હરિવંશ · અધ્યાય 62

ધૃતં ગોવર્ધનં દૃષ્ટ્વા પરિત્રાતં ચ ગોકુલમ્
કૃષ્ણસ્ય દર્શનં શક્રો રોચયામાસ વિસ્મિતઃ ॥

સ નિર્જલામ્બુદાકારં મત્તં મદજલોક્ષિતમ્
આરુહ્યૈરાવતં નાગમ્ અજગામ મહીતલમ્ ॥

સ દદર્શોપવિષ્ટં વૈ ગોવર્ધનશિલાતલે
કૃષ્ણમ્ અક્લિષ્ટકર્માણં પુરુહૂતઃ પુરંદરઃ ॥

તં દૃશ્ય બાલં મહતા તેજસા દીપ્તમ્ અવ્યયમ્
ગોપવિષધરં વિષ્ણું પરિજજ્ઞે પુરંદરઃ ॥

તાલસ્તમ્ભવનશ્યામં સ તં શ્રીવત્સલક્ષણમ્
પર્યાપ્તનયનઃ શક્રઃ સર્વૈર્ નેત્રૈર્ ઉદૈક્ષત ॥

દૃષ્ટ્વા ચૈનં શ્રિયા જુષ્ટં મર્ત્યલોકે ઽમરોપમમ્
સુરાણાં કાર્યસિદ્ધ્યર્થં નિત્યં કર્મસુ નિષ્ઠિતમ્ ।
સૂપવિષ્ટં શિલાપૃષ્ટે શક્રઃ સ વ્રીડિતો ઽભવત્ ॥

તસ્યોપવિષ્ટસ્ય સુખમ્ પક્ષાભ્યાં પક્ષિપુંગવઃ
અન્તર્ધાનગતશ્ છાયામ્ ચકારોરગભોજનઃ ॥

તં વિવિક્તે નગગતં લોકવૃત્તાન્તતત્પરમ્
ઉપતસ્થે ગજં હિત્વા કૃષ્ણં બલનિષૂદનઃ ॥

સ સમીપગતસ્ તસ્ય દિવ્યસ્રગનુલેપનઃ
રરાજ દેવરાજો વૈ વજ્રપૂર્ણકરઃ પ્રભુઃ ॥

કિરીતેણાર્કવર્ણેન વિદ્યુદ્વિદ્યોતકારિણા
કુણ્ડલાભ્યાં સ દિવ્યાભ્યાં સતતં શોભિતાનનઃ ।
પઞ્ચસ્તબકલમ્બેન દેવભૂષણભૂષિતઃ ॥
સહસ્રપત્રકાન્તેન દેહભૂષણકારિણા ।
ઈક્ષમાણઃ સહસ્રેણ નેત્રાણાં કામરૂપિણામ્ ।
ત્રિદશાજ્ઞાપનાર્થેન મેઘનિર્ઘોષકારિણા ।
પ્રણામ અકરોચ્ છક્રઃ ક્ષન્તવ્યમ્ ઇતિ ચાબ્રવીત્ ।
તુષ્ટાવ ચ હરિં વિષ્ણું ગોપવેષવિભૂષિતમ્ ॥
નમસ્ તે દેવદેવેશ ભૂતભાવનભાવન ।
હિરણ્યરેતસે તુભ્યં નમઃ સોમપ્રદાયિને ॥
નમો વેદૈકતત્ત્વાર્થ તન્નિબોધન બોધન ।
નમઃ પ્રણવવાચ્યાય વાચકાય નમો નમઃ ॥
નમસ્ તે વિશ્વરૂપાય નમો લોકહિતાય તે ।
નમો ગોપવિરૂપાય નમો ગોધરધારિણે ॥
નમઃ પુરાણરૂપાય નમસ્ તે મધુસૂદન ॥
કિં વાનેન જગન્નાથ નમસ્કારેણ કેશવ ।
યા યાસ્ તુ દેવદેવસ્ય મૂર્તયો મૂર્તિમત્તર ।
નમસ્ તાભ્યસ્ તથા વિષ્ણો સર્વાભ્યઃ સર્વકામદ ॥
ક્ષન્તવ્યં મમ દેવેશ કૃતં ગોપાલનન્દન ।
અજ્ઞાનાદ્ એથ વા જ્ઞાનાદ્ રોષાદ્ વા યદુનન્દન ॥
સમર્થેષ્વ્ અસમર્થેષુ રોષઃ પ્રસ્ફુરતિ પ્રભો ।
ન કેનચિદ્ ભવાઞ્ શાસ્યઃ શાસ્તા સર્વસ્ય વૈ પ્રભો ॥
ત્વન્નિમિત્તમ્ ઇદં સર્વમ્ ઐન્દ્રં મમ સુદુર્લભમ્ ।
ત્વત્પ્રસાદજ્ જગન્નાથ દેવાનામ્ ઈશ્વરો યતઃ ॥
તતશ્ ચ દેવદેવેશ ક્ષન્તવ્યં દાસ ઇત્ય્ અહમ્ ।
ઇત્ય્ ઉક્ત્વાથ પુનર્ વાક્યં વ્યાજહાર શચીપતિઃ ॥
કૃષ્ણં કમલપત્રાક્ષમ્ અબાલં બાલરૂપિણમ્ ।
અતસીપુષ્પસંકાશં શ્રીવત્સકૃતલક્ષણમ્ ।
ઉપવિષ્ટં શિલાપૃષ્ઠે કૃત્વા કર્માતિમાનુષમ્ ॥
ન હિ દાસેષુ કોપો ઽસ્તિ સ્વામિનાં સ્વામિસત્તમ ।
અથ દિવ્યેન મધુરમ્ વ્યાજહાર સ્વરેણ તમ્ ॥

