કૃષ્ણામૃતમહાર્ણવ · શ્લોક 201-220

શ્રી વેદવ્યાસઃ:
અચ્યુતાનન્તગોવિન્દનામોચ્ચારણભીષિતાઃ
નશ્યન્તિ સકલા રોગાઃ સત્યં સત્યં વદામ્ય્ અહમ્.

સકૃદ્ ઉચ્ચારિતં યેન હરિર્ ઇત્ય્ અક્ષરદ્વયમ્
બદ્ધઃ પરિકરસ્ તેન મોક્ષાય ગમનં પ્રતિ.

એવં બ્રહ્માદયો દેવા ઋષયશ્ ચ તપોધનાઃ
કીર્તયન્તિ સુરશ્રેષ્ઠં દેવં નારાયણં પ્રભુમ્.

કિં તસ્ય દાનૈઃ કિં તીર્થૈઃ કિં તપોભિઃ કિમ્ અધ્વરૈઃ
યો નિત્યં ધ્યાયતે દેવં નારાયણમ્ અનન્યધીઃ.

નિત્યોત્સવો નિત્યતા ચ નિત્યશ્રીર્ નિત્યશો જયઃ
યેષાં હૃદિસ્થો ભગવાન્ મઙ્ગલાયતનો હરિઃ.

જીવંશ્ ચતુર્દશાદ્ ઊર્ધ્વં પુરુષો નિયમેન તુ
સ્ત્રી વા ઽપ્ય્ અનૂનદશકં દેહં માનુષમ્ આર્જતે.

ચતુર્દશોર્ધ્વજીવીનિ સંસારશ્ ચાદિવર્જિતઃ
અતો ઽવિત્ત્વા પરં દેવં મોક્ષાશા કા મહામુને.

આચતુર્દશમાદ્ વર્ષાત્ કર્માણિ નિયમેન તુ
દશાવરાણાં દેહાનાં કારણાનિ કરોત્ય્ અયમ્
અતઃ કર્મક્ષયાન્ મુક્તિઃ કુત એવ ભવિષ્યતિ.

સમાનાં વિષમા પૂજા વિષમાણાં સમા તથા
ક્રિયતે યેન દેવો ઽપિ સ્વપદાદ્ ભ્રશ્યતે હિ સઃ.

વિત્તં બન્ધુર્ વયઃ કર્મ વિદ્યા ચૈવ તુ પઞ્ચમી
એતાનિ માન્યસ્થાનાનિ ગરીયો યદ્ યદ્ ઉત્તરમ્.

ગુણાનુસારિણીં પૂજાં સમાં દૃષ્ટિં ચ યો નરઃ
સર્વભૂતેષુ કુરુતે તસ્ય વિષ્ણુઃ પ્રસીદતિ.

યથા સુહૃત્સુ કર્તવ્યં પિતૃશત્રુસુતેષુ ચ
તથા કરોતિ પૂજાદિ સમબુદ્ધિઃ સ ઉચ્યતે.

તિર્યક્પુણ્ડ્રં ન કુર્વીત સમ્પ્રાપ્તે મરણે ઽપિ ચ
ન ચાન્યન્ નામ વિબ્રૂયાત્ પરં નારાયણાદૃતે.

નૈવેદ્યશેષં દેવસ્ય યો ભુનક્તિ દિને દિને
સિક્થે સિક્થે ભવેત્ પુણ્યં ચાન્દ્રાયણશતાધિકમ્.

ઊર્ધ્વપુણ્ડ્રમ્ ઋજું સૌમ્યં લલાટે દૃશ્યતે
સ ચણ્ડાલો ઽપિ શુદ્ધાત્મા પૂજ્ય એવ ન સંશયઃ.

અશુચિર્ વા ઽપ્ય્ અનાચારો મનસા પાપમ્ આચરન્
શુચિર્ એવ ભવેન્ નિત્યમ્ ઊર્ધ્વપુણ્ડ્રાન્કિતો નરઃ.

ઊર્ધ્વપુણ્ડ્રવિહીનસ્ય શ્મશાનસદૃશં મુખમ્
અવલોક્ય મુખં તેષામ્ આદિત્યમ્ અવલોકયેત્.

યજ્ઞો દાનં તપશ્ ચૈવ સ્વાધ્યાયઃ પિતૃતર્પણમ્
વ્યર્થં ભવતિ તત્ સર્વમ્ ઊર્ધ્વપુણ્ડ્રં વિના કૃતમ્.

ગોપીચન્દનલિપ્તાઙ્ગો યં યં પશ્યતિ ચક્ષુષા
તં તં શુદ્ધં વિજાનીયાન્ નાત્ર કાર્યા વિચારણા.

આસ્ફોટયન્તિ પિતરઃ પ્રનૃત્યન્તિ પિતામહાઃ
વૈષ્ણવો ઽસ્મત્કુલે જાતઃ સ નઃ સન્તારયિષ્યતિ.