ગૌરગઓવિન્દાર્ચનસ્મરણપદ્ધતિ · શ્લોક 121-140

આદ્ય-મધ્યાન્ત-ભેદેન કૌમારાદીનિ ચ ત્રિધા ।
અષ્ટ-માસાધિકં વર્ષં ભાગત્વેન ચ કીર્તિતમ્

તદ્ યથા--આદ્ય-કૌમારમ્ અષ્ટ-માસાધિકમ્ એક-વર્ષમ્ એવં મધ્ય-કૌમારમ્, એવં ચ શેષ-કૌમારમ્; એવં પઞ્ચમ-વર્ષ-પર્યન્તં કૌમારં જ્ઞેયમ્ ।
આદ્ય-પૌગણ્ડમ્ અષ્ટ-માસાધિકમ્ એક-વર્ષમ્; એવં મધ્ય-પૌગણ્ડમ્; એવં ચ શેષ-પૌગણ્ડમ્; એવં ચ ક્રમેણ ષષ્ઠ-વર્ષમ્ આરભ્ય દશ-વર્ષ-પર્યન્તં પૌગણ્ડં જ્ઞેયમ્ ।
આદ્ય-કૈશોરં સાર્ધ-દિન-દ્વયોત્તરૈકાદશ-માસાધિકમ્ એક-વર્ષમ્; એવં મધ્ય-કૈશોરમ્; એવં શેષ-કૈશોરમ્; ક્રમેણૈકાદશ-વર્ષમ્ આરભ્ય પઞ્ચ-દશ-વર્ષ-નવ-માસ-સાર્ધ-સપ્ત-દિન-પર્યન્તં કૈશોરં જ્ઞેયમ્ ।
અથ શ્રી-કૃષ્ણસ્ય વ્રજ-લીલા--તત્ર શ્રી-કૃષ્ણસ્ય વ્રજ-લીલા પઞ્ચ-દિનોત્તર-ષડ્-માસાધિક-દશ-વર્ષીયા જ્ઞેયા (10-6-5) અથ ચ (ભ્પ્ 3.2.26)--
એકાદશ-સમાસ્ તત્ર ગૂઢાર્ચિઃ સબલો ઽવસત્

મહારાજ-કુમારતયા ભોગાતિશયેન સમૃદ્ધ્યા વર્ષ-માસ-દિનાનાં સાર્ધતયા સાર્ધ-સપ્ત-દિનોત્તર-નવ-માસાધિક-પઞ્ચ-દશ-વર્ષ-પરિમિતં શ્રી-કૃષ્ણસ્ય વયો જ્ઞેયમ્ (15-9-7 1।2) ।
અત્રૈવ શેષ-કૈશોરે ષોડશ-હાયને સદા ।
વ્રજે વિહારં કુરુતે શ્રીમન્ નન્દસ્ય નન્દનઃ

વંશી-પાણિઃ પીત-વાસા ઇન્દ્રનીલ-મણિ-દ્યુતિઃ ।
કણ્ઠે કૌસ્તુભ-શોભાઢ્યો મયૂર-દલ-ભૂષણઃ

ગુઞ્જા-હાર-લસદ્-વક્ષા રત્ન-હાર-વિરાજિતઃ ।
વન-માલા-ધરો નિષ્ક શોભોલ્લસિત-કણ્ઠકઃ

વામ-ભાગ-સ્થિત-સ્વર્ણ-રેખા-રાજદ્-ઉરઃ-સ્થલઃ ।
વૈજયન્તી-લસદ્-વક્ષા ગજ-મૌક્તિક-નાસિકઃ

કર્ણયોર્ મકરાકાર-કુણ્ડલાભ્યાં વિરાજિતઃ ।
રત્ન-કઙ્કન-યુગ્ ઘસ્તઃ કૌઙ્કુમં તિલકં દધત્

