કલ્પદ્રુમાવદાનમાલા · શ્લોક 301-320

યદિ તે ઽસ્તિ કૃપા દેવિ મયિ મોક્ષાર્થસાધિનિ
સંબુદ્ધં દર્શય ક્ષિપ્રં તદ્ધર્મેષુ નિવેશય ॥

ત્રિરત્નશરણં ગત્વા ચરિષ્યે તદ્ વ્રતોત્તમમ્*
તથાશુ કૃપયા નીત્વા માં વિહારે પ્રવેશય ॥

ઇતિ શ્રુત્વા વચસ્ તસ્ય સુભૂતેર્ વનદેવતા
વિજ્ઞાય બોધિમાર્ગેષુ ચિત્તં તથાનુમોદિતમ્* ॥

તત એવ સમાગૃહ્ય સુભૂતિં બ્રહ્મચારિણમ્*
ઋદ્ધ્યા સાકાશમાર્ગેણ નિનાય જિનમન્દિરમ્* ॥

સુભૂતિસ્ તત્ર સંપ્રાપ્તો દદર્શ જિનભાસ્કરમ્*
ભગવન્તં મહાસૌમ્યં લક્ષણૈઃ સમલંકૃતમ્* ॥

વ્યઞ્જનૈશ્ ચ વિરાજન્તં વ્યામપ્રભામહોજ્જ્વલમ્*
સહસ્રકિરણાધિક્યં રત્નાઙ્ગમ્ ઇવ જઙ્ગમમ્* ॥

સમન્તતો મહાભદ્રં જગન્નાથં મુનીશ્વરમ્*
સર્વદેવાધિપં સમ્યક્ સંબોધિગુણસાગરમ્* ॥

દૃષ્ટ્વૈવ સહસા ચાથ સુભૂતેસ્ તસ્ય સર્વથા
આધાતો યશ્ ચ સત્વેષુ સ પ્રતિવિગતો ઽપ્ય્ અભૂત્* ॥

તતઃ પ્રસાદજાતો ઽસૌ સુભૂતિર્ દ્વિજસત્તમઃ
નત્વા પાદૌ મુનેર્ ધર્મં શ્રોતું તસ્થૌ મુદાઃ પુરઃ ॥

તતો ઽસૌ ભગવાંસ્ તસ્ય સુભૂતેશ્ ચિત્તશુદ્ધતામ્*
જ્ઞાત્વાર્યસત્યધર્માણિ દિદેશૈવં સવિસ્તરમ્ ॥

શૃણુ વિપ્ર મહાભાગ સર્વસત્વહિતાર્થતઃ
યદિ તે ધર્મવાઞ્છાસ્તિ સંબોધિપદસાધને ॥

ભાવનીયા સદા મૈત્રી સત્વેષ્ એવં યથાત્મજે
ધર્મમાતા યતો મૈત્રી તન્ ન ત્યાજ્યા કદાચન ॥

કરુણા ચ તથા કાર્યા સત્વેષ્ અપિ યથાત્મજે
કારુણ્યાદ્ વર્ધતે ધર્મસ્ ત કારુણ્યં સદા કુરુ ॥

મુદિતાપિ સદા સાધ્યા સત્વેષુ ચ યથાત્મજે
મુદિતાં હિ સમાલમ્બ્ય બોધિપદમ્ અવાપ્નુયાઃ ॥

ઉપેક્ષાપિ સદા ધાર્યા સત્વેષ્વ્ અપિ યથાત્મજે
ઉપેક્ષાતો લભેત્ સૌખ્યં તદુપેક્ષાં સદા ભજ ॥

ઇમે ધર્મા હિ ચત્વારશ્ ચતુર્વર્ગફલાપ્તયે
તત્પ્રાપ્ત્યૈ સાધ્યતાં યત્નાચ્ ચતુર્બ્રહ્મવિહારતા ॥

ઇતિ શ્રુત્વાર્યધર્માણિ સ સુભૂતિઃ પ્રમોદિતઃ
ક્લેશસંઘાન્ વિનિર્જિત્ય બુદ્ધધર્મં સમૈક્ષત ॥

સત્કાયદૃષ્ટિશૈલં ચ વિંશતિશિખરોદ્ગતમ્*
વિદાર્ય જ્ઞાનવજ્રેણ સંસારરતિનિઃસ્પૃહઃ ॥

સ્રોતાપત્તિફલં સાક્ષાત્ કૃત્વા શિષ્યો ઽભવન્ મુનેઃ
દૃષ્ટસત્યો ઽથ સંબુદ્ધં નત્વા ચૈવ કૃતાઞ્જલિઃ ॥

પ્રવ્રજ્યાપ્રાર્થનાં ચક્રે સ્વાખ્યાતધર્મસાધને
નમસ્ તે ભગવન્ નાથ સર્વસત્વાનુપાલક ॥