કૃષ્ણામૃતમહાર્ણવ · શ્લોક 181-200

દ્વાદશી ન પ્રમોક્તવ્યા યાવદ્ આયુઃ પ્રવર્તતે
અર્ચનીયો હૃષીકેશો વિશુદ્ધેનાન્તરાત્મના.

ભક્ત્યા ગ્રાહ્યો હૃષીકેશો ન ધનૈર્ ધરણીસુરાઃ
ભક્ત્યા સમ્પૂજિતો વિષ્ણુઃ ફલં દત્તે સમીહિતમ્.

જલેનાપિ જગન્નાથઃ પૂજિતઃ ક્લેશનાશનઃ
પરિતોષં પ્રયાત્ય્ આશુ તૃષાર્તાસ્ તુ યથા જલૈઃ.

આસીનસ્ય શયાનસ્ય તિષ્ઠતો વ્રજતો ઽપિ વા
રમસ્વ પુણ્ડરીકાક્ષ હૃદયે મમ સર્વદા.

સર્વગશ્ ચૈવ સર્વાત્મા સર્વાવસ્થાસુ ચાચ્યુત
રમસ્વ પુણ્ડરીકાક્ષ નૃસિંહ હૃદયે મમ.

કરાવલમ્બનં દેહિ શ્રી કૃષ્ણ કમલેક્ષણ
ભવપઙ્કાર્ણવે ઘોરે મજ્જતો મમ સર્વદા.

ત્રાહિ ત્રાહિ જગન્નાથ વાસુદેવાચ્યુતાવ્યય
માં સમુદ્ધર ગોવિન્દ દુઃખસંસારસાગરાત્.

એતત્ પુણ્યં પરં ગુહ્યં પવિત્રં પાપનાશનમ્
આયુષ્યં ચ યશસ્યં ચ કલિદુઃસ્વપ્નનાશનમ્.

કલૌ પાપં કિયન્માત્રં હત્યાસ્તેયાદિસમ્ભવમ્
સ્મૃતે મનસિ ગોવિન્દે દહ્યતે તૂલરાશિવત્.

કલૌ કેશવભક્તાનાં ન ભયં વિદ્યતે ક્વચિત્
સ્મૃતે સંકીર્તિતે ધ્યાતે સંક્ષયં યાતિ પાતકમ્.

અધ્યેતવ્યમ્ ઇદં શાસ્ત્રં શ્રોતવ્યમ્ અનસૂયયા
ભક્તેભ્યશ્ ચ પ્રદાતવ્યં ધાર્મિકેભ્યઃ પુનઃ પુનઃ.

અધીયાન ઇદં શાસ્ત્રમ્ વિષ્ણોર્ માહાત્મ્યમ્ ઉત્તમમ્
સર્વપાપવિનિર્મુક્તઃ પ્રાપ્નોતિ પરમં પદમ્.

શ્રુત્વા ધર્મં વિજાનાતિ શ્રુત્વા ત્યજતિ દુર્મતિમ્
શ્રુત્વા જ્ઞાનમ્ અવાપ્નોતિ શ્રુત્વા મોક્ષં ચ ગચ્છતિ.

તસ્માદ્ ઇદં સમાશ્રાવ્યં શ્રોતવ્યં ચ સદૈવ હિ
કુતર્કદાવદગ્ધેભ્યો ન દાતવ્યં કથઞ્ચન.

સંસારવિષપાનેન યે મૃતાઃ પ્રાણિનો ભુવિ
અમૃતાય સ્મૃતસ્ તેષાં કૃષ્ણામૃતમહર્ણવઃ.

ક્લિન્નં પાદોદકેનૈવ યસ્ય નિત્યં કળેબરમ્
તીર્થકોટિસહસ્રૈસ્ તુ સ્નાતો ભવતિ પ્રત્યહમ્.

તીર્થકોટિસહસ્રૈસ્ તુ સેવિતૈઃ કિં પ્રયોજનમ્
તોયં યદિ પિબેન્ નિત્યં સાળગ્રામશિલાચ્યુતમ્.

સાળગ્રામશિલાસ્પર્શં યે કુર્વન્તિ દિને દિને
વાઞ્છન્તિ કરસંસ્પર્શં તેષાં દેવાઃ સવાસવાઃ.

દુઃસહો નારકો વહ્નિર્ દુઃસહા યમકિઙ્કરાઃ
વિષમશ્વાન્તકપથઃ પ્રેતત્વં ચાતિદારુણમ્.

વિચિન્ત્ય મનસા ઽપ્ય્ એવં પાતકાદ્ વિનિવર્ત્તયેત્
સ્મરણં કીર્તનં વિષ્ણોઃ સદૈવ ન પરિત્યજેત્.