જાતકમાલા · અધ્યાય 12

શીલં પરિપાલયતા ત્રાતાઃ સત્ત્વા મયૂરભૂતેન ।
પ્રાણભયાદ્ યેન પુરા કસ્ તત્ર ન રોપયેદ્ ભક્તિમ્ ॥

મયૂરવરમ્ ઉત્પાદ્ય તં વિચિત્રતનૂરુહમ્
વિસ્મિતા ઇવ પશ્યન્તો બભૂવુઃ કર્મશિલ્પિનઃ ॥

મેઘારમ્ભે જાતનૃત્યાનુરાગં પશ્યન્તીનાં તં મયૂરાધિરાજમ્
સ્તોકોદ્દ્યોતા હ્રીમતીનામ્ ઇવાસન્ મન્દા વિદ્યુલ્લાસિકાનાં વિલાસાઃ ॥

મૃદઙ્ગવદ્ ધ્વાનિનિ વારિનિર્ઝરે દ્વિરેફવીણાસુ કલસ્વનાસુ ચ
લતાવનાન્તર્ગૃહકે મનોહરે નનર્ત ચિત્રં સ મયૂરલાસકઃ ॥

પરિસ્ફુરચ્ચન્દ્રકરત્નમણ્ડલસ્ તટાન્તમ્ આરુહ્ય યદા નનર્ત સઃ
સમીરણાધૂતવનો હિમાચલસ્ તદા વિભાતિ સ્મ કિરીટવાન્ ઇવ ॥

કાન્તં વિતન્વતિ કલાપમ્ અનઙ્ગવધ્વા ચિત્રે વિશેષક ઇવાલિખિતે ધરિત્ર્યામ્
તત્ર સ્થિતા શિખિનિ સિદ્ધવિલાસિનીનાં ગાઢં કુતૂહલવશાન્ ન તતર્પ દૃષ્ટિઃ ॥

આપાણ્ડુમેઘપટલાવૃતદિઙ્મુખાન્તે મુક્તામલામ્ભસિ શરત્સમયે ઽભ્યુપેતે
યસ્યાં સ ચન્દ્રકમણીન્ અસૃજત્ કલાપી ભૂર્ ઇન્દ્રનીલશકલૈર્ ઇવ સા બભાસે ॥

કાન્તે વિચેરુષિ શનૈર્ અપુલાકપક્ષે યૂથાનુયાતગમને કુશલૈકપક્ષે
તસ્મિન્ મહીધરવરસ્ય મયૂરરાજ ઇન્દ્રાયુધૈઃ શબલિતેવ મહી રરાજ ॥

વદ કસ્ય ધ્વનિર્ અયં તારસ્ તારાધિપાનન
યેન પ્રતાર્યમાણેન મમ પ્રહ્લાદિતં મનઃ ॥

પુરુષાણાં તિરશ્ચાં વા ગુણા એવ પ્રકાશકાઃ
ભિન્નાન્ધકારનિવહા મણીનામ્ ઇવ રશ્મયઃ ॥

મયૂરાકૃતિમ્ આસ્થાય કો ઽપિ કેનાપિ હેતુના
નયનોત્સવભૂતો ઽસૌ સ્થિતો ગૌરીગુરોર્ વને ॥

શિખિયૂથાધિપતિના તેનાલંકૃતગહ્વરઃ
નાથવન્તમ્ ઇવાત્માનં મન્યતે તુહિનાચલઃ ॥

ગર્જિતેન પ્રયચ્છન્તઃ સાધુવાદમ્ ઇવામ્બુદાઃ
બદ્ધનૃત્તં તમ્ ઈક્ષન્તે સ્ફુરદ્ભિસ્ તડિદીક્ષણૈઃ ॥

ઘનસમયનાટકાદાવ્ આહૂતા બર્હિસૂત્રધારેણ ।
સહસા તડિદ્ આત્માનં દર્શયતિ નટીવ સવિલાસમ્ ॥

