દેવીગીતા · અધ્યાય 6

ઇતિ દેવીગીતાયાં પઞ્ચમો ઽધ્યાયઃ -
ઇતિ શ્રીદેવીભાગવતે મહાપુરાણે સપ્તમસ્કન્ધે દેવીગીતાયાં પઞ્ચત્રિંશો ઽધ્યાયઃ
અથ ષષ્ઠો ઽધ્યાયઃ -
સપ્તમઃ સ્કન્ધઃ
અથ ષટ્ત્રિંશો ઽધ્યાયઃ
દેવ્યુવાચ
ઇત્યાદિયોગયુક્તાત્મા ધ્યાયેન્માં બ્રહ્મરૂપિણીમ્ ।
ભક્ત્યા નિર્વ્યાજયા રાજન્નાસને સમુપસ્થિતઃ

આવિઃ સન્નિહિતં ગુહાચરં નામ મહત્પદમ્ ।
અત્રૈતત્ સર્વમ્ અર્પિતમ્ એજત્ પ્રાણન્નિમિષચ્ચ યત્

એતજ્જાનથ સદસદ્વરેણ્યં પરં વિજ્ઞાનાદ્યદ્વરિષ્ઠં પ્રજાનામ્ ।
યદર્ચિમદ્યદણુભ્યો ઽણુ ચ યસ્મિંલ્લોકા નિહિતા લોકિનશ્ચ

તદેતદક્ષરં બ્રહ્મ સ પ્રાણસ્તદુ વાઙ્મનઃ ।
તદેતત્ સત્યમ્ અમૃતં તદ્વેદ્ધવ્યં સૌમ્ય વિદ્ધિ

ધનુર્ગૃહીત્વૌપનિષદં મહાસ્ત્રં શરં હ્યુપાસાનિશિતં સન્ધયીત ।
આયમ્ય તદ્ભાવગતેન ચેતસા લક્ષ્યં તદેવાક્ષરં સૌમ્ય વિદ્ધિ

પ્રણવો ધનુઃ શરો હ્યાત્મા બ્રહ્મ તલ્લક્ષ્યમ્ ઉચ્યતે ।
અપ્રમત્તેન વેદ્ધવ્યં શરવત્તન્મયો ભવેત્

યસ્મિન્ દ્યૌશ્ચ પૃથિવી ચાન્તરિક્ષમ્ ઓતં મનઃ સહ પ્રાણૈશ્ચ સર્વૈઃ ।
તમ્ એવૈકં જાનથાત્માનમ્ અન્યા વાચો વિમુઞ્ચથામૃતસ્યૈષ સેતુઃ

અરા ઇવ રથનાભૌ સંહતા યત્ર નાડ્યઃ ।
સ એષો ઽન્તશ્ચરતે બહુધા જાયમાનઃ

ઓમિત્યેવં ધ્યાયથાત્માનં સ્વસ્તિ વઃ પારાય તમસઃ પરસ્તાત્ ।
દિવ્યે બ્રહ્મપુરે વ્યોમ્નિ આત્મા સમ્પ્રતિષ્ઠિતઃ

મનોમયઃ પ્રાણશરીરનેતા પ્રતિષ્ઠિતો ઽન્ને હૃદયં સન્નિધાય ।
તદ્વિજ્ઞાનેન પરિપશ્યન્તિ ધીરા આનન્દરૂપમ્ અમૃતં યદ્વિભાતિ

ભિદ્યતે હૃદયગ્રન્થિશ્છિદ્યન્તે સર્વસંશયાઃ ।
ક્ષીયન્તે ચાસ્ય કર્માણિ તસ્મિન્ દૃષ્ટે પરાવરે

હિરણ્મયે પરે કોશે વિરાજં બ્રહ્મ નિષ્કલમ્ ।
તચ્છુભ્રં જ્યોતિષાં જ્યોતિસ્ તદ્યદાત્મવિદો વિદુઃ

ન તત્ર સૂર્યો ભાતિ ન ચન્દ્રતારકં નેમા વિદ્યુતો ભાન્તિ કુતો ઽયમ્ અગ્નિઃ ।
તમેવ ભાન્તમ્ અનુભાતિ સર્વં તસ્ય ભાસા સર્વમ્ ઇદં વિભાતિ