કૃષ્ણ કૃષ્ણ મહાબાહો જ્ઞાતીનાં નન્દિવર્ધન
અતિદૈવં કૃતં કર્મ ત્વયા પ્રીતિમતા ગવામ્ ॥

મયા સૃષ્ટેષુ મેઘેષુ યુગાન્તાવર્તકારિષુ
યત્ ત્વયા રક્ષિતા ગાવસ્ તેનાસ્મિ પરિતોષિતઃ ॥

સ્વાયંભુવેન યોગેન યચ્ ચાયં પર્વતોત્તમઃ
ધૃતો વેશ્મ ઇવાકાશે કો હ્ય્ એતેન ન વિસ્મયેત્ ॥

પ્રતિષિદ્ધે મમ મહે મયેયં રુષિતેન વૈ
અતિવૃષ્ટિઃ કૃતા કૃષ્ણ ગવાં વૈ સપ્તરાત્રિકી ॥

સા ત્વયા પ્રતિષિદ્ધેયં મેઘવૃષ્ટિર્ દુરાસદા
દેવૈઃ સદાનવગણૈર્ દુર્નિવાર્યા મયિ સ્થિતે ॥

અહો મે સુપ્રિયં કૃષ્ણ યત્ ત્વં માનુષદેહવાન્
સમગ્રં વૈષ્ણવં તેજો વિનિગૂહસિ રોષિતઃ ॥

સાધિતં દેવતાનાં હિ મન્યે ઽહં કાર્યમ્ અવ્યયમ્
ત્વયિ માનુષ્યમ્ આપન્ને યુક્તેનૈવં સ્વતેજસા ॥

સેત્સ્યતે વીર કાર્યાર્થો ન કિંચિત્ પરિહાસ્યતે
દેવાનામ્ યદ્ ભવાન્ નેતા સર્વકાર્યપુરોગમઃ ॥

એકસ્ ત્વમ્ અસિ લોકાનાં દેવાનાં ચ સનાતનઃ
દ્વિતીયં નાનુપશ્યામિ ધુરં યસ્ તે સમુદ્વહેત્ ॥

યથા હિ પુંગવઃ શ્રેષ્ઠો મગ્ને ધુરિ નિયુજ્યતે
એવં ત્વમ્ અસિ દેવાનાં મગ્નાનાં દ્વિજવાહન ॥