અન્તઃપુરમધ્યગતસ્ફુટ ચન્દ્રકધારિણા મયૂરેણ
વિવિધમણિકર્ણપૂરેવ તેન નો ગૃહમહી ભવતુ ॥

સૃજતઃ સુરભીન્ મદામ્બુબિન્દૂન્ બલિનો ઽપિ દ્વિરદાન્ વશં નયન્તિ
પુરુષાઃ પટુવીર્યબુદ્ધ્યુપાયાઃ કિમ્ ઉત સ્વલ્પબલોદયાન્ વિહઙ્ગાન્ ॥

હ્રિયતે બડિશેન વારિમધ્યાત્ પૃથુરોમા નયનાધ્વનશ્ ચ્યુતો ઽપિ
કિમ્ ઉપાયવતામ્ અસાધ્યમ્ અસ્તિ વ્યવસાયે હિ સતિ ક્રિયાઃ ફલન્તિ ॥

ભવતો ઽસ્તિ મતિર્ વિશેષપટ્વી બહવઃ સન્તિ વિપશ્ચિતઃ સહાયાઃ
સફલીક્રિયતે ન ચેન્ મમેચ્છા ભવતા સ્નેહપરાઙ્મુખો ઽસિ નૂનમ્ ॥

શાવાન્ કુલાયકગતાન્ પરિપાતુકામા નદ્યાઃ પ્રગૃહ્ય તનુપક્ષપુટેન તોયમ્
દાવાનલં કિલ સિષેચ મુહુઃ કપોતી સ્નિગ્ધો જનો ન ખલુ ચિન્તયતિ સ્વપીડામ્ ॥

વિલાસિનીનાં મદનાનુકર્ષિણા વિલાસપાશેન નિબદ્ધમાનસઃ
શુભાશુભાન્વેષણસુપ્તચેતનઃ પ્રયાત્ય્ અનિઘ્નો ઽપિ હિ નિઘ્નતાં જનઃ ॥

અમર્ત્યતેજોઽવયવાન્ અવાપ્ય યા તિલોત્તમેતિ પ્રથિતા સુરાઙ્ગના
ત્રિલોકનાથો ઽપિ તયાત્મશોભયા ચતુર્મુખત્વં ગમિતસ્ ત્રિલોચનઃ ॥

તપોનિધિં ગાધિસુતં તપોવને મહાધિયં મેનકયા હૃતેન્દ્રિયમ્
અવજ્ઞયાકૃષ્ય મૃણાલકાર્મુકં શરેણ વિવ્યાધ હસન્ મનોભવઃ ॥

યદ્ એધતે લાઘવહેતુર્ અર્થિતા પતન્તિ યન્ મૂર્ધ્નિ નિકારપાંસવઃ
સ્પૃશન્ત્ય્ અધિક્ષેપશરાશ્ ચ યન્ મનસ્ તદ્ અઙ્ગનાભિઃ ક્રિયતે શરીરિણામ્ ॥

આબધ્ય વ્યવસાયવર્મ પુરતો વિન્યસ્ય તૃષ્ણાચમૂમ્ આરોપ્ય પ્રસભં નિતાન્તકઠિનં નિર્વ્રીડતાકાર્મુકમ્
અર્થિત્વાહવમધ્યમ્ એત્ય વિવશાઃ સીમન્તિનીભિઃ કૃતા નીચેભ્યો ઽપિ સહન્ત એવ પુરુષા ભ્રૂભઙ્ગબાણવ્રણમ્ ॥

પ્રાલેયાદ્રેસ્ તુઙ્ગસાનોર્ ઉપઘ્ને ન્યસ્તં યદ્ યત્ તેન શાકુન્તિકેન
તેનાત્યર્થં બર્હિણા દૃષ્ટમાત્રં તત્ તદ્ દૂરાચ્ ચિચ્છિદે પાશજાલમ્ ॥

