ગૌરગઓવિન્દાર્ચનસ્મરણપદ્ધતિ · શ્લોક 61-80

મન્ત્રો યથા--શ્રીં ગું ભગવદ્-ગુરવે સ્વાહા ।
તતો ઽવશેષ-નિર્માલ્યાદિકં ગૃહ્ણીયાત્; સ્થાનાન્તરે ચ સંસ્થાપ્ય પ્રભુપાદ-પદ્મે પુષ્પાઞ્જલિં દત્ત્વા આરાત્રિકં કુર્યાત્ ।
તદ્-અન્તરં ચામર-વ્યજનાદિકં કૃત્વા શ્રી-ગુરુ-પાર્શ્વે તિષ્ઠન્ ધ્યાનાનુક્રમેણ નિરીક્ષણં કૃત્વા તતો બહિઃ-પૂજયેત્ ।
બહિઃ-પૂજાં કૃત્વાનન્તરં સ્વ-સ્વ-ગાયત્રી-મન્ત્રાન્ જપેત્ ક્રમાત્--
તત્રાદૌ શ્રી-ગુરુ-ગાયત્રી યથા પાદ્મે--શ્રીં ગુરુદેવાય વિદ્મહે ગૌર-પ્રિયાય ધીમહિ તન્ નો ગુરુઃ પ્રચોદયાત્ ।
પ્રથમં મન્ત્ર-ગુરોઃ પૂજા પશ્ચાચ્ ચૈવ મમાર્ચનમ્ ।
કુર્વન્ સિદ્ધિમ્ અવાપ્નોતિ હ્ય્ અન્યથા નિષ્ફલં ભવેત્

ધ્યાનાદૌ શ્રી-ગુરોર્ મૂર્તિં પૂજાદૌ ચ ગુરોઃ પૂજામ્ ।
જપાદૌ ચ ગુરોર્ મન્ત્રં હ્ય્ અન્યથા નિષ્ફલં ભવેત્

તતો જપ-લક્ષણં યથા (શ્રી-હરિ-ભક્તિ-વિલાસઃ 17.143, 129)--
ન કમ્પયેચ્ છિરો ગ્રીવાં દન્તાન્ નૈવ પ્રકાશયેત્ ।
મનઃ-સંહરણં શૌચં મૌનં મન્ત્રાર્થ-ચિન્તનમ્

મનો-મધ્યે સ્થિતો મન્ત્રો મન્ત્ર-મધ્યે સ્થિતં મનઃ ।
મનો-મન્ત્રં સમાયુક્તમ્ એતદ્ ધિ જપ-લક્ષણમ્

અથ જપાઙ્ગુલ્યાદિ-નિયમઃ (શ્રી-હરિ-ભક્તિ-વિલાસઃ 17.116-120)--
તત્રાઙ્ગુલિ-જપં કુર્વન્ સાઙ્ગુષ્ઠાઙ્ગુલિભિર્ જપેત્ ।
અઙ્ગુષ્ઠેન વિના કર્મ કૃતસ્ તદ્ અફલં ભવેત્

કનિષ્ઠાનામિકા મધ્યા ચતુર્થી તર્જની મતા ।
તિસ્રો ઽઙ્ગુલ્યસ્ ત્રિ-પર્વા સ્યુર્ મધ્યમા ચૈક-પર્વિકા

પર્વ-દ્વયં મધ્યમાયા જપ-કાલે વિવર્જયેત્ ।
એવં મેરું વિજાનીયાદ્ બ્રહ્મણા દૂષિતં સ્વયમ્

આરભ્યાનામિકા-મધ્યાત્ પ્રદક્ષિણમ્ અનુક્રમાત્ ।
તર્જની-મૂલ-પર્યન્તં ક્રમાદ્ દશસુ પર્વસુ

અઙ્ગુલિર્ ન વિયુઞ્જીત કિઞ્ચિત્ સઙ્કોચયેત્ તલમ્ ।
અઙ્ગુલીનાં વિયોગે તુ છિદ્રેષુ સ્રવતે જપઃ

મધ્યમા ચૈક-પર્વિકા ઇત્ય્ ઉક્તેઃ કેચિત્ મધ્યમા-મધ્ય-પર્વ ગૃહ્ણન્તિ તન્ ન ।
અથ જપ-ક્રમો યથા--
પ્રથમં ગુરુદેવસ્ય મન્ત્ર-ગાયત્રીં સંસ્મરેત્ ।
તતઃ શ્રી-ગૌરચન્દ્રસ્ય ગાયત્ર્ય્ ઉચ્ચારણં તથા

શ્રીલાવધૂતેન્દ્રાદ્વૈત-મન્ત્ર-ગાયત્રીં સંસ્મરેત્ ।
તતઃ શ્રી-ગદાધરસ્ય શ્રીવાસ-પણ્ડિતસ્ય ચ