ત્વચ્છરીરગતં કૃષ્ણ જગત્પ્રહરણં ત્વ્ ઇદમ્
બ્રહ્મણા સાધુ નિર્દિષ્ટં ધાતુભ્ય ઇવ કાઞ્ચનમ્ ॥

સ્વયં સ્વયંભૂર્ ભગવાન્ બુદ્ધ્યાથ વયસાપિ વા
ન ત્વાનુગન્તું શક્તો વૈ પઙ્ગુર્ દ્રુતગતિં યથા ॥

સ્તાણુભ્યો હિમવાઞ્ શ્રેષ્ઠો હ્રદાનાં વરુણાલયઃ
ગરુત્માન્ પક્ષિણાં શ્રેષ્ઠો દેવતાનાં ભવાન્ વરઃ ॥

અપામ્ અધસ્તાલ્ લોકો વૈ તસ્યોપરિ મહીધરાઃ
નાગાનામ્ ઉપરિષ્ટાદ્ ભૂઃ પૃથિવ્યુપરિ માનુષાઃ ॥

મનુષ્યલોકાદ્ ઊર્ધ્વં તુ ખગાનાં ગતિર્ ઉચ્યતે
આકાશસ્યોપરિ રવિર્ દ્વારં સ્વર્ગસ્ય ભાનુમાન્ ॥

દેવલોકઃ પરસ્ તસ્માદ્ વિમાનગહનો મહાન્
યત્રાહં કૃષ્ણ દેવાનામ્ ઐન્દ્રે વિનિહિતઃ પદે ॥

સ્વર્ગાદ્ ઊર્ધ્વં બ્રહ્મલોકો બ્રહ્મર્ષિગણસેવિતઃ
તત્ર સોમગતિશ્ ચૈવ જ્યોતિષાં ચ મહાત્મનામ્ ॥

તસ્યોપરિ ગવાં લોકઃ સાધ્યાસ્ તં પાલયન્તિ હિ
સ હિ સર્વગતઃ કૃષ્ણ મહાકાશગતો મહાન્ ॥

ઉપર્યુપરિ તત્રાપિ ગતિસ્ તવ તપોમયી
યાં ન વિદ્મો વયં સર્વે પૃચ્છન્તો ઽપિ પિતામહમ્ ॥

લોકસ્ ત્વ્ અર્વાગ્ દુષ્કૃતિનાં નાગલોકસ્ તુ દારુણઃ
પૃથિવી કર્મશીલાનાં ક્ષેત્રં સર્વસ્ય કર્મણઃ ॥

ખમ્ અસ્થિરાણાં વિષયો વાયુના તુલ્યવૃત્તિનામ્
ગતિઃ શમદમાઢ્યાનાં સ્વર્ગઃ સુકૃતકર્મણામ્ ॥

બ્રાહ્મે તપસિ યુક્તાનાં બ્રહ્મલોકઃ પરા ગતિઃ
ગવામ્ એવ હિ ગોલોકો દુરારોહા હિ સા ગતિઃ ॥

સ તુ લોકસ્ ત્વયા કૃષ્ણ સીદમાનઃ કૃતાત્મના
ધૃતો ધૃતિમતા વીર નિઘ્નતોપદ્રવં ગવામ્ ॥

તદ્ અહં સમનુપ્રાપ્તો ગવાં વાક્યેન ચોદિતઃ
બ્રહ્મનશ્ ચ મહાભાગ ગૌરવાત્ તવ ચાગતઃ ॥

અહં ભૂતપતિઃ કૃષ્ણ દેવરાજઃ પુરંદરઃ
અદિતેર્ ગર્ભપર્યાયે પૂર્વજસ્ તે પુરાતનઃ ॥

તેજસ્ તેજસ્વિનશ્ ચૈવ યત્ તે દર્શિતવાન્ અહમ્
મેઘરૂપેણ તત્ સર્વં ક્ષન્તુમ્ અર્હસિ મે વિભો ॥

એવં ક્ષાન્તમનાઃ કૃષ્ણ સ્વેન સૌમ્યેન તેજસા
બ્રહ્મણઃ શૃણુ મે વાક્યં ગવાં ચ ગજવિક્રમ ॥