દૃષ્ટ્યાનેન શ્રીમતા પુણ્યધામ્ના છિન્નાઃ પાશા ગાઢબન્ધા યથેમે
સાધોર્ અસ્ય પ્રાપ્તબોધેસ્ તથૈવ પ્રજ્ઞાશસ્ત્રં છેત્સ્યતિ ક્લેશપાશાન્ ॥

પ્રાણવિચ્છેદભીતાનાં શરણ્ય શરણાર્થિનામ્
શ્વેતાપાઙ્ગપતે ભૂયાસ્ ત્વમ્ એવ શરણં હિ નઃ ॥

દૃષ્ટ્યા ચ્છિન્નાસ્ ત્વયા પાશાઃ શઙ્ખચ્છેદસિતાન્તયા
સ ત્વમ્ ઈદૃક્પ્રભાવઃ સન્ કથમ્ અસ્માન્ ન પાસ્યસિ ॥

તમ્ આલોકયતો દીનં મગ્નં બન્ધુમ્ ઇવાપદિ
આપુપૂરે મનસ્ તસ્ય દુઃખેન કરુણાત્મનઃ ॥

ન ત્રાસ્યતે કથં સત્ત્વાન્ ધીરો ઽયં વ્યસનાદ્ ઇતિ
શીલપારમિતા તસ્મિન્ નિઃસંદિગ્ધેવ તસ્થુષી ॥

માં ચેન્ ન સંત્યજસિ બોધિમ્ અવાપ્તુકામ એતાન્ મયૂરવર પાહિ નરેન્દ્રદણ્ડાત્
તં શીલપારમિતયા જનિતપ્રસાદમ્ ઇત્થં કૃપા શિખિનમ્ ઉક્તવતીવ સાધ્વી ॥

મધુરસ્વરઃ સુરુચિરાઙ્ગરુહો યદિ નાભવિષ્યમ્ અહમ્ અત્ર વને
ન નરેશ્વરાદ્ અકરુણપ્રકૃતેર્ ભયમ્ આગમિષ્યદ્ ઇતિ શાકુનિકાન્ ॥

ઇતિ મન્નિમિત્તમ્ અયમ્ આર્તમના વ્યસનં ન યાવદ્ ઉપયાતિ જનઃ
પરિચોદિતઃ ક્ષિતિભુજા મરણાત્ પરિપાલયામિ ખલુ તાવદ્ ઇમમ્ ॥

અકારણે વા સતિ વાપિ કારણે સમેત્ય યન્ નામ પરો વિનશ્યતિ
અનેકધિગ્વાદશરક્ષતાત્મના કિમ્ ઈદૃશા તસ્ય જનસ્ય જન્મના ॥

અથ જાલગવાક્ષવર્તિનીનામ્ અબલાનાં વદનૈર્ વિશાલનેત્રૈઃ
શિખિદર્શનજાતસંભ્રમાણાં બહુચન્દ્રેવ ભૃશં પુરી રરાજ ॥

કૌતૂહલાદ્ અનિલવેલ્લિતકાકપક્ષા રંહસ્વિનો હરિણશાવમનોહરાક્ષાઃ
આલોકિતાઃ પ્રમનસા જનનીજનેન નિર્જગ્મુર્ ઉન્નતમુખાઃ શિશવો ગૃહેભ્યઃ ॥

ક્રીડાં વિહાય ચ મનોહરકન્દુકોત્થાં સ્વેદાવબદ્ધકણચારુલલાટદેશાઃ
કિંચિત્કુચોદ્ગમસમુન્નમિતોત્તરીયા નિશ્ચક્રમુઃ પ્રતનુબાહુલતાઃ કુમાર્યઃ ॥

