કૃષ્ણામૃતમહાર્ણવ · શ્લોક 161-180

એકાદશીમ્ ઉપોષ્યાથ દ્વાદશીમ્ અપ્ય્ ઉપોષયેત્
ન તત્ર વિધિલોપઃ સ્યાદ્ ઉભયોર્ દેવતા હરિઃ.

પારયિત્વોદકેનાપિ ભુઞ્જાનો નૈવ દુષ્યતિ
અશિતાનશિતા યસ્માદ્ આપો વિદ્વદ્ભિર્ ઈરિતાઃ
અમ્ભસા કેવલેનાથ કરિષ્યે વ્રતપારણમ્.

ન કાશી ન ગયા ગઙ્ગા ન રેવ ન ચ ગૌતમી
ન ચાપિ કૌરવં ક્ષેત્રં સમા ભૂપ હરેર્ દિનાત્.

અશ્વમેધસહસ્રાણિ વાજપેયાયુતાનિ ચ
એકાદશ્યુપવાસસ્ય કલાં નાર્હન્તિ ષોડશીમ્.

એકાદશીસમુત્થેન વહ્નિના પાતકેન્ધનમ્
ભસ્મીભવતિ રાજેન્દ્ર અપિ જન્મશતોદ્ભવમ્.

નેદૃશં પાવનં કિઞ્ચિન્ નરાણાં ભુવિ વિદ્યતે
યાદૃશં પદ્મનાભસ્ય દિનં પાતકહાનિદમ્.

તાવત્ પાપાનિ દેહે ઽસ્મિંસ્ તિષ્ઠન્તિ મનુજાધિપ
યાવન્ નોપોષયેજ્ જન્તુઃ પદ્મનાભદિનં શિવમ્.

એકાદશેન્દ્રિયૈઃ પાપં યત્ કૃતં ભવતિ પ્રભો
એકાદશ્યુપવાસેન તત્ સર્વં વિલયં નયેત્.

એકાદશીસમં કિઞ્ચિત્ પાપત્રાણં ન વિદ્યતે
વ્યાજેનાપિ કૃતા રાજન્ ન દર્શયતિ ભાસ્કરિમ્.

શ્રી વેદવ્યાસ ઉવાચ:
સ બ્રહ્મહા સ ગોઘ્નશ્ ચ સ્તેનઃ સ ગુરુતલ્પગઃ
એકાદશ્યાં તુ ભુઞ્જાનઃ પક્ષયોર્ ઉભયોર્ અપિ.

વરં સ્વમાતૃગમનં વરં ગોમાંસભક્ષણમ્
વરં હત્યા સુરાપાનમ્ એકાદશ્યાં તુ ભોજનાત્.

એકાદશીદિને પુણ્યે ભુઞ્જતે યે નરાધમાઃ
અવલોક્ય મુખં તેષામ્ આદિત્યમ્ અવલોકયેત્.

પૃથિવ્યાં યાનિ પાપાનિ બ્રહ્મહત્યાદિકાનિ ચ
અન્નમ્ આશ્રિત્ય તિષ્ઠન્તિ સમ્પ્રાપ્તે હરિવાસરે.

રુગ્માઙ્ગદઃ:
અષ્ટવર્ષાધિકો યસ્ તુ અશીતિર્ ન હિ પૂર્યતે
યો ભુઙ્ક્તે માનવઃ પાપો વિષ્ણોર્ અહનિ ચાગતે.

પિતા વા યદિ વા પુત્રો ભાર્યા વા ઽપિ સુહૃજ્જનઃ
પદ્મનાભદિને ભુઙ્ક્તે નિગ્રાહ્યો દસ્યુવદ્ ભવેત્.

ધર્મવિભૂષણઃ:
પ્રાતર્ હરિદિને લોકાસ્ તિષ્ઠધ્વં ચૈકભોજનાઃ
અક્ષારલવણાઃ સર્વે હવિષ્યાન્ નિષેવિણઃ.

અવનીતપશયનાઃ પ્રિયાસંગવિવર્જિતાઃ
સ્મરધ્વં દેવદેવેશં પુરાણપુરુષોત્તમમ્.

સકૃદ્ ભોજનસંયુક્તા હ્ય્ ઉપવાસે ભવિષ્યથ
અકૃતશ્રાદ્ધનિચયા જલપિણ્ડોદકક્રિયાઃ.

બ્રહ્મા:
ઉપોષ્ય દ્વાદશીં પુણ્યાં સર્વપાપક્ષયપ્રદામ્
ન પશ્યતિ યમં વા ઽપિ નરકાન્ ન ચ યાતનામ્.

રટન્તીહ પુરાણાનિ ભૂયો ભૂયો વરાનને
ન ભોક્તવ્યં ન ભોક્તવ્યં સમ્પ્રાપ્તે હરિવાસરે.