આહ ત્વા ભગવાન્ બ્રહ્મા ગાવશ્ ચાકાશગા દિવિ
કર્મભિસ્ તોષિતા દિવ્યૈસ્ તવ સંરક્ષણાદિભિઃ ॥

ભવતા રક્ષિતા ગાવો ગોભિર્ લોકાશ્ ચ રક્ષિતાઃ
યદ્ વયં પુંગવૈઃ સાર્ધં વર્ધામઃ પ્રસવૈસ્ તથા ॥

કર્ષકાન્ પુંગવૈર્ વાહ્યૈર્ મેધ્યેન હવિષા સુરાન્
શ્રિયં શકૃત્પવિત્રેણ તર્પયિષ્યામ કામગાઃ ॥

તદ્ અસ્માકં ગુરુસ્ ત્વં હિ પ્રાણદશ્ ચ મહાબલ
અદ્યપ્રભૃતિ નો રાજા ત્વમ્ ઇન્દ્રો વૈ ભવિષ્યસિ ॥

તસ્માત્ ત્વં કાઞ્ચનૈઃ પૂર્ણૈર્ દિવ્યસ્ય પયસો ઘટૈઃ
એભિસ્ ત્વમ્ અભિષિચ્યસ્વ મયા હસ્તાવનામિતૈઃ ॥

અહં કિલેન્દ્રો દેવાનાં ત્વં ગવામ્ ઇન્દ્રતાં ગતઃ
ગોવિન્દ ઇતિ લોકાસ્ ત્વાં સ્તોષ્યન્તિ ભુવિ શાશ્વતમ્ ॥

મમોપરિ યથેન્દ્રસ્ ત્વમ્ સ્થાપિતો ગોભિર્ ઈશ્વરઃ
ઉપેન્દ્ર ઇતિ કૃષ્ણ ત્વામ્ ગાસ્યન્તિ દિવિ દેવતાઃ ॥

યે ચેમે વાર્ષિકા માસાશ્ ચત્વારો વિહિતા મમ
એષામ્ અર્ધં પ્રયચ્છામિ શરત્કાલં તુ પશ્ચિમમ્ ॥

વર્ષાર્ધે ચ ધ્વજો નિત્યં તતઃ પૂજામ્ અવાપ્સ્યતિ
મમામ્બુપ્રભવં દર્પં તદા ત્યક્ષ્યન્તિ બર્હિનઃ ॥

અલ્પવીર્યમદાશ્ ચૈવ યે ચાન્યે મેઘનાદિનઃ
શાન્તિં સર્વે ગમિષ્યન્તિ જલકાલવિચારિણઃ ॥

ત્રિશઙ્ક્વગસ્ત્યચરિતામ્ આશાં ચ વિચરિષ્યતિ
સહસ્રરશ્મિર્ આદિત્યસ્ તાપયન્ સ્વેન તેજસા ॥

તતઃ શરદિ યુક્તાનાં મૌનમૂકેષુ બર્હિષુ
યાવત્ સુખતરૈસ્ તોયૈર્ વિપ્લુતેષુ પ્લુતેષુ ચ ॥

મત્તક્રૌઞ્ચપ્રણાદેષુ મત્તેષુ વૃષભેષુ ચ
ગોષુ ચૈવ પ્રહૃષ્ટાસુ ક્ષરન્તીષુ પયો બહુ ॥

નિવૃત્તેષુ ચ મેઘેષુ નિર્યાત્ય જગતો જલમ્
આકાશે શસ્ત્રસંકાશે હંસેષુ વિચરત્સુ ચ ॥

જાતપદ્મેષુ તોયેષુ વાપીષુ ચ સરિત્સુ ચ
તડાગેષુ ચ કાન્તેષુ તોયેષુ વિમલેષુ ચ ।
કલમાવનતાગ્રાસુ પક્વકેદારપઙ્ક્તિષુ ॥

મધ્યસ્થં સલિલારમ્ભં કુર્વન્તીષુ નદીષુ ચ
સસસ્યાયાં ચ સીમાયાં મનોહર્યાં મુનેર્ અપિ ॥

