ગૌરગઓવિન્દાર્ચનસ્મરણપદ્ધતિ · શ્લોક 281-300

અસ્યા યૂથો યથા (શ્રી-કૃષ્ણ-ગણોદ્દેશે 1.246)--
મઞ્જુમેધા સુમધુરા સુમધ્યા મધુરેક્ષણા ।
તનૂમધ્યા મધુસ્યન્દા ગુણચૂડા વરાઙ્ગદા

અસ્યા મન્ત્રોદ્ધારો યથા કિશોરી-તન્ત્રે--
લક્ષ્મી-પૂર્વા તુઙ્ગવિદ્યા ચતુર્થી હુત-ભુક્-પ્રિયા ।
મન્ત્રો ઽયં તુઙ્ગવિદ્યાયા વસુ-વર્ણઃ સમીરિતઃ

મન્ત્રો યથા--શ્રીં તુઙ્ગવિદ્યાયૈ સ્વાહા ।
અસ્યા ધ્યાનં, યથા તત્રૈવ--
ચન્દ્રાઢ્યૈર્ અપિ ચન્દનૈઃ સુલલિતાં શ્રી-કુઙ્કુમાભ-દ્યુતિં
સદ્-રત્નાન્વિત-ભૂષણાઞ્ચિત-તનું શોણામ્બરોલ્લાસિતામ્ ।
સદ્-ગીતાવલિ-સંયુતાં બહુ-ગુણાં ડમ્ફસ્ય શબ્દેન વૈ
નૃત્યન્તીં પુરતો હરે રસવતીં શ્રી-તુઙ્ગવિદ્યાં ભજે

વાયવ્ય-દલકે કુઞ્જમ્ આસ્તે હરિત-વર્ણકમ્ ।
વસન્ત-સુખદમ્ અત્ર સુદેવી વર્તતે સદા

કલહાન્તરિતા-ભાવમ્ આપન્ના રતિ-યુગ્-ઘરૌ ।
પદ્મ-કિઞ્જલ્ક-રુચિરા જબા-પુષ્પ-નિભામ્બરા

અસૌ ચ જલ-સેવાઢ્યા વામા પ્રખરિકા મતા ।
વેદ-વાસર-સંયુક્ત-દ્વિ-માસ-મનુ-હાયના (14-2-4)

અસ્યા વયઃ-પરિમાણં યાવટે તુ નિકેતનમ્ ।
માતાસ્યાઃ કરુણા પ્રોક્તા જનકો રઙ્ગસાગરઃ

ભ્રાત્રા વક્રેક્ષણસ્યેયમ્ પરિણીતા કનીયસા ।
શ્રી-વાસુદેવ-ઘોષાખ્યામ્ આપ્તા ગૌર-રસે ત્વ્ અસૌ

કલહાન્તરિતા-લક્ષણં યથા (ઉન્ 5.87)--
યા સખીનાં પુરઃ પાદ-પતિતં વલ્લભં રુષા ।
નિરસ્ય પશ્ચાત્ તપતિ કલહાન્તરિતા હિ સા ।
અસ્યાઃ પ્રલાપ-સન્તાપ-ગ્લાનિ-નિઃશ્વસિતાદયઃ

ઉદાહરણં યથા (ઉન્ 5.88)--
સ્રજઃ ક્ષિપ્તા દૂરે સ્વયમ્ ઉપહૃતાઃ કેશિ-રિપુણા
પ્રિય-વાચસ્ તસ્ય શ્રુતિ-પરિસરાન્તે ઽપિ ન કૃતાઃ ।
નમન્ન્ એષ ક્ષૌની-વિલુઠિત-શિખં પ્રૈક્ષિ ન મયા
મનસ્ તેનેદં મે સ્ફુટતિ પુટપાકાર્પિતમ્ ઇવ

વામ-પ્રખરા-લક્ષણોદાહરણે તૂક્તે; અસ્યા યૂથો યથા (શ્રી-કૃષ્ણ-ગણોદ્દેશે 1.249)-
કાવેરી ચારુકવરી સુકેશી મઞ્જુકેશિકા ।
હારહિરા હારકણ્ઠી હારવલ્લી મનોહરા

અસ્યા મન્ત્રોદ્ધારો યથા રુદ્ર-યામલે--
દ્વે વાગ્-ભવે રમા ઙે ઽન્તા સુદેવી દહન-પ્રિયા ।
ઉક્તઃ સુદેવ્યા મન્ત્રો ઽયમ્ અષ્ટાર્ણઃ પ્રેમ-ભક્તિ-દઃ

મન્ત્રો યથા--ઐં સૌં શ્રીં સુદેવ્યૈ સ્વાહા ।
અસ્યા ધ્યાનં યથા તત્રૈવ--
અમ્ભોજ-કેશર-સમાન-રુચિં સુશીલાં
રક્તામ્બરાં રુચિર-હાસ-વિરાજિ-વક્ત્રામ્ ।
શ્રી-નન્દનન્દન-પુરો જલ-સેવનાઢ્યાં
સદ્-ભૂષણાવલિ-યુતાં ચ ભજે સુદેવીમ્

કુઞ્જો ઽસ્તિ રૂપોલ્લાસાખ્યો લલિતા-કુઞ્જકોત્તરે ।
સદા તિષ્ઠતિ તત્રૈવ સુશોભા રૂપ-મઞ્જરી

પ્રિય-નર્મ-સખી-મુખ્યા સુન્દરી રૂપ-મઞ્જરી ।
ગોરોચના-સમાઙ્ગ-શ્રીઃ કેકિ-પત્રાંશુક-પ્રિયા

સાર્ધ-ત્રિદશ-વર્ષાસૌ (13-6) વામ-મધ્યાત્વમ્ આશ્રિતા ।
રઙ્ગણ-માલિકા ચેતિ પ્રવદન્તિ મનીષિણઃ

ઇયં લવઙ્ગ-મઞ્જર્યા એકેનાહ્ના કનીયસી ।
કલૌ ગૌર-રસે રૂપ-ગોસ્વામિત્વં સમાગતા

અસ્યા મન્ત્રોદ્ધારો યથા કિશોરી-તન્ત્રે--
શ્રી-બીજેન સમાયુક્તા ઙે ઽન્તા વૈ રૂપ-મઞ્જરી ।
અયમ્ અષ્ટાક્ષરો રૂપ-મઞ્જર્યા મન્ત્ર ઈરિતઃ

મન્ત્રો યથા--શ્રીં રૂપ-મઞ્જર્યૈ સ્વાહા ।
અસ્યા ધ્યાનં યથા તત્રૈવ--
ગોરોચના-નિન્દિ-નિજાઙ્ગ-કાન્તિં
માયૂર-પિઞ્છાભ-સુચીન-વસ્ત્રામ્ ।
શ્રી-રાધિકા-પાદ-સરોજ-દાસીં
રૂપાખ્યકાં મઞ્જરિકાં ભજે ઽહમ્

રત્યમ્બુજાખ્યઃ કુઞ્જો ઽસ્તિ ઇન્દુલેખા-કુઞ્જ-દક્ષિણે ।
તત્રૈવ તિષ્ઠતિ સદા સુરૂપા રતિ-મઞ્જરી