Gauragaovindārcanasmaraṇapaddhati · Verses 181-200

śrī-rādhā-mantroddhāro yathā gaurī-tantre--
śrī-nāda-bindu-saṃyuktā tathāgnir mukha-vṛtta-yuk /
caturthī vahni-jāyāntā rādhikāṣṭākṣaro manuḥ

mantro yathā -śrīṃ rāṃ rādhikāyai svāhā /
gāyatrī yathā -śrī-rādhikāyai vidmahe, prema-rūpāyai dhīmahi, tan no rādhā pracodayāt /
asyā dhyānaṃ yathā tatraiva--
smerāṃ śrī-kuṅkumābhāṃ sphurad-aruṇa-paṭa-prānta-k ptāvaguṇṭhāṃ
ramyāṃ veśena veṇī-kṛta-cikura-śikhālambi-padmāṃ kiśorīm /
tarjjany-aṅguṣṭha-yuktyā hari-mukha-kamale yuñjatīṃ nāgavallī-*
parṇaṃ karṇāyatākṣīṃ tri-jagati madhurāṃ rādhikām arcayāmi

tapta-hema-prabhāṃ nīla-kuntala-baddha-mallikām /
śarac-candra-mukhīṃ nṛtya-cakorī-cañcalekṣaṇām

bimbādhara-smita-jyotsnāṃ jagaj-jīvana-dāyikām /
cāru-ratna-stanālambi-muktādāma-vibhūṣaṇām

nitamba-nīla-vasanāṃ kiṅkiṇī-jāla-maṇḍitām /
nānā-ratnādi-nirmāṇa-ratna-nūpura-dhāriṇīm

sarva-lāvaṇya-mugdhāṅgīṃ sarvāvayava-sundarīm /
kṛṣṇa-pārśva-sthitāṃ nityaṃ kṛṣṇa-premaika-vigrahām /
ānanda-rasa-sammagnāṃ kiśorīm āśraye vane

saurīṃ raktāmbarāṃ ramyāṃ sunetrāṃ susmitānanām /
śyāmāṃ śyāmākhilābhīṣṭāṃ rādhikām āśraye vane

vinā rādhā-prasādena kṛṣṇa-prāptir na jāyate /
tataḥ śrī-rādhikā-kṛṣṇau smaraṇīyau susaṃyutau

yathā bhaviṣyottare--
prema-bhaktau yadi śraddhā mat-prasādaṃ yadīcchasi /
tadā nārada bhāvena rādhāyārādhako bhava

tathā ca nāradīye--
satyaṃ satyaṃ punaḥ satyaṃ satyam eva punaḥ punaḥ /
vinā rādhā-prasādena mat-prasādo na vidyate

śrī-rādhikāyāḥ kāruṇyāt tat-sakhī-saṃgatim iyāt /
tat-sakhīnāṃ ca kṛpayā yoṣid-aṅgam avāpnuyāt

anaṅga-sukhadākhyo 'sti kuñjas tasyottare dale /
vijñeyo 'yaṃ taḍid-varṇo nānā-puṣpa-drumāvṛtaḥ

lalitānandado nityam uttare kuñja-rājakaḥ /
gorocanābhā lalitā tatra tiṣṭhati nityaśaḥ

mayūra-piñcha-sadṛśa-vasanā kṛṣṇa-vallabhā /
khaṇḍitā-bhāvam āpannā rati-yuktā harau sadā

candra-tāmbūla-sevāḍhyā divyābharaṇa-maṇḍitā /
sapta-viṃśaty-aho yuktāṣṭa-māsa-manu-hāyanā (14-8-27)

asyā vayaḥ-pramāṇaṃ yat pitā mātā viśokakaḥ /
śāradā ca patir yasyā bhairavākhyo mato budhaiḥ

svarūpa-dāmodaratāṃ prāptā gaura-rase tv iyam /
iyaṃ tu vāma-prakharā gṛham asyās tu yāvaṭe

khaṇḍitā-lakṣaṇaṃ, yathā (UN 5.85-86)--
ullaṅghya samayaṃ yasyāḥ preyān anyopabhogavān /
bhoga-lakṣmāṅkitaḥ prātar āgacchet sā hi khaṇḍitā /
eṣā tu roṣa-niḥśvāsa-tūṣṇīṃ-bhāvādi-bhāg bhavet

yāvair dhūmalitaṃ śiro bhuja-taṭīṃ tāṭaṅka-mudrāṅkitāṃ
saṃkrānta-stana-kuṅkumojjvala-muro mālāṃ parimlāpitām /
ghūrṇā-kuḍmalite dṛśau vraja-pater dṛṣṭvā prage śyāmalā
citte rudra-guṇaṃ mukhe tu sumukhī bheje munīnāṃ vratam

vāma-prakharā-lakṣaṇaṃ yathā (UN 6.2-5)--
saubhāgyāder ihādhikyād adhikā sāmyataḥ samā /
laghutvāl laghur ity uktās tridhā gokula-subhruvaḥ