પૃથિવ્યાં પૃથુરાષ્ટ્રાયાં રમાયાં વર્ષસંક્ષયે
શ્રામત્સુ પઙ્ક્તિમાર્ગેષુ ફલવત્સુ તૃણેષુ ચ
ઇક્ષુમત્સુ ચ દેશેષુ પ્રવૃત્તેષુ મખેષુ ચ ॥

તતઃ પ્રવર્ત્સ્યતે પુણ્યા શરત્સુપ્તોત્થિતે ત્વયિ
લોકે ઽસ્મિન્ કૃષ્ણ નિખિલે યથૈવ ત્રિદિવે તથા ॥

નરાસ્ ત્વાં ચૈવ માં ચૈવ ધ્વજાકારાસુ યષ્ટિષુ
મહેન્દ્રશ્ ચાપ્ય્ ઉપેન્દ્રશ્ ચ મહીયેતાં મહીતલે ॥

યે ચાવયોઃ સ્થિતા વૃત્તે મહેન્દ્રોપેન્દ્રસંજ્ઞિતે
માનવાઃ પ્રણમિષ્યન્તિ તેષાં નાસ્ત્ય્ અનયાગમઃ ॥

તતઃ શક્રસ્ તુ તાન્ ગૃહ્ય ઘટાન્ દિવ્યપયોધરાન્
અભિષેકેણ ગોવિન્દં યોજયામાસ યોગવિત્ ॥

દૃષ્ટ્વા તમ્ અભિષિચ્યન્તં ગાવસ્ તાઃ સહ યૂથપૈઃ
સ્તનૈઃ પ્રસ્નવસંયુક્તૈઃ સિષિચુઃ કૃષ્ણમ્ અવ્યયમ્ ॥

મેઘાશ્ ચ દિવિ મુક્તાભિઃ સામૃતાભિઃ સમન્તતઃ
સિષિચુસ્ તોયધારાભિર્ અભિષિચ્યન્તમ્ અવ્યયમ્ ॥

વનસ્પતીનાં સર્વેષાં સુસ્રાવેન્દુનિભં પયઃ
વવર્ષુઃ પુષ્પવર્ષં ચ નેદુસ્ તૂર્યાણિ ચામ્બરે ॥

સ્તુવન્તિ મુનયઃ સર્વે વાગ્ભિર્ મન્ત્રપરાયણાઃ
વસિષ્ઠો વામદેવશ્ ચ જાબાલિર્ અથ કાશ્યપઃ ।
વિશ્વામિત્રો ભરદ્વાજઃ કણ્વો ઽત્રિર્ ભગવાન્ પ્રભુઃ ।
એતે ચ મુનયઃ સર્વે સિદ્ધાશ્ ચ પરમર્ષયઃ ।
એકાર્ણવવિમુક્તં ચ દધાર વસુધા વપુઃ ॥

પ્રસાદં સાગરા જગ્મુર્ વવુર્ વાતા જગદ્ધિતાઃ
ઈતયઃ પ્રશમં જગ્મુર્ જગ્મુર્ નિર્વૈરતાં નૃપાઃ ॥

માર્ગસ્થો વિબભૌ ભાનુઃ સોમો યોગેન સંગતઃ
પ્રવાલપુષ્પશબલાઃ ફલવન્તશ્ ચ પાદપાઃ ॥

મદં પ્રસુસ્રુવુર્ નાગા યાતાસ્ તોષં વને મૃગાઃ
અલંકૃતા ગાત્રરુહૈર્ વાતુભિર્ ભાન્તિ પર્વતાઃ ॥

દેવલોકોપમો લોકસ્ તૃપ્તો ઽમૃતસુતર્પિતઃ
આસીત્ કૃષ્ણાભિષેકે હિ દિવ્યસ્વર્ગરસોક્ષિતઃ ॥

અભિષિક્તં તુ તં ગોભિઃ શક્રો ગોવિન્દમ્ અવ્યયમ્
દિવ્યશુક્લામ્બરધરમ્ દેવરાજો ઽબ્રવીદ્ ઇદમ્ ॥