શ્રી-ગુરુદેવસ્ય મન્ત્રો યથા--શ્રીં ગું ભગવદ્-ગુરવે સ્વાહા ।
અથ ગાયત્રી--શ્રીં ગુરુદેવાય વિદ્મહે, ગૌર-પ્રિયાય ધીમહિ, તન્ નો ગુરુઃ પ્રચોદયાત્ ।
ઇતિ શ્રી-ગુરુ-ગાયત્રી-સ્મરણાનન્તરં ગુરુ-વર્ગાન્ સ્મરેત્; સ્મરણ-ક્રમો યથા--
શ્રી-ગુરુ-પરમ-ગુરુર્ ઇત્યાદિ-ક્રમેણ સ્વ-સ્વ-પ્રણાલ્ય્-અનુસારેણ સ્વ-સ્વ-પરિવારેશ્વર-પરમ-પરમેષ્ઠિ-ગુરુ-પર્યન્તં ધ્યાનં કૃત્વા સ્વીય-સ્વીય-નામાનિ ચતુર્થ્યન્તં કૃત્વા જપાનન્તરં શ્રી-શ્રી-ચૈતન્ય-મહાપ્રભોર્ મન્ત્રં ગાયત્રીં ચ સ્મરેત્ ।
મન્ત્રો યથા -ક્લીં ગૌરાય સ્વાહા ।
ગાયત્રી યથા -ક્લીં ચૈતન્યાય વિદ્મહે વિશ્વમ્ભરાય ધીમહિ તન્ નો ગૌરઃ પ્રચોદયાત્ ।
મન્ત્રો યથા -ક્લીં દેવ-જાહ્નવી-વલ્લભાય સ્વાહા ।
ગાયત્રી યથા -ક્લીં નિત્યાનન્દાય વિદ્મહે સઙ્કર્ષણાય ધીમહિ તન્ નો બલઃ પ્રચોદયાત્ ।
મન્ત્રો યથા -ક્લીં અદ્વૈતાય સ્વાહા ।
ગાયત્રી યથા -ક્લીં અદ્વૈતાય વિદ્મહે મહા-વિષ્ણવે ધીમહિ તન્ નો અદ્વૈતઃ પ્રચોદયાત્ ।
મન્ત્રો યથા -શ્રીં ગદાધરાય સ્વાહા ।
ગાયત્રી યથા -ગાં ગદાધરાય વિદ્મહે પણ્ડિતાખ્યાય ધીમહિ તન્ નો ગદાધરઃ પ્રચોદયાત્ ।
મન્ત્રો યથા -શ્રીં શ્રીવાસાય સ્વાહા ।
ગાયત્રી યથા -શ્રીં શ્રીવાસાય વિદ્મહે નારદાખ્યાય ધીમહિ તન્ નો ભક્તઃ પ્રચોદયાત્ ।
શ્રી શ્રી ગૌર-ગદાધર મન્ત્રો યથા -ક્લીં શ્રીં ગૌર-ગદાધરાય સ્વાહા ।
અનન્તરં સ્તવ-પ્રણામાદિ કૃત્વા શ્રી-ગૌરચન્દ્રાષ્ટ-કાલીય-સૂત્રાનુસરેણ સ્મરેત્--
ગૌરસ્ય શયનોત્થાનાત્ પુનસ્ તચ્-છયનાવધિ ।
નાનોપકરણૈઃ કુર્યાત્ સેવનં તત્ર સાધકઃ

શ્રી-નવદ્વીપ-ચન્દ્રસ્ય ચરિતામૃતમ્ અદ્ભુતમ્ ।
ચિન્ત્યતાં ચિન્ત્યતાં નિત્યં માનસ-સેવનોત્સુકઃ

નિશાન્તે ગૌરચન્દ્રસ્ય શયનં ચ નિજાલયે ।
પ્રાતઃ-કાલે કૃતોત્થાનં સ્નાનં તદ્-ભોજનાદિકમ્

પૂર્વાહ્ન-સમયે ભક્ત-મન્દિરે પરમોત્સુકમ્ ।
મધ્યાહ્ને પરમાશ્ચર્ય-કેલિં સુર-સરિત્-તટે

અપરાહ્ને નવદ્વીપ-ભ્રમણં ભૂરિ-કૌતુકમ્ ।
સાયાહ્ને ગમનં ચારુ-શોભનં નિજ-મન્દિરે

પ્રદોષે પ્રિય-વર્ગાઢ્યં શ્રીવાસ-ભવને તથા ।
નિશાયાં સ્મરેદ્ આનન્દં શ્રીમત્-સંકીર્તનોત્સવમ્

એવં શ્રી-ચૈતન્ય-દેવં નિષેવ્ય સિદ્ધ-દેહેન શ્રી-કૃષ્ણ-સેવાઙ્ગં વિદધ્યાત્ ।
અત્ર કારિકા--
તચ્ ચિન્તનાદિ-સમયે કુર્યાત્ તદ્ અનુસારતઃ ।
ચિન્તનં તુ તયોસ્ તત્ર વસન્ ગુરુ-ગણાન્વિતઃ

પુનશ્ ચાક્ષુષ-લીલે ઽસ્મિન્ સિદ્ધ-દેહેન સાધકઃ ।
મનસા માનસીં સેવામ્ અષ્ટ-કાલોચિતાં વ્રજેત્

સાધકઃ સિદ્ધ-દેહેન કુર્યાત્ કૃષ્ણ-પ્રિયા-ગૃહે ।
ગુરુ-રૂપ-પ્રિયા-પાર્શ્વે લલિતાદિ સખી-ગણે