિકં મન્ત્રં ભૈરવાકારસંસ્થિતમ્
સ તુ ભોજનકાલે તુ પાત્રે સઞ્ચિન્ત્ય સાધકઃ ॥

સમ્પૂર્ણશશિનં ધ્યાયેદ્ ભુઞ્જાનો ઽમૃતમ્ અશ્નુતે
સમ્પૂર્ણચન્દ્રમધ્યસ્થમ્ અધોર્ધ્વસમ્પુટીકૃતમ્ ॥

પર્યટેત્ સાધકો નિત્યં સર્વશ્રેયમ્ અવાપ્નુયાત્
યદ્ ઇચ્છેત્ સાધકઃ સિદ્ધિં હૃદિ કૃત્વા કુજેશ્વરમ્ ॥

ચન્દ્રમણ્ડલમધ્યસ્થં સ્વચ્છન્દગતિભાવિતમ્
તત્પ્રવિષ્ટં વિચિન્તેત અન્ત્યાદ્ અન્તં પરાપરમ્ ॥

પરસ્પરં તુ સઞ્ચિન્ત્ય યાવદ્ બ્રહ્મબિલં ગતઃ ॥