એષ મે પ્રથમઃ કૃષ્ણ નિયોગો ગોષુ યઃ કૃતઃ
શ્રૂયતામપરં ચાપિ મમાગમનકારણમ્ ॥

ક્ષિપ્રં સંસાધ્યતાં કંસઃ કેશી ચ તુરગાધમઃ
અરિષ્ટશ્ ચ મદાવિષ્ટો રાજરાજ્યં તતઃ કુરુ ॥

પિતૃષ્વસરિ જાતસ્ તે મમાંશો ઽહમ્ ઇવ સ્થિતઃ
સ તે રક્ષ્યશ્ ચ માન્યશ્ ચ સખ્યે ચ વિનિયુજ્યતામ્ ॥

ત્વયા હ્ય્ અનુગૃહીતઃ સ તવ વૃત્તાનુવર્તકઃ
ત્વદ્વશે વર્તમાનઃ સ પ્રાપ્સ્યતે વિપુલં યશઃ ॥

ભારતસ્ય ચ વંશસ્ય સ વરિષ્ઠો ધનુર્ધરઃ
ભવિષ્યત્ય્ અનુરૂપશ્ ચ ત્વામ્ ઋતે ન ચ રંસ્યતે ॥

ભારતં ત્વયિ ચાસક્તં તસ્મિંશ્ ચ પુરુષોત્તમે
ઉભાભ્યામ્ અપિ સંયોગે યાસ્યન્તિ નિધનં નૃપાઃ ॥

પ્રતિજ્ઞાતં ચ મે કૃષ્ણ ઋષિમધ્યે સુરેષુ ચ
મમ પુત્રો ઽર્જુનો નામ જાતઃ કુન્ત્યાં કુરૂદ્વહઃ ॥

સો ઽસ્ત્રાણાં પારતન્ત્રજ્ઞઃ શ્રેષ્ઠશ્ ચાપવિકર્ષણે
તં પ્રવેક્ષ્યન્તિ વૈ સર્વે રાજાનઃ શસ્ત્રયોધિનઃ ॥

અક્ષૌહિણ્યશ્ ચ શૂરાણાં રાજ્ઞાં સંગ્રામશાલિનામ્
સમરે રાજધર્મેણ યોજયિષ્યન્તિ મૃત્યુના ॥

તસ્યાસ્ત્રચરિતં માર્ગં ધનુષો લાઘવેન ચ
નાનુયાસ્યન્તિ રાજાનો દેવા વા ત્વાં વિના પ્રભો ॥

સ તે બન્ધુઃ સહાયશ્ ચ સંગ્રામેષુ ભવિષ્યતિ
તસ્ય યોગો વિધાતવ્યસ્ ત્વયા ગોવિન્દ મત્કૃતે ॥

દ્રષ્ટવ્યઃ સ યથાહં વૈ ત્વયા માન્યશ્ ચ નિત્યશઃ
જ્ઞાતા ત્વમ્ એવ લોકાનામ્ અર્જુનસ્ય ચ નિત્યશઃ ॥

ત્વયા હિ નિત્યં રક્ષ્યઃ સ આહવેષુ મહત્સુ ચ
રક્ષિતસ્ય ત્વયા તસ્ય ન મૃત્યુઃ પ્રભવિષ્યતિ ॥

અર્જુનં વિદ્ધિ માં કૃષ્ણ માં ચૈવાત્માનમ્ આત્મના
આત્મા તે ઽહં યથા શશ્વત્ તથૈવ તવ સો ઽર્જુન ॥

ત્વયા લોકાન્ ઇમાઞ્ જિત્વા બલેર્ હસ્તાત્ ત્રિભિઃ ક્રમૈઃ
દેવતાનાં કૃતો રાજા પુરા જ્યેષ્ઠક્રમાદ્ અહમ્ ॥

ત્વાં ચ સત્યમયં જ્ઞાત્વા સત્યેષ્ટં સત્યવિક્રમમ્
સત્યેનોપેત્ય દેવા વૈ યોજયન્તિ રિપુક્ષયે ॥

