ગૌરગઓવિન્દાર્ચનસ્મરણપદ્ધતિ · શ્લોક 101-120

ચામર-વ્યજનાદીનાં સર્વાજ્ઞા-પ્રતિપાલનમ્ ।
ઇતિ સેવા પરિજ્ઞેયા યથા-મતિ વિભાગશઃ

શ્રી-રાધા-કૃષ્ણયોર્ યદ્વદ્ રૂપ-મઞ્જરિકાદયઃ ।
પ્રાપ્ત નિત્ય-સખીત્વં ચ તથા સ્યામ્ ઇતિ ભાવયેત્

પાલ્ય-દાસી ચ સા પ્રોક્તા પરિપાલ્યા પ્રિયંવદા ।
સ્વ-મનો-વૃત્તિ-રૂપેણ યા નિત્ય-પરિચારિકા

નિવાસો વ્રજ-મધ્યે તુ રાધા-કૃષ્ણ-સ્થલી મતા ।
વંશી-વટશ્ ચ શ્રી-નન્દી-શ્વરશ્ ચાપ્ય્ અતિકૌતુકઃ

અનઙ્ગ-મઞ્જરી પ્રોક્તા વિલાસ-મઞ્જરી તથા ।
અશોક-મઞ્જરી ચેતિ રસ-મઞ્જરિકા તથા

રસાલ-મઞ્જરી નામ્ના તથા કમલ-મઞ્જરી ।
કરુણા-મઞ્જરી ખ્યાતા વિખ્યાતા ગુણ-મઞ્જરી

એવં સર્વાશ્ ચ વિખ્યાતાઃ સ્વ-સ્વ-નામાક્ષરૈઃ પરાઃ ।
મઞ્જર્યો બહુશઃ રૂપ-ગુણ-શીલ-વયો ઽન્વિતાઃ

નામ-રૂપાદિ તત્ સર્વં ગુરુ-દત્તં ચ ભાવયેત્ ।
તત્ર તત્ર સ્થિતા નિત્યં ભજેત્ શ્રી-રાધિકા-હરી

ભાવયન્ સાધકો નિત્યં સ્થિત્વા કૃષ્ણ-પ્રિયા-ગૃહે ।
તદ્ આજ્ઞા-પાલકો ભૂત્વા કાલેષ્વ્ અષ્ટસુ સેવતે

સખીનાં સઙ્ગિની-રૂપામ્ આત્માનં ભાવના-મયીમ્ ।
આજ્ઞા-સેવા-પરાકાષ્ઠા-કૃપાલઙ્કાર-ભૂષિતામ્ ।
તતશ્ ચ મઞ્જરી-રૂપાન્ ગુર્વાદીન્ અપિ સંસ્મરેત્

અથ પ્રાતઃ-પૂર્વાહ્ન-લીલાં સ્મૃત્વા મધ્યાહ્ને સઙ્ગ-મિતૌ રાધા-કૃષ્ણૌ પરસ્પર-સઙ્ગ-જનિત-નાના-સાત્ત્વિક-વિકાર-ભૂષિતૌ લલિતાદિ-પ્રિય-સખી-વૃન્દ-સનર્મ-વાગ્-વિલાસેન જનિત-પરમાનન્દૌ નાના-રસ-વિલાસ-ચિહ્નૌ સમ્મગ્ન-માનસૌ વિહિતારણ્ય-લીલૌ વૃન્દારણ્યે સુમહીરુહ-મૂલે યોગ-પીઠોપરિ ઉપવિષ્ટૌ એવમ્ભૂતૌ રાધા-કૃષ્ણૌ સંસ્મરેત્ ।
પ્રથમં ષડ્-દલં પદ્મં તદ્-બહિર્ વસુ-પત્રકમ્ ।
તદ્-બહિર્ દશ-પત્રં ચ દશોપદલ-સંયુતમ્

શ્રીમદ્-રાધા-કૃષ્ણ-લીલા-રસ-પૂરિત-વિગ્રહમ્ ।
તત્-તદ્-ઇચ્છા-વશેનૈવોન્-મીલિતં ભાતિ મુદ્રિતમ્

પ્રાકારાસ્ તદ્-બહિસ્ તત્ર દિક્ષુ દ્વાર-ચતુષ્ટયમ્ ।
ચતુષ્-કોણાશ્ ચ ષડ્-દલ્યાં ષટ્-પદ્ય્-અષ્ટાદશાક્ષરી

યથા બ્રહ્મ-સંહિતાયામ્ (2-4)
સહસ્ર-પત્રં કમલં ગોકુલાખ્યં મહત્ પદમ્ ।
તત્-કર્ણિકારં તદ્-ધામ તદ્-અનન્તાંશ-સમ્ભવમ્

કર્ણિકારં મહદ્ યન્ત્રં ષટ્-કોશં વજ્ર-કીલકમ્ ।
ષડ્-અઙ્ગં ષટ્-પદી-સ્થાનં પ્રકૃત્યા પુરુષેણ ચ

પ્રેમાનન્દ-મહાનન્દ-રસેનાવસ્થિતં હિ યત્ ।
જ્યોતી-રૂપેણ મનુના કામ-બીજેન સઙ્ગતમ્

તત્-કિઞ્જલ્કં તદ્-અંશાનામ્ તત્-પત્રાણિ શ્રિયામ્ અપિ

એવમ્ભૂત યોગ-પીઠે શ્રી-શ્રી-રાધા-કૃષ્ણૌ સ્મરેત્ ।
અથ શ્રી-કૃષ્ણ-ચન્દ્રસ્ય વયો-વેશાદયો ઽખિલાઃ ।
રસ-શાસ્ત્રાનુસારેણ નિરૂપ્યન્તે યથામતિ

(ભક્તિ-રસામૃત-સિન્ધુ 2.1.308, 9)--
વયઃ કૌમાર-પૌગણ્ડ-કૈશોરમ્ ઇતિ તત્ ત્રિધા

કૌમારં પઞ્ચમાબ્દાન્તં પૌગણ્ડં દશમાવધિ ।
આષોડશાચ્ ચ કૈશોરં યૌવનં સ્યાત્ તતઃ પરમ્