Gauragaovindārcanasmaraṇapaddhati · Verses 101-120

cāmara-vyajanādīnāṃ sarvājñā-pratipālanam /
iti sevā parijñeyā yathā-mati vibhāgaśaḥ

śrī-rādhā-kṛṣṇayor yadvad rūpa-mañjarikādayaḥ /
prāpta nitya-sakhītvaṃ ca tathā syām iti bhāvayet

pālya-dāsī ca sā proktā paripālyā priyaṃvadā /
sva-mano-vṛtti-rūpeṇa yā nitya-paricārikā

nivāso vraja-madhye tu rādhā-kṛṣṇa-sthalī matā /
vaṃśī-vaṭaś ca śrī-nandī-śvaraś cāpy atikautukaḥ

anaṅga-mañjarī proktā vilāsa-mañjarī tathā /
aśoka-mañjarī ceti rasa-mañjarikā tathā

rasāla-mañjarī nāmnā tathā kamala-mañjarī /
karuṇā-mañjarī khyātā vikhyātā guṇa-mañjarī

evaṃ sarvāś ca vikhyātāḥ sva-sva-nāmākṣaraiḥ parāḥ /
mañjaryo bahuśaḥ rūpa-guṇa-śīla-vayo 'nvitāḥ

nāma-rūpādi tat sarvaṃ guru-dattaṃ ca bhāvayet /
tatra tatra sthitā nityaṃ bhajet śrī-rādhikā-harī

bhāvayan sādhako nityaṃ sthitvā kṛṣṇa-priyā-gṛhe /
tad ājñā-pālako bhūtvā kāleṣv aṣṭasu sevate

sakhīnāṃ saṅginī-rūpām ātmānaṃ bhāvanā-mayīm /
ājñā-sevā-parākāṣṭhā-kṛpālaṅkāra-bhūṣitām /
tataś ca mañjarī-rūpān gurvādīn api saṃsmaret

atha prātaḥ-pūrvāhna-līlāṃ smṛtvā madhyāhne saṅga-mitau rādhā-kṛṣṇau paraspara-saṅga-janita-nānā-sāttvika-vikāra-bhūṣitau lalitādi-priya-sakhī-vṛnda-sanarma-vāg-vilāsena janita-paramānandau nānā-rasa-vilāsa-cihnau sammagna-mānasau vihitāraṇya-līlau vṛndāraṇye sumahīruha-mūle yoga-pīṭhopari upaviṣṭau evambhūtau rādhā-kṛṣṇau saṃsmaret /
prathamaṃ ṣaḍ-dalaṃ padmaṃ tad-bahir vasu-patrakam /
tad-bahir daśa-patraṃ ca daśopadala-saṃyutam

śrīmad-rādhā-kṛṣṇa-līlā-rasa-pūrita-vigraham /
tat-tad-icchā-vaśenaivon-mīlitaṃ bhāti mudritam

prākārās tad-bahis tatra dikṣu dvāra-catuṣṭayam /
catuṣ-koṇāś ca ṣaḍ-dalyāṃ ṣaṭ-pady-aṣṭādaśākṣarī

yathā brahma-saṃhitāyām (2-4)
sahasra-patraṃ kamalaṃ gokulākhyaṃ mahat padam /
tat-karṇikāraṃ tad-dhāma tad-anantāṃśa-sambhavam

karṇikāraṃ mahad yantraṃ ṣaṭ-kośaṃ vajra-kīlakam /
ṣaḍ-aṅgaṃ ṣaṭ-padī-sthānaṃ prakṛtyā puruṣeṇa ca

premānanda-mahānanda-rasenāvasthitaṃ hi yat /
jyotī-rūpeṇa manunā kāma-bījena saṅgatam

tat-kiñjalkaṃ tad-aṃśānām tat-patrāṇi śriyām api

evambhūta yoga-pīṭhe śrī-śrī-rādhā-kṛṣṇau smaret /
atha śrī-kṛṣṇa-candrasya vayo-veśādayo 'khilāḥ /
rasa-śāstrānusāreṇa nirūpyante yathāmati

(bhakti-rasāmṛta-sindhu 2.1.308, 9)--
vayaḥ kaumāra-paugaṇḍa-kaiśoram iti tat tridhā

kaumāraṃ pañcamābdāntaṃ paugaṇḍaṃ daśamāvadhi /
āṣoḍaśāc ca kaiśoraṃ yauvanaṃ syāt tataḥ param