Gauragaovindārcanasmaraṇapaddhati · Verses 61-80

mantro yathā--śrīṃ guṃ bhagavad-gurave svāhā /
tato 'vaśeṣa-nirmālyādikaṃ gṛhṇīyāt; sthānāntare ca saṃsthāpya prabhupāda-padme puṣpāñjaliṃ dattvā ārātrikaṃ kuryāt /
tad-antaraṃ cāmara-vyajanādikaṃ kṛtvā śrī-guru-pārśve tiṣṭhan dhyānānukrameṇa nirīkṣaṇaṃ kṛtvā tato bahiḥ-pūjayet /
bahiḥ-pūjāṃ kṛtvānantaraṃ sva-sva-gāyatrī-mantrān japet kramāt--
tatrādau śrī-guru-gāyatrī yathā pādme--śrīṃ gurudevāya vidmahe gaura-priyāya dhīmahi tan no guruḥ pracodayāt /
prathamaṃ mantra-guroḥ pūjā paścāc caiva mamārcanam /
kurvan siddhim avāpnoti hy anyathā niṣphalaṃ bhavet

dhyānādau śrī-guror mūrtiṃ pūjādau ca guroḥ pūjām /
japādau ca guror mantraṃ hy anyathā niṣphalaṃ bhavet

tato japa-lakṣaṇaṃ yathā (śrī-hari-bhakti-vilāsaḥ 17.143, 129)--
na kampayec chiro grīvāṃ dantān naiva prakāśayet /
manaḥ-saṃharaṇaṃ śaucaṃ maunaṃ mantrārtha-cintanam

mano-madhye sthito mantro mantra-madhye sthitaṃ manaḥ /
mano-mantraṃ samāyuktam etad dhi japa-lakṣaṇam

atha japāṅgulyādi-niyamaḥ (śrī-hari-bhakti-vilāsaḥ 17.116-120)--
tatrāṅguli-japaṃ kurvan sāṅguṣṭhāṅgulibhir japet /
aṅguṣṭhena vinā karma kṛtas tad aphalaṃ bhavet

kaniṣṭhānāmikā madhyā caturthī tarjanī matā /
tisro 'ṅgulyas tri-parvā syur madhyamā caika-parvikā

parva-dvayaṃ madhyamāyā japa-kāle vivarjayet /
evaṃ meruṃ vijānīyād brahmaṇā dūṣitaṃ svayam

ārabhyānāmikā-madhyāt pradakṣiṇam anukramāt /
tarjanī-mūla-paryantaṃ kramād daśasu parvasu

aṅgulir na viyuñjīta kiñcit saṅkocayet talam /
aṅgulīnāṃ viyoge tu chidreṣu sravate japaḥ

madhyamā caika-parvikā ity ukteḥ kecit madhyamā-madhya-parva gṛhṇanti tan na /
atha japa-kramo yathā--
prathamaṃ gurudevasya mantra-gāyatrīṃ saṃsmaret /
tataḥ śrī-gauracandrasya gāyatry uccāraṇaṃ tathā

śrīlāvadhūtendrādvaita-mantra-gāyatrīṃ saṃsmaret /
tataḥ śrī-gadādharasya śrīvāsa-paṇḍitasya ca

śrī-gurudevasya mantro yathā--śrīṃ guṃ bhagavad-gurave svāhā /
atha gāyatrī--śrīṃ gurudevāya vidmahe, gaura-priyāya dhīmahi, tan no guruḥ pracodayāt /
iti śrī-guru-gāyatrī-smaraṇānantaraṃ guru-vargān smaret; smaraṇa-kramo yathā--
śrī-guru-parama-gurur ityādi-krameṇa sva-sva-praṇāly-anusāreṇa sva-sva-parivāreśvara-parama-parameṣṭhi-guru-paryantaṃ dhyānaṃ kṛtvā svīya-svīya-nāmāni caturthyantaṃ kṛtvā japānantaraṃ śrī-śrī-caitanya-mahāprabhor mantraṃ gāyatrīṃ ca smaret /
mantro yathā -klīṃ gaurāya svāhā /
gāyatrī yathā -klīṃ caitanyāya vidmahe viśvambharāya dhīmahi tan no gauraḥ pracodayāt /
mantro yathā -klīṃ deva-jāhnavī-vallabhāya svāhā /
gāyatrī yathā -klīṃ nityānandāya vidmahe saṅkarṣaṇāya dhīmahi tan no balaḥ pracodayāt /
mantro yathā -klīṃ advaitāya svāhā /
gāyatrī yathā -klīṃ advaitāya vidmahe mahā-viṣṇave dhīmahi tan no advaitaḥ pracodayāt /
mantro yathā -śrīṃ gadādharāya svāhā /
gāyatrī yathā -gāṃ gadādharāya vidmahe paṇḍitākhyāya dhīmahi tan no gadādharaḥ pracodayāt /
mantro yathā -śrīṃ śrīvāsāya svāhā /
gāyatrī yathā -śrīṃ śrīvāsāya vidmahe nāradākhyāya dhīmahi tan no bhaktaḥ pracodayāt /
śrī śrī gaura-gadādhara mantro yathā -klīṃ śrīṃ gaura-gadādharāya svāhā /
anantaraṃ stava-praṇāmādi kṛtvā śrī-gauracandrāṣṭa-kālīya-sūtrānusareṇa smaret--
gaurasya śayanotthānāt punas tac-chayanāvadhi /
nānopakaraṇaiḥ kuryāt sevanaṃ tatra sādhakaḥ

śrī-navadvīpa-candrasya caritāmṛtam adbhutam /
cintyatāṃ cintyatāṃ nityaṃ mānasa-sevanotsukaḥ

niśānte gauracandrasya śayanaṃ ca nijālaye /
prātaḥ-kāle kṛtotthānaṃ snānaṃ tad-bhojanādikam

pūrvāhna-samaye bhakta-mandire paramotsukam /
madhyāhne paramāścarya-keliṃ sura-sarit-taṭe

aparāhne navadvīpa-bhramaṇaṃ bhūri-kautukam /
sāyāhne gamanaṃ cāru-śobhanaṃ nija-mandire

pradoṣe priya-vargāḍhyaṃ śrīvāsa-bhavane tathā /
niśāyāṃ smared ānandaṃ śrīmat-saṃkīrtanotsavam

evaṃ śrī-caitanya-devaṃ niṣevya siddha-dehena śrī-kṛṣṇa-sevāṅgaṃ vidadhyāt /
atra kārikā--
tac cintanādi-samaye kuryāt tad anusārataḥ /
cintanaṃ tu tayos tatra vasan guru-gaṇānvitaḥ

punaś cākṣuṣa-līle 'smin siddha-dehena sādhakaḥ /
manasā mānasīṃ sevām aṣṭa-kālocitāṃ vrajet

sādhakaḥ siddha-dehena kuryāt kṛṣṇa-priyā-gṛhe /
guru-rūpa-priyā-pārśve lalitādi sakhī-gaṇe