અયમ્ અયમ્ ઇતિ બર્હી દર્શનપ્રોન્નતાભિઃ સ્ફુટનખમણિભાભિઃ પદ્મપત્ત્રારુણાભિઃ
સ્મિતરુચિરમુખીનાં રાજસીમન્તિનીનાં કિસલયિતમ્ ઇવાસીદ્ અઙ્ગુલીભિઃ પુરં તત્ ॥

યુગપદ્ અથ જનાનાં વિદ્રુમાકારતુણ્ડે શિખિનિ ગુરુકલાપે દૃષ્ટયસ્ તત્ર પેતુઃ
દદતિ ધનમ્ ઉદારે ક્ષિપ્રમ્ આશાઃ સમન્તાદ્ અભિલષિતફલાનામ્ અર્થિનાં દાતરીવ ॥

રાજા ચ રાજમહિષી ચ મયૂરરાજમ્ આલોક્ય તં તુતુષતુઃ સમવાપ્ય કામમ્
લોકસ્ય દુર્લભમ્ અવાપ્ય હિ વસ્તુ કિંચિત્ ખિન્નં પ્રમોદમુદમ્ ઉદ્વહતીવ ચેતઃ ॥

જિત્વેન્દ્રિયાણિ બલવન્તિ બલેન બુદ્ધેર્ યુઞ્જન્ મુહુઃ પ્રણયિનાં પ્રણયં ફલેન
એતાં સમુદ્રવસનાં વ્યસનાન્ય્ અપાસ્ય ભુપાલ પાલય ચિરં પૃથિવીં નયેન ॥

તવ ધર્મમયાઃ કચ્ચિદ્ એધન્તે ધર્મસેતવઃ
અગાધં દુઃખજલધિં યાન્ આલમ્બ્યોત્તરિષ્યસિ ॥

રન્ધ્રાવલોકિભિઃ ક્રૂરૈર્ દુર્ગૃહીતૈર્ ઇવાહિભિઃ
કચ્ચિદ્ દૃષ્ટમહાદોષૈર્ વિષયૈર્ નાતિબાધ્યસે ॥

ભૃત્યેષુ ચ વિનીતેષુ કલત્રેષુ સુતેષુ ચ
કચ્ચિત્ તે કુશલં રાજન્ દેહે ચાત્ર યશોનિધૌ ॥

ભવત્ય્ અકુશલં તાવન્ મયૂરાધિપ દેહિનામ્
પરાર્થપટુના યાવત્ સંગમો ન ભવાદૃશા ॥

સંચરન્મુરજમેઘનિસ્વનં નર્તકીતડિદલંકૃતાન્તરમ્
ત્વામ્ અવાપ્ય શિખિરાજ મન્દિરં વારિવાહસમયાયતે મમ ॥

કાન્તામુખસ્ય તિલકો નભસઃ શશાઙ્કઃ સ્વચ્છપ્રભસ્ય મણિર્ આભરણસ્ય શુદ્ધઃ
જાતશ્ ચિરાભિલષિતો ઽસ્ય મયૂરનાથ મદ્વેશ્મનશ્ ચ મહતસ્ ત્વમ્ અલંકરિષ્ણુઃ ॥

સાથ ક્ષિતીશમહિષી મહિષીવિષાણ ધૂમ્રાલકાકુલમુખી પરિપાણ્ડુરાઙ્ગી
વાતાયનપ્રસૃતમ્ આયતપક્ષ્મલેખં ચક્ષુશ્ ચિરં વ્રજતિ ધૂર્તવિટે બબન્ધ ॥

દૃષ્ટ્વા ચ તાં સુનયનાં નયનાભિરામાં ભિત્તેઃ સમીપમ્ અગમદ્ વિટપુઙ્ગવો ઽસૌ
પાર્શ્વાનિ વીક્ષ્ય ચકિતા ચ પુનઃ પુનઃ સા કર્ણોત્પલં સુરભિ તસ્ય મુમોચ ગાત્રે ॥