કિઙ્કિણી-યુક્ત-કટિકો રત્ન-નૂપુર-યુક્-પદઃ ।
માલતી-મલ્લિકે જાતિ-યૂથી કેતકી-ચમ્પકે

નાગકેશર ઇત્યાદિ પુષ્પ-માલા-સ્વલઙ્કૃતઃ ।
ઇતિ વેશ-ધરઃ શ્રીમાન્ ધ્યેયઃ શ્રી-નન્દનન્દનઃ

શૃઙ્ગં વામોદર-પરિસરે તુન્દ-બન્ધાન્તર-સ્થં
દક્ષે તદ્વન્ નિહિત-મુરલીં રત્ન-ચિત્રાં દધાનઃ ।
વામેનાસૌ સરલ-લગુણં પાણિના પીત-વર્ણં
લીલામ્ભોજં કમલ-નયનઃ કમ્પયન્ દક્ષિણેન

અસ્યૈવ કૃષ્ણ-ચન્દ્રસ્ય મન્ત્રાઃ સન્તિ ત્રયો ઽમલાઃ ।
સિદ્ધાઃ કૃષ્ણસ્ય સત્-પ્રેમ-ભક્તિ-સિદ્ધિ-કરા મતાઃ

તત્રાદૌ મન્ત્રોદ્ધારો યથા સનત્-કુમાર-સંહિતાયામ્--
હરે-કૃષ્ણૌ દ્વિર્ આવૃત્તૌ
કૃષ્ણ તાદૃક્ તથા હરે ।
હરે રામ તથા રામ
તથા તાદૃગ્ ઘરે મનુઃ

હરે કૃષ્ણ હરે કૃષ્ણ કૃષ્ણ કૃષ્ણ હરે હરે ।
હરે રામ હરે રામ રામ રામ હરે હરે

અસ્ય ધ્યાનં યથા તત્રૈવ--
ધ્યાયેદ્ વૃન્દાવને રમ્યે
ગોપ-ગોભિર્ અલઙ્કૃતે ।
કદમ્બ-પાદપ-ચ્છાયે
યમુના-જલ-શીતલે

રાધયા સહિતં કૃષ્ણં
વંશી-વાદન-તત્-પરમ્ ।
ત્રિભઙ્ગ-લલિતં દેવં
ભક્તાનુગ્રહ-કારકમ્

વિશેષતો દશાર્ણો ઽયં
જપ-માત્રેણ સિદ્ધિ-દઃ ।
પઞ્ચાઙ્ગાન્ય્ અસ્ય મન્ત્રસ્ય
વિજ્ઞેયાનિ મનીષિભિઃ

ઇતિ ગૌતમીય-તન્ત્ર-વાક્યાત્ રાગ-માર્ગે દશાક્ષર-ગોપાલ-મન્ત્રસ્ય પ્રસિદ્ધિઃ; તદ્-ઉદ્ધારો લિખ્યતે, સ યથા ગૌતમીય-તન્ત્રે--
ખાન્તાક્ષરં સમુદ્ધૃત્ય
ત્રયોદશ-સ્વરાન્વિતમ્ ।
પાર્ણં તુર્ય-સ્વર-યુતં
છાન્તં ધાન્તં તથા દ્વયમ્

અમૃતાર્ણં માંસ-યુગ્મં
મુખ-વૃત્તેન સંયુતમ્ ।
ભાર્શં તુ મુખ-વૃત્તાઢ્યં
પવનાર્ણં તથૈવ ચ

બીજ-શક્તિ-સમાયુક્તો
મન્ત્રો ઽયં સમુદાહૃતઃ ।
ગુપ્ત-બીજ-સ્વભાવત્વાદ્
દશાર્ણઃ ખલુ કથ્યતે

બ્રહ્માર્ણં તુર્ય-સંયુક્તં
માંસ-દ્વય-સમન્વિતમ્ ।
નાદ-બિન્દુ-સમાયુક્તં
જગદ્-બીજમ્ ઉદાહૃતમ્