કલ્પદ્રુમાવદાનમાલા · શ્લોક 441-460

મૈત્રી હિ જગતાં માતા પિતા શાસ્તા ગુરુઃ પ્રભુઃ
પતિર્ મિત્રઃ સુહૃદ્ બન્ધુસ્ તસ્માન્ મૈત્રી પ્રસાધ્યતામ્+ ॥

મૈત્રીં વિના ન જાયેત કરુણા સ્વાત્મજે ઽપિ ચ
ન મુદિતા ન ચોપેક્ષા તસ્માન્ મૈત્રી પ્રધીયતામ્* ॥

એતા બ્રહ્મવિહારાખ્યાઃ સંબોધિપદસાધકાઃ
ત્રૈલોક્યભર્તૃકા નાથાઃ સર્વસત્વાનુપાલકાઃ ॥

એતા વિના ન શોભન્તિ મહાભિજ્ઞાસ્ તપસ્વિનઃ
કલ્પકોટિસહસ્રાણિ તપ્ત્વાપિ દુષ્કરં તપઃ ॥

એતા હિ પરમાચાર્યાઃ સદ્ધર્મગુણદાયકાઃ
એતા વિના ન સિધ્યન્તિ સર્વપારમિતારતાઃ ॥

યાવન્તિ સુખભોગ્યાનિ પુણ્યસિદ્ધાનિ સર્વથા
તાનિ સર્વાણિ જાનીત મૈત્રીમૂલોદ્ભવાનિ હિ ॥

તસ્માત્ સર્વપ્રયત્નેન ક્રોધં જિત્વાંવરૈર્ અપિ
મૈત્રીં ચિત્તે સમાધાય કુરુધ્વં પ્રાણિષુ ક્ષમામ્* ॥

તતો ધર્મપ્રભાવેણ યૂયં સર્વે ઽનુમોદિતાઃ
યાવજ્જીવં સુખં ભુક્ત્વા સૌખાવતીં ગમિષ્યથ ॥

ઇતિ શ્રુત્વા વચસ્ તસ્ય નાગાશ્ ચ ગરુડા યતેઃ
વૈરાનુશયતાં ત્યક્ત્વા બભૂવુર્ મૈત્રિચારિણઃ ॥

ઇતિ દૃષ્ટ્વા ચ તે સત્વા વિસ્મયહર્ષસંયુતાઃ
ધર્માનુમોદનં કૃત્વા બભૂવુર્ મૈત્રિચારિણઃ ॥

એવં સુભૂતિના તેન નાગાશ્ ચ ગરુડાશ્ ચ તે
મૈત્રીધર્મોપદેશેન વિનીતા ધર્મસત્પથે ॥

અથ શ્રીભગવાન્ બુદ્ધઃ સર્વદર્શી વિનાયકઃ
ભિક્ષૂન્ આમન્ત્રયામાસ સંવૃતિચારકાન્ અપિ ॥

પશ્યધ્વં ભિક્ષવો યૂયં સુભૂતિં બ્રહ્મચારિણમ્*
યેનૈતે ગરુડા નાગા વિનીતા ધર્મસત્પથે ॥

એષ મે શ્રાવકાણાં ચ ભિક્ષૂણાં બ્રહ્મચારિણામ્*
સુભૂતિઃ કુલપુત્રો ઽયમ્ અગ્રો ઽરણાવિહારિણામ્* ॥

ઇતિ તેન મુનીન્દ્રેણ સુભૂતિર્ એવ સદ્યતિઃ
નિર્દિષ્ટઃ સર્વભિક્ષૂણામ્ અગ્રો ઽરણાવિહારિણામ્* ॥

અથ તે ભિક્ષવઃ સર્વે સંશયોદ્ધતમાનસાઃ
ચ્છેતારં સંશયાનાં તં પપ્રચ્છુર્ એવમ્ ઈશ્વરમ્* ॥

કાનિ ભદન્ત કર્માણિ કૃતાન્ય્ અપિ સુભૂતિના
નિર્દિષ્ટો ભવતા યેન જ્યેષ્ઠો ઽરણાવિહારિણામ્* ॥

ઇતિ તૈર્ ભિક્ષુભિઃ પૃષ્ટો ભગવાન્ ઇત્ય્ ઉદાહરત્*
શૃણુધ્વં ભિક્ષવઃ સર્વે તત્ કૃતં યત્ સુભૂતિના ॥

સુભૂતિના કૃતં કર્મ તત્ કો ઽન્યઃ પરિભોક્ષ્યતે
યેનૈવ યત્ કૃતં કર્મ તેનૈવ તત્ પ્રભુજ્યતે ॥

ભૂતપૂર્વમ્ અતીતે ઽધ્વન્ય્ અસ્મિન્* કલ્પે ચ ભદ્રકે
વર્ષસહસ્રમ્ આયુષ્ ચ વિંશતિગુણિતં યદા ॥