ગર્ગસંહિતા · અધ્યાય 6.3

શ્રીનારદ ઉવાચ ॥
ઇત્થં મયા તે કથિતં દ્વારકાવાસકારણમ્ ॥
વિવાહાદિકથાઃ સર્વા વદિષ્યામિ પરેશયોઃ

પૂર્વં શ્રીબલદેવસ્ય વિવાહં શૃણુ મૈથિલ ॥
સર્વપાપહરં પુણ્યમાયુર્વર્દ્ધનમુત્તમમ્

આનર્ત્તો નામ રાજાભૂત્સૂર્યવંશે મહામનાઃ॥
યન્નામ્નાનર્તદેશઃ સ્યાત્સમુદ્રે ભીમનાદિનિ

રૈવતોનામ તત્પુત્રશ્ચક્રવર્તી ગુણાકરઃ॥
રાજ્યં ચકાર સ પુરીં વિનિર્માય કુશસ્થલીમ્

તસ્ય પુત્રશતં ચાસીદ્રેવતી નામ કન્યકા॥
સર્વોત્તમં ચિરંજીવં સુન્દરં વરમિચ્છતી

એકદા રથમાસ્થાય હેમરત્નવિભૂષિતમ્ ॥
આરોપ્ય સ્વાં દુહિતરં રૈવતઃ પર્યટન્ભુવમ્

પ્રાપ્તો યોગબલેનાપિ બ્રહ્મલોકં શુભાવહમ્ ॥
કન્યાવરં પરિપ્રષ્ટું બ્રહ્માણં પ્રણનામ હ

ગાયંત્યાં પૂર્વચિત્ત્યાં ચ સ્થિતો લબ્ધક્ષણઃ ક્ષણમ્ ॥
એકચિત્તં વિધિં જ્ઞાત્વા સ્વાભિપ્રાયં ન્યવેદયત્

રૈવત ઉવાચ ॥
પરઃ પુરાણો જગદંકુરોભૂઃ પૂર્ણઃ પરાત્મા પરમેશ્વરોસિ ।
સ્થિતઃ સદા ધામનિ પારમેષ્ઠ્યે સૃજસ્યલં પાસિ ચ હિંસસીદમ્

વેદા મુખં ધર્મ ઉરસ્તથૈવ પૃષ્ઠં હ્યધર્મશ્ચ મનુર્મનીષા ॥
અંગાનિ દેવા અસુરાશ્ચ પાદાઃ સર્વાસૃતિર્દેવતનુસ્તવ સ્યાત્

કરોષિ હસ્તામલકં ચ વિશ્વં નેતું પ્રભુઃ સારથિવદ્ગુણેષુ ॥
એકસ્ત્વમેકં ચ વિધાય જાલં ગ્રસિષ્યસે સર્વમિવોર્ણનાભિઃ

મહેંદ્રધિષ્ણ્યં તવ વશ્યમસ્તિ કિં સાર્વભૌમં કિમુ યોગસિદ્ધિઃ ॥
યઃ પારમેષ્ઠ્યં ચ સદાસ્થિતોસિ તસ્મૈ નમોનંતગુણાય ભૂમ્ને

ભવાન્સ્વયં ભૂર્જગતાં પિતામહો વિધે સુરજ્યેષ્ઠ ઇતિ પ્રભાવતઃ ॥
અસ્યા વરં સર્વગુણં ચિરાયુષં વદાશુ માં દિવ્યમશેષદર્શનઃ

શ્રીનારદ ઉવાચ ॥
એતચ્છુત્વા તતો બ્રહ્મા સ્વયંભૂઃ સર્વદર્શનઃ ॥
રૈવતં પ્રાહ રાજાનં પ્રહસન્નિવ મૈથિલ

શ્રીબ્રહ્મોવાચ ॥
અત્ર ક્ષણેન હે રાજન્ભુવિ કાલો મહાબલી ॥
ત્વરં વ્યતીતસ્ત્રિનવચતુર્યુગવિકલ્પિતઃ

ન સંતિ મર્ત્યલોકે ત્વત્પુત્રાઃ પૌત્રાઃ સબાંધવાઃ ॥
તત્પુત્રપૌત્રનપ્તૄણાં ગોત્રાણિ ચ ન શૃણ્મહે

તદ્ગચ્છ સર્વમુખ્યાય નરરત્નાય શાશ્વતે ॥
કન્યારત્નમિદં રાજન્બલદેવાય દેહિ ભોઃ

પરિપૂર્ણતમૌ સાક્ષાદ્ગોલોકાધિપતી પ્રભૂ ॥
ભુવો ભારાવતારાયાવતીર્ણૌ બલકેશવો

અસંખ્યબ્રહ્માંડપતી વસુદેવાત્મજૌ હરી ॥
દ્વારકાયાં વિરાજેતે યદુભિર્ભક્તવત્સલૌ

શ્રીનારદ ઉવાચ ॥
અથ શ્રુત્વા વિધિં નત્વા રૈવતો નૃપસત્તમઃ ॥
આયયૌ દ્વારકાં ભૂયઃ સમૃદ્ધાતાં સમૃદ્ધિભિઃ

પારિબર્હે રથં દત્ત્વા વિશ્વકર્મવિનિર્મિતમ્ ॥
સહસ્રહયસંયુક્તં દિવ્યં યોજનવિસ્તૃતમ્

દિવ્યાંબરાણિ રત્નાનિ બ્રહ્મદત્તાનિ મૈથિલ ॥
દત્ત્વા યયૌ તપસ્તપ્તું બદર્યાખ્યં શુભાવહમ્

તદા મહોત્સવશ્ચાસીદ્યદુપુર્યાં ગૃહેગૃહે ॥ ।
સંકર્ષણોથ ભગવાન્રેવત્યા વિરરાજ હ

બલદેવવિવાહસ્ય કથાં યઃ શૃણુયાન્નરઃ ॥
સર્વપાપવિનિર્મુક્તઃ પરાં સિદ્ધિમવાપ્નુયાત્

ઇતિ શ્રીમદ્ગર્ગસંહિતાયાં શ્રીદ્વારકાખણ્ડે નારદબહુલાશ્વસંવાદે બલદેવવિવાહોત્સવાનામ તૃતીયોઽધ્યાયઃ