ગર્ગસંહિતા · અધ્યાય 6.5

શ્રીનારદ ઉવાચ ॥
ધ્યાયંતી કૃષ્ણ પાદાબ્જં ભૈષ્મી કમલલોચના ॥
મોઘં વા મનુતે વાહ મેઘશ્યામમચિંતયત્

રુક્મિણ્યુવાચ ॥
અહોત્રિયામાંતરિતો વિવાહો મમૈવ નાગચ્છતિ કૃષ્ણચન્દ્રઃ ॥
ન વેદ્મિ કિં કારણમત્ર ધાતર્નાવર્તતેઽદ્યાપિ ચ ભૂમિદેવઃ

યદૂત્તમો દેવવરો મમૈષ દૃષ્ટ્વા હિ કિંચિત્કલુષં વિધાતઃ ॥
કૃતોદ્યમો નૂનમતીવ હસ્તગ્રાહેણ ચાગચ્છતિ કિં કરોમિ

હા દુર્ભગાયાશ્ચન મે વિધાતા ન સાનુકૂલઃ કિલ ચન્દ્રમૌલિઃ॥
ન ચૈકદંતો વિમુખા ચ ગૌરી ગાવો હિ વિપ્રાશ્ચ ન સાનુકૂલાઃ

શ્રીનારદ ઉવાચ ॥
એવં વિચિંતયંતી સા ભૈષ્મી ગેહાટ્ટભૂમિષુ ॥
પરિભ્રંમતી શ્રીકૃષ્ણં પશ્યંતી ગૃહશેખરાત્

તદૈવ તસ્યા વામાંગમસ્ફુરત્પ્રતિભાષણમ્ ॥
તેન પ્રસન્ના શ્રીભૈષ્મી કાલજ્ઞા સર્વમંગલા

કૃષ્ણપ્રણોદિતો વિપ્રઃ સદ્યશ્ચાગતવાંસ્તદા।
શ્રીકૃષ્ણાગમનં તસ્યૈ શનૈઃ સર્વં શશંસ હ

તતઃ પ્રસન્ના શ્રીભૈષ્મી તદંઘ્ર્યોઃ પ્રણિપત્ય સા ॥
પ્રાહ ત્વદ્વંશતો વિપ્ર ન યાસ્યામિ વચોમમ

શ્રુત્વાગતૌ રામકૃષ્ણૌ વિવાહપ્રેક્ષણોત્સુકૌ ॥
ભીષ્મકો નિર્ગતો નેતું બ્રાહ્મણૈસ્તત્પ્રભાવિત્

ભૃશં મંગલપાત્રેષુ ગંધાક્ષતયુતેષુ ચ ॥
વાસોરત્નચયં ધૃત્વા ગીતવાદિત્ર મંગલૈઃ

કોટિશો મધુપર્કાણાં કુમ્ભવ્યૂહાન્વિધાય ચ ॥
પૂજયિત્વાથ વિધિવદ્રામકૃષ્ણૌ પરેશ્વરૌ

અહો ચાસ્મૈ ન દત્તેયમિતિ ખિન્નમનાઃ પરમ્ ॥
આનંદનવને સ્થાપ્ય નત્વા સ્વગૃહમાયયૌ

શ્રુત્વાગતં શ્રીવસુદેવનંદનં ત્રૈલોક્યલાવણ્યનિધિં પરેશ્વરમ્ ॥
આગત્યનેત્રાંજલિભિઃ પુરૌકસઃ પપુઃ પરંતન્મુખપંકજામૃતમ્

અસ્યૈવ ભાર્યા ભવિતું હિ રુક્મિણી યોગ્યાસ્તિ નાન્યેત્ય વદન્પુરૌકસઃ ॥
દત્ત્વા સ્વપુણ્યાનિ વિવાહહેતવે શ્રી- કૃષ્ણલાવણ્યકલાનિબંધકાઃ