આદાય તત્ કુવલયં વિકસત્પલાશમ્ આઘ્રાય મૂર્ધ્નિ ચ નિવેશ્ય સ જૃમ્ભમાણઃ
અસ્તં વિવસ્વતિ ગતે વિવશઃ કથંચિત્ તસ્યાઃ ક્રમેણ નયનાનુગતઃ પ્રતસ્થે ॥

ગત્વા તતઃ સ ગણિકાભવનં વિલાસી ગાઢં વિતાનહૃદયઃ શયને નિવિશ્ય
નિશ્વાસસૂચિતમનોભવબાણપાતસ્ તસ્યાઃ પ્રકામમ્ ઉદકણ્ઠત વીતધૈર્યઃ ॥

ઊચે વિટો ગણિકયા પરિહાસપૂર્વં પશ્યામિ શૂન્યમ્ ઇવ સાંપ્રતમ્ આર્યપુત્રમ્
ધૂર્તસ્ તતઃ સ નિજગાદ નિગૂઢભાવો દ્યૂતે જિતો ઽહમ્ ઇતિ તેન વિતાનતા મે ॥

વાતાયનં સમવલમ્બ્ય વિલાસવત્યા હાસસ્ફુરદ્દશનરત્નમયૂખભાસા
નામ્ના તયાનુપમયોત્પલમ્ ઉત્પલાક્ષ્યા રૂપેણ ચાનુપમયોપરિ મે વિમુક્તમ્ ॥

સા વાતયાનમુખસંગતચન્દ્રવક્ત્રા ચન્દ્રપ્રભાં દશનરત્નરુચા હરન્તી
ભ્રૂકાર્મુકેણ સવિલાસમ્ ઉદીરિતેન ચક્ષુઃશરં મયિ વિમુક્તવતી કૃશાઙ્ગી ॥

વિનીતનિદ્રાકુલલોચનોત્પલા પ્રવેપિતાઙ્ગી જઘનચ્યુતામ્બરા
સસાધ્વસા કો ઽયમ્ ઇતિ પ્રભાષિણી ભવિષ્યતિ વ્યાઘ્રભયાન્ મૃગીવ સા ॥

પુષ્પાયુધપ્રતિનિધે ભવનાન્તગામી દૃષ્ટો યદાનુપમયાસિ નરેન્દ્રપત્ન્યા
સા મે સખી કરતલાર્પિતવક્ત્રપદ્મા કાર્શ્યં તદાપ્રભૃતિ પાણ્ડુરતાં ચ ધત્તે ॥

તનુતરમ્ અમૃણાલપઙ્કપાણ્ડુ ચ્યુતધૃતિ સાંપ્રતમ્ અઙ્ગમ્ ઉદ્વહન્ત્યાઃ
મનસિ મનસિજઃ શરાન્ અશેષાન્ અવિરતમ્ અસ્યતિ મે વયસ્ય સખ્યાઃ ॥

કુસુમશયનમ્ ઊષ્મણાઙ્ગજેન પ્રતિદિવસં વિતપત્ય્ અનઙ્ગતન્વી
ઉપવનમ્ અપિ ચારુ વીક્ષમાણા ન ચ રમતે હરિણીવ યૂથમુક્તા ॥

ઇતિ કુસુમધનુઃશરાહતાઙ્ગીમ્ અવિરતનિશ્વસિતસ્ફુરત્કપોલામ્
અવનમિતમુખીં હ્રિયા સુગાત્રાં રમય સખીં વચસાપિ તાવદ્ અદ્ય ॥

ઉપરિ મમોત્પલમ્ અસિતં કર્ણાદ્ આદાય યત્ ત્વયા મુક્તમ્ ।
જીવિતમ્ ઇવ તદ્ દયિતં મ્લાનમ્ અપિ ન સંત્યજામ્ય્ એતત્ ॥