સો ઽર્જુનો નામ મે પુત્રઃ પિતુસ્ તે ભગિનીસુતઃ
ઇહ સૌહૃદતાં યાતુ ભૂત્વા સહચરઃ પુરા ॥

તસ્ય તે યુધ્યતઃ કૃષ્ણ સ્વસ્થાને ઽથ ગૃહે ઽપિ વા
વોઢવ્યા પુંગવેનેવ ધૂઃ સર્વા રણવાહિની ॥

કંસે વિનિહતે કૃષ્ણ ત્વયા ભાવ્યર્થદર્શિના
અભિતસ્ તન્ મહદ્યુદ્ધં ભવિષ્યતિ મહીક્ષિતામ્ ॥

તત્ર તેષાં નૃવીરાણામ્ અતિમાનુષકર્મણામ્
વિજયસ્યાર્જુનો ભોક્તા યશસા ત્વં તુ યોક્ષ્યસે ॥

એતન્ મે કૃષ્ણ કાર્ત્સ્ન્યેન કર્તુમ્ અર્હસિ ભાષિતમ્
યદ્ય્ અહં તે સુરાશ્ ચૈવ સત્યં ચ પ્રિયમ્ અચ્યુત ॥

શક્રસ્ય વચનં શ્રુત્વા કૃષ્ણો ગોવિન્દતાં ગતઃ
પ્રીતેન મનસા યુક્તઃ પ્રતિવાક્યં જગાદ હ ॥

પ્રીતો ઽસ્મિ દર્શનાદ્ એવ તવ શક્ર શચીપતે
યત્ ત્વયાભિહિતં ચેદં ન કિંચિત્ પરિહાસ્યતે ॥

જાનામિ ભવતો ભાવં જાનામ્ય્ અર્જુનસંભવમ્
જાને પિતૃષ્વસા દત્તા પાણ્ડોર્ વસુમતીપતેઃ ॥

યુધિષ્ઠિરં ચ જાનામિ કુમારં ધર્મનિર્મિતમ્
ભીમસેનં ચ જાનામિ વાયોઃ સંતાનજાં તનુમ્ ॥

અશ્વિભ્યાં સાધુ જાનામિ સૃષ્ટં પુત્રદ્વયં શુભમ્
નકુલં સહદેવં ચ માદ્ર્યાઃ કુક્ષિભવાવ્ ઉભૌ ॥

કાનીનં ચાપિ જાનામિ સવિતુઃ પ્રથમં સુતમ્
પિતૃષ્વસરિ કર્ણં વૈ પ્રસૂતં સૂતતાં ગતમ્ ॥

ધાર્તરાષ્ટ્રાશ્ ચ મે સર્વે વિદિતા યુદ્ધકાઙ્ક્ષિણઃ
દુર્યોધનમુખાઃ શક્ર કૌરવાણાં મહાબલાઃ ।
પાણ્ડોર્ ઉપરમં ચૈવ શાપાશનિનિપાતજમ્ ॥

તદ્ ગચ્છ ત્રિદિવં શક્ર સુખાય ત્રિદિવૌકસામ્
નાર્જુનસ્ય રિપુઃ કશ્ચિન્ મમાગ્રે પ્રભવિષ્યતિ ॥

અર્જુનાર્થે ચ તાન્ સર્વાન્ પાણ્ડવાન્ અક્ષતાન્ યુધિ
કુન્ત્યા નિર્યાતયિષ્યામિ નિવૃત્તે ભારતે મૃધે ॥

યચ્ ચ વક્ષ્યતિ માં શક્ર તનૂજસ્ તવ સો ઽર્જુનઃ
ભૃત્યવત્ તત્ કરિષ્યામિ તવ સ્નેહેન યન્ત્રિતઃ ॥

સત્યસંધસ્ય તચ્ છ્રુત્વા પ્રિયં પ્રીતસ્ય ભાષિતમ્
પ્રણમ્ય દેવદેવસ્ય મૂર્ધ્ના શક્રઃ પદામ્બુજમ્ ।
કૃષ્ણસ્ય સાક્ષાત્ ત્રિદિવં જગામ ત્રિદશેશ્વરઃ ॥