કલ્પદ્રુમાવદાનમાલા · શ્લોક 421-440

મૈત્રીમાન્ પુરુષઃ સાધુર્ દેવૈર્ અપિ પ્રશસ્યતે
વિશ્વસ્યતે સદા સદ્ભિર્ બાન્ધવૈઃ સ્વજનૈર્ જનૈઃ ॥

મૈત્રીમાન્ સજ્જનો લોકે નિર્ગુણો ઽપિ પ્રશોભતે
મૈત્રીમાન્ સન્મતિર્ બન્ધુર્ લોકાનાં જગતામ્ અપિ ॥

મૈત્રીમાઞ્ જગતામ્ ઇષ્ટો મૈત્રીમાઞ્ જગતાં સુહૃત્*
મૈત્રીમાઞ્ જગતાં મિત્રો મૈત્રીમાઞ્ જગતાં સખા ॥

મૈત્રીમાન્ પુરુષઃ શ્રીમાન્ યત્ર યત્ર પ્રગચ્છતિ
તત્ર તત્રૈવ સર્વત્ર પૂજ્યતે સ્વજનૈર્ યથા ॥

બુદ્ધો હિ જગતાં બન્ધુસ્ ત્રૈલોક્યાધિપનાયકઃ
સો ઽપિ શાસ્તા વિભાત્ય્ એવં મૈત્ર્યા સંસ્કારયઞ્ જગત્* ॥

યે યે સત્વા મહાભિજ્ઞાઃ સર્વલોકાનુકમ્પકાઃ
પૂજ્યન્તે સત્વલોકૈશ્ ચ તે ઽપિ મૈત્ર્યાઃ પ્રભાવતઃ ॥

બોધિસત્વા મહાસત્વા બોધિસંભારસાધકાઃ
સર્વસત્વહિતાર્થસ્થાસ્ તે ઽપિ મૈત્રીપ્રચારિણઃ ॥

યન્ માતા દુઃખિતાપ્ય્ એવમ્ આ ગર્ભાદ્ બાલકં સુતમ્*
પાતિ સ્નેહોપચારેણ તચ્ ચ મૈત્રીપ્રભાવતઃ ॥

યત્ પિતા બાલકં પુત્રમ્ અભુઞ્જાનઃ સ્વયં સુખમ્*
પાતિ સ્નેહોપચારેણ તચ્ ચ મૈત્રીપ્રભાવતઃ ॥

યચ્ ચ રાજા પ્રજાઃ પાતિ સ્વયં વીરવ્રતં દધત્*
દુર્જનાન્ મર્દયન્ સર્વાન્ તચ્ ચ મૈત્રીપ્રભાવતઃ ॥

યચ્ ચ વિદ્વાન્ ગુરુઃ શિષ્યાન્ સદ્ધર્માર્થોપદર્શયન્*
પ્રબોધ્ય બાલકાઞ્ છાસ્તિ તચ્ ચ મૈત્રીપ્રભાવતઃ ॥

યચ્ ચ વીરા રણે સ્થિત્વા સહન્ત્યરીન્ પ્રહારિણઃ
પ્રરક્ષન્તિ સ્વપક્ષાંશ્ ચ તચ્ ચ મૈત્રીપ્રભાવતઃ ॥

સાર્થવાહો ઽમ્બુધિં ગત્વા યત્નૈ રત્નાનિ સાધયન્*
સત્વાન્ પાતિ દદદ્ દાનં તચ્ ચ મૈત્રીપ્રભાવતઃ ॥

યચ્ ચ ભાર્યાનુયાત્ય્ એવ મૃતેન સ્વામિના સહ
અનપેક્ષ્ય સ્વજીવે ઽપિ તચ્ ચ મૈત્રીપ્રભાવતઃ ॥

પિતૃભ્યો મૃતકેભ્યો ઽપિ દદાતિ પિણ્ડમ્ આદરાત્*
અનુશોચન્ મુહુશ્ ચાપિ તચ્ ચ મૈત્રીપ્રભાવતઃ ॥

તિર્યગ્યોન્યુદ્ભવાશ્ ચાપિ પશવઃ ક્રૂરમાનસાઃ
સ્વસુતાન્ સ્નેહતઃ પાન્તિ તચ્ ચ મૈત્રીપ્રભાવતઃ ॥

કૃમ્યાધિકીટયશ્ ચાપિ ક્રૂરા ગૃધ્રાદિપક્ષિણઃ
સ્વબન્ધૂન્ સ્નેહતઃ પાન્તિ તદ્ ધિ મૈત્રીપ્રભાવતઃ ॥

ચણ્ડાલા નિર્ઘૃણા રૌદ્રાઃ સત્વહિંસારતાઃ ખલાઃ
બાન્ધવાંસ્ તે ઽપિ રક્ષન્તિ તદ્ ધિ મૈત્રીપ્રભાવતઃ ॥

યદ્ દદન્તિ મહાસત્વાઃ સ્વદેહે ઽપ્ય્ અનપેક્ષિતાઃ
અર્થિભ્યઃ પ્રાર્થિતં વસ્તુ તદ્ ધિ મૈત્રીપ્રભાવતઃ ॥

એવમ્ અન્યે ઽપિ યે લોકા ભોજયન્તઃ પરસ્પરમ્*
પાલયન્તિ મહાસ્નેહાત્ તચ્ ચ મૈત્રીપ્રભાવતઃ ॥