કદાપિ સાક્ષાચ્છ્વશુરસ્ય મંદિરં સંપ્રાગતં ચૈવમહો વયં જનાઃ ॥
દ્રક્ષ્યામ આરાત્કૃતકૃત્યતાં તદા વ્રજેમ લોકે બહુજીવિતેન કિમ

વદત્સુ લોકેષુ ચ ભીષ્મકન્યકાદ્રિકન્યકાપૂજનહેતવે નૃપ ॥
અંતઃપુરાત્સર્વસખીસમન્વિતા વિનિર્યયૌ કૃષ્ણગૃહીતમાનસા

ભેરીમૃદંગૈર્બહુદુંદુભિસ્વનૈઃ સુગાયકૈર્બંદિજનૈશ્ચ માગધૈઃ ।
વારાંગનાનૃત્યમનોજ્ઞભાવૈર્જયેત્યભૂન્મંગલશબ્દૌચ્ચકૈઃ

કોટીંદુબિંબદ્યુતિમાદધાનાં બાલાર્કતાટંકધરાં શ્રિયં તામ્॥
સીતાતપત્રવ્યજનૈઃ સ્ફુરદ્ભિઃ સુચામરૈઃ પાર્શ્વગણઃ સિષેવે

કોશાદ્વિનિષ્કૃષ્ય સિતાસિલક્ષં પદાતયો વીરજના ઇતસ્તતઃ ॥
તથાશ્વગોભી રથિનો ગજસ્થિતાઃ સમુદ્યતાસ્ત્રા જુગુપુર્વિદૂરતઃ ॥ ૧૯ ।
દેવીમઠં પ્રાપ્ય સુચત્વરે સ્થિતા શાંતા શુચિર્ધૌતકરાંઘ્રિપંકજા॥
ગત્વા સમીપં યતવાક્કૃતાંજલિર્ભેજે ભવાનીં ભવભીતિ હારિણીમ્

દુર્ગે સ્વસંતાનયુતે શિવે શુભે નમામિ તુભ્યં સતતં ભવાનિ તે ॥
ભૂયાત્પતિર્મે ભગવાન્પરેશ્વરઃ શ્રીકૃષ્ણચન્દ્રઃ પ્રકૃતેઃ પરઃ સ્વયમ્

એવં શુભે મા વદ કૃષ્ણનામ ચૈદ્યં સમુદ્દિશ્ય વરં ગૃહાણ ॥
ઇત્થં વદંતીષુ સખીષુ ભૈષ્મી ભૂયો ભવાની ભવને જગાદ

અજાનતીયં તવ ચાંબબાલા તથા વદંતીષુ સખીષુ ભૈષ્મી ॥
ગંધાક્ષતૈર્ધૂપવિભૂષણાદ્યૈઃ સ્રઙ્માલ્ય- દીપાવલિભોગવસ્ત્રૈઃ

અપૂપતાંબૂલફલેક્ષુભિશ્ચ ભેજે ભવાનીં પરયા ચ ભક્ત્યા ॥
નત્વાથ તાં વા બહુભૂષણાદ્યૈઃ સંપૂજ્ય સૌભાગ્યવતીર્નનામ

સર્વાઃ સ્ત્રિયસ્તાઃ પ્રદદુર્વરાણિ સુમંગલાશીર્વચનાનિ તસ્યૈ ॥
રૂપં સદા તે શતરૂપયાસમં શીલં સદા શૈલસુતાસમં પ્રભો

શુશ્રૂષણં ભર્ત્તુરરુંધતીસમં ક્ષમા હિ ભૂયાજ્જનકાત્મજાસમા ॥
સૌભાગ્યમેવં તવ દક્ષિણાસમં સુવૈભવં ભીષ્મસુતે શચીસમમ્ ॥
સરસ્વતી તે ચ સરસ્વતીસમા ભક્તિઃ પતૌ સ્યાચ્ચ સતાં હરૌ યથા

ઇતિ શ્રીમદ્ગર્ગસંહિતાયાં શ્રીદ્વારકાખણ્ડે નારદબહુલાશ્વસંવાદે રુક્મિણીનિર્ગમનંનામ પંચમોઽધ્યાયઃ