ગૌરગઓવિન્દાર્ચનસ્મરણપદ્ધતિ · શ્લોક 201-220

પ્રત્યેકં પ્રખરા મધ્યા મૃદ્વી ચેતિ પુનસ્ ત્રિધા

પ્રગલ્ભ-વાક્યા પ્રખરા ખ્યાતા દુર્લઙ્ઘ્ય-ભાષિતા ।
તદ્ ઊનત્વે ભવેન્ મૃદ્વી મધ્યા તત્-સામ્યમ્ આગતા

તત્ર લઘુ-પ્રખરા (ઉન્ 8.31) --
સા લઘુ-પ્રખરા દ્વેધા ભવેદ્ વામાથ દક્ષિણા

તત્ર વામા (ઉન્ 8.32)--
માન-ગ્રહે સદોદ્યુક્તા તચ્ છૈથિલ્યે ચ કોપના ।
અભેદ્યા નાયકે પ્રાયઃ ક્રૂરા વામેતિ કીર્ત્યતે

(ઉન્ 8.37)--
યૂથે ઽત્ર વામ-પ્રખરા લલિતાદ્યાઃ પ્રકીર્તિતાઃ

વામ-પ્રખરોદાહરણં, યથા (ઉન્ 8.36)--
અમૂર્ વ્રજ-મૃગેક્ષણાશ્ ચતુર્-અશીતિ-લક્ષાધિકાઃ
પ્રતિસ્વમ્ ઇતિ કીર્તિતં સવયસા તવૈવામુના ।
ઇહાપિ ભુવિ વિશ્રુતા પ્રિય-સખી મહાર્ઘ્યેત્ય્ અસૌ
કથં તદ્ અપિ સાહસી શઠ! જિઘૃક્ષુર્ એનામ્ અસિ

અસ્યા યૂથો, યથા (શ્રી-કૃષ્ણ-ગણોદ્દેશ-દીપિકા 1.242)--
રત્નરેખા (-પ્રભા) રતિ-કલા સુભદ્રા ચન્દ્ર (ભદ્ર-) રેખિકા ।
સુમુખી ચ ધનિષ્ઠા ચ કલહંસી કલાપિની

અસ્યા મન્ત્રોદ્ધારો, યથા સમ્મોહન-તન્ત્રે--
લક્ષ્મી લીલા ચ લલિતા ઙે તતો વહ્નિ-નાયિકા ।
એષો ઽષ્ટાર્ણો મહા-મન્ત્રો લલિતાયાસ્ તુ રાગ-દઃ

મન્ત્રો યથા--શ્રીં લાં લલિતાયૈ સ્વાહા ।
અસ્યા ધ્યાનં, યથા તત્રૈવ--
ગોરોચના-દ્યુતિ-વિડમ્બિ-તનૂં સુવેશીં
મયૂર-પિઞ્છ-વસનાં શુભ-ભૂષણાઢ્યામ્ ।
તામ્બૂલ-સેવન-રતાં વ્રજ-રાજ-સૂનોઃ
શ્રી-રાધિકા-પ્રિય-સખીં લલિતાં સ્મરામિ

ઈશાન-દલ આનન્દ-નામકં કુઞ્જમ્ અસ્તિ હિ ।
મેઘ-વર્ણં શ્રી-વિશાખા યત્રાસ્તે કૃષ્ણ-વલ્લભા

સ્વાધીન-ભર્તૃકા-ભાવમ્ આપન્ના હિ હરૌ સદા ।
વસ્ત્રાલઙ્કાર-સેવાઢ્યા ગૌરાઙ્ગી તારકામ્બરા

પક્ષાહર્-યુગ્-યુગ્મ-માસ-સંયુક્ત-મનુ-હાયના (14-2-15) ।
અસ્યા વયઃ પિતા માતા પાવનો દક્ષિણા ક્રમાત્

પતિર્ યસ્યા બાહુકાખ્યો ઽપ્ય્ અસૌ ગૌર-રસે પુનઃ ।
રાય-રામાનન્દતયા વિખ્યાતાભૂત્ કલૌ યુગે

ઇયં ત્વ્ અધિક-મધ્યા હિ ગૃહમ્ અસ્યાસ્ તુ યાવટે

સ્વાધીન-ભર્તૃકા-લક્ષણમ્ (ઉન્ 5.91)--
સ્વાયત્તાસન્ન-દયિતા ભવેત્ સ્વાધીન-ભર્તૃકા ।
સલિલારણ્ય-વિક્રીડા-કુસુમાવચયાદિ-કૃત્

ઉદાહરણં યથા (ઉન્ 5.92)--
મુદા કુર્વન્ પત્રાઙ્કુરમ્ અનુપમં પીન-કુચયોઃ
શ્રુતિ-દ્વન્દ્વે ગન્ધાહૃત-મધુપમ્ ઇન્દીવર-યુગ્મમ્ ।
સખેલં ધમ્મિલ્લોપરિ ચ કમલં કોમલમ્ અસૌ
નિરાવાધાં રાધાં રમયતિ ચિરં કેશિ-દમનઃ

(ઉન્ 8.19)--
અત્ર યૂથે વિશાખાદ્યા ભવન્ત્ય્ અધિક-મધ્યમાઃ

અધિક-મધ્યોદાહરણં યથા (ઉન્ 8.17)--
દામાર્પ્યતાં પ્રિય-સખી-પ્રહિતાં ત્વયૈવ
દામોદરે કુસુમમ્ અત્ર મયાવચેયમ્ ।
નાહં ભ્રમાચ્ ચતુરિકે સખિ સૂચનીયા
કૃષ્ણઃ કદર્થયતિ મામ્ અધિકં યદ્ એષઃ

અસ્યા યૂથો યથા (કૃષ્ણ-ગણોદ્દેશ-દીપિકા 1.243)--
માલતી માધવી ચન્દ્ર-રેખા ચાપિ શુભાનના ।
કુઞ્જરી હરિણી ચૈવ સુરભિશ્ ચપલાપિ ચ

અસ્યા મન્ત્રોદ્ધારો, યથા બૃહદ્-ગૌતમીયે--
વાગ્-ભવઃ સૌં તતો ઙે ઽન્તા વિશાખા વહ્નિ-જાયિકા ।
અષ્ટાક્ષરો વિશાખાયા મન્ત્રો ઽયં પ્રેમ-વૃદ્ધિ-દઃ