બ્રહ્મૈવેદમ્ અમૃતં પુરસ્તાદ્બ્રહ્મ પશ્ચાદ્બ્રહ્મ દક્ષિણતશ્ચોત્તરેણ ।
અધશ્ચોર્ધ્વં ચ પ્રસૃતં બ્રહ્મૈવેદં વિશ્વં વરિષ્ઠમ્

એતાદૃગનુભવો યસ્ય સ કૃતાર્થો નરોત્તમઃ ।
બ્રહ્મભૂતઃ પ્રસન્નાત્મા ન શોચતિ ન કાઙ્ક્ષતિ

દ્વિતીયાદ્વૈ ભયં રાજંસ્તદભાવાદ્બિભેતિ ન ।
ન તદ્વિયોગો મે ઽપ્યસ્તિ મદ્વિયોગો ઽપિ તસ્ય ન

અહમ્ એવ સ સો ઽહં વૈ નિશ્ચિતં વિદ્ધિ પર્વત ।
મદ્દર્શનં તુ તત્ર સ્યાદ્યત્ર જ્ઞાની સ્થિતો મમ

નાહં તીર્થે ન કૈલાસે વૈકુણ્ઠે વા ન કર્હિચિત્ ।
વસામિ કિન્તુ મજ્જ્ઞાનિહૃદયામ્ભોજમધ્યમે

મત્પૂજાકોટિફલદં સકૃન્મજ્જ્ઞાનિનો ઽર્ચનમ્ ।
કુલં પવિત્રં તસ્યાસ્તિ જનની કૃતકૃત્યકા

વિશ્વમ્ભરા પુણ્યવતી ચિલ્લયો યસ્ય ચેતસઃ ।
બ્રહ્મજ્ઞાનં તુ યત્પૃષ્ટં ત્વયા પર્વત સત્તમ

કથિતં તન્મયા સર્વં નાતો વક્તવ્યમ્ અસ્તિ હિ ।
ઇદં જ્યેષ્ઠાય પુત્રાય ભક્તિયુક્તાય શીલિને

શિષ્યાય ચ યથોક્તાય વક્તવ્યં નાન્યથા ક્વચિત્ ।
યસ્ય દેવે પરા ભક્તિર્યથા દેવે તથા ગુરૌ

તસ્યૈતે કથિતા હ્યર્થાઃ પ્રકાશન્તે મહાત્મનઃ ।
યેનોપદિષ્ટાવિદ્યેયં સ એવ પરમેશ્વરઃ

યસ્યાયં સુકૃતં કર્તુમ્ અસમર્થસ્તતો ઋણી ।
પિત્રોરપ્યધિકઃ પ્રોક્તો બ્રહ્મજન્મપ્રદાયકઃ

પિતૃજાતં જન્મ નષ્ટં નેત્થં જાતં કદાચન ।
તસ્મૈ ન દ્રુહ્યેદિત્યાદિ નિગમો ઽપ્યવદન્નગ

તસ્માચ્છાસ્ત્રસ્ય સિદ્ધાન્તો બ્રહ્મદાતા ગુરુઃ પરઃ ।
શિવે રુષ્ટે ગુરુસ્ત્રાતા ગુરૌ રુષ્ટે ન શઙ્કરઃ

તસ્માત્ સર્વપ્રયત્નેન શ્રીગુરું તોષયેન્નગ ।
કાયેન મનસા વાચા સર્વદા તત્પરો ભવેત્

અન્યથા તુ કૃતઘ્નઃ સ્યાત્ કૃતઘ્ને નાસ્તિ નિષ્કૃતિઃ ।
ઇન્દ્રેણાથર્વણાયોક્તા શિરશ્છેદ પ્રતિજ્ઞયા

અશ્વિભ્યાં કથને તસ્ય શિરશ્છિન્નં ચ વજ્રિણા ।
અશ્વીયં તચ્છિરો નષ્ટં દૃષ્ટ્વા વૈદ્યૌ સુરોત્તમૌ

પુનઃ સંયોજિતં સ્વીયં તાભ્યાં મુનિશિરસ્તદા ।
ઇતિ સઙ્કટસમ્પાદ્યા બ્રહ્મવિદ્યા નગાધિપ