શિખિને વિષસંપૃક્તમ્ આહારમ્ ઉદકં ચ સા
દદાવ્ અસ્વવશીભૂતા રાગેણ ચ ભયેન ચ ॥

અપેતકૌલીનભયઃ સુખાશયા વિમોહિતઃ પુણ્યસપત્નભૂતયા
અનાત્મવાન્ કિં ન કરોત્ય્ અસાંપ્રતં ગતત્રપો રાગપરાયણો જનઃ ॥

એતૌ સ્ત્રીપુંસૌ જાતરાગાન્ધબુદ્ધી યાવદ્ વાધૂક્યં સાંપ્રતં નોપયાતઃ
ધર્મ્યાં કુર્વાણઃ સંકથાં કાપથઘ્નીં તાવદ્ વૈરાગ્યં નેતુમ્ એનૌ યતિષ્યે ॥

અહો હાસ્યજ્યોત્સ્નાપરિચયમનોજ્ઞો મુખશશી સલીલપ્રસ્થાનં સ્તનયુગલમ્ ઉચ્છ્રાયિ સુભગમ્
નરસ્યેત્થં મોહાત્ પરયુવતિરૂપં કલયતઃ પ્રસંખ્યાનાભાવાત્ કુસુમધનુર્ અન્તઃ પ્રવિશતિ ॥

નિરુન્ધાના હસ્તં મમ રહસિ નીવીશિથિલિનં ભવિષ્યત્ય્ એવં સા પ્રથમતરલજ્જાનતમુખી
ઇતિ સ્ત્રીસઙ્ગાર્થં બહુવિધવિકલ્પાન્ધમનસઃ શરીરં રન્ધ્રેક્ષી પ્રતિદિનમ્ અનઙ્ગઃ ક્રશયતિ ॥

આગચ્છેત્ પુનર્ અદ્ય સા ગુરુભયાત્ તસ્યાઃ કુતો ઽભ્યાગમઃ શર્વર્યામ્ અથવાહમ્ એવ ચકિતં ગચ્છામિ સુપ્તે જને
દૂત્યાપ્ય્ અદ્ય ચિરં કૃતં કિમ્ ઉ મનસ્ તસ્યા નિવૃત્તં ભવેદ્ ઇત્ય્ આરૂઢવિકલ્પનાકુલધિયઃ કિં તત્ સુખં કામિનઃ ॥

પ્રભવત્ય્ અનઙ્ગદહનસ્ તાપસ્ તતો જાયતે સંતાપાદ્ અરતિઃ સ્મૃતેઃ પ્રમથની સ્મૃત્યા વિના હ્રીઃ કુતઃ
હ્રીભઙ્ગાદ્ વચનીયતાપરિભવઃ ક્લેશેષુવિદ્ધાત્મનોઃ સ્યાતામ્ આધિમતોઃ કદા નુ સુખિની સ્ત્રીપુંસયોશ્ ચેતસી ॥

અક્ષાણાં વશમ્ આગતઃ સુખમ્ ઇતિ વ્યામોહિતશ્ ચિન્તયા કામાર્તઃ પરયોષિતે સ્પૃહયતિ વ્રીડાવિહીનો જનઃ
શ્લિષ્યન્તીં સ્ત્રિયમ્ આયસીં હુતવહજ્વાલાસ્ફુલિઙ્ગાકુલાં સોઢું શક્ષ્યતિ તાં કથં નુ નરકે પ્રાદુર્ભવદ્વેપથુઃ ॥

ઇતિ પરદારાસઙ્ગં બહુદોષમ્ અવેત્ય ધૈર્યમ્ આલમ્બ્ય ।
ભગિનીસંજ્ઞાં કૃત્વા તસ્માત્ પ્રાજ્ઞો નિવર્તેત ॥

અહો ત્વદ્ એનાં નરકોપવર્ણનાં પ્રકામમ્ આકર્ણ્ય મુહુર્ ભયંકરીમ્
ઉદર્ચિષં નારકજાતવેદસં વિલોકયામીવ સમુત્થિતધ્વનિમ્ ॥

તદ્ અદ્યારભ્ય રાગાન્ધ જનચિત્તાપહારિણે
નમો ઽસ્તુ પરદારાય સુગતિદ્વારરોધિને ॥

શુભાશુભપથાખ્યાન વ્યક્તીકૃતવિનિશ્ચયઃ
આચાર્યમ્ ઇવ પશ્યામિ ભવન્તમ્ અનુશાસકમ્ ॥

ઇમાં ચ રાજમહિષીમ્ અખણ્ડિતપતિવ્રતામ્
અપેતરાગતિમિરો મન્યે ઽહં ભગિનીમ્ ઇવ ॥

મૈત્રીમન્ત્રેણ મે નિત્યં શરીરમ્ અભિમન્ત્રિતમ્
નૈવ હાલાહલેનાપિ વિષેનાયાતિ વિક્રિયામ્ ॥

દેવિ મા સ્મ ગમઃ શઙ્કાં મદપાયકૃતામ્ ઇતિ
ન ચાહં કથયિષ્યામિ કિંચિદ્ ઈદૃઙ્ મહીભુજે ॥

મમ વિરહવિષાદદીનચિત્તં ન પિબતિ વારિ ફલં ન ચાપિ ભુઙ્ક્તે
જલધરસમયે ઽપિ વીતનૃત્તં શિખિકુલમ્ આકુલતાં ધ્રુવં પ્રયાતમ્ ॥

ઇતિ નરવર પાલય ત્વમ્ એનાં ભુવમ્ અખિલાં વિજિતેન્દ્રિયારિવર્ગઃ
અહમ્ અપિ હિમવન્તમ્ ઇન્દુગૌરં ત્વદનુમતઃ શિખિપાલનાય યામિ ॥

ઇતિ તમ્ અભિદધાનમ્ ઇન્દ્રનીલ ચ્છવિગલમ્ આયતચારુબર્હભારમ્
કથમ્ અપિ ગમનાય યૂથનાથં નગરવરાદ્ અનુમન્યતે સ્મ રાજા ॥

નૃપતિનાથ સમુત્સુકચેતસા પુરજનેન ચ તેન વિલોકિતઃ
અભજતામ્બરમ્ અમ્બુદસંવૃતં શિખિવરઃ શિખિનાં હિતકામ્યયા ॥

અથ વિલોક્ય મનોહરમ્ અમ્બરે શિખિનમ્ આયતબર્હભરાલસમ્
અમુચદ્ ઉત્સુકતાં સમુપાગતં નયનવારિકણાન્ અવરોધનમ્ ॥

તીવ્રે મનોધૃતિભિદિ પ્રિયવિપ્રયોગે રૂઢં યદ્ અશ્રુ મતિલોચનસંનિરોધે
તન્ મૂર્તિમન્ નિયતમ્ આધિહુતાશતાપાદ્ દુઃખં દ્રવીભવતિ સઙ્ગવતો જનસ્ય ॥

દૃષ્ટ્વા તતશ્ ચલકલાપશિરોધરં તં દૂરાન્ મયૂરવૃષભં નભસા વ્રજન્તમ્
પ્રત્યુદ્યયુશ્ ચલિતપક્ષપુટાઃ પ્રતીતાઃ કેકાઃ કલાઃ કલગિરઃ શિખિનઃ સૃજન્તઃ ॥

અથ શિખિનિ સમેતે તત્ર ભૂપાલપાર્શ્વાદ્ ગુણવતિ સુહૃદીવ પ્રાપ્તસર્વાભિલાષે
તુહિનગિરિર્ ઉદગ્રં પ્રીતિમ્ આવિશ્ચકાર પ્રવિસૃતહિમહાસઃ શષ્પરોમોદ્ગમેન ॥