ગૌરગઓવિન્દાર્ચનસ્મરણપદ્ધતિ · શ્લોક 181-200

શ્રી-રાધા-મન્ત્રોદ્ધારો યથા ગૌરી-તન્ત્રે--
શ્રી-નાદ-બિન્દુ-સંયુક્તા તથાગ્નિર્ મુખ-વૃત્ત-યુક્ ।
ચતુર્થી વહ્નિ-જાયાન્તા રાધિકાષ્ટાક્ષરો મનુઃ

મન્ત્રો યથા -શ્રીં રાં રાધિકાયૈ સ્વાહા ।
ગાયત્રી યથા -શ્રી-રાધિકાયૈ વિદ્મહે, પ્રેમ-રૂપાયૈ ધીમહિ, તન્ નો રાધા પ્રચોદયાત્ ।
અસ્યા ધ્યાનં યથા તત્રૈવ--
સ્મેરાં શ્રી-કુઙ્કુમાભાં સ્ફુરદ્-અરુણ-પટ-પ્રાન્ત-ક્ પ્તાવગુણ્ઠાં
રમ્યાં વેશેન વેણી-કૃત-ચિકુર-શિખાલમ્બિ-પદ્માં કિશોરીમ્ ।
તર્જ્જન્ય્-અઙ્ગુષ્ઠ-યુક્ત્યા હરિ-મુખ-કમલે યુઞ્જતીં નાગવલ્લી-*
પર્ણં કર્ણાયતાક્ષીં ત્રિ-જગતિ મધુરાં રાધિકામ્ અર્ચયામિ

તપ્ત-હેમ-પ્રભાં નીલ-કુન્તલ-બદ્ધ-મલ્લિકામ્ ।
શરચ્-ચન્દ્ર-મુખીં નૃત્ય-ચકોરી-ચઞ્ચલેક્ષણામ્

બિમ્બાધર-સ્મિત-જ્યોત્સ્નાં જગજ્-જીવન-દાયિકામ્ ।
ચારુ-રત્ન-સ્તનાલમ્બિ-મુક્તાદામ-વિભૂષણામ્

નિતમ્બ-નીલ-વસનાં કિઙ્કિણી-જાલ-મણ્ડિતામ્ ।
નાના-રત્નાદિ-નિર્માણ-રત્ન-નૂપુર-ધારિણીમ્

સર્વ-લાવણ્ય-મુગ્ધાઙ્ગીં સર્વાવયવ-સુન્દરીમ્ ।
કૃષ્ણ-પાર્શ્વ-સ્થિતાં નિત્યં કૃષ્ણ-પ્રેમૈક-વિગ્રહામ્ ।
આનન્દ-રસ-સમ્મગ્નાં કિશોરીમ્ આશ્રયે વને

સૌરીં રક્તામ્બરાં રમ્યાં સુનેત્રાં સુસ્મિતાનનામ્ ।
શ્યામાં શ્યામાખિલાભીષ્ટાં રાધિકામ્ આશ્રયે વને

વિના રાધા-પ્રસાદેન કૃષ્ણ-પ્રાપ્તિર્ ન જાયતે ।
તતઃ શ્રી-રાધિકા-કૃષ્ણૌ સ્મરણીયૌ સુસંયુતૌ

યથા ભવિષ્યોત્તરે--
પ્રેમ-ભક્તૌ યદિ શ્રદ્ધા મત્-પ્રસાદં યદીચ્છસિ ।
તદા નારદ ભાવેન રાધાયારાધકો ભવ

તથા ચ નારદીયે--
સત્યં સત્યં પુનઃ સત્યં સત્યમ્ એવ પુનઃ પુનઃ ।
વિના રાધા-પ્રસાદેન મત્-પ્રસાદો ન વિદ્યતે

શ્રી-રાધિકાયાઃ કારુણ્યાત્ તત્-સખી-સંગતિમ્ ઇયાત્ ।
તત્-સખીનાં ચ કૃપયા યોષિદ્-અઙ્ગમ્ અવાપ્નુયાત્

અનઙ્ગ-સુખદાખ્યો ઽસ્તિ કુઞ્જસ્ તસ્યોત્તરે દલે ।
વિજ્ઞેયો ઽયં તડિદ્-વર્ણો નાના-પુષ્પ-દ્રુમાવૃતઃ

લલિતાનન્દદો નિત્યમ્ ઉત્તરે કુઞ્જ-રાજકઃ ।
ગોરોચનાભા લલિતા તત્ર તિષ્ઠતિ નિત્યશઃ

મયૂર-પિઞ્છ-સદૃશ-વસના કૃષ્ણ-વલ્લભા ।
ખણ્ડિતા-ભાવમ્ આપન્ના રતિ-યુક્તા હરૌ સદા

ચન્દ્ર-તામ્બૂલ-સેવાઢ્યા દિવ્યાભરણ-મણ્ડિતા ।
સપ્ત-વિંશત્ય્-અહો યુક્તાષ્ટ-માસ-મનુ-હાયના (14-8-27)

અસ્યા વયઃ-પ્રમાણં યત્ પિતા માતા વિશોકકઃ ।
શારદા ચ પતિર્ યસ્યા ભૈરવાખ્યો મતો બુધૈઃ

સ્વરૂપ-દામોદરતાં પ્રાપ્તા ગૌર-રસે ત્વ્ ઇયમ્ ।
ઇયં તુ વામ-પ્રખરા ગૃહમ્ અસ્યાસ્ તુ યાવટે

ખણ્ડિતા-લક્ષણં, યથા (ઉન્ 5.85-86)--
ઉલ્લઙ્ઘ્ય સમયં યસ્યાઃ પ્રેયાન્ અન્યોપભોગવાન્ ।
ભોગ-લક્ષ્માઙ્કિતઃ પ્રાતર્ આગચ્છેત્ સા હિ ખણ્ડિતા ।
એષા તુ રોષ-નિઃશ્વાસ-તૂષ્ણીં-ભાવાદિ-ભાગ્ ભવેત્

યાવૈર્ ધૂમલિતં શિરો ભુજ-તટીં તાટઙ્ક-મુદ્રાઙ્કિતાં
સંક્રાન્ત-સ્તન-કુઙ્કુમોજ્જ્વલ-મુરો માલાં પરિમ્લાપિતામ્ ।
ઘૂર્ણા-કુડ્મલિતે દૃશૌ વ્રજ-પતેર્ દૃષ્ટ્વા પ્રગે શ્યામલા
ચિત્તે રુદ્ર-ગુણં મુખે તુ સુમુખી ભેજે મુનીનાં વ્રતમ્

વામ-પ્રખરા-લક્ષણં યથા (ઉન્ 6.2-5)--
સૌભાગ્યાદેર્ ઇહાધિક્યાદ્ અધિકા સામ્યતઃ સમા ।
લઘુત્વાલ્ લઘુર્ ઇત્ય્ ઉક્તાસ્ ત્રિધા ગોકુલ-સુભ